الموضوع: رحلة ريشة الخيالية لجزر الأزور البرتغالية وشاء القدر أن نلتقي الثالث

ووصلنا مطار هورتا



وهالطيارة اللي ماعطتنا ظهرها هي طيارتنا ...
وهي نفسها اللي اخذتنا من الجزيرة الأولى للثانية..
وعلى المدرج طيارة أخرى هبطت للتو




المطار كبير طبعاً مقارنة بمطار فلوريس( الجزيرة الثانية )
بحكم إن الجزيرة أكبر وعدد سكانها أكثر....
كل المعلومات هذي ذكرتها في المقدمة







في انتظارنا في المطار كانت حرمة تابعة للشركة السياحية...
أخذتنا الحرمة للفندق في Van
الدرب شوي كان بعيد ..
مقارنة بقرب المطار للفندق في الجزيرة الثانية فلوريس كانت المسافة شي لايذكر...
تقريبا أخذ لنا 15 إلى 20 دقيقة.....







ووصنا وسط المدينة وعلى طول الدرب اللي مشينا فيه بيوت صغيرة تطل على الشاطئ....
أهم مايميز مدينة هورتا هو المرفأ ...
اللي يضم أعداد كبيرة جداً من اليخوت من مختلف دول العالم
الناس اللي تبحر في المحيط الأطلسي بيخوتهم الخاصة..
هورتا هي نقطة الراحة اللي لازززززم يتوقفوا عندها ...
لجمالها ...وحيويتها..



المدينة تشبه إلى حد ما مدينة بونتا ديلغادا في الجزيرة الأولى سان ميغيل
إلا أن مدينة هورتا Horta
أجمل بكثير.....


( وعلى فكرة مافيها ريحة :109: )


يتبع .....

وصلنا الفندق
Hotel Horta
ذو الأربع نجوم










يقع على مرتفع ويطل مباشرة على المارينا....
الفندق نظيف...والغرف واسعة..



ملاحظة : كل الوسادات توجد داخل خزانة الملابس في كل الفنادق في الجزر...









ويحتوى على بركة سباحة والمنظر رائع ...















حيث بالإمكان رؤية جزيرة بيكو Pico
الجزيرة الرابعة التي سنزورها في فترة إقامتنا في جزيرة فايال.....



يتبع .....

اليوم اللي بعده صحينا من الصبح ...وتريقنا ....
الريوق عبارة عن بوفيه ..منوع...
بس الأجبان كانت بجانب الخنزير وكذلك البيض..
لكن ممكن تطلبوه من داخل المطعم ويجيبوه لكم على الطاولة ..
مع ملاحظة التأكيد على عدم احتوائه أو ملامسته للخنزير...

بعد الفطور طلعنا أنا وفارس نستكشف الجو..
والجو كان بارد وجميل ....
وشفنا سايقنا طبعا خخخخخخخخخخخخخخخ
الموعد المفروض 9:30
بس هالمرة وصل لنا 9
قلنا لا مشكلة..
جبنا أغراضنا من الغرفة
وانطلقنا ...
سايقنا حبوب ريال كبير في السن شوية
بس وايد فادنا لخبرته في الجزيرة
وبيتضح ذلك لاحقا

أول نقطة توقفنا عندها كانت المنطقة المطلة على هورتا والمرفأ...وطبعا شفنا الأبقار والبيوت الفايالية..



سوري قطعت راسج يامرحبا ...ما انتبهت خخخخخخخخخخخخخخ







صورناج كاملة علشان ماتزعلين

على هذه النقطة يوجد تمثال للعذراء وطبعاً مابعرض صورته....



بعدها توقفنا عند نقطة قريبة لرؤية طواحين الهواء..




هي في الواقع لا تعمل ...وحاليا معروضة للسياح فقط





في فترات سابقة كانت هذه الطواحين تستعمل ولكن الآن توقفت عن العمل



طبعاً ممكن تصعدون السلم وتشوفوا داخل الطاحونة ...

تشبه إلى حد كبير طواحين الهواء الهولندية ...






وهي فعلا مستوحاة من تلك الطواحين...
بالنسبة لي هذي ألوانها أحلى من اللي بهولندا
وطبعاً حجمها أصغر من الطواحين الهولندية ....

يتبع ....

[size="5"][color="Purple"]ماشاء الله تبارك الله

جهد مميز وسرد وتصوير أكثر من رائع

تابعنا الأجزاء 1 و2 ومتابعين بقية هذا الجزء

ولكن أختي ليتك وضعتي تقاريرك كلها في تقرير واحد

:114:

ماشاء الله مناظر ولا اروع


تصويرج رهيب


ومتابعه لتقريرج للاخير

موضوع لطالما انتظرناه ...

وعندي ملاحظة على العنوان وياليت إذا قدرتي تغيرينه ...

حكم قول شاءت قدرة الله وشاء القدر

ما حكم قول شاءت القدرة الإلهية أو قول شاءت يد القدرة الإلهية أو نحوها ؟

الفتوى :

الحمد لله والصلاة والسلام على رسول الله وعلى آله وصحبه أما بعد:

فإنه لا يصح أن يقال: شاءت القدرة الإلهية أو شاءت يد القدرة الإلهية أو نحوها.. كقول بعضهم: شاءت قدرة الله.
وقد سئل الشيخ محمد الصالح العثيمين رحمه الله عن حكم قول: شاءت قدرة الله وشاء القدر؟ فأجاب بقوله: لا يصح أن يقال: شاءت قدرة الله لأن المشيئة إرادة، والقدرة معنى، والمعنى لا إرادة له، وإنما الإرادة للمريد والمشيئة لمن يشاء، ولكننا نقول: اقتضت حكمة الله كذا وكذا، أو نقول عن الشيء إذا وقع: هذه قدرة الله أي مقدوره، كما تقول: هذا خلق الله أي مخلوقه، وأما أن نضيف أمرا يقتضي الفعل الاختياري إلى القدرة فإن هذا لا يجوز.
ومثل هذا قولهم: شاء القدر كذا وكذا، وهذا لا يجوز لأن القدر والقدرة أمران معنويان ولا مشيئة لهما، وإنما المشيئة لمن هو قادر ولمن هو مقدر

انتهى من مجموع الفتاوى والرسائل له المجلد الثالث صـ114.
والله أعلم.



المصدر
اسلام ويب http://www.islamweb.net/ver2/Fatwa/ShowFatwa.php?lang=A&Id=27151&Option=FatwaId


اكرر شكري على متابعتك كتابة هذا التقرير المميز عن كل التقارير في المنتديات السياحية العربية على الإنترنت ...

نواصل ......


الجو كان رااااااائع بارد البرودة اللطيفة والشمس حرارتها تعادل الجو فتخليه معتدل
لكن كل ماتعمقنا وكل ما ارتفعنا ...زادت برودة الجو...
خلوني اقول ان الجو ربيعي إلى بارد إن صح التعبير

بعدها مرينا على قرية Flamengos

وكملنا الدرب ....












ماشاء الله محد يضيع وقته اهني ...الكل ياكل خخخخخخخخخخخخخخخخخخخخخ








ووصلنا هدفنا ....





دخلنا في هالنفق الصغير....




على فكرة فارس كان في هذه الصوة وأخفيته بالكامل
خخخخخخخخخخخخخخخخخخخخ
ساحرة
الله يخلي الفوتوشوب
والريال اللي ظاهر جزء منه في الصورة هو سايقنا..
ودخلنا ونحن لا نعلم ماسنرى بعد قليل...

يتبع ها ها ها ها
ضحكة شريرة أونه اللي بنشوفه مخيف ..

وانتهى النفق.....








وهذا ما رأينا.....





فوهة بركان في قمة الروعة والجمال
تسمى Caldeira





كيف لي أن أصف المكان ومن أين أبدأ؟









المساحة كبيرة
اللون أخضر لا أستطيع وصفه ولم تستطع كاميراتي التقاطه كما هو في الواقع
الجو باااااااااااااااارد
هل سمعتم بالمصطلح "اقدر من كثر الهدوء أن اسمع صوت الهدوء"
هدووووووووووووووووووووووء غير طبيعي
وكأن المكان عازل للصوت....





