الموضوع: أسئلة مهمةتفيدنيوتفيد غيري أتمنى الإجابه

السلام عليكم حيا الله الشباب..:24::24:


أنا بصراحة عندي بعض الإستفسارات لي محيرتني نوعَا ما..:114::114::114:
1- بالنسبة للكمبيوتر ( الابتوب ) الأفضل إني أشيله معي يعني يكون بيدي أو أني أحطه في شنطة الملابس.
2- الفلوس إذا جيت أبغى أروح هل أحولها إلى جنيه من هنا قبل ما أروح وإلا كيف.. وكم المفروض (أكبر مبلغ وأقل مبلغ ) يكون معي .
3-إذا معي مجموعة من( السيديات cd) وفيهن برامج منسوخة يعني سيديات ماهي أصلية .. هل هذا ممنوع .. وهل يفتشون السيديات الي معي..
4- بالنسبة لبطاقة الصراف وش سالفتها .. آخذ معي بطاقة البنك البريطاني ( ســـاب ) .. وإلا وش أسوي .
5- الملابس هل آخذ معي ملابس شتوية أو صيفية .
6- بالنسبة لبطاقة الأحوال السعودية آخذها معي أو لا.
7- إذا جيت هناك ( يقولون لازم ترسل للسفارة أنك وصلت وأترسلهم أشياء كثيرة مدري وشن ) كيف أسوي ذلك .. ووش أرسل لهم بالضبط.
7- هل الأكل الي يقدمونه العائلة فيه خنزير أو لحم حرام.
8- مدينة تشيلتينهام في أي دولة هل هي في إنجلترا أو ليدز أو اسكوتلندا .. وكيف وضع اللهجة عندهم وكيف أمن المدينة.
9- هل آخذ معي شراشف للنوم وغيرها أو عندهم كل شي.
10- الإنترنت هناك يكون موجود في أي مكان .. يعني العائلة ألقا عندهم إنترنت .. وهل هو بفلوس أو مجاني.
11- وش أفضل الأماكن سياحة في تشيلتينهام أو المدن القريبة منها (أفضل شي عندي الطبيعة والأمطار والبراد والخضرة ).
12- تنصحوني آخذ معي قهوة عربية وتمر وهيل .. وآخذ معي شاهي ومتطلباته .
14- وش أفضل العائلة الي معهم أطفال أو العائلة الي شيبان .
15- آخذ معي شنطة ودفاتر الدراسة من هنا وإلا أشتريها من هناك , أو يعطونيها المعهد.
16- متى آخر وقت في الليل يجب أن أكون موجود فيه بالبيت ولو أسهر داخل غرفتي على الكمبيوتر أو غيره .. هل هذه يزعج العائلة.
17- هل الأفضل أن أمزح مع العائلة والضحك معهم أو أكون جدي معهم.
18- الأستحمام اليومي هل هو يزعج العائلة.
19- الدخول على مواقع إسلامية وغيرها هل يسبب مشاكل هناك .. وهل يعرفون المواقع الي أدخل عليها.
20- هل آخذ معي شي غير الملابس والأغراض الخاصة من عطورات وكريمات .. وسجادة وقرآن ودفتر أذكار.. إذا يوجد ياليتكم لو توضخونها لي..
21- هل آخذ معي قاموس.
22- هل مصادقة البنات يسبب مشاكل هناك ( فقط للإستفسار والإحاطة ).

سبق لي وأن أطلعت على مواضيع ملبورن التي تخص(نصائح بريطانيا) & (ذاهب إلى بريطانيا ماذا تحتاج ):108::108:



مشكورين جميعًا على إطلاعكم على موضوعنا وأتوقع هذه الأشياء مهمة لي ولبعض الأخوة الموجودين أتمنى إفادتي بكل وضوح .. مشكورين عامة.:113:.

مواضيع عشوائيه ممكن تكون تعجبك اخترناها لك:

• اتمنى مساعدتك ياملبورن
• هل يمكنني تغيير تخصص البعثة بعد الموافقة ؟
• نزلت مواعيد مقابلات الطلبة والطالبات المرشحين للإبتعاث
• دراسه في لندن احتاج مشورتكم
• مكافأة شهر شعبان في حسابات المبتعثين اليوم الثلاثاء شعبان هـ
• هااااااام جدا القنصلية بجدة
• أود اكمال دراستي الجامعية في بريطانيا
• دبلوم حاسب التعليم الاكتروني عن بعد
• الرجاء المساعدة لمن لديه خبرة
• صيدلانية تحتاج مساعدة
• اليوم أول مرة أروح لمركز القبول ولكن للاسف
• للي يعرف انقليزي كويس ؟ وخبرة بالجامعات
• أرجوكم أفيدوني
• قبول طلاب لبرنامج الابتعاث لسنغافورة بالخطأ
• انشد فيكم اخوة المغتربين
• ذاهب للدراسة بليدز ارجو من الخبراء ابداء الاراء
• الى ملبورن وبقية الاخوة ارجوا المساعده
• مهم وعاجل لخبرا الفيز
• بريطانيا أو أمريكا للدراسة أيهما أفضل
• محتار بين ولاية ايداهو و ولاية نبراسكا ارجو مساعدتي في الاختيار

