الموضوع: هذا اللي صار معنا في السفارة

السلام عليكم ورحمة الله وبركاته

أحب أوجه شكر لهالمنتدى الرائع اللي ما عمره قصر معنا في شي والأعضاء كلهم خصوصا:

بنت الصقور
الرصاصي
impact
mode

كان عندنا موعد يوم الاربعاء 9/1 الساعه 7 عشان فيزا سياحة ... أهم شي تتأكدون منه هو احضار الأوراق كاملة ... وأكرر احضار الأوراق كاملة عشان ما تتعطلون ... وللفائدة هذي الأوراق المطلوبة للفيزا السياحية:

1- تعبئة الفورم DS-156 بالكمبيوتر عن طريق الموقع

https://evisaforms.state.gov/ds156.asp

2- تعبئة النموذج DS-157 بالكمبيوتر عن طريق الموقع للذكور اللي أكبر من 16 سنة
أو الناس اللي مولودين في السودان ، سوريا ، ايران ، ليبيا ، كوريا الشمالية سواء كان ذكورا أو انثا

http://www.state.gov/documents/organization/79964.pdf

فيه خانة الاسم بالعربي اكتبه بخط يدك ما فيه مشكلة لانك ما راح تقدر تكتب عربي بالكمبيوتر

3- دفع 498 ريال رسوم الفيزا واحضار الوصل ... يمكن التسديد عن طريق سامبا كونيكت للي عندهم حسابات في سامبا (بدون الحاجة للذهاب للفرع) واللي ما عنده حساب في سامبا ممكن يدفع عن طريق فروع سامبا ... للمعلومية رسوم الفيزا تم زيادتها من 380 ريال الى 498 ريال بداية من 1 يناير 2008

4- طباعة ورقة الموعد.

5- تعريف بالراتب وتاريخ الخدمة ومسمى الوظيفة باللغة الانقليزية.

6- كشف حساب لاخر 3 شهور.

7- صورة واحدة 5 سم في 5 سم خلفية بيضاء ويفضل بدون نظارة طبية ولا تنسى تدبسها في النموذج DS-156 في المكان المخصص لها في الاسفل على اليمين.

8- جواز سفر صالح لاكثر من 6 شهور من تاريخ دخولك المتوقع لأمريكا.

9- الجوازات السابقة ان وجدت (يفضل) ... انا ما طلبوه مني

10- ممكن انك تحجز حجز مبدئي عشان يكون اثبات لك انك راح ترجع بلدك ... واحتمال كبير انك ما تنسأل عنه.

المهم بعد هالمقدمة نخش في التفاصيل:

حجزنا في فندق الشرق رمادا موقعه في شارع العروبة بجوار مستشفى الملك خالد للعيون ... وأنصح اللي يبي يقدم على الفيزا يسكن فيه لأنه قريب مرة من حي السفارات

مشينا من الفندق الساعه 6 وعشر ورحنا لبوابة حي السفارات اللي عند طريق عبدالله بن حذافة السهمي ... وقفنا العسكري وقال وش عندكم ؟:114: قلت له عندنا موعد مع السفارة الأمريكية الساعه 7 ... قال ممنوع تدخلون قبل الساعه 7 وربع أو 7 ونص :112: حاولنا معه قلنا له في سرا وش طوله ... قال ممنوع :105: قلت له خير ان شاء الله ... قلت يا ولد لا تستسلم خصوصا ان هالعسكري شكله بس يبغى يستقعد وما يبي يتعاون ... رحت للبوابة الثانية حقت السفارات وسألوني وش عندك ؟ قلت لهم موعد مع السفارة الأمريكية ... قال لي وقف على جنب ... وفتشنا وكان العسكري الصراحة محترم وحبيب مرة ووصف لنا الطريق ... وصلنا السفارة الساعه 6 و20 دقيقة ولقينا قبلنا 9 أشخاص ... والصراحة انقهرت مرة من العسكري الأول اللي قال ما راح ندخلكم الا الساعه 7 ونص :112:

المهم انتظرنا في السرا ... تحسه سرا خواجات :24: كل واحد محترم نفسه وماسك مكانه ... ما فيه أحد يتقدم على أحد مثل العادة :101: طبعا الجو كان بررررررررررررررد :11ight: بس أشوى كنا حاسبين حساب ذا النقطة وعارفين اننا نبي ناقف بالبرد حوالي ساعه كاملة :11ld: يوم جات الساعه 7 و 20 دقيقة جت الموظفة وقعدت عند البوابة اللي ندخل معها وحطت طاولتها :101: وراحت تشيك على السرا وتسأل هل فيه أطفال ... اللي فهمته انها تبي تمشي العوائل اللي معهم أطفال أول عشان ذا البزارين مساكين ما يتحملون البرد ... الحمد لله ما كان فيه أي أطفال ... يوم جا دورنا جيتها أنا وخويي ... وشيكت على الأوراق ... وقالت اذا معكم جوال أو ريموت حطوها عند مكتب الامن وخوذوا عليها وصل ... حنا اصلا كنا مخلين كل شي في السيارة ... دخلنا لبوابة الأمن الأولى ... بعدين تمشي الى بوابة الأمن الثانية ... وبعد ما خلصنا التفتيش الثاني رحنا واخذنا رقم للتشييك على الأوراق (مرة ثانية) وانتظرنا حول 10 دقايق بعدين جا دورنا وشيكت على الاوراق وطلبت مني اكتب تاريخ انتهاء الدراسة في الفورم DS-157 قلت لها بس مهوب مكتوب ان ذا التاريخ مطلوب :108: قالت معليش امسحها بوجهنا واكتبه ولا تكثر كلام :109: لا أمزح قالت حاول تتذكر واكتبه انا داريه انه مهوب مكتوب بس عاد الشكوى لله ... بعدين قالت لي رح خذ رقم عشان المقابلة ... ورحنا انتظرنا حول ساعه كاملة عشان المقابلة الين ما شرفوا الموظفين .... وجا دوري ...

طلب مني أول شي بصمات الاربع اصابع اليسار .... بعدين الاربع اصابع اليمين ... بعدين الابهامين

عقبن قالي ارفع السماعه ... وصبح علي بالخير ... وقالي وش لونك اليوم ... قلت له بخير ... سألني هالأسئلة التالية:
هل سبق لك الذهاب لأمريكا؟ قلت: لا
ما سبب زيارتك لأمريكا؟ قلت: سياحة
اين كانت سفراتك الاخيرة؟ قلت: اسبانيا ، مصر ، الامارات ، لبنان ، الأردن ، سوريا ، البحرين ....

قالي متى رحت سوريا؟ قلت له 1997 قبل 11 سنة يوم اني بزر :109: قالي أنت رحت سوريا سياحة مع اهلك؟ قلت له : الله الله

سألني هل رحت ايران ، كوريا الشمالية ، العراق ، أفغانستان ، المغرب :114: (صراحة استغربت) ؟ كان الجواب لا

قالي وين تشتغل؟ جاوبته
كم الراتب؟ جاوبته
كم مدة الخدمة؟ جاوبته

وين تبي تروحون في أمريكا؟ هيوستن ، لاس فيغاس ، لوس انجيلوس ، سان فرانسيسكو ، نيو يورك

قالي اووووووووه شكلها تبي تصير رحلة حلوة :24: قلت له أتمنى ذلك

قالي فيه أحد يبي يروح معك قلت له خويي اللي في الشباك اللي جنبك ... قال خلاص أموركم ان شاء الله زينة وتستاهلون الفيزا :101:
ولكن .................................................. ..



روحوا شباك 4 وادفعوا 27 ريال وتبي تجيكم الفيزا ان شاء الله بعد أسبوعين :24:

وأطالع الساعه وحنا طالعين من السفارة 9:05 بتوقيت مدينة الرياض وعلى الساكنين خارجها مراعاة فروق التوقيت :109:

كان جميع من في السفارة محترمين للغاية ... وكل شي منظم .... وأكثرهم احتراما المسؤول اللي سوا معي المقابلة

نصيحة للي يبي يقدم:

1- احضر مبكر عشان تخلص بدري ... هناك مدخلين لحي السفارات ... حاول تدخل مع المدخل الأول ... اذا رفض وقال لك الساعه 7 ونص .... رح للمدخل الثاني وجرب حظك يمكن يدخلك (من كان له حيلة فليحتال)

2- تعبئة النموذج بدقة ... ولا تترك مكان فاضي عشان اذا رحت هناك ترتاح وعلى طول تخلص.