الجو والأخضرار والهدوء....
صدقوني مكان لن استطيع وصفه....
كأنه الهدوء الذي يسبق العاصفة.....
إلا انه يسبق بركاناً ثائراً وحمم وصخور تلتهب في أعماقه.....






في الواقع انه بركان خامد منذ آلاف السنين ...
إلا أن الجزيرة تحوي نشاطات بركانية في أماكن آخرى ....
سوف نراها في سياق التقرير....

هذه أبعاد الفوهة...



العمق 400 متر
المحيط : 2 كيلومتر


يتبع....

الفوهة مزروعة بالكامل من الداخل والخارج بأنواع مختلفة من النباتات وهي تعتبر محمية طبيعية










واحنا هناك شفنا عايلة فرنسية...
سبق واني ذكرت اني ما أقدر اتحمل هالشعب العنصري جدا
طبعا هم عرفوا ان احنا عرب ومسلمين.....
وكانت النظرات واضحة ..ولن أذكر نوع النظرات ..لأنها معروفة....
كان معهم ولدهم صغير عمره يمكن 4 سنوات....
والثاني يمكن 6 سنوات......
والمكان فيه صعدة على الجبل...بالضبط فوق النفق للي يحب يشوف المنظر من الأعلى
والدرب خطر لأنه منحدر....
فكان الطفل اللي عمره 4 سنوات يحاول الصعود وأبوه هو اللي طلب منه
المكان جداً خطر....


فأنا لا شعورياً مريت يدي أحاول احط حد للولد علشان مايطيح من فوق
والأهل ولا كأنهم موجودين ..
النظرة شوي تغيرت ...اني كنت أحاول احمي ولدهم من السقوط....
بس مازال الأب خلف الولد والولد ماشي لحاله ولو يفقد توازنه أكيد بيطيح.....
ماعرف كيف هالناس عايشة....
حتى لعيالهم ماعندهم أي مشاعر !!!!!!!!

نرجع للفوهة ...طبعا هي لأعلى قمة في جزيرة فايال.....
والجزيرة كلها مرتفعة من النص وتنزل تدريجياً صوب الساحل..
وهذا هو حال معظم جزر الأزور..
لا تنسون انها عبارة عن قمم جبال قابعة تحت الماء




المهم ظلينا فترة طويلة واقفين في نفس المكان ...لأنه باختصار مكان يخدر
كأنكم في غرفة لونها أخضر والمكيف شغال والغرفة كاتمة للصوت
خخخخخخخخخخخخ


والحلو ان سايقنا شاف حرمة شكلها صديقة قديمة وقعد فترة يسولف معها
واحنا في هالأثناء صورنا وتصورنا ...
ريشة وفارس عند فوهة البركان...شعور عجيييييييييييييب




فعلا تجربة أكثر من رائعة..





يتبع بعد حين

اختي ريشة


قرائة تقارير ك تعتبر متعة لي غير طبيعية

كاني اشاهدبرنامج تلفزوني عن السياحة


المكان يهببببببببببببببل بصراحة فعلا مغامرة

ماشاء الله عليكم انتي وفارس

ودي اتعرف عليكي شخصيا عشان تردي على اسئلة كثيرة تدور في بالي

متابعة معاكي بفارغ الصبر

مثل مانتظرت الجزء الثالت بنفس اللهفة

وفرحت جدا لما وجدته

منتظرة الباقي

تحياتي

نواصل ...يالله نواصل ...



وتركنا الفوهة ....وخرجنا من النفق


حتى النفق مزروع من داخله...سبحان الله


بعدها تعمقنا أكثر في الحقول...


















والمراحب منتشرة هنا وهناك

المرحبا = أي نوع من الكائنات الحية في قاموس ريشة ..للي ماتابع الأجزاء السابقة







ومرينا على الطرق الضيقة اللي تحفها أزهار الأورتنسيا الزرقاء الجميلة
من الجوانب





وطبعاً أكيد يتبع

بعدها توقفنا في منطقة استراحة وتعتبر متنزه صغير...للي يحب يشوي وهو يشوف البحر
طبعا المكان عام ومفتوح للجميع وهو يصير على الشارع ..









ومن هذه البقعة بالذات ممكن تشوفون الأرض اللي تكونت نتيجة الحمم البركانية..









كل هالأمتداد من الأرض اللي تشوفوه صوب المحيط هو في الواقع أرض جديدة لم تكن موجودة أصلا

المنطقة المحيطة...











يُت يُت لصديقاتنا القدامى...

ومازلنا مع المناظر من نفس المنطقة...












وتابعنا الدرب.....

ومثل ماخبرتكم في الأجزاء السابقة إن هذه الصخور المتكونة نتيجة الحمم البركانية
هي مكان خصب لنمو النباتات....










شوفوا كيف النباتات ....نابتة من الصخور









وهذي شكل صخور الحمم البركانية من قريب...








لكن إذا حبيتوا تشوفون أحدث بقعة أرض على وجه الكرة الأرضية تعالوا معي
وشوفوا أرض عمرها 50 سنة بس




طبعاً يُت يُت

هذا كان الدرب ..بيوت صغيرة تطل على المحيط..











لا أذكر جيداً ولكني أعتقد أن السائق قد أخبرنا بإن هذه مدرسة...








ووصلنا الموقع









هذا الفنار هو المكان اللي كانوا يراقبوا منه نشاط البركان الأخير...
واللي صار قبل 50 سنة









البركان اسمه Capelinhos






واحد من أهم العالم السياحية في الأزور
يطلق على هذا البركان اسم البركان الغامض
Capelinhos mystery
والمنطقة كلها يطلق عليها المنطقة الغامضة....
والسبب يرجع إلى أن هذا البركان لم يظهر من على قمة جبل....
وإنما نشأ من أعماق المحيط...







يتبع .....

*هكذا نشأ بركان كابلينوس


.......................................



ملاحظة : الهدف من عرض هذه المعلومات ليس لمجرد سرد الحقائق الجيولوجية ولكن للتعرف على مامر به أهالي فايال
وما شاهدوه والأهم من ذلك هو التدبر في قدرة الله سبحانه وتعالى...
(إنما أمره إذا أراد شيئًا أن يقول له كن فيكون)


......................................



في حوالي الساعة السابعة صباحاً بتاريخ 27 سبتمبر 1957
كانت بداية التكوين وهي عبارة عن قطعة أرض صغيرة نشات نتيجة تراكم رماد الحمم بركانية
حول أربع فوهات بركانية تقع في قاع المحيط......
أمام الفنار وعلى بعد كيلومتر واحد من الساحل
هذه الظاهر سبقتها مئات الهزات الأرضية ولمدة 15 يوم







مجموعة الصور توضح مراحل التكوين...

ابتدأت بأربع فوهات في أعماق المحيط....
ثم تحول لجزيرة صغيرة هلالية الشكل...
أمتدت بعدها والتصقت بالأرض...
وتكونت في آخر مرحلة بحيرة الحمم البركانية...






بحلول نهاية أكتوبر من العام نفسه
اختفت قطعة الأرض الصغيرة (والتي كانت تسمى الأرض الجديدة) فجاة
بعد أيام من أختفاء الأرض الجديدة بدأ البركان باستعادة نشاطه
وتوالت تكون الجزر الصغيرة...
حيث كانت الجزيرة الثالثة أكبرها
في بداية شهر نوفمبر التصقت الأرض الجديدة بجزيرة فايال الأم
لتصبح جزءاً جديداً من الجزيرة.....















يتبع.....

وفي يوم 16 ديسمبر من العام نفسه..لوحظ ظهور الحمم البركانية Lava
على سطح الأرض ..واستمرت لفترة بسيطة....




