الموضوع: باريس و ديزني لاند الى

السلام عليكم ورحمة الله وبركاته ..


هالمره راح يكون التقرير غير .. ماراح اكتب كل التفاصيل .. فقط راح اكتب خط سير الرحله و الجدول اليومي للرحله مع بعض الصور والمواقف ....

نبدأ بمخطط الرحلة العام ..

25-7 الى 27-7 باريس - فرنسا
27-7- الى 29-7 ديزني لاند - فرنسا
29-7 الى 1-8 زيورخ - سويسرا
1-8 الى 5-8 انترلاكن - سويسرا
5-8 الى 7-8 لوزان - سويسرا
7-8 الى 9-8 جنيف - سويسرا



----------------------------------------------

الطيران الناقل ... الخطوط الجوية القطرية .... دوحة - باريس و جنيف - دوحة




--------------------------------------


وصلنا باريس الساعه 1 ظهرا واول ماطلعنا من باب المطار كان الجو بارد حلووو ... حسينا بالفرق بين جونا وجوهم و كلنا بدون استثناء كنا مستانسين ومبتسمين ... بخصوص النقل من المطار الى الفندق .. حجزت سياره كبيره بـ 70 يورو وكان السائق في انتظارنا - السعر يعتمد على عدد الركاب وعدد الحقائب ... والحجز كان عن طريق هالموقع

http://www.taxi-airport-transfers.com/

-------------------------------------------------

حجزنا كان في فندق امبر ampere hotel اربع نجوم و الفندق بحد ذاته حلو والغرف مرتبه ونظيفه بس العيب ان التواليت مفصول عن الحمام ... وبالنسبة لموقع الفندق يبعد عن الشانز يمكن ربع ساعه مشي او عشر دقايق عالاقل واقرب محطة مترو له pererre station محطة قطار ومترو بيرير مش متاكده من الاسبلنق ... وهاي صور للفندق من النت .. الفندق يوفر ارواب حمام و نعل على قد عدد الاشخاص في الغرفه وقت الحجز يعني احنا كنا 3 اشخاص في غرفة وحده وكان الحجز على هالاساس فوفرو لنا 3 ارواب و 3 سليبرز . الصابون والشامبو ماركة l 'occitane product



والحين اخليكم مع صور للفندق ...

التواليت



الحمام



صوره للغرفة المزدوجه .. بس غرفتنا كانت غير ثلاثيه ..




تقريبا مثل هاي




الفندق من الخارج











الفندق من الداخل







ويوجد في الفندق حديقه خاصه بالفندق بها مطعم لتناول الافطار او الغداء او شرب القهوه او الجلوس وقراءة الجرايد ...

وبهاي اكون خلصت اول جزء من التقرير .. وبعد الفطور ان شاء الله اكمل التقرير وراح اكتب لكم جدول الرحلات ...


القاكم قريبا

مواضيع عشوائيه ممكن تكون تعجبك اخترناها لك:

• خطأ بسيط بالفيزا
• ياليت تساعدوني وتعطوني رأيكم في جدول رحلتي
• خبرتكم تكفون
• بعض الاستفسارات ممكن مساعدتي
• ساعدوني بليييييز
• ربي يسعد كل من يساعدني
• تذاكر المترو لو سمحتو شو افضل تذكره للمترو لمده 8 ليالي ومن وين اشتريها في فرنسا
• هل اسكن في شامونيه او مجيف أو قرى أخرى
• استفسارات عن فرنسا والانتقال منها الى سويسرا
• النقاب في باريس للي يستفسر
• أفضل فنادق باريس؟ ساعدوني
• مجموعة صور من حلب
• ترانزيت في باريس ارجو منكم المساعدة
• فندق في ستراسبورغ
• رايكم فندق é
• ابي اسافر باريس وابي اعرف الدول القريبه مره الاوربيه
• استفسار بخصوص الفيزا
• ارجوا المساعده في اختيار الفنادق
• للذهاب من مطار الى قريبا من الشانزلزيه
• سؤال بخصوص المركز الموحد للتأشيرات؟

الكاتبة القديرة

أحلى من العقد

بداية موفقة

سجلينا متابعينـ

ماشاء الله من البدايه حبيت التقرير بس ماذكرتي لنا اسعار الفندق وانا من متا انتظر تقريرج .............

