بسم الله الرحمن الرحيم
أولا أعرفكم عن نفسي أختكم بالله Ghaith97 عضويتي في هذا المنتدى قديمة حيث تم التسجيل في المنتدى بتاريخ 16 – 7 – 2005 ولم أشارك أي مشاركة نهائيا ومن خلال هذا التقرير سأبدأ أول مشاركاتي وأول تقاريري :106: حيث كنت وللأسف أكتفي بالاطلاع على التقارير بدون أي مشاركات :108:.
والآن سأبدأ تقريري المتواضع الذي تأخرت في عرضه عليكم حيث سافرت أنا وعدة أفراد من عائلتي بتاريخ
1 – 8 – 2005 الى سنغافوره ,,, ماليزيا ,,, ثم العوده الى ديرتي الغالية الكويت . وسأستخدم ان شاءالله لهجتي الكويتيه في طرح التقرير لكي استمتع وانا أكتب التقرير .
بس في مشكلة صغيره اني الحين وانا اتصفح الصور لقيت أغلب الصور احنا طالعين فيها فراح أحاول أقص الصور وأضبطها كثر ما أقدر.
استخدمت بالتصوير كامرتي المتواضعه الصغيره Olympus C350
(بلد جميل جداً ومنظم جدا)
سمعت عن من زار سنغافوره أنها أجمل بلاد العالم لكني ما أقتنعت بهذه الكلمات حيث اني وبصراحة ما ارتحت في هذا البلد وما أفكر أزوره مره ثانيه ,, يمكن يكون أول الأسباب درجة حرارة الجو لأن شهر أغسطس بالكويت الله يحفظها لا يوصف من الحرارة فكان ودي اروح ديره تكون شوي بارده وانصدمت مو بس بالحراره ,, كان الجو مزيج من الحراه و الرطوبه الشديده :105: للأسف .
أولاد حجزنا على طيران الامارات وبصراحة طيران عجيب مريح جدا جدا .
صعدنا الطياره وبدا مسلسل الرعب لأن أختكم تموت من الخوف من الطياره ,, ودي أكون مره بحياتي قويه ولكن للأسف ما أقدر بالعربي أخاف من الطياره ,, المهم ان انا واختي قعدنا يم بعض طارت الطياره والحمد الله وبدوا المضيفين يقدمون العصاير والأكل وكانت المضيفه واقفه عند الكرسي اللي احنا قاعدين عليه وماسكه علبة العصير وبتصبه للراكب اللي جدامنا ولسوء الحظ مرينا على مطب هوائي وتطير نقطه من العصير وتطب بعيني :112: حدي احتريت وانبطت جبدي والأسوء ان العصير كان عصير برتقال يعني يحرق وحرق عيني شويه بس الحمدالله عدت الأمور على خير .
وبعد تقريبا ساعه ونص وصلنا مطار دبي ... ولقينا مدهش بانتظارنا .
قعدنا فتره في مطار دبي وهالفتره القصيره ما خلت من الشراء طبعا بسكوت وكاكاو وبيبسي وبطاط لزوم الطريق:24:
المهم ردينا الطياره وواصلنا طريقنا الى سنغافوره .
وصلنا المطار وخلصنا اجراءاتنا ولقينا لوحة مكتوب عليها اسمنا ونقلنا الباص الى الفندق وهذي الصوره واحنا بطريقنا الى الفندق , وفي وايد صور بالباص بس احنا طالعين فيها
وسكنا بالشارع المشهور orchard road
في الفندق orchard parade hotel
الفندق عادي جدا بس موقعه حلو الشارع مليء بالمجمعات والمطاعم وتحت الفندق في قهوة Starbucks
وقهوة The coffee Bean اللي كنا نتريق فيها كل يوم .
قعدنا بالفندق وارتحنا وبالليل طلعنا تعشينا بمطعم هارد روك كافيه .
وطلعنا بعدها تمشينا وشريت التوست الملون المحشي بالايس كريم وايد كان لذيذ وتسوقنا وردينا الفندق علشان ننام ونستعد حق رحلتنا في اليوم الثاني الى جزيرة Sentosa .
والآن أتوقف وأراكم قريبا في جزيرة Sentosa .
رد مع اقتباس
المشاركة الأصلية كتبت بواسطة WishfuL
المشاركة الأصلية كتبت بواسطة Fanar90
المفضلات