3- تأكد من أوراقك كلها انها معاك ... مرة ومرتين وثلاث .... ما تسوى عليك الرجعة .... خصوصا اذا كنت ساكن برا الرياض مثلي

4- اختيار اللبس اللائق للحضور للمقابلة

5- بالنسبة لفيزا السياحة .... ترا هم ناس متعودين على التخطيط للسفر ... بعكس أغلبنا اللي ما يخطط للسفر الا قبل أسبوع عشان كذا من المتوقع يسألك وين تبي تروح هناك؟ طبعا مهوب مناسب أبد انك تقوله والله اني ما بعد خططت الين هلحين :11ight: ممكن هالجواب يكون سبب في عدم اعطائك الفيزا :112: تلقى المسؤول يقول في نفسه الله لا يهينك اذا عرفت وين تبي تروح له تعال قدم علينا مرتن ثانية ويصير خير .... :114:

6- يفضل قبل أسبوع من تاريخ المقابلة تكون مجهز كل الأوراق المطلوبة... عشان ما تحشر نفسك بالوقت ... وأفضل انك تحتفظ بنسخة منها عندك ... سبحان الله ما تدري وش يصير ... تضيع ... تنسرق .... الدنيا دوارة

7- جوالك ... ريموت السيارة ... اي بود .... كل ذا الاشياء خلها بالسيارة ... لانك ما راح تقدر تدخل فيها السفارة

8- أهم نقطة .... قبل ما تحجز موعد للسفارة وتسوي أي شيء ... تأكد من جواز سفرك وتاريخ انتهائه ... اقولك ليش ... لانك لو حجزت موعد يبي يطلب منك رقم الجواز .... واذا دخلت رقم الجواز خلاص معد يمديك تغيره :108: ولو جددت جوازك يبي يتغير الرقم حق الجواز بالتأكيد ... عشان كذا شيك جوازك قبل ما تحجز الموعد حق الفيزا ... اذا ما بقى فيه الا شوي طلع لك واحد جديد وفك روحك

اي استفسار أو ملاحظة انا على أتم الخدمة

دمتم بود

مواضيع عشوائيه ممكن تكون تعجبك اخترناها لك:

• استفســار هام بخصوص الأبلكيشن
• فيه رسوم عالولايات ؟؟
• لأهل الخبرة ادخل ضروري جدا جدا وابغى رايك
• جوازي ضاع وضاعت معه الفيزا كيف اطلع فيزا بدل فاقد
• للاسف تم رفص طلبي للحصول على الفيزا بقنصلية جدة
• عدة استفسارات امريكيه
• اوكلاهوما
• الوزن في الطيران الداخلي بأمريكا
• استفسار اهبل شوية بخصوص المقابلة
• أسئلة بخصوص ورقة اثبات العمل للفيزا وعن المقابلة
• متدينون سعوديون في أميركانقرأ أسئلة في الوجوه بسبب لحانا الطويلة
• ماذا تعرف عن بلاك فريداي
• شباب لم اضف صوره في ما العمل ؟؟
• متردددددددد جداً
• لو تسمح لم يتبقى الا هذا السؤال
• استفسار عن السكن والتنقل في نيويورك ؟ ارجو المساعده
• فنادق لوس انجلوس
• السفارة
• الرجاء المساعده مشكله في التذكره
• طلب المساعده والنصيحه ولكم الأجر

تستاهلون كل خير اخوي لايف هارت و بالتوفيق انشالله

الف مبروك الفيزا مقدماً ...

وتروحون وتردون بالف سلامة يارب !!

ولا تنسانا من الصور الجميلة علشان تقريرك الرائع ..