والحمدلله ع سلامتكم اذكر يوم كنتي اجهزين شنطة السفر الايام بسرعه تخطف

متابعه معك يا عسل

الكاتبه القديره كلنا شوف لقراءه تقريرج

ماشالله عليج الصراحه كل تقاريرج فعلن مميزه ومن زمان ماشفنا جديدج


وهنيج على البدايه الحلوه و القويه


ومتابعج للأخر

واقفة مع الجماعة بانتظار مفاجأتك عزيزتي ,,


متابعة

اهلا وسهلا بالجميع ...


نسيت اذكر معلومه قد تكون مهمه وقد تكون غير مهمه وهي سعر الفندق .. لان السعر يختلف حسب الموسم والايام واماكن الحجز .. انا حجزت عن طريق احد مواقع الانترنت .. وكان سعر الغرفتين وحده ثلاثيه ووحده ثنائيه لمدة ليلتين 799 دولار امريكي ... بدون الافطار ..


--------------------------------------------------

اول يوم كان مخططنا كما سترونه في التقرير ..

---------------------------------------------------

اول مكان كنت مخططه له قصر فرساي وفضلته على قصر اللوفر بعتبار ان اللوفر تحول الى متحف للمعروضات الفنيه واللوح والمنحوتات .. وانا بطبيعتي مع اهلي طبعا .. نفظل رؤية القصور واثاث القصور وطريقة عيش الملوك على رؤية لوح ومنحوتات مصفوفه وخلاص ...

توجهنا من محطة قطار برير pereire الى champ de mars effeile tour وبدلنا الى محطة فرساي على نفس خط القطار الاصفر ..اعتقر اسمه C





وتجنبا للزحمه .. قصيت التذاكر مسبقا وانا في الدوحه من النت طبعا ...نزلنا من محطة القطار وقمنا نبحث عن قصر فرساي .. ومشينا في الاتجاه الغلط ..





مشينا باتجاه فيل هوتيل .. ولاحظت في كل المدن الفرنسيه فندق بهذا الاسم ...



ولين حسينا بالتوهان سألنا واحد من اصحاب المطاعم ودلانا وكان الطريق سهل و في لافتات توضح المكان




ووصلنا بسهوله .. والطريق حلو وممتع



لين شفنا زحمه وسيارات وناس وعجئه قلنا بس وصلنا القصر





وصلنا تقريبا الساعه 5 والقصر يسكر الساعه 6 ونص فقلت يالله يالله هالساعه ونص تمدينا داخل القصر ..



وهاي الفارس خارج القصر





و هاي القصر من الخارج ...









وان شاء الله في الجزء القادم راح اتكلم عن داخل القصر وباقي رحلات اليوم الاول


اشوفكم قريبا ...

; كل عام وانتم بخير

تقرير رائع ما شاء الله منذ البداية

والله لا يحرمنا من جديدك ووجودك

لن أنسي تقريرك عن الرفير الفرنسي
فقد كنتي دليلي الاول يا احلي من العقد
ولوالله ثم تقريرك لما نجحت رحلتي

https://travel.maktoob.com/photo/sho...moud&cat=12329

الحمدلله ع السلامه
ومتابعه معك ..,

حمدلله علي السلامه
خلينا نشتغل علي المعرف الرديف لين الله يفك معرفي القيم
وين صورة الشنطه قبل تقفينها خخخخخخخخخخ

المشاركة الأصلية كتبت بواسطة إحساس هاديء
http://www.arabtravelersforum.com/tr...6/#post4136176

الحمدلله ع السلامه
ومتابعه معك ..,




هلا والله الله يسلمج يارب من كل شر وحياج معانا







المشاركة الأصلية كتبت بواسطة &فيصل&_
http://www.arabtravelersforum.com/tr...6/#post4136366

حمدلله علي السلامه
خلينا نشتغل علي المعرف الرديف لين الله يفك معرفي القيم
وين صورة الشنطه قبل تقفينها خخخخخخخخخخ