معلومة : الحمم البركانية عبارة عن صخور ذائبة



ثم عاد ظهور الرماد البركاني من جديد....
استمر الوضع على هذا الحال لشهر مايو من عام 1958
وفي ليلة ال 12 من مايو....
اهتزت جزيرة فايال بقوة وتوالت الإهتزازات الأرضية ......
صاحبتها انفجارات طينية ورماد في الفوهة السابقة Caldera ( اللي تصورنا عندها )
في حين أن عند البركان نفسه تكونت بحيرة من الحمم البركانية..
صاحبت هذه الظواهر خروج قذائف من الحجارة...
تصدر أصواتاً كالقنابل...لاحتوئها على الغازات المحصورة داخل الحجارة
حيث كانت درجة الحرارة عند فوهة البركان 1100 درجة مئوية








على اليسار شكل الرماد البركاني...وعلى اليمين الحمم البركانية وقذائف الحجارة


يارب أرحمنا برحمتك يا أرحم الراحمين..
إن كانت هذه درجة حرارة الحمم البركانية وهي على سطح الأرض...
فما هو حال جهنم وحرارتها والعياذ بالله

اللهم إنا نسألك الجنة ونعوذ بك من النار






هذه بعض الصور الحقيقية لمراحل تكون البركان ..... تبدأ من اليسار لليمين...














خلونا نشوف التفاصيل على الصورة الحقيقية...




1 الرماد البركاني والإرتفاع 145 متر
2 فوهة البركان الرئيسية المتكونة سنة 1958
3 الرماد الركاني والإرتفاع 63 متر
4 حمم بركانية من سنة 1958
5 جزيرة صغيرة قديمة جداً قبل ظهور البركان..
6 نقطة اتصال الجزيرة الصغيرة مع جزيرة فايال وهي مجموعة حجارة تكون خط مستقيم





( *كل المعلومات السابقة ترجمة شخصية بتصرف من كتيب خاص عن البركان Capelinhos)





يتبع....

هذا البركان مازال هو البركان الوحيد في العالم الذي نشأ من أعماق المحيط


والحمد لله بالرغم من كل تلك الأحداث لم تقع ولا حالة وفاة واحدة..
معظم سكان المنطقة انتقلوا للعيش في أمريكا بحثاً عن بداية جديدة وحياة أفضل...






بعد كل هالمعلومات ...
خلونا نشوف سايقنا شو قال عن تجربته وشو شاف..طبعا هو وقتها كان صغير
يقول المكان كان لا يمكن حد يقرب صوبه بسبب الرماد المتطاير
وهذه الصورة توضح كيف يكون الجو كله مليان ذرات الغبار والرماد الناتج من البركان









بقايا الرماد .....





الناس أول ما ابتدت الظواهر تصير...
تركت بيوتها ...اللي انتقل مدينة ثانية.... أو جزيرة ثانية .....أو بلد آخر
يقول حتى بعد هدوء البركان المنطقة تكون غير صالحة للسكن ..
الرماد يبقى منتشر في الجو لفترة طويلة





يقول الصوت كان كأنه صوت القنابل بالضبط .....
بمجرد ارتطام الأحجار الخارجة من باطن الأرض بسطح ماء المحيط....
تصدر فرقعات مدوية.....
يقول اذكر السما كلها صارت حمرا في الليل حتى من بعيد
ودرجة الحرارة كانت وقتها 950 درجة مئوية





يقول إن البيوت كلها كانت مصنوعة من الحجارة آنذاك ..
وكلها تهدمت بسرعة بسبب الهزات الأرضية والحمم البركانية
ولذلك البيوت في الوقت الحالي تم بناؤها بالطوب..
سألنا كيف ما كانت توجد إصابات....
وخبرنا السايق إن الظواهر صارت على مراحل وفترات
فالناس كان عندها الوقت انها تهرب من المكان....





لكن فعلا الواحد يتساءل ..

شو اللي يخلي الناس تسكن بالقرب من البراكين؟؟؟
شي غريب فعلاً...





الأرض الجديدة اللي شفتوها عمرها 50 سنة بس
والظواهر خذ لها 13 شهر علشان يكتمل شكل البركان الحالي..





المكان حالياً ممكن السايح يشوفه من بعيد بس مايسمحوا لحد يقترب من البركان إلا بوجود احد عناصر الشرطة...







يتبع....

رحت اصور المكان وزوجي وقف مع السايق يتناقشون وانضم لهم شخص ثالث
فعلا شعور مميز ...أنا اقف على أرض عمرها 50 سنة فقط
شعور غريب
كل هالأرض ماكان لها وجود من قبل!!!!!








خبرت زوجي من بعيد إني بجمع قطع من الحجارة الملونة الخارجة من الأرض...بس انشغلت بالتصوير...
رجعت من بعد التصوير وأشوف فارس جمع لي الحجارة
فرحت وايد وشكرته ...






سبحان الله مع انها كلها طالعة من نفس المكان ومتعرضة لنفس درجات الحرارة
إلا إن لكل وحدة لون مختلف ...وهذا الشي يدل على إن مكوناتها مختلفة....
سبحان الله...




خبرني فارس انه ممنوع .أخذ الحجارة..
وممنوع أي حد ياخذ أي شي من هالمنطقة لأنها منطقة محمية...
بس قال حظج حلو إن لحد الحين ماتطبق القرار..
وهذي المعلومات كانت من الشخص اللي كان معهم وهو مسؤول عن المكان..






المكان مثالي للصيد ..
لأنه بعد هدوء البركان ...دبت الحياة في المكان ..
ونمت الزروع ..و العصافير والطيور كونت أعشاشها في المكان
وطبعا هذي الأخاديد اللي تكونت مثالية لتكاثر الأسماك






صياد مع سنارته ودلوه...








المكان أيضاً ملائم للسباحة...تخيلوا الواحد يسبح والبركان يقرر يثور
خخخخخخخخخخخخخخخخخخخ
مابي أتخيل شو بيصير بعدها








وبعض السياح يتصورون






شوفوا هالصخور....لونها على الطبيعة أسود أسود..حالك السواد...
ما طلع اللون الحقيقي....






يتبع...

بعض اللقطات هنا وهناك...















مسبح طبيعي....






















على فكرة جلسنا في المكان فترة طويلة ...
ماعرف بس في شي يخيلكم مشدودين للمكان...
يمكن هو الخوف من ثوران البركان الممتزج بالدهشة من الأرض الجديدة..
الممتزج بهدوء المكان وجمال المحيط....



وركبنا السيارة وقبل مانمشي خلانا السايق نشوف كيف البيوت القديمة مدفونة بسبب الحمم البركانية...





وعند نفس المنطقة في متحف صغير يعرض الصور لتطور البركان
بس للأسف ماكان مفتوح وقتها ....





ولكل من سأل...تخصصاتي لا علاقة لها بالجيولوجيا إطلاقااااااااااااً






ومازلنا مواصلين ...ولكن بعد حين

المشاركة الأصلية كتبت بواسطة qwqw9999
http://www.arabtravelersforum.com/tr...7/#post2448747

مشكورة عل هذا التقرير الرائع
إنه بحق واحد من اروع التقارير التر قرأتها
فهو رائع اسلوباً وكتابتاً وتنظيماً وسرداً وتعليقاً ومكاناً وصوراً
منتظرين تكملة لهذا التقرير المميز

العفو ...والرائع هو تواجدك في التقرير ^^









المشاركة الأصلية كتبت بواسطة سعودية تعشق مصر
http://www.arabtravelersforum.com/tr...7/#post2449887

اختي ريشة


قرائة تقارير ك تعتبر متعة لي غير طبيعية

كاني اشاهدبرنامج تلفزوني عن السياحة


المكان يهببببببببببببببل بصراحة فعلا مغامرة

ماشاء الله عليكم انتي وفارس

ودي اتعرف عليكي شخصيا عشان تردي على اسئلة كثيرة تدور في بالي

متابعة معاكي بفارغ الصبر

مثل مانتظرت الجزء الثالت بنفس اللهفة

وفرحت جدا لما وجدته

منتظرة الباقي

تحياتي



ميرسي حبوبتي شكلك صرتي عاشقة الأزور أيضاً ^^
إن شاء الله حبيبتي سنفتح قنوات الإتصال وحاضرة لأي استفسار ....
:101:

والله لو كنت قاعد في نفس المكان وقالولي انه الارض تحتك تغلي وممكن يثور البركان في اي لحضه والله ما أقعد في الجزيره

بس الصراحه والله متعه لانه الواحد يحس انه غامر شوي

وكملي أختي ريشه تراني متاااااااااااااااااااابع وبشده

السلام عليكم ورحمه الله وبركاته

الف شكر اختي على السرد الرائع :24:

وفعلا المعلومات اللي ذكرتيها عن البركان وتكونه كانت اكثر من ممتازه
والله حسيت نفسي قاعده اشوف برنامج وثائقي
وخصوصا اني كثير احب هذه الانواع من البرامج والمعلومات اللي بالفعل سبحان الله تبين قدرة الخالق

الله يوفقك اختي ويسعدك طول العمر انتي وفارس

:x1::x1::x1::x1::x1::x1::x1:

ما شاء الله يا ريشة

مستمتعين والله أشد الاستمتاع

ومتابعين على طول على طول ولو استمرت تقاريرك سنة كامله في حلقاتها الممتعة

واصلي واصلي والله يوفقك

بصرااااااااااحة من الان بديت افكر جديا في زيارة هذة الجزر حتى لو بعد 5 سنين لكن ان شاء الله ازورها


ننتظر باقي التقرير



الف شكررررررررررررر

الجزيرة فعلا حلوة بس تصويرك احلى ما شاء الله وبالانتظار

أشكركم أعزائي على المتابعة ...خلونا نواصل






بعد البركان...رحنا نرتاح شي ساعة زمان خخخخخخخخخ
وصلنا الاستراحة والمحمية الطبيعية...









هي عبارة عن حديقة طبيعية تحتوى على الأشجار والنباتات التي تنمو في الجزيرة...








ومكان للشواء...طبعاً الأكل أهم شي







حمامات الله يعزكم ...









ملاحظة: معظم البيوت والمباني مبنية من قطع الأحجار البركانية ....

حتى الحمامات



















ويتبع

بعدها رجعنا الفندق نرتاح ...


صورة سفينة الشحن اللي تتنقل بين الجزر ....وشفناها في كذا جزيرة ..






فارس نزل يشتري لي External Hard disk drive
علشان أخزن عليه الصور .....
الشباب هناك على اطلاع بالتكنولوجيا كأي بلد آخر
فاللي يبيعوا في هذي المحلات عندهم خبرة كبيرة في الكمبيوتر...ومايتعلق به..





................................


معلومة : الجامعة الوحيدة في الأزور مقرها الجزيرة الأولى سان ميغيل ..
وتتكون من 3 مباني موزعة على مناطق متفرقة من الجزيرة.....
تختص بتدريس تاريخ المحيط والأحياء.....
ولها فروع مثل الحرم الجامعي في جزيرة ترسيرا وهي آخر جزيرة بنزورها...
وتدرس العلوم الزراعية.....
(كما يوجد في نفس الجزيرة معهد لتدريس تاريخ الأزور)

والفرع الآخر هو الحرم الجامعي في هذه الجزيرة ( فايال)....
وهي مختصة بعلوم البحار والأحياء البحرية......

طبعاً واضح إن التخصصات تتبع احتياجات سوق العمل في الجزر ...


.................................






خلوني أشرح لكم ألحين شوي عن التمشية في مدينة هورتا
مثل ماخبرتكم من قبل الجزر كلها قمم جبال
فبالتالي كل الجزر فيها صعدات ونزلات
النزول أمره هين
لكن الصعود عذااااااااااااااب
للوصول لفندقنا الطريق منحدر جداً
بس احنا طلعنا لنا طرق جانبية الدرب فيها أقل انحداراً...

بعد النزول على طول ...تبتدي المحلات
كل شي تقريباً متوفر..
والمدينة تشتهر بمحلات المانكير المتخصصة في تقليم الأظافر....
وهالموضة منتشرة بشكل كبيييييييييييييييييييييييير هناك....
وألوان وأشكال مختلفة....
وطبعا توجد صالونات لتصفيف الشعر.....


بشكل عام بنات فايال مهتمات وايد بمظهرهم من ناحية القصات والألوان
واللبس ...
والسبب طبعاً لأن المنطقة يزوروها الناس من كل بلدان العالم....
فتوصلهم الموضات أول بأول....






المدينة فيها Free Wireless Internet connection
في نطاق معين أي حد ممكن يشبك مع الشبكة المجانية .....
وتدخلوا النت ....




وللي ماعنده لاب توب ممكن يروح المكتبة العامة وهناك استخدام الكمبيوتر مجاني...
كيف عرفنا كل هالمعلومات؟؟؟
في المحل اللي يبيع معدات الكمبيوتر..
التقى زوجي مع عائلة أمريكية
حرمة وزوجها...


ولما رجع خبرني إنهم طيبين وايد ....
وأخذ لهم ساعة وهم يتكلموا ويسولفوا مع بعض....
وخبرني إن الحرمة فرحت وايد إني كنت بأمريكا......
ونفسها تشوفني...




وطبعا كانوا هم الأصدقاء الجدد




يتبع ....

وبعدين طلعنا نتمشى علشان نروح نتعشى..
والله هو كان بين الغدا والعشا





المهم واحنا ماشيين شفنا قوس المطر...




بس خلالالالالالالالالالالالالاص مليت شبعت وأنا اشوف أقواس المطر
خخخخخخخخخخخخخخخخخخخخخخخخخخخخخخ
بس فعلا المنظر رااااااااائع
وكانت الغيوم كثيفة حتى إن قمة جبل بيكو ماكانت باينة...





وهذي مناظر من المرفأ









ياترى حد مازال يتذكر هالسفينة من الجزء الأول
صورتها بالليل
والحين وصلت هذي الجزيرة
شو سالفتها ياترى
لحد الآن مش فاهمين شي


وهذي قلعة قديمة وحالياً هي مطعم فاخر







يتبععععععع

وهذا هو الشارع المطل على المارينا...شوفوا كيف كل الشوارع صعدات ونزلات...



هذا بائع الهوت دوغ...كان مصّر إننا ناكل من عنده قلنا له احنا ماناكل خنزير...
قال لها هذا زين نوعية مختلفة من الخنزير...خخخخخخخخخخخ
بس فعلاً شي غريب إن كل أهالي الجزر لما تسألونهم عن أي شي يحبون يساعدون بأي طريقة...
ماكان يبينا نمشي قبل لا يدور لنا شي ناكله ...
:110: كسر خاطري...
وكنا بحكم موقعه الإستراتيجي ووجوده الدائم بنفس المكان ...كل ما نمر على ساحل المارينا نبتسم له وهو يبادلنا الإبتسامة :101:



ومرينا على مقهى بيتر..
وهو معلم مهم جداً في هورتا (جزيرة فايال)
عبارة عن مطعم وفي نفس الوقت محل لبيع الملابس من نفس الماركة والتذكارات




شو قصة بيتر كافيه سبورت..وليش هو مكان مشهور وايد
ولازم أي شخص يوصل فايال يزوره.؟؟


شعار peter Zee



الجواب كان عند سايقنا
خبرنا واحنا طالعين في جولتنا قصة بيتر

قصة بيتر

بيتر أصلا أسمه كان Jose Azevedo

وكان طفل يساعد أبوه في أعمال المقهى اللي يمتلكه والده واللي يبيع فيه التحف المصنوعة يدوياً
لما كبر شوي التحق للعمل مع البريطانيين
وأكتسب خبرة كبيرة وكان يتكلم الإنجليزية بطلاقة.....
واسم بيتر جاء من أيام الحرب عندما كانت السفينة الحربية التابعة للأسطول الملكي....
راسية طوال فترة الحرب في مرفأ هورتا لعطل حصل فيها.....
وكانت تستخدم آنذاك كمركز للإتصالات....
ومن هنا جاء أسم بيتر ...
حيث كان الضابط المسؤول يطلق اسم بيتر على الشاب....
لأنه يشبه إلى حد كبير أحد أبناءه ....والذي كان يدعى بيتر
ومشى عليه الأسم

والناس صارت تناديه بيتر...


قصة بيتر ماتتوقف لهذا الحد ....
السايق يذكر لنا صفات بيتر وأخلاقه العالية وحبه لمساعدة الآخرين دون تمييز...