منتظرينك على احر من الجمر

بالتوفيق ان شاء الله :24:

المشاركة الأصلية كتبت بواسطة LIFE HEART
http://www.arabtravelersforum.com/tr...4/#post1777274


العزيز Impact

أشكرك على شعورك الجميل ... ومساعدتك لاخوانك وان دل على شيء فهو على طيبتك

بالنسبة للتقرير ما أتوقع نقدر نسوي مثل تقريرك ما شاء الله :113:

دمتم بود





بالعكس لا تزعلني منك !!

انت توكل على الله ... وروح انبسط ... وصورلنا صورك الجميلة ..

وانا متأكد انك بتسوي تقرير اروع من الروعة ...

واضح ماشاء الله من شرحك للمقابلة !!

وحاضر لاي مساعدة او استفسار ..

وترجعلنا بالف سلامة يارب ..

وبالتوفيق :24:

الف مبرووووك تستاهل والله

وترجع بالسلامة ان شاء الله

تستاهلون كل خير أخوي

:24::24::24::24::24::24:


وتروح وترجع بالسلامة ان شاء الله

رحلة موفقة ان شاء الله

AL--SaHeR
MR-MAJED
مكة

شكرا لكم جميعا على شعوركم الطيب ... والله يوفق الجميع

تحياتي

مبروك بس 27 ريال الي دفعتها في السفارة حقة ايش

27 ريال رشوة عشان يعطونا الفيزا بسرعه ههههههههههههههههههه




لا أمزح معك ... هو قالي proccessing fee

الله يوفقك أنشالله وجيكم الفيزا

المشاركة الأصلية كتبت بواسطة A.A.H
http://www.arabtravelersforum.com/tr...4/#post1781914

يعطيك الف عافيه اخووي على المعلومات المفيده وكانت بصراحه شاامله لكل شي بس عندي سؤال

بصراحه انا بقدم على فيزا دراسه انشا الله بس مشكلتي مااعرف انقلش ولو دخلت السفاره يتكلمون معاي انقلش مارح افهم وانا ادري فيه مترجمين بس المترجمين كم اعطيه عشان يترجم لي اذا عندك خلفيه ؟

وهل المقابله ماكانت وجه لوجه يعني كانت عن طريق رفه السماعه ومقابلين وبينكم شباك يعني ؟

وكم كلفت الفيزا من الاول للاخر ؟

وهل صحيح انك لازم تحجز موعد عن طريق النت وتدفع بالفيزا او الماستر كارد والا فيه طريقه ثانيه لحجز الموعد ؟!


شاكر لك اخووي تعاونك ومبرووك الفيزا وتروح وترجع بالسلامه



هلا أخوي

أول شي بالنسبة للانقلش ... لا تشيل هم أبدا أبدا أبدا تبي أكثر من هالتأكيد :109: أغلب اللي في السفارة يتكلمون عربي ... وحتى لو كان ما يعرف عربي يخلي أحد من المسؤولين في السفارة يساعده بالترجمة ... طبعا ما تدفع لهم أي شي عشان الترجمة :108:

بالنسبة للمقابلة تشبه الصرافين اللي بالبنوك الى حد كبير يعني تشوفه ويشوفك وممكن تسمعه بدون تلفون بس أفضل استخدام التلفون عشان الصوت يكون واضح للطرفين

بالنسبة لتكلفة الفيزا السياحية فهي كالتالي:
1- حجز موعد للمقابلة عن طريق الموقع فقط ... وما فيه طريقة غير الموقع ... تدفع 45 ريال عن طريق ماستر كارد أو فيزا كارد فقط ... مهوب شرط البطاقة تكون باسمك ... ممكن باسم أحد أصدقائك أو أقربائك ... حجز الموعد هذي طريقته للكل سواء سياحة ولا دراسة ... بامكانك اضافة 4 من أفراد عائلتك من الدرجة الأولى (زوجة - بنت - ولد - أب - أم - أخ - أخت)

2- دفع رسوم الفيزا (498 ريال) عن طريق سامبا ... أيضا هذا سواء للدراسة او السياحة ... رسوم الفيزا لكل شخص سواء كان مضاف مع أمه أو لوحده