سلام

لاب توب بكون بالايد وعــن الاعائله لازم اول شي انت بتجينس الانبض لان هم حياتهم واجد واجد مرتبه ولازم تحاي على كل شي مثلا الفطور لازم بتقول لهم من الليل انا ما ابي فطور .. وله راحت عليك يوم ثاني

انا بعد مثل الاخ حابه اعرف... واكثر شي عن المصحف ... وتواقيت الصلاة ..

الله يعافيكم ماقصرتم يالغالين..

بالنسبة لبطاقة الصراف.. آخذها على طول وإلا أمر البنك مثلا واعطيهم خبر إني بطلع خارج المملكة عشان يعممونها مثلا .. أو آخذ فيزا أو ماستر كارد ..

ياليت لو تعطوني وش أفضل حل لبطاقة الصراف.

لي عوده ياغالي , ( تسجيل مشاهده )

بالتوفيق

أخوي في أشياء ذكرتها وممكن ما تحتاجها فخذ اللي تحتاجه

الصراحة افضل موضوع في المنتدى خلال شهر:113::113:
لكن مو غريبة اذا كان صاحبه هو البيضاني
موفق يا اخوي

ماقصرتم يالغالين.. أنا عشقي الرياض .. وقت القهوة .. Mr-man ..

بيض الله وجيهكم والله يعطيكم العافيه.

ياشباب أتمنى التوضيح في الأسئلة التالية..

سؤال: هل بطاقة البنك الأمريكي ( سامبا ) تشتغل في بريطانيا على أي صراف ؟
إذا الجواب لا : وش آخذ بدالها.

سؤال: بالنسبة للفلوس هل الأفضل أني أحول فلوسي إلى جنيهات وأخذها معي قبل ما أسافر وإلا أخلي فلوسي ريالات وأحولها في بريطانيا؟

سؤال: التعامل داخل الطائرة هل هو بالجنيه أو بالريال علما أني على طيران الخليج ؟

أخوي الغالي وقت القهوه , غدا بإذن الله لي عوده للرد عليك ولعلي بإذن الله افيدك بما اعرف

المشاركة الأصلية كتبت بواسطة turki4449
http://www.arabtravelersforum.com/tr...4/#post2125494

ياشباب افيدوني فيما يلي
انا رايح لمدينة هستنقس وهي مدينه صغيره ساحليه جنوب لندن ساعتين بالقطار راح ادرس بمعهد امبيسي لمدة سنه
بسألكم عن الدفاتر كم احتاج دفتر وما المقصود بالشنط المدرسية اللي ذكرتوها هل هي مثل الشنط اللي عندنا حقت الاطفال وللا شنطة من النوع اللي يحمل في اليد
واين اجد مكاتب الصرافه في الرياض الصرافين لو فيه احد منكم يعرف موقعها
انا طبعا مسافر بعد 3 ايام بأذن الله
اوصل يوم السبت ياترى الملحقية السعودية يدامون يوم السبت



بالتوفيق اخوي
وهذا المعهد نفس معهدي اللي قبلوني فيه وان شاء الله نلحقك بعد 3 اسابيع
ارجو منك تكتب لنا اول بأول اعن المعهد وكيف وصلت وتعاملت معهم والله يوفقك بالدراسة ويسهل امر سفرك

turki4449
معليش يا أخوي تركي توي أشوف ردك فسامحني
الدفاتر خذ لك دفاتر جامعة الكبيرة ابو 200 ورقة واكثر ب10ريال تقريباً الواحد لكن ما أدري كم تحتاج وأنا أخوك لكن انتبه للكيلوات لأنك لو تروح على الخطوط السعودية لك 30كيلو وإذا زاد عليك كيلو تدفع 100ريال وكم هللة وإذاك كان عندك بطاقة فرسان لك عشرة كيلو زيادة لكن لازم تسجل قبل ولا إذا تعرف أحد بالمطار شي ثاني.

