السلام عليكم
شخباركم ان شاء الله بخير اليوم يالسة اسافرمن مكان لمكان في هذا المنتدى الغالي
وقلت خلني الف ع بوابة الكويت مع اني خلاص يايتنها من قبل تقريبا شهر
الصراحة كنت حاطة موضوع عن الشقق و ووو و الحمدلله استقرينا ع شقق سارة كالمعتاد خخخ عيل حق شو تسئلين
المهم وصلنا ع الساعة 4 بتوقيتكم العصر بس أتأخرنا في تأجير السيارة مع اني امخبرتنهم من الامارات اني ابا سيارة بافندر اللي كل مره ناخذها من نفس الشركة المهم لما وصلنا طبعا الحبايب حاجزين لنا سيارة جمس موديل 2010 بتقريبا 30 او 25 دينار ما اذكر بالضبط
و ها لفة مني و مناك لين حصلنا سيارة بعد جميس بس انفوي بس موديل قديم يعنى 2007 او 8 ما اذكر ع 15 دينار الحمدلله لمدة 4 ايام
وصلنا ع الساعة 6 تقريبا الفندق و الحمدلله ما اخذين الجارمن و من العام كنا امخزنين الاماكن خخخ
ريحنا اشوي و ع طول طلبنا من شقيقي الغالي ان انسير سيتي سنتر المعلم و هاك لف في الاسواق لين انهدينا اخر شي في الجمعية لين الساعة وحده و طبعا شرينا مؤونة الريوق اللي الشيف بنت طموحة اتسويلهم خخخ شغالة عندهم خخخخ
المهم ثاني يوم نشينا من الصبح ورانا العربيد طبعا انا اول وحده نشيت سويت لهم ريوق
بيض طماطم و جبن حلوم و خلطة الاجبان بالخضرة و الحليب و الجام والعسل خخخ
اتريقنا و طلعنا ع الساعة 11 للأسف لان معانا رضيعه و طفلين خخخ اخرونا في الطلعة مع ان المفروض انكون في العربيد من الصبح
المهم وصلنا ع الساعة 12 يعنى يادوب كمن محل و صكروا قلنا وين انسير وين انسير
طبعا نزلنا شقيقي الغالي و قال انتوا ما منكم فايده و خذ الصغارية و ساروا المراكز قلنا سير و رد بتشوفنا في السوق ما خلصنا خخخخ حريم
المهم سرنا انا و اختي و رضيعتها اتغدينا في الماكدولنز و بعدين صلينا في الحمرا و ريحنا لما فتحوا و ياللا انكمل المشوار و طيران مشي ع العربيد و خمينا العربيد خم من الاول لين التالي ما خلينا مكان والا و افتريناه خخخ
طبعا ما خلصنا لين ما يا اخوي لنا تقريبا الساعة 10 و احنا يالسين انلقط مني و مناك الفتافيت خخخ بس الصراحة عندهم جلابيات افكار و طبعا كلما ادش محل ينقصون لي خاصة اني اتكلم اللغة الاوردية خخخخ فاحصل ديسكوند عدل مدل و يستانسون يقولون انتي مو كويتي اقول لا من دبي خخخ
المهم طلعنا من عندهم ع الساعة 11 على اساس كل الجلاليب اتخلص بعد الجمعة و احنا طبعا سايرين لهم يوم الاربعاء المهم كلهم رضوا و الحمدلله
و طبعا الحبيب الغالي يبا يفتر اشوي ع شارع المطاعم و شارع السالمية مع ان منهدين قلنا يالله امرنا لله ما فيش مفر
المهم اتعشينا و تم الاستعداد لليوم التالي ع اساس اننا واعدين اخوي الحبيب بطلعة محترمة اونه خخخ انقص عليه خخخخ
المهم نشيت كالمعتاد اول وحده و سويت لهم بيض امفور و فول و الاجبان و العسل و الجام و الخبر طبعا و الحليب الشيف طبعا يتكلم خخخ