اووه فيصل ... اشفيه معرفك القديم ؟؟؟؟ بخصوص الشنطه تدري اني كنت متذكره اني اصورها وقلت حق اختي بصور شنطتي قبل مااسكرها قالت لي ليش قلت لها ناس طالبين يشوفونها .. وعاد بعدين لهيت ونسسسسسسسسسسسيت اصور الشنطه ... بس اوعددك اذا اكتشفت ان شنطتي طالعه في احد الصور اقولك ان هاي شنطتي خخ على العموم الشنطه كلها ورد تقول رايحه هاواي خخخ على قولة البنات يتطنزون على حقيبتي اللطيفه

المشاركة الأصلية كتبت بواسطة hmoodi
http://www.arabtravelersforum.com/tr...3/#post4137293

كل عام وانتي بخير يا احلى من العقد


هالله هالله بالتقرير والصور

سجليني احد متابعينك




ياهلا ومرحبا ... وان شاء الله التقرير يعجبك شكرا لتواجدك

واو القصر روووووووووووووعه معقوله ولا حمام شو ها الارف

الحمدلله ع النعمه

بس الغاليه ممكن سؤال انا ابا احجز لقصر فرساي ولبرج ايفل من هني واقص التذاكر بس كيف ؟؟ علميني

صراحه معلومه جميله عن القصر
لا هنتي وبانتظار ورد هاواي

المشاركة الأصلية كتبت بواسطة فراشة سويسرا
http://www.arabtravelersforum.com/tr...3/#post4137453

واو القصر روووووووووووووعه معقوله ولا حمام شو ها الارف

الحمدلله ع النعمه

بس الغاليه ممكن سؤال انا ابا احجز لقصر فرساي ولبرج ايفل من هني واقص التذاكر بس كيف ؟؟ علميني




هلا اختي فراشة سويسرا ... عشان تحجزين لقصر فرساي عن طريق النت .. ادخلي هالموقع وهو الموقع الرسمي لقصر فرساي راح يوفر عليج وقت الانتظار الطويت قريت في تقرير الاخ المغماسي انه انتظر ساعه واربعين دقيقه بس عشان يقص التذاكر .. احنا على طول دخلنا بدون ثانية انتظار حتى ..

http://www.chateauversailles.fr/homepage

اما برج ايفل هاي البيانات شوفيها و احنا دخلنا برج ايفل بطريقه مختلفه راح اذكرها لين اوصل لجزء برج ايفل بس مبدأيا هاي الموقع يمكن يفيدج

http://www.tour-eiffel.fr/teiffel/multi/ar.html


ومن هنا تقدرين تحجزين اون لاين

http://www.tour-eiffel.fr/teiffel/uk/







المشاركة الأصلية كتبت بواسطة &فيصل&_
http://www.arabtravelersforum.com/tr...5/#post4137455

صراحه معلومه جميله عن القصر
لا هنتي وبانتظار ورد هاواي




ههههه مصمم على شنطة هاواي خخخخخخ

ياحلاة فرساي ,, لي فيه ذكريات رائعة


صدمتيني بقصة الحمامات !! ما يتقرفون من نفسهم ؟؟؟


متابعة ,,

من اول رد لك كنت داخله
بس ماحبيت اقاطعك فكرتك حابه تسردين متتالي
عالعموم الف الف شكر وربي يسلم الايادي عالتقرير ربي يوفقك
عوافي اختي

يعطيج العافية على التقرير


بس ما أدري ...

حسيتج متروعة و إنتي تصورين داخل القصر !



أقصد بعض الصور المهزوزة

أتخيلج ... اطلعين الكيمرا بسرعة من الشنطة و تصورين و تردينها بسرعة



القصر أمامه حديقة كبيرة بنافروات

بس يمكن لـ ضيق الوقت ما أمداكم تزورها


يوم الأحد

لعب الموسيقى مع النافورات في أرجاء الحديقة

و أظن فيه يوم

مخصص لـ الألعاب النارية

الصراحه هالمرة ما شاء الله عليج الصور طالعه أحسن من قبل

والتقرير شكله دسم ومعلوماتك جداً حلوة وممتعه بالقراءة

واصلي وأن شاء الله من المتابعين

المشاركة الأصلية كتبت بواسطة ام نواف ونورة
http://www.arabtravelersforum.com/tr...6/#post4137766