3- دفع 150 ريال لفيدكس لارسال الجواز الى منطقتك بدون الحاجة للذهاب للسفارة لاستلام الجواز ... طبعا لو كنتوا مجموعة يمكنكم دفع 150 ريال وارسال جوازاتكم مرة وحده ... ولو كنت من سكان الرياض وحاب تراجع السفارة لاستلام الجواز بامكانك ذلك

أتمنى اني جاوبت على استفساراتك .... ويا ليت تاخذ لفة على منتدى التعليم والدراسة في أمريكا ممكن يساعدونك ويجاوبون على كل استفساراتك

http://www.arabtravelersforum.com/travelarab104/


الله يوفقك في دراستك ان شاء الله

بليييز الابلكيشن وين احصله فيه ؟

وهل اعبي الابلكيشن واروح اعطيهم اياه بعدين احجز موعد ؟
او احجز موعد وبنفس موعدي اعطيهم الابلكيشن؟

أخوي الأبلكيشن موجودة بالموضوع !!

بالنسبة لفيزا الدراسة تعبي النموذجين اللي مكتوبة في أول الموضوع بالاضافة الى DS-158

طبعا لا ترسل أي شي للسفارة قبل الموعد ... كل شي تجيبه معك يوم المقابلة وتسلمه لهم في السفارة

هذي متطلبات فيزا الدراسة من موقع السفارة ... خذ نظرة عليها

http://riyadh.usembassy.gov/student_visas.html

مشكور اخوي على هذا الموضوع بس عندي استفسار عن موعد المقابله بعد ماترسل اورقك على النت هل يكون موعده قريب او بعيد مع تمنياتي لك بالصحه والعافيه

هلا أخوي Silver Sky

أول شي ودي أوضح نقطة للاخوان بالنسبة للاوراق ... جميع الاوراق تحضرها معك يوم المقابلة ... ما ترسل شي قبل المقابلة .... اللي يصير هو انك اذا جيت تحجز للموعد يطلبون منك بعض المعلومات مثل رقم الجواز وتاريخ الميلاد ومكان العمل وتاريخ وصولك المتوقع لامريكا ... طبعا كل هالاشياء عن طريق الموقع تعبيها

بالنسبة لموعد المقابلة ... هذا يعتمد على الزحمة اللي عندهم ... يعني لو ما فيه زحمة ممكن تلقى موعد بعد أقل من اسبوع وممكن ما تلقى الى بعد شهر في حالة الزحمة

السلام عليكم
اخي اشكرك على المعلومات القيمة وراح اسالك بعض الاسئلة
اولا : هل لابد ان تعرف انجليزي لاني مااعرف انجليزي وراح ادرس لغة
ثانيا : هل يسالوك غير الاسئلة التي قلتها واذا جبت معاي ورقة مكتوب فيها كل شي وين ساكن وين بسكن
ثالثا :انا سمعت ان بعض القبائل مثل اهل الجنوب صعوبة استخراج فيزا
وشكرا لك

هلا أخوي ايوان1

أولا: ما هو لازم تعرف انقليزي ... فيه ناس بالسفارة كثير يتكلمون عربي

ثانيا: بالنسبة للاسئلة .... أغلبها يكون أنت أصلا مجاوب عليها ... أهم شي لا تكذب وجاوب على قد السؤال وأمورك ان شاء الله تمام

ثالثا: بالنسبة لموضوع العوائل ... والله مدري وش أقولك ... أنا أعرف ناس من أهل الجنوب وطلعوا فيز ما فيه أي مشكلة ما أنكر ان هناك بعض المرات مزاجية من بعض الموظفين ...
أنت توكل على الله وقدم وخلك واثق من نفسك ... وانت مو مسوي شي غلط .... ولا تخلي عدم حصولك على الفيزا لا سمح الله نهاية الدنيا .... عادي بدال أمريكا 20 دولة فاتحة لك أبوابها ... وما تدري وين الخيرة فيه

بالتوفيق أخوي