و استعدينا لليوم التالي سرنا الله يسلمكم النقره و اتغدينا في مغل محل و بعدين سرنا المغاتير مافي شي و طفنا بعد وسلمنا ع العربيد امعسكرين في الفراونية خخخخ
و بعدين سرنا مره ثانية و طبعا مرينا ع شارع المطاعم بس ما شاء الله زحمة في المطاعم وايد وايد و اتعشينا و عدا اليوم هذا ع خير
ورانا باجر نشة من الصبح باجر الجمعة نستلم الطلبيات من العربيد اسمينا بنشل شل جنه ليلام خخخخ
المهم شوفوا الخبيثة نشيت من الصبح و اتفقت ويا اختي انا انش من الصبح و خاصة الجمعة ما في شي فاتح بس قلنا يالله انجرب حظنا في الستيي سنتر المعلم
و اتريقنا بيض اومليت و الاجبان و الحليب
و شليت بالدس سويج السيارة من غرفة اخوي جان يجكني هاهاهاهاه و شافني لابسة العباة هاهاه يقولي وين رايحه و انا اقوله ارقد بسير اشوي و برد خخخ جني في البلاد
المهم زين حافظة الطريج لاني السنة اللي طافت سقيت هاهاه بدون ليسن كويتي بس اماراتي
المهم سرنا وانا و اختي طبعا كان الجو جميل وايد ووممطر استانسا ع الجو الحلو و طبعا الشي الوحيد اللي صورته هو المطر خخخخ
طبعا كل المحلات امصكرة اللي الجمعية و البريد توك و الكوفيات و كمن محل قلنا خلنا اندش الجمعية و خمينا مواعين خخخخ الصراحة عندكم مواعين روعة
المهم خلصنا و يلسنا في الكوفي و طلبنا من البريد توك الخبز الملون و ها الاشياء للامارات يستانسون الصغارية ع اي شي فيه الوان خخخ
المهم يلسنا نتمشى لين ما استوت الساعة 12 جان يتصل اخوي يبا السيارة لانه بيسير صلاة الجمعة وانا الطماعة ما ابا اطلع من السوق و انا اقوله يايه و انا بعدني في السوق و كلما يتصل اقوله احنا انحط الاغراض في السيارة و احنا بعدنا في السوق اخر شي قلت له سير مشى اي مسجد جريب خخخخ نذالة
المهم ردينا ع الوحده بسرعة اتعدلنا نشينا ع طول السوق خخخ مطاير
و طبعا قال بسكم عاد نبا انسير مكان راقي قلنا فالك طيب بنعزمكم في فريج الصواليح و ما ادرك ما فريج الصواليح خخخخ
طبعا الجو الحلو و الويك اند ما شاء الله
وصلنا ع الساعة 3 طبعا استغربنا من الزحمة سرنا الدور الاول زحمة الارضي زحمة بعدين سرنا الثاني و قلت حق اللي ايسجل ياين من الامارات بس عشان ناكل من المطعم هاهااها جنه اميوعين خخخخ
يلسنا نتريا نتريا لين حنوا علينا و دخلونا الساعة 4 الكابينه طبعا قبلها قلنا لازم انمر ع اللي ايسوي الحلوى و طبعا ما خله شي ما ذوقنه اياه و خاصة عقب ما عرف انا ياين من دبي قلت اخاف نشبع و طبعا يلست ارطن وياه هندي خخخخ عن اتقولون اصلي هندي حشى والله بس الافلام ما تقول شي
و طلبنا محشي ورق عنب و برياني ربيان و عيش ابيض و سلطة فتوش و شوربة سي فود و كاري بس الصراحة الاكل جنه اكل بيت ضربنا عليه بالخمس بس الملاعق خخخخ
و طبعا يانا صويلح الصغيريايب لنا الشاي و اللقيمات الصراحة لذيذه و صورت الصويلح و هو مستانس و بعد زقرت ع صويلحة الصغيره و صورتها الفلبنية لايق عليهم الثوب خخخخ