ياحلاة فرساي ,, لي فيه ذكريات رائعة


صدمتيني بقصة الحمامات !! ما يتقرفون من نفسهم ؟؟؟


متابعة ,,



ياهلا ومرحبا فيج ام نواف ونوره .. كلهم مثل بعض مايتقرفون من نفسهم تلقين اذا شافو حد نظيف يقولون يه نظيف .. واصلا احد الاسباب الرأيسيه الي خلتهم يتقدمون في صناعة العطور ودايما يتسابقون على طرح الجديد انهم كانو يحطون العطورات فوق النتانه لعل وعسى تغطي شي ...بس مايدرون ان العطر مع الخياس يصير خياس خخ






المشاركة الأصلية كتبت بواسطة *؛؛شـمــوخ ؛؛*
http://www.arabtravelersforum.com/tr...3/#post4138043

من اول رد لك كنت داخله
بس ماحبيت اقاطعك فكرتك حابه تسردين متتالي
عالعموم الف الف شكر وربي يسلم الايادي عالتقرير ربي يوفقك
عوافي اختي




شكرا لذوقج عزيزتي .. وشكرا على الرد اللطيف ماقصرتي







المشاركة الأصلية كتبت بواسطة ra3y amreeka
http://www.arabtravelersforum.com/tr...9/#post4138639

يعطيج العافية على التقرير

بس ما أدري ...

حسيتج متروعة و إنتي تصورين داخل القصر !

أقصد بعض الصور المهزوزة

أتخيلج ... اطلعين الكيمرا بسرعة من الشنطة و تصورين و تردينها بسرعة

القصر أمامه حديقة كبيرة بنافروات

بس يمكن لـ ضيق الوقت ما أمداكم تزورها

يوم الأحد

لعب الموسيقى مع النافورات في أرجاء الحديقة

و أظن فيه يوم

مخصص لـ الألعاب النارية

هلا والله .. لا التصوير مسموح عادي ماكنت متروعه هههههه بس لان اهلي يشوفون ويروحون مب مستعدين ينطروني عشان اصور خخخخخ فاصور بسرعه والحقهم ههههه .. و الحديقه ماتمشينى فيها وايد مثل ماقلت ان الوقت كان ضيق .. وتذكرتي ماكانت شامله النوافير الراقصه ... بس تبي الصج ... كنا تعاااااااااااااااااااااااااااااااااااااااااابه ومافينا شده نمشي في الحديقة .. خبرك صار لنا 24 ساعه مواصلين







المشاركة الأصلية كتبت بواسطة غردينيا
http://www.arabtravelersforum.com/tr...3/#post4139063

الصراحه هالمرة ما شاء الله عليج الصور طالعه أحسن من قبل

والتقرير شكله دسم ومعلوماتك جداً حلوة وممتعه بالقراءة

واصلي وأن شاء الله من المتابعين

شكرا جزيلا ماقصرتي على الاطراء وان شاء الله التقرير يعجبج للنهايه

كذا انا ازعل اليوم نزلت تقرير عن الهضبة

يعني كيف بتأخذين الجو مني
من الان ما فيه مقارنة بين تقريري و تقريريك

أنتي أسم كبير بالمنتدي ومحبوبه من الجميع
وتقاريرك قمة في الروعة وبجد مستمتع بتقريرك وكأني لم أذهب الي باريس
والسبب في طرحك المميز وأسلوبك الرائع جدأ

https://travel.maktoob.com/photo/sho...1709&cat=12329

المشاركة الأصلية كتبت بواسطة ((المغامسي))
http://www.arabtravelersforum.com/tr...3/#post4139963

كذا انا ازعل اليوم نزلت تقرير عن الهضبة

يعني كيف بتأخذين الجو مني
من الان ما فيه مقارنة بين تقريري و تقريريك

أنتي أسم كبير بالمنتدي ومحبوبه من الجميع
وتقاريرك قمة في الروعة وبجد مستمتع بتقريرك وكأني لم أذهب الي باريس
والسبب في طرحك المميز وأسلوبك الرائع جدأ

https://travel.maktoob.com/photo/sho...1709&cat=12329






هههههههههههه

تصدق .. حتى انا لين شفت تقريرك وانك كتبت اليوم عن المونمارت قلت يااامحاسن الصدف ههههههههههههههههههههههههههههههههههه


بس والله لاتقلل من قيمة تقريرك بصراحه فيه معلومات وصور واشياء حلوه وممكن تكون مفيده اكثر من الي في تقريري