(واين اجد مكاتب الصرافه في الرياض الصرافين لو فيه احد منكم يعرف موقعها )

أعرف أنا اللي بالبطحاء لكن فيه ثانين بس نسيت وينه واحد قالي قبل بس نسيت يعطيك سعر ممتاز
لكن اللي أعرفهم بالبطحاء در على كم واحد بالبطحاء وأنت نازل من كبري البطحاء على الصف اللي على اليمين وكاسرهم.


((انا طبعا مسافر بعد 3 ايام بأذن الله توصل بالسلامة ولا تنسانا من دعاك الصالح)).
اوصل يوم السبت ياترى الملحقية السعودية يدامون يوم السبت إتصل عليهم وتأكد لأني قالي واحد يستقبلون لكن يقول ما هو متأكد فاتصل عليهم أحسن فادخل جوجل واكتب الملحقية الثقافية في بريطانيا ورح للإتصال بنا وإتصل عليهم وإسألهم وخبرنا معاك
وما المقصود بالشنط المدرسية :
زي شنطة اللابتوب لكن أكبر تقدر تحط اللابتوب وتقدر تحط كتب فيها ولا تنس قاموس المورد الكبير والمورد للجيب أبو 15 ريال.

ولا تنس دلتك وفناجيلك والقهوة والتمر عشان تقهويهم وتعلم منهم لغة.
وإذا احتجت شي قلنا ونجاوبك إن شاء الله .

بيض الله وجهك ماقصرت الامور صارت واضحه الان وراح اوافيكم بكل اللي يصير معاي بالنسبة للصرف صرفت من الراجحي للتحويل وخلصت طلع سعر الباوند عندهم ب 7.58 ريال المهم خلصت وصرت جاهز للسفر ادعولي بالتوفيق
بالنسبة للشنطه انا مشتري شنطه للاب توب حقي تشيل اثنين كبيره اعتقد انها بتكفيني ومشتري دفترين واقلام ان شاء الله تكفي اما القهوه والله ماقدرت اخذ شي من عدتها بسبب كثر العفش امتلت الشنط ماعاد لها مكان والبطانيه ايضا بتركها لأنه مالها مشيل خلاص كل شي فل والله عفشي واجد وانا مسافر على الخطوط البريطانيه ياترى كم بياخذون مني اذا كان الوزن زايد

السلام عليكم ورحمة الله وبركاته
توصل بالسلامة أخوي
ما أدري كم الوزن المسموح لك على الخطوط البريطانية لكن ممكن تلقاها بالتذاكر مكتوب كم الوزن وكم شنطة لك تشيل وقريت بالمنتديات 20 كيلو للشخص وكل زيادة 100 ريال لكن ماني متأكد وممكن تتصل على مكاتب حجز الطيران ترى فيه فروع تفتح الجمعة وحاول تاخذ ماخف وزنه وغلى ثمنه.
وقليل من المرات الموظف يمشيها مرة على الخطوط السعودية جيت أبوصل أحد أخوياي للمطار بالفجر وكانوا حبيبين الموظفين يمشون كل من جاهم ومرة وصلت أحد أخوياي بالظهر لأحد الدول حسب عليه .
وأبقولك طرق توفر على نفسك تعال مبكر يمكن إذا ما كان عنده زحمة يمكن يمشيها لك وفيه طريقة مهمة عشان ما تدفع زيادة للعفش جب شنطة يد وحطبها أغراضك وشنطة اللاب توب وشلهن معك للطيارة.

السلام عليكم ورحمة الله وبركاته

نسيت شيء وهو تروح لسوق حراج الكمبيوتر اللي بالعليا هناك اللي يبسطون سيديات عندهم سيديات منسوخة تعليمية إنجليزي خذلك مجموعة برامج انجليزي مفيدة جداً بس منسوخ وهو ممنوع ببريطانيا المنسوخ لكن ما يفتشون على كلام الإخوة وفيه تل مي مور والبي بي سي وغيرها البرامج الدي في دي شريته قبل من عندهم منسوخه كاسرتهم وأخذت الواحد ب5ريال والسيدي9جيجا فيه برامج ب10 ريال وفيه برنامج الكافي أبو 150ريال موجود منسوخ عندهم ب5ريال ولا تنسى سيدي الويندوز أو الريكفري لأن الفورمات عندهم غالية وفيه سيدي 9جيجا فيه مجموعات برامج انجليزي لا تفوتك.

موضوع رائع يحتوي على اسئلة مهمه واجاباتها .. يشكر صاحب الموضوع و كل من ساهم فيه