المهم طلعنا و بغيت سوق الجوهرة ما ادري الدانة بس محل واحد فقط و طلعنا ع العربيد ورانا تلقيط الجلابيات جسمنا الفواتير علي و على اختي و خلينا الرضيعة في السيارة ويا اخوي و يلسنا من فوق و من تحت انشل و انحمل ع طول في السيارة واللي ايقول عندنا بياعة بس خخخ كلهم حقنا خخخ للعيد و للمناسبات و للايام العادية و للبيت ما خلينا شي
و فجأة ما مااشوف اللا ولدي سعود يتصل علي و طبعا ما يدري اني طايحة في البحر اغرف خخخ اسمعه يصيح بس بعدني ما خلصت خخخ متفيجة الصراحة خفت و طلعت من العربيد لان ارساله ضعيف و ما اشوف و اختي عند السيارة شو السالفة طيحتوا قلبي
قالت ما ادري ولدج في الحمام و يصيح و اخوج رايح له
و ين الحمامات يلست اسأل طبعا العربيد شو من الحمامات اكرمكم الله فيه
الله يقطع ابليسك يا سعود ما قدرت تصبر خخخ انوديك مكان راقي او حتى الماكدونلدز
المهم يلست اركض مثل الخبلة والله اتحسبت و ظينت ظن السوء حد سوا به شي لين ما ووصلت صوب الحمام عزكم الله مكان
المهم شفت الشرطة طاح قلبي شو السالفة و شفت اخوي شو السالفة
قال ولدج في الحمام ما طايع يطلع
دقيت عليه اطلع يا سعود شو فيك
تدرون شو فيه
الحبيب بالغلط داش حمام الحريم خخخخخو الولد حساس وحيد امه و ابوه و جان يصيح وطيح قلبنا خخخ
و لا و لما طلع طبعا الكل امتجمعين و الحبيبو يهزب الحريم خخخ اتعقد منهم
المهم خلصنا تجميع الجلابيات الساعة 8 و نص الا بعض المحلات الله يقطع ابليسهم ما خلصوا و وعدنا اخونا الغالي بطلعة للمركز راقي لانه اتكدر و قال خلاص اخر مرة اييبكم لا تكفى
المهم قلنا للمحلات احنا بنسير و الساعة عشر بنرجع طبعا اللي سوا سالفة و اللي و اللي المهم
حطيتا الجارمن اجرب مكان مركز السلطان قلنا ياللا ياجارمن ودينا ع مركز سلطان بس الصراحة انا واختي بغينا انخلص الجلابيات قبل خخخ متفيجات
المهم بالصدفة وصلنا الافنيوز و هذا المركز اخوي الحبيب ما سار له قبل سار 360 و المراكز داخل الكويت طبعا اكيد بيلف و احنا كل مره في العربيد
المهم نزلنا بس الصراحة كان يوم عجيب بالنسبة لنا الكل يطالع فينا شكلنا الصراحة اقول حق اختي اكيد امصفع ياين من العربيد لمركز راقي الافنيوز بشلاعتنا خخخخ
المهم بس الدراج اكيد عندكم الالوان الفسفورية عيوننا طاحت من هاي الالوان يمين اصفر فاقع يسار فوشي صارخ فوق برتقالي فاقع تحت اخضر يعشي العين
و الا التحرش بالبنات اشكره الصراحه يلسنا مستغربين الصراحة هب الكل بس الشباب و المراهقات و المراهقين الله يستر عليهم و علينا طبعا الحبيب اخونا مستانس و احنا انخطط من وراه خخخخ
طبعا استوت الساعة عشرصلينا العشى و الحمدلله و نتحرقص انا و اختي نخاف يصكرون و احنا طيارتنا باجر ع الساعة 12 و نص الظهر يعنى ما شي وقت
و اتصل فيهم لا تصكرون واحد تلو الاخر و الهندي يلب دوره في محور الحديث