واللي استمرت مع الأجيال من بعده....
بيتر كان محب لعمل الخير وكان يساعد الكل حتى بالمال....
كان يعطي المال للبحارة المحتاجين....
يقول لهم المرة الجاية لما تزوروا هورتا تقدرون ترجعوا المبلغ....
من كان يثق في حد في ذاك الزمان؟؟!!!!!
وموقع الجزر بعيد...يعني تقريبا هو يعطيهم وهو مقتنع إن احتمال الرجوع ضئيل....
مع ذلك عمره ما تردد في مساعدة البحارة....

المقهى كان مكان للتجمع والجو العام عائلي...

ويوجد موقع خاص بالمحل على الإنترنت.....









هذي صورة لمقهى بيتر من الداخل وطبعاً نادراً مايكون فاضي جذي..
دائماً مليان ماشاء الله وللحصول على طاولة لابد من الحجز...
داخل المقهى تكثر المشروبات الكحولية...لذا فإن الجزء الآخر من المقهى والواقع على المارينا مباشرة في الهواء الطلق أجمل بكثير...



وهذا شكل بيتر ...وكتابه عن مشاهداته للبركان...





وكنا كل مانمشي نشوف أحد أبناءه ويمكن أحفادة رجل كبير مش صغير ويشبه بيتر بالضبط


طبعا لنا عودة لمحل بيتر والمشتريات والمأكولات







يتبع ...لأن ألحين حان موعد الطعاااااااااااااام

ووصلنا المطعم...وموقعه في نهاية شارع المارينا...






وهو يقدم طريقة حلوة للشوي على الحصاة الحارة
Hot stone
هذي الطريقة ليست جديدة علينا جربناها في أحد مطاعم ألمانيا من قبل....





بس هذي بعد تجربة لها طابع مختلف....


هذي طاولتنا...




وهذا المنظر يطل على المارينا...

طبعاً المقبلات الأزورية المعتادة الخبز والجبن الرااااااااااائع ....

( من تجربتي الشخصية ...جبنة فايال هي الألذ والأخف وتتميز بقلة ملوحتها...وطراوتها)



وبعدها ابتدينا في الجد



هذي الصينية الخشبية اللي بتجرى عليها عملية الشواء...






بعد شوي يجيبوا لنا طبق من السلطة...
بطاطا مقلية....
وقليل من الزبدة ..المايونيز وصلصلة ال Thousand Island









يتبع يمي يمي

المنيو فيه خيارات متعددة...اخترت لي المشكل...وزوجي اختار ستيكات
وأنا اللي ربحت :8888:



ووصل الطبق المشكل


بس حتى كمية الستيكات كانت كبيرة....لشخص!!!


ووصلت الحصاة الحارة




وابتدت ريشة تشوي
أول شي ابتديت في الستيكات....
يوجد ملح بحري خشن ويعطي طعم رائع في الطبخ..ممكن تضيفوه حسب الرغبة


وضفت عليه قليل من الزبدة يمي يمي...





وبعدها الحبار....















ثم الأسماك...







ثم الروبيان وقطعة الدجاج اليتيمة...خبرتكم من قبل الدجاج نادر في المطاعم الأزورية





وبعد عملية الشواء ابتدا الهجووووووم على الأكل


على فكرة الحصاة يبدلوها كل ما تبرد....وممكن تاكلوا عليها واللحوم تنشوي
بس شخصيا كنت كل ما أخلص مجموعة حطيتها بصحن جانبي وآكل...
في حين القسم الأخر ينشوي....



أخليكم مع الغداء ....وبالهناء والشفاء :101:



يتبع بعد حين ....

ماشاء الله قمة في الابداع

والصور ولا اروع مانقدر نقول الا سبحان الله


بس عندي سؤال ما مليتوا من شوفة نفس المناظر في الجزر الستة (اكيد موب نفس المناظر)وكل جزيرة لها مناظرها

عني انا تكفيني جزيرتين منهم


حلوة حياة الريف وخاصة للاسترخاء والتدبر بس لاغنى عن حياة المدينة


وماشاء الله عليكم تعتبرون واجهة للسياح العرب ووفيتوا وكفيتوا

رروعه رروعه
يعطيج العافيه

لاتعليق طبعا

اكثر من اني قلك يعطيكي الف عافية


وتتهني يارب انتي وفارسك المغامر


متابعة

تحياتي

تقاريرك كلها روووعه يا ريشه وخصوصا الشرح المفصل مع الصور
وتقاريرك بجزيرة الأزور اول مره يكتب عنها بالمنتدى

مشكوره على المواضيع المميزه والشرح المميز والرائع
بس ياليت تخبرينا كم كلفتك الرحله؟!!

وأكون شاكرة لك
ودمت بود

اختك حزن

ماشاءالله تبارك الرحمن تقرير روعه وكامل من حيث المعلومات والصور

بارك الله فيج وموفقه خير يارب

الف شكر :113::113::113:

عزيزتي ريشة :

الله يقويك ويزيدك علم , ماشاءالله عليك ,

تقرير أرشحه ليكون مرجع في أحد الكتب الجيولوجية المتخصصة,,,((مو مجاملة,, والله))

سؤال/ هل تخصصك الجامعي جغرافيا أو جيولوجيا؟؟

أتمنى الإجابة,,,,,,

وبإنتظار جديدك,,

أشكركم جميعاً على المتابعة ...والردود بعد هذا القسم *_^

نوووووووووواصل



صورة لأرصفة الأزور واحنا راجعين من المطعم


في طريق العودة صورت بعض الثمار والنباتات المزروعة في البيوت...
لا تسألوني شو يطلع هذا ما أدري...








أورتنسيا صغيرة








شجرة غريبة





وهذا ليس نوع من الثمار وإنما نوع من الأزهار


ومصدره اليابان
وشكل الوردة وايد حلو لما تتفتح
عرضتها في الجزء الأول
كانت تطل علينا من بين الأغصان

وهذا الموز الأزوري



يتميز بصغر حجمة وحلاوته الملحوظة




أكثر حلاوة من الموز العادي..
.......
ولما رجعنا الفندق طبعاً قعدنا في البلكونة مثل كل ليلة...
وهذا الكلب الحزين ينتظر صاحبه كل يوم في نفس هالمكان....




صباح اليوم التالي
صحيت اصلي الفجر وبعدها فتحت الستارة فشفت قمة جبل بيكو لأول مرة
دايما كانت مغطاة بالغيوم..




واليوم اللي قبله وبعد العشا مرينا على محل بيتر وتشرينا ....


المحل سبق وأن ذكرت أنه يحتوى على ملابس من نفس الماركة
تي شيرتس وتوبس ملابس من هالقبيل..
وعليها شعار بيتر وهو الحوت..
ويبيعوا اكسسوارات نسائية ..
و تذكارات
كلها لها علاقة بالبحر والمنقطة والحيتان...

المشتريات كلها توضع في كيس مثل اللي يستعملوه البحارة...



وفادنا وايد في رحلاتنا المقبلة
وأغلب الناس يستعملوه هناك لحمل أغراضهم الشخصية...

وطبعاً لازم أعرفكم على المخلوق الصغير جداً اللي اشتريته من هناك...


وسميته "ويلي"

ولما أشوفه شقد كيوت أغني عليه ...
ويلي ..ويلي ويلي ..آه ياويلي ويلي ويلي
خخخخخخخخخخخخخخخخخخخخخخخخخ

وفارس يضحك علي...

ياربي عليه كييييييييييييوووووووووووووووووووووووت


وي......يتبع خخخخخخخخخخخخخ

ريشة تصبح من المشاهير ..


ووصلنا موقع الإحتفال والناس كانت حاجزة الأماكن من زمااااااااااااااااااان
طبعاً واصلين متأخرين...
لكن ريشة في هالسوالف تعجبكم...
تطلع حلول سريعة
تجولت شوي مع فارس لاختار زاوية تصوير مناسبة ...
لكن الناس محتله الساحل كله...



وفي النهاية شفت لي فتحة صغيرة واخترت الموقع ...
استراتيجي
الأحتفال كان عرض تمثيلي للوصول الأول لجزيرة فايال في الأزمنه القديمة...
والتمثيل بيكون بالسفينه اللي شفناها من قبل وماعرفنا قصتها....



الموقع الإستراتيجي اللي اخذته هو مكان أقدر أصور منه السفن...
وأول ماينزلوا على طول انتقل لموقع نزولهم...
واللي كان فاضي ومحد معبره ...