وااذا انا محبوبه فانت محبوب ولا تزعل خخخخ

مشكور على الرد اخوي وماقصرت على الكلام الطيب وبنشوف الجزء الياي بتروح نفس مكاني ولا لاء

بروح احمل الصور ههههه

الله يعطيج العافيه

اكيييييييد متابعتج تقرير يشوووق كملي ولا تطولين علينا

كاتبه قديره لها كل احترام وتقدير

متابع

المشاركة الأصلية كتبت بواسطة mr.q8
http://www.arabtravelersforum.com/tr...2/#post4141062

الله يعطيج العافيه



ياهلا ومرحبا والله يعافيك







المشاركة الأصلية كتبت بواسطة عنود الرفاع
http://www.arabtravelersforum.com/tr...3/#post4141093

اكيييييييد متابعتج تقرير يشوووق كملي ولا تطولين علينا




ياهلا فيج عنود الرفاع ومسروره بتواجدج ..







المشاركة الأصلية كتبت بواسطة قدها ونص
http://www.arabtravelersforum.com/tr...0/#post4141960

كاتبه قديره لها كل احترام وتقدير

متابع




اتشرف بوجودك ومتابعتك ... ياهلا فيك

اليوم ... ثاني يوم واخر يوم لنا في باريس ... تخيلو بس يومين ... او بالاصح يوم ونص ... ابدا مب كفايه .. بس معليه ..


قمنا من النوم وتجهزنا .. وكانت وجهتنا محل الفلافل الي في الحي الاتيني ... بس للاسف مادليت المحل وضيعت بس لقيت في ويهي مطعم هندي ...


وعندي اخ غرامه البرياني والعيش وتم يحن ويقول مانبي فلافل .. نبي عيش خخخ فقلت اوكي واكلنا في مطعم هندي في الحي الاتيني بس مااذكر اسمه ولا صورته ...


بعد ذلك توجهنا لكنيسة نوتردام وانا من عشاق فلم احدب نوتردام .. فرحت اهناك اتمشى حول الكنيسه .. وبالضبط مثل ماكانت مرسومه في الفلم ...




حلوه بالذات وانها بالضبط بالضبط نفس الفلم وهاي نهر السين جدامها ...








تمشينا فتره طويله حول الكنيسة ودخلنا المحلات الي حول الكنيسه وتسوقنا هدايا تذكاريه وايد مثل التيشيرتات الي عليها برج ايفل و مكتوب عليها باريس و الميدليات وهالاشياء ...



ووقفنا على طرف النهر نشوف العبارات الرايحه والراده ..





وجمب النوتردام فيه ساحه فيها منصه .. كان عليها عازفين ومغنيين .. قدمو عرض حلو وااايد ..








كنا قاعدين على الكراسي مثل باقي الناس حول الموسيقيين ونتابع بإستمتاع




حبينا ندخل الكنيسة .. بس الطابوووور كان طوووووووووووووووووووووووويل والساعه تقريبا 4 ونص وعندنا موعد الساعه 6 ... فكنا لازم نرجع الفندق ونستعد للسهره ....






ففوتنا فرصة دخول النوتردام ... بس قضينا سهرة راااائعة .. اقولكم عنها في الجزء الجاي قريبا ...ماراح اطول عليكم

خووووووووووش صور وخووووووووووووووش جووووووووووووووووووووو

المشاركة الأصلية كتبت بواسطة mr.q8
http://www.arabtravelersforum.com/tr...0/#post4144120

خووووووووووش صور وخووووووووووووووش جووووووووووووووووووووو






مشكور على المتابعه

بعد ماتجهزنا ولبسنا وضبطنا عمرنا للسهره الي كنت حاجزه لها مسبقاً من الدوحة طلعت من الفندق .. وامي ماجات معانا لانها ماجهزت وكانت السهره تبدا 6ونص فرحنا عنها وبسرعه بسرعه بالتاكسي لين وصلنا الى مكتب باريس فيجن المفروض الانطلاق بالباص من عندهم بس وصلنا متاخرين وراح عنا الباص فلحقناهم بالتاكسي الى برج ايفل الرااائع ..





وكنا ندور المندوبة عشان تسلمنا تذاكر الصعود لبرج ايفل وتجاوز الطابور والعشاء في المطعم الموجود في برج ايفل ..