المهم قصينا ع اخوي طبعا هو يسايرنا خخخخ قلنا شو رايك انروح العربيد انيب الجلابيات و و بعدين نرجع الافنيوز بما انهم بيصكرون ع الساعة 12 قال اتقصون علي خخخ
ريا و سكينه خخخخ
المهم طلعنا و كله اسى انه ما شاف مركز راقي ويانا قال ابا اطلع وياكم لاني مليت و انا اطلع ويا سعود بروحكم
طبعا يفتقد الجو المرح خخخخخ
المهم
رجعت ريما لعادتها القديمة و رجعنا و انكلم فلان و احليلهم يتريونا عند المخرج لانهم خلاص صكرو ا و بس تم لنا محل واحد اتصل عليه ما يرد و نزلنا انا و اخوي جان انشوفه امصكر
جان ادور رقمه مني و مناك لما يبته و اتصلت عليه وقال خلاص ما بيي
و جان اشفر باللغة الاوردية و قال خلاص 10 دقايق و انا ياي خخخخ
المهم استلمنا الجلابيات و الحمدلله mission is completed hahaha
طبعا يلسنا لين الساعة 2 و احنا انرتب الجنط
و احنا انقول اكيد
بيطلع لنا وزن اكيد اكيد
المهم
نشيت الصبح و سويت لهم اخر ريوق و المتبقي من الطعام ما شاءا لله علي اموزنه بالتمام و الكمال للأكل
و يلسنا انحمل الجنط و قلنا نطلع من وقت احسن لنا عشان انسلم السيارة و الوزن ووو
و طبعا حملو الجنط
طبعا تم لنا في الحجرة بعض الرتوشات مثل النعلة وانتو بالكرامة و بعض الاغراض و حزام بنتي وووو و احترت وين احطيه جان احطه بكيس من اكياس سيتي سنتر المعلم الوردي
و طبعا كان في ايدي بعد جنطة مال طيران الامارات عاد هاي مهمة بس الصراحة الغباء يلعب دوره في بعض الاحيان و طبعا فيه الليسن مالي اماراتي طبعا و بطاقاتي الصحية و هويتي حق شو يايبتنه وياج ما ادري خخخخ و مبلغ 3000 درهم و فلاشين و بعض الاغراض مثل مكياجي
ما عرفت وين احطه و خاصة الجنط كله شلوهم جان احطه في الكيس الوردي
المهم وصلنا المطار الساعة 10 و نص تقريبا سلمنا السيارة و الحمدلله
طبعا صار لنا مشكلة الوزن خخخ 70 دينار خيبه خخخخ
المهم ادور مني و مناك اسوم ويهي مني و مناك واللي ما عنده جنط ادز ويهي له عشان ايشيل جنطنا بس للأسف ما حصلت حد و لا طاعوا اينقصون لنا دينار
وينج يا طيران العربية الحبيبة ع الاقل مشتونا العام الماضي
بس الجزيرة و ما ادراك ما الجزيرة
المهم سوينا الوزن و دفعنا 44 دينار قلنا ياللا امرنا لله طبعا علي وعلى اختي نتقاسمه
و الباجي من الجنط كل واحد شال في ايده جنطتين خخ واحد ب15 او 20 كيلو و قلنا ياللا ع الله
المهم ياللا ركيض ع الGate المهم تم بحمد الله ركبنا الطيارة و استبشرنا خير و طارت الطيارة و الحمدلله
و فجأةو نحنا في الجو شو تتوقعون:
جان اسأل اختي وين الكيس الوردي قالت ما شفته
سألت سعود وين الكيس الوردي قال ما شفته
لفيت ورا و دخلت راسي في الفتحة الصغيرة و اسأل اخوي وين الكيس الوردي قال ما شفته
وأسال بنتي وين الكيس الوردي قالت ما شفته
شو
فيه طبعا كل اللي كتبته باللون الاحمرفوق
تتخيلون موقفي الصعب جان حد امصفعني