وقفت وساعدني ريال شيبه مسكين قال لي تعالي مكاني علشان تصورين
ياربي على طيبة هالشعب والله...

ووقفنا ننتظر وشوي بدت السفن في الإقتراب وهذي السفينة الأولى وهي برتغالية


السفينة تطلق المدافع...






والسفينة الثانية اسبانية...



لأن الحكم في السابق كان لمملكة واحدة تشمل شبه جزيرة أيبيربا



وهذي طيارة مارة فوقنا




طبعاً الصور كثيرة وأختصرتها لكم..
بعدها بدوا ينزلوا الناس من السفن في قوارب صغيرة....

بعد الوصول انطلقت للنقطة اللي حاطة عيني عليها...






في هالفترة كان موجود مصور فوتوغرافي
ولما شاف زاوية التصوير اللي واقفة فيها عجبته ووقف جنبي...
شوي وأشوفه مصوب كاميرته علي يبي يصورني
ههههههههههههههههههههههههيييييييييييييييييييي
وقققققققققققققققققققققققققققف
شو تسوي انت؟؟؟!!!!!!!!!!!!!!!!!
خخخخخخخخخخخخخخخخخخخخ
انا لفيت راسي...ماخليته يصور...
مسكين انحرج وقال لا بس حبيت أصور الحجاب
طبعاً بالإشارة
قلت لفارس لا مستحيل أخليه يصورني ...
شو عرفني شو التعليق اللي بيكتبه تحت صورتي
( العرب وصلوا خخخخخخخخخخخخخ)

جزء من الجماهير












وتفوز النيكون بالضربة القاضية 3 -1
وأنا الثالثة



طبعاً انا كنت أعجوبة الإحتفال..
وأتوقع البعض فكرني بمثل مع المجموعة خخخخخخخخخخخخخخ
وإن حجابي نوع من التنكر....
بس النظرات كانت عادية ومعظهم يبتسموا لي بعد ما يشوفوا اللبس....
ووقف جنبي ولد يمكن عمره 3 سنوات
ابوه حامله...
ومن الزحمة كل شوي يضرب أيده فيني...
ويخااااااااااااااااف....
ههههههههههههههههههههههههههه
ريشة البعبع
خخخخخخخخخخخخخخخخخخ
أقول لزوجي حرام الياهل بيموت من الخوف مني
هههههههههههههههههههههههههههههههههههههه


يتبع لا تخافون ماسويت شي بالياهل خخخخخخخخخخخخ

وبعدها الموسيقى الأزورية والرقص الشعبي..

الموسيقى الأزورية لها طابع مختلف عن باقي دول العالم..تحسون كأنها قديمة وفعلاً نغماتها تراثية..
شوي حسيتها مزعجة مع الغناء وكأنها ترانيم الكنيسة...
بشكل عام أحس اللغة البرتغالية مزعجة عند السماع ...
خخخخخخخخخخخخ قلبت عليهم أشوف...
:109:





وابتدت المسيرة والخيول









قررنا بعدها نرجع وهذي بعض الصور لطريق العودة....رجعنا مشي ....



القوارب اللي نزلوا منها..





نظرة أخيرة على السفن ...

وهذا الساحل رملي مليان ناس في الأوقات العادية ...للسباحة...

على فكرة السواحل الرملية في الأزور قليلة جداً طبعاً لطبيعة الأزور الجيولوجية ...
فلما يكون في المنطقة ساحل رملي تشوفون أهل المنطقة كلها متجمعة في هالبقعة الصغيرة
زححححححححححمممممة
:surf
الحين هو فاضي لأن هناك أوقات محددة للسباحة على شواطئ الأزور

وهذا مصنع قديم لصيد الحيتان...
طبعاً الآن يمنع صيد الحيتان...ولكن هذا كان مصدر رزق الأزورين في السابق
حيث يقطع الحوت وتستخرج منه الزيوت....
حبيبي حوتي حرااااااااااااااااااااام





























وأعشاب الطبخ تزرع حتى في الشارع...




يتبع....

عجبني لون السما



وقررنا نتعشى في مطعم القلعة...
دخلنا وكان مليااااااااااان...
قلت لزوجي مافي أمل الكل راجع من الإحتفال والمطاعم مليانه
فقال لي شو رايج نروح المطعم التقليدي اللي مدحوا لنا اياه في الفندق
يالله نروح...






منظر من الطريق وهنا بالذات وقفنا نسحب فلوس من ماكينة السحب..
وهي منتشرة في الأزور كلها....





ووصلنا







وكانوا الناس مخلصين تقريباً
وحصلنا لنا طاولة لشخصين...
المكان حسسني كأني قرصانة في حانة خخخخ
المكان قديم ومسوينه على الطراز التقليدي..








الطباخة كانت واقفة عند هالباب قبل شوي ..شكلها أزوري مررررررررررررة خخخخخخ
بس خفت مايعجبها إني اصورها..



حسيت اني مازلت في اجواء الإحتفال اللي تركته قبل شوي....
المطعم مشهور جداً انه يقدم أفضل أنواع المأكولات البحرية على هذي الجزيرة...

وهذي كانت طلباتنا..


هذا سمك أزوري طعمه شبيه بالكنعد...
والبطاطا ماعرف كيف يسووه رووووووعة طعمه مع ان شكله مايوحي...





زوجي طلب ستيك طبعاً خخخخخخخخخخخخخخخ
وهذا اللي بالصحن شريحتين دائريتين هو اليام Yam
اللي خبرتكم عنه قبل في الجزء الأول وهو شبيه بالبطاطا
طعمه روووووووووووووعة

رجعنا الفندق وتوني أستعد للصلاة
جان اسمع فارس يصرررررررررررخخخخخخخخخخ
ريشششششششششششششششششششششششششششة
انتي في التلفزييييييييييييييييييييوووووووووووووووووون
خخخخخخخخخخخخخخخخخخخخخخخخخخخخخ





صرت من المشاهير....:106:

هناك قناة مختصة لنقل الأحداث المحلية
وصوروني وطلعت على ال TV :8888:
خخخخخخخخخخخخخخخخخخخخخخخ





هذي مش أول مرة ...
لما صارت حرب لبنان سنة 2006
طلعت على قناة العربية وانا في مطار سوريا
خخخخخخخخخخخخخخخخخخخخخخخ




وجهي يجذب الكاميرا...هع هع
فارس قال لي لو حد ماشافج في فايال والأزور اليوم الكل شافج
خخخخخخخخخخخخخخخخخخخ



هذا المجرم اللي على اليسار هو اللي صورني خخخخخخخخ
والثاني هو المصور اللي ماخليته يصورني


يالله شو نسوي ضريبة الشهرة..
وواصلت صلاتي ...ونمت أحلى نومة...


...........................................




اليوم اللي بعده كانت رحلتنا لجزيرة بيكو الجزيرة الرابعة
وهي مرتبة من قبل الشركة ومحجوز لنا كل شي مسبقاً
ماراح أذكر التفاصيل ألحين بخلي بيكو في تقرير منفصل




...................................



تابعوا حلقة السهرة الليلة ...
وهي الحلقة ماقبل الأخيرة...
لا تفوتكم....

يتبع

تقرير رائع جدا

والصور اروع واسلوب اروع

المشاركة الأصلية كتبت بواسطة يزن2
http://www.arabtravelersforum.com/tr...7/#post2455137

تقرير رائع جدا

والصور اروع واسلوب اروع




شكراً لج حبيبتي يزن ^^

يوم جميل في حياتي .........


هذا يوم ماراح انساه أبداً أبداً جميل من بدايته لنهايته...
تذكرون قبل شوي خبرتكم إنا كنا مخططين لرحلة بحرية وتأجلت
واليوم كان المفروض نروح الجزيرة السادسة ( سان جورج)
ولكني ضحيت بالجزيرة علشان الرحلة البحرية....

وأخيراً التقينا...

في الواقع الرحلة البحرية هي رحلة لمشاهدة الحيتان..
معقولة أوصل الأزور وما أشوف حوتي ؟؟؟!!!!!
لالالالالالالالالالالا يمكن
فضحيت بالجزيرة علشان حوتي الحبيب.....