المنطقة تحت برج ايفل روووعة ... والوقت مغرب والاجواء رائعة


استلمنا التذاكر .. ورحنا نصعد برج ايفل باللفت بدون طابور من الممر الخاص بالمطعم ..




ومشينا بسسسسسسسرعة و لا طابور ولا غيره





وهاي تذاكر صعود برج ايفل باللفت او الاسنصير بدوووون طاااااااااااابور








وكل الناس الي في الطابور احس يطالعونا اكيد يقولون يابختهم واشمعنى هم بدون طابور




شوفو الطابور اش كبره يمتد الى مالا نهايه





وهاي اسم المطعم ..




وطبعا الصعود والنزل له باللفت بدون سلالم وبدون تعب .. قمة الراحة .. اشوف الناس يركبون السلم اقول الله يعينهم ..

وهاي الصور من داخل اللفت ..





وهاي الناس الي راكب والي نازل الله يعينهم





برج ايفل غريب .. تحسونه حديد متركب على بعضه .. و صراحه صج يستحق يكون من عجائب الدنيا











صعدنا اول شي للدور الثاني .. وبعدين رجعنا نزلنا للدور الاول الي فيه المطعم ..







هاي الصور من الاسنصير .. بس ابيكم تشوفون شلون البرج مبني حدايد مشبكه ببعض .. غرررييب





قبل لاندخل المطعم خذنا لنا لفة سريعة نشوف باريس من فوق





والناس صاعدين ونازلين بالسلم الله يعينهم





هاي البرج من فوق ..




اختار وين تبي تروح ..






واحنا رحنا جهة المطعم .. شوفو القوس او النص دائرة ... هاي بوابة المطعم ..





ولين اهني اترككم والقاكم قريبا عشان اقولكم تفاصيل السهرة

رحلة رائعة وتفاصيل ممتعة وصور تجعلنا في قلب الحدث


شكرا لك احلى من العقد

المشاركة الأصلية كتبت بواسطة الذيب العربي
http://www.arabtravelersforum.com/tr...9/#post4145679

رحلة رائعة وتفاصيل ممتعة وصور تجعلنا في قلب الحدث


شكرا لك احلى من العقد







اهلا وسهلا يامرحبا فيك وشكرا على ردك اخوي العزيز

دخلنا المطعم ... و كلمتنا موظفة الاستقبال وطلبت منا اسمنا لان المطعم مايستقبل الا الناس الا الي حاجزين مسبقاً ..


دخلونا وقعدونا في مكان كان مخصص ل خمس اشخاص بس للاسف امي ماكانت معانا .. فتسائلو اذا الشخص الخامس سيحضر او لا ... وقلنا لا ..


وقعدنا ننطر الوجبة ..





وهاي جيرانا في الطاولة الي جمبنا .. بس مكانهم احلى جمب الشباك





ولأن احنا مانشرب مشروبات كحوليه فجابو لنا ماء واي نوع من العصائر او المشروبات الغازيه الي نبيها ..





هاي المنظر الي يطلون عليه جيرانا في الطاولة الي جنبنا وطبعا احنا بعد نشوف هالمنظر مثلهم





وهاي تذاكر السهره العشاء في برج ايفل وباقي البرنامج اقولكم عليه لين اوصل له ..





وبسم الله اعرض عليكم الاكل ...


طبعا اول شيء السلطه وكانت لذيذة ..






وبعدين الطبق الرأيسي الغريب العجيب .. عبارة عن صدر دجاج مشوي و عليه صوص مادري شنو هالصوص والغريب في السالفه ان على الدجاج رغوه مثل الصابون .. كنت محتاره شنو هالرغوه مثل الصابون شلتها عن الدجاج و كلت .. اعطي الطبق 7من 10






وبعدين السويت ... طعمه حلو






مع كوب قهوة .. بس القهوه مهما تحطون فيها شكر تضل مرررررررررره وطعمها غريب عجيب ماحبيناها





استمر العشاء مدة ساعتين .. او بالاصح ساعه لان احنا وصلنا متاخرين .. فخلصنا الساعه 8 واصلا القرصون نفسه قام ينبه الموجودين طبعا بلطف ان انتهى موعد العشاء .. يعني بالعربي طلعو .. بس بصراحه ماتحس انه عشى لين الحين نهار والشمس طالعه حلات العشاء في الليل ... شوفو هاي القرصون قام ينظف عقب ما اغلب الناس طلعو





الساعه 9 كنا لازم نكون عند هالعبارة الكبيرة عشان نكمل برنامج السهوه .. وناخذ جولة على نهر السين لمدة ساعة ..