جان اصيح خخخخخخخ عقب العذاب هذا
و لما وصلنا مطار دبي نزلت و يلست ادور حد من الكويت يعرف حد يشتغل في المطار او اي شي اقول حق اخوي اسأل قال لا ما بسأل جان اسأل الشباب خخخ رزت ويهه
قالوا ما نعرف
عقب حصلت عائلة كويتية راجعة الكويت قالوا بنشوف بس يا عمي منو ايسوي حق حد شي ها الزمان اهي اهي
المهم جان احصل شباب داشين العسكرية ع ما اظن جان اسألهم الصراحة ما قصروا بس قالوا اتصلي ع رقم واحد كويتي و قوليله السالفة لان ولد عمه يشتغل في المطار و اتصلوا هم عليه بس لانهم بيدخلون الكلية الحين فماشي فايده
طبعا ما اتصلت
المهم سرت طيران الجزيرة كلمت واحد لبناني اهناك بس ما حصلو الكيس
و بعدين كلمت مطار دبي المفقودات قالوا بيشوفون وتميت لين الساعة 5 و نص ما انا واصلين الساعة 3 و نص
المهم يلست امبوزة طول الطريج
ما تسوى علي هاي السيرة خخخ هب جنه خميت الكويت خم
المهم طبعا ما وصلت و انا كله مكالمات مطار الكويت كل يوم تقريبا خلاص حفظوني خخخ
المهم عقب كمن يوم اتصلت عليهم و رد علي واحد قال اختي
الكيس شو فيه قلت شو الاشياء اللي فيه
قال في نعال ذهبي و انتو بالكرامة و قال حزام جان اقوله احمر قال هيه و قلت جيه و جيه وجيه فيه
قال بس هذا اللي موجود
جنك يا بو زيد ما غزيت خخخخ
و طبعا قلت ياللا عليه العوض و منه العوض
بس اتصدقون اني لين الحين اسوق بدون ليسن خخخ بس ورقة
و بدون هويه
و فلاشاتي اهي ايه كل شغلي فيه للأسف
و اهم شي مكياجي الماركات واللي شريته من عندكم ما شي
و هاي قصتي اقصد ورطتي في الكويت
و توته توته خلصت الحدوته
و السموحة ع التطويل
و تم بحمد الله
انتظر تعليقاتكم الحلوة
مواضيع عشوائيه ممكن تكون تعجبك اخترناها لك:
- عدستي في قرية كويتي وأفتخر الكويت منطقة مشرف أرض المعارض
- أرجو منكم مساعدتي هام جدا ً
- ابي مساعده ممكن انامسافره الكويت بكره الخميس
- برنامج سياحي ارجو المساعده
- تأجير سيارة
- اخر صرعات عروض الطيران في الكويت
- التركيبة السكانية في الكويت
- ممكن مساعدة
- البرستيج السوق مطعم اوليف غاردن
- بعض المعالم للمشاهده في الكويت
- حالة الطقس على طريق الرياض الكويت المختصر
- جزيرة هونج كونج او كولون؟
- الطريق الي الكويت من الرياض
- الاتحاد للطيران تفتتح مكتبا جديدا للمبيعات في الكويت
- عفيييييه كل كويتيه حبوبه تعرف ديرتها زين تدخل
- طلب من الأخوة الكويتيين أو المصريين العاملين بالكويت
- مسافر للكويت نصايحكم
- اريد شقق سعره معقول
- «الخطوط الكويتية» تبدأ تشغيل رحلاتها من مطار برج العرب في الاسكندرية
- تقريري فندق الماريوت
رد مع اقتباس
المشاركة الأصلية كتبت بواسطة زينه الحلوة
المشاركة الأصلية كتبت بواسطة bo_aziz76
المشاركة الأصلية كتبت بواسطة مبارك ((بوفهد))
المشاركة الأصلية كتبت بواسطة غلاعمري
:
المشاركة الأصلية كتبت بواسطة كويتي 505
المفضلات