يالله تعالوا معي في هذه التجربة التي لا يمكن وصفها بالكلمات ولا الصور..

Whale Watching
تذكرون المحل اللي خبرتكم عنه ...






أول ماتوصلون بيعطوكم معلومات عن الحيتان وأنواعها وباقي الأحياء البحرية



خلونا ناخذ بعض المعلومات البسيطة عن حوتي اللي أحبه
ال Sperm Whale





هذا الحوت يعتبر أكبر أنواع الحيتان من فصيلة الحيتان ذوات الأسنان
مثل الحوت القاتل Killer whale
والدولفين يعتبر أيضاً من هذه الفصيلة
وهو أكبر حيوان على وجه الأرض من ذوات الأسنان...





يتغذى هذا الحوت على الحبار والأسماك الوجودة في أعماق المحيطات..
يصل عمق المناطق التي يقتات منها ل 2200 متر

وهذا مايجعله الحيوان الثديي الوحيد الذي يستطيع الغطس والصول لهذه الأعماق
إناث الحيتان وصغارهم يعيشون في معزل عن الحيتان الذكور..
حيث يتجول الذكر وحيداً في المحيطات...
في حين تكون الإناث وصغارهم مجموعات مترابطة
لا يفترقون إلا عند البحث عن الطعام....





أهم مايميز شكل هذا الحوت هو رأسه الكبير ذو الشكل المميز
وبالأخص رأس الحوت الذكر...
والذي يقدر بثلث طوله الكامل....
يصل طول الحوت الذكر إلى 20.5 متراً
ومخه يعتبر الأكبر والأثقل وزناً بين الحيوانات الحالية والمنقرضة
يستخدم الحوت السونار لرؤية أعماق المحيطات وذلك بإطلاق نبضات متلاحقة من الصوت عالية التردد
تصطدم بالأجسام ويرتد صداها لتكشف للحوت
عن خفايا الأعماق..
سبحان الله




فتحة النفخ
(blowhole)

توجد في مقدمة الرأس على جهة اليسار...
وهذا يجعل النفخ أقوى وبزاوية إلى الأمام
سبحان الله..... سبحان الله





يحتوي الفم على 20 إلى 26 زوج من الأسنان المخروطية الشكل
ووزن كل سن يقدر بكيلوغرام واحد ....

كل هذه المعلومات ترجمة شخصية من الويكيبيديا مع بعض التعديلات والإضافات...
وللمزيد من المعلومات والتفاصيل الرجاء مشاهدة الفيلم الوثائقي لل بي بي سي
Ocean Odyssey







يتبع....

وصلنا المحل ...وطبعاً بما أننا أخذنا المعلومات في اليوم السابق..
دخلنا على طول..
ولبسنا سترات النجاة
استعداداً لركوب القارب
وريشة جهزت كاميراتها






القارب اللي بنركبه صغير ونوعه
Semi Rigid
من تحت صلب ومن فوق تيوب منفوخ...
عددنا كامل كان 11 شخص
6 كبار أنا وفارس من ضمنهم
وزوجين وحرمة..وأمير الظلام*





*أمير الظلام هو مصطلح ريشاوي - فارسي مبتكر يطلق على الأشخاص اللي يحبون يستعرضون
ومفكرين نفسهم حلوين وجذابين وآخر شياكه وعلى الموضة
وهناك أمير ظلام واحد على الأقل في كل سفرة ...وأحياناً أكثر من واحد...
والأعمار بين ال19 سنة - 50 سنة...






3 صغار والأعمار من 5 سنوات وطالع
وسايق القارب والبنت اللي تشرح لنا...
كلنا جذي صرنا 11




احتياجات الرحلة:

لباس مريح وخفيف...
قبعة عن الشمس..
نظارة شمسية...
شنطة للمحارم الورقية ومأكولات خفيفة لو معكم صغار...
وطبعاً واقي الشمس...





وبدينا نصعد...









كانت معنا عايلة سويسرية وهذا ولدهم وبنتهم
وهذا شكل سترات النجاة....








وابتدى القارب يتحرك...






يتبع....

بصراحة كنت شوي خايفة لأن القارب صغير والوجهة هي منتصف المحيط ....
والعمق تقريبا 2000 متر أو أكثر....
بس بعدين تعودت على الوضع




الجو اليوم كانت مثاااااااااااااالي
معتدل إلى بارد والشمس أشعتها جداً لطيفة
والله حظنا حلو..





انطلقنا بسرعة بالقارب ....
ومن السرعة والأمواج..... يرتفع القارب وينزل بقوة.....
كأننا قاعدين في لعبة في الملاهي بالضبط .....
والصغار كل ماتصير هذي الحركة يضحكوا بصوت عااااااالي





القارب فيه كراسي معدة بطريقة إن الوقوف هو الأمثل.....
والسبب إن الإرتطامات المتكرره هذي تضايق.....
فنصيحتي خلكم في وضع بين الجلوس والوقوف..





أمير الظلام كان جالس قدامي وانا كرسيي على اليمين ماقبل الأخير
أخترنا الجلوس في الخلف تجنباً لقوة أرتطام مقدمة القارب بالأمواج
بس هذا خيار خاطئ للي يحب يصور في اعتقادي...
ومازلنا نتعمق....




ومرينا على الطيور


























أمير الظلام ابتدت عنده أول مظاهر الإستعراض.....
شوي أشوفه مطلع تلفونه آخر ماتوصلت له التكنولوجيا.....
واتصل في حد.....
تعرفون رجال الأعمال لازم يخلصوا أعمالهم من منتصف المحيط

:109:




واحنا ماشيين دخلت علينا شوي من الأمواج...وصار الكل يضحك.....
الموجة رشتنا بالماي....
وجت على وجهي وتذوقت طعم المحيط .....
ماااااااااااااااااااااااااااااااااااالح



يتبع.....

ووصلنا في منتصف المحيط وصرنا ننتظر إشارة من المراقبين...

على الجزيرة توجد غرف صغيرة بيضاء





تستخدم لمراقبة الحيتان بالمنظار...
أول ما يشوفوا موقعهم يخبروا القوارب ونتجه صوب المكان...
وهذا ماكان...






الرحلة كاملة تستغرق 3 ساعات...
ويطلبوا منا الدخول للحمامات قبل الصعود على القارب......
بالأخص للأطفال .....






بعد مرور مايقارب 20 إلى 30 دقيقة
وصلتنا أول إشارة لوجود الحيتان
وانطلقنا بسرعة البرق
...





وصلنا وتوقفنا قليلا ...
ما أشوف شي.....
شوي وأسمع الكل يصرخ حووووووووووووووووت حووووووووووووووووت
هناااااااااااااااااااااااك

يعني المفروض إني أصور
بس ماعرف شو صار لي
بلمت...
حسيت إني مش على بعضي ومرتبكة
بشوفه أخيراً
خخخخخخخخخخخخخخخخخخخخخخخخخ





والله ارتبكت وخذ لي وقت ليما استوعبت الموضوع......
خخخخخخخخ
أخيراً بشوفك ياحوتي الحبيب...ياحياتي
وبعدها بديت أصور.....

وهذي كانت أول ملاحظة من بعيد في شي يتحرك والأمواج صارت بيضاء
وفي شي رمادي تحتها..





قربنا شوي وشفت زعنفة ظهرة ...ياحياتي...





أووووووووو واكتشفنا أنهم أم وولدها...







على فكرة مش شرط تكون هذي أمه ممكن أي وحدة من الإناث تساعد في مرافقة ومراقبة الصغار..



يتبع

وهذا الظهور الأول ....حبيبي حوتي تعال عندي:106:




طبعاً أصور وأتكلم بالعربي
خخخخخخخخخخخخخخخخخخخخ

خلاص قريب بيغطسوا في الأعماق





وغطسوا فعلا وكانت غطسة حلوة استمتعت بمشاهدتها
لأن أمير الظلام أعتقد إن الحوت غطس علشانه بس فطلع في جزء من الصورة
وهو يحاول يصوره






معليش نكمل
أنا كل ما أصور صورة وأقول لفارس انها طلعت حلوة أمير الظلام يمووووووووت قهر
خخخخخخخخخخخخخخخخخخخخخخخخ



بعدها وصلتنا المعلومة الثانية في حيتان في مكان ثاني
وانطلقنا بسررررررررررررررررررعة..