وبما ان مازال فيه وقت تمشينا داخل برج ايفل وصورت لكم هالصور ..


هاي باريس من فوق








البرج من الداخل ..








و المزيد من صور باريس من الاعلى





هاي المونمارت امس كنا فيه ...





وبعدها رحنا للاسنصير عشان ننزل مره ثانيه ونلحق العبارة ..




وكان اللفت مزززدحم لان الكل يبي ينزل





وهاي واحنا نازلين





وبعد ماوصلنا ركضنا ركض عند العباره نخاف تروح عنا و يفوتنا البرنامج ...





ويالله نعبر الشارع عشان نروح للنهر





وبسرعة بسرعه ننزل من السلم جنب النهر








يالله وصلنا تقريبا ..





وعشان تعرفون باقي الاحداث .... تابعو الجزء القادم


اشوفكم على خير

جميل جدا
استمتعت بالتقرير والمتابعه

صور رائعه وتقرير ممتع يذكرنا بتقرير الريفيرا
عساكم ع القوه

المشاركة الأصلية كتبت بواسطة قدها ونص
http://www.arabtravelersforum.com/tr...3/#post4149593

جميل جدا
استمتعت بالتقرير والمتابعه




اشكرك عزيزي على المتابعه والرد واسعدني تواجدك

المشاركة الأصلية كتبت بواسطة bahraini
http://www.arabtravelersforum.com/tr...8/#post4149628

صور رائعه وتقرير ممتع يذكرنا بتقرير الريفيرا
عساكم ع القوه




الله يقويك اخوي العزيز .. واسعدتني متابعتك

المبدع دأئما ما يكون مبدع
رائع جدا ما تسطره يداكي


https://travel.maktoob.com/photo/sho...oud1&cat=12329

المشاركة الأصلية كتبت بواسطة ((المغامسي))
http://www.arabtravelersforum.com/tr...1/#post4152141

المبدع دأئما ما يكون مبدع
رائع جدا ما تسطره يداكي


https://travel.maktoob.com/photo/sho...oud1&cat=12329




اشكرك جزيل الشكر ...

ويسعدني تواجدك ومتابعتك

وصلنا لين مقر انطلاق العبارات وكان فيه طابور بس كلنا دخلنا عباره وحده وزادت كراسي بعد










وبالضبط الساعه 9 دخلونا العبارة




و مشت العبارة ..




ومايحتاي طبعا اقولكم عن الجو الحلو والهواء البارد ...وباي باي برج ايفل










ومرينا على اماكن حلوه ومهمه في باريس تطل على النهر مثل كتدرائية نوتردام - اللوفر - واماكن اخرى مب متذكرتها

شوفها في الصور ..































كل مامرينا على حد قامو يسوون لنا بااااي واحنا نسوي لهم بااااي





واشوي الا يطق علينا مطر خفيف وحلو .. وكل الناس قامو و راحو للقسم المغطى .. بس احنا وفي غيرنا بعد بقينا تحت المطر ..





واخر الجولة رجعنا مره ثانيه لبرج ايفل .. وبينما احنا على العباره افتحو اضواء برج ايفل بطريقة حلووووه













برج ايفل رومانسي في المساء ..





و الساعه 10 بالضبط خلصت الجولة .. يعني الجولة تاخذ ساعه كاملة

بعدها نزلنا من العبارة وركبنا الباص الخاص بشركة باريس فيجن عشان نكمل السهرة ...