وأول شي شفته خشم ونفخة




ومواصل السباحة .....

















يتبع....

ياولد هذي النفخات ولا بلاش
خخخخخخخخخخخخخخخخخخخخخخخ





طبعاً انا كنت أشوف شوي وأصور شوي
بس بعدها وقفت تصوير صرت أراقبه
وأنا ودي أوصل له وأحضنه وأغطس معه
خخخخخخخخخخخخخخخخخخخخخخ



وبعدها صورت مسج منه شوفوا....



مافهمتوا شو يقول لي؟؟

يقول لي أنا احبج بعد ....




خخخخخخخخخخخخخخخخخخخخخ
طلع الشعور متبادل الحمد لله


وإذا مش مصدقين شوفوا القلب في النفخة في الصورة السابقة




يتبع....

مرحبااااا ^_^





هذي الصورة حلوة تبين عرض الحوت وفي نفس الوقت شوفوا الفتحة كيف صايرة على جهة اليسار..




واستعدوا الآن للإستعراض الخطير.....


يا الله





أقلب





إرفع






واااااااااااااااااااو






غووووووووووووووووووووص



لاحظوا كيف الذيل مقطوع من جهة اليسار
هذا يدل ل إنه تعرض لهجمة شرسة من قبل الحوت القاتل killer whale
في الواقع الحيتان القاتلة تهجم يطريقة مباغته وبسرعة رهيبة تقطع جزء من الذيل من أول هجمة...
وتظل تحوم حوالين الحوت الصغير....
تبغي تفترسه.....
لكن الحيتان الكبيرة تتدخل وتحميه بهذي الطريقة
تسوي حلقة حواليه مثل الوردة





سبحان الله ....سبحان الله .....سبحان الله
كل هالمعلومات وأكثر في الفيلم الوثائقي....


يتبع...

هذي الصورة المفضلة عندي وهي صورة الأم تغطس وجنبها الصغير على وشك الغطس...
















وتابعنا شفنا آخر حوت بس ماصورته لأني فضلت أستمتع آخر شي بالمنظر ...
كان بجانب قارب قريييييييييييييب جداً منه وهذا الشي ممنوع لأنه في مسافة معينه مفروضة بين القوارب والحيتان
والمسافة هي 50 متر وكل الصور اللي شفتوها هي ملتقطة من هذا البعد...








التصوير كان جداً جداً صعب أولاً لأن القارب واااااااااااااااايد يتحرك لأنه صغير والإهتزازات كثيرة..

والشي الثاني إن فترة ظهور الحوت قصيرة...يعني يا تلحقون يا ماتلحقون...

الشمس أحيانا تخلي لون الحوت يطلع كأنه بقعه سوداء في محيط أزرق...




أضف إلى ذلك وجود شخص مثل أمير الظلام يحاول بشتى الطرق إنه يسبقني بالتصوير
خخخخخخخخخخخخخخخخخخخخخخخخ
آخر عقبة مقدور عليها ....رفسة وحدة وكان ممكن يكون في أعماق المحيط
خخخخخخخخخخخخخخخخخخخخخخخ









تابعوني غداً وشوفوا شو صار بعدين



يتبع وبكرا آخر حلقة...

المشاركة الأصلية كتبت بواسطة bo_aziz76
http://www.arabtravelersforum.com/tr...1/#post2454561

ماشاءالله تبارك الرحمن تقرير روعه وكامل من حيث المعلومات والصور

بارك الله فيج وموفقه خير يارب

الف شكر :113::113::113:



العفو :106:
وجزاك الله خير ...








المشاركة الأصلية كتبت بواسطة نوووووف
http://www.arabtravelersforum.com/tr...8/#post2454858

عزيزتي ريشة :

الله يقويك ويزيدك علم , ماشاءالله عليك ,

تقرير أرشحه ليكون مرجع في أحد الكتب الجيولوجية المتخصصة,,,((مو مجاملة,, والله))

سؤال/ هل تخصصك الجامعي جغرافيا أو جيولوجيا؟؟

أتمنى الإجابة,,,,,,

وبإنتظار جديدك,,



لا عزيزتي تخصصاتي لا علاقة لهالا بالجغرافيا ولا الجيولوجيا إطلاقاً...
وأشكرج الغالية على التقدير ^^
:36_3_16:

ما شاء الله

:24:

تقرير شاامل ووافي

انتي لازم البرتغال يعطونك عمولة عالسياحة عندهم... اتوقع بتزيد 88 % بسببك (شوفي الدقة) لووول

عزيزتي اذا ماعليك امر

ابي اعرف المصاريف بالضبط وطريقة الحجز ((اذا في لنك اعطيني اياه))

افكر اروح مع زوجي بديسمبر.. او متى ماربي سهل ويمكن نزور 3 جزر بالكثير...

اي الجزر احسن من خبرتك... وكم التكلفة الاجمالية تقريبا


عذرا عالازعاج

جزاك الله كل خير

السلام عليكم ورحمة الله

الحمدلله على السلامة رشرش ...

ماشاء الله تبارك ... الله يهنيك رشروش ويسعدك انت وزوجك

مارح أقولك تقرير روعة أو تقرير مميز لأن قلتها لك أكثر من مرة والتقرير مايحتاج شهادتي

لكن حابه أعلق عن هالتقرير بشي بسيط ...

أعجبني جداً جداً الجزء اللي تكلمتِ فيه عن البركان ومراحل تكونه ...
شدتني الملعلومات والصور ... سبحان الله
.
.
الجزيرة حلوة وشكلها حية أكثر من الجزيرة اللي قبلها...

صور الطبيعة روعة

والمطعم عذاب ....:110:

أموت على هالحركات في المطاعم

بس أنا أعز الشاي ... وشاي على الهوت ستون أكيد شي :24: ....ليه ماحطيتي صوره له :114:

وياقلبي على الويلي الصغير... شكله يهبل ...ماتنلامي في حبه هههههههههههه

شكراً لأنك أخذتينا في رحلتك الممتعه وشفنا الحيتان معاك..



يعطيك العافيه حبيبتي

ومتابعينك ... باستمتاع لا حدود له ...

واااااااااااااااااااااااااااااااااو ياريشة


رووووووووووووووووووووووعه:24:



ماتدري كيف كنت اتابع معاكي احداث الجزء هذا كانت عيوني :shocking:


يابختك وياحظك ماشاء الله تبارك الله

امنية حياتي اشوف حوت على الطبيعة

رحلتك فيها انواع المغامرات ياحبي لك

منتظرة ايش بيصير كمان


تحياتي

ياةةةةةةةةةة يا ريشة بصراحة فى أخر التقرير أنفاسى أنحبست من هول ما فعلتى
محيط وقارب صغير وحوت
:36_1_25:
ياربى
بسم الله ما شاء االله راح نسميكى جريئة مش ريشة
انتى فعلاً جريئة فى أختيار مكان الرحلة وهى بلد بها العديد من البراكين ومغامراتك فى الجبال والمنحدرات ثم أخر شىء محيط ورؤية حوت وكمان عليهم أمير الظلام
:109:
متابعة معكىىىىىىىىىىىىىىىىىىىىىىىىىىىىىىىىىى

أتعلمين يا ريشة .... ما الذي يميز أجزاء هذا التقرير ....
أن لكل جزء ...حكاية....
ورغم صغر الأمكنة ...و قربها الجغرافي...
إلا أنك جعلتي لنا في كل جزيرة قصة مختلفة لا تشبه الأخرى....

لا نزال متابعين بنفس لهفة القراءة الأولى....
فزيدينا ... متعة ...

ما شاء الله ع مبدعنا ريوووووووش


مكااااااااااان عذاااااب

صوور صور بركااااان والحيتااااان وكل شي طبيعه عذااااااب


اوييييييييييييييييه طلعت مشهوره يا ريوووووش تتطلعين ف Tv من وراااااااي خخخخخخ

ربي يسعدج انتي وفارسج وكملي مغامراااات حلووووه

ومتاااااابعه لين اخر

روووووووووووووووووعة



نتريا الباقي ^^