والقاكم قريبا

ها العرض مش هو الليدو في شارع الشانزليزيه ترا نفس الطاولات ونفس المسرح

نحن دخلناه الشخصين ب 1000 درهم او الشخص نسيت والله

بس كان العرض روووووووووووووووعه بس بصراحه البستهم خليعه وها الشي اللي ماعجبني مع ان عرض اتقنوه وكان مكن الساعه 11 لين 1 صباحا ساعتين

المشاركة الأصلية كتبت بواسطة &فيصل&_
http://www.arabtravelersforum.com/tr...6/#post4153006

لا هنتي احلي من العقد شيء راائع
وبانتظار ديزني




سكرا اخوي على المتابعه ... واتمنى يعجبك قسم ديزني

مشكوره حبيبتي على الموضوع وانا استفدت منه بصراحه

وومن جد الحجز المسبق مهم لانه من المشاكل اللي واجهتها هالسنه بالصيف الطوابير والانتظار

شكرا لج حبيبتي تقرير ممتع

السلام عليكم
ماشاء الله الله يهنيكم بالرحلة الحلوة
بانتظار الرحلة الى الديزني لاند و بانتظار رأيك فيها لأنه بالنسبة لي حسيتها عادية جدا
و سؤال تاني بالنسبة للأكل انتو أكلتو أكل الفرنسيين عادي
يعني انتبهتوا اذا كان اللحم حلال او لا
لأنه ممكن يكون اللحم غير مدبوح
و باريس بالذات مليااااااانة مطاعم حلال عربي و تركي و الاكل عندهن بصراحة كتير طيب
بالنظار التتمة

خوش تقرير الصراحة ويعطيج العافية

المشاركة الأصلية كتبت بواسطة سهم الغدر
http://www.arabtravelersforum.com/tr...6/#post4165736

خوش تقرير الصراحة ويعطيج العافية




ياهلا فيك ...

سؤال اختي احلى من العقد

ليش اخترتي هالفندق مع في خيارات كثيره لفنادق ديزني شنو اللي شدج في الفندق ؟

المشاركة الأصلية كتبت بواسطة أديــــــــــم
http://www.arabtravelersforum.com/tr...0/#post4168790

سؤال اختي احلى من العقد

ليش اخترتي هالفندق مع في خيارات كثيره لفنادق ديزني شنو اللي شدج في الفندق ؟




اخترت الفندق لهالاسباب

1- كان من ظمن الخيارات الموجوده في موقع ديزني لاند لان الحجز كان بكج كااامل شامل الملاهي والالعاب

2- بعد ماشفت التريب ادفايسر وشفت راي الناس فيه حسيت انه حلو

3- سعره كان اقل من اسعار الفنادق الي داخل ديزني

4- موقعه امامه مول وفال دي يورب والمنطقه حوله فيها مطاعم ومحطة قطار والمطاعم هنا اكيد ارخص من الي داخل ديزني لاند ومتنوعه اكثر

5- يوفر باص مجاني من والى ديزني لاند

6- كنت حاطه من ظمن البرنامج اني اتسوق في الاوت لت الي يبعد خطوات عن الفندق وارجع ارمي الاغراض في الفندق وبعدين اكمل الى ديزني لاند بس اصلا من شفت ديزني لاند غيرت الفكره و قلت خليني في ديزني والعب واستانس ومب لازم اتسوق

هاي الاسباب

يعطيج العافية أختي احلى من العقد
على التقرير الرووووعة

وبصراحة شدني مقلبكم لأمكم إلي هي فكرة خطيرة وعجيبة بنفس الوقت
ودي أسويها لكل حريمنا والله إنهم يتشهدون وأحنا بناتهم بنفطس عليهم الضحك

وورينا بعد مقالبج لأمج المسكينة إلي معاد سامعه مقالبكم

المشاركة الأصلية كتبت بواسطة هدوء العالم
http://www.arabtravelersforum.com/tr...4/#post4171064

يعطيج العافية أختي احلى من العقد
على التقرير الرووووعة

وبصراحة شدني مقلبكم لأمكم إلي هي فكرة خطيرة وعجيبة بنفس الوقت
ودي أسويها لكل حريمنا والله إنهم يتشهدون وأحنا بناتهم بنفطس عليهم الضحك

وورينا بعد مقالبج لأمج المسكينة إلي معاد سامعه مقالبكم




والله امي مسكينه احسن وحده فينا اهي خخخخخخخ تصدقين البنات العيايز واخوي الدقس الكسلان كان يتحلطم بسبب القطار و ذيلاك مسوين فيها دلوعات يقولون تعب تعب مافي الا امي مسكينه تساندني تقول مافي تعب كله تبون يخدمونكم الله يخلي لنا امي ... بس تبين الصج انصحج تسوين هالحركه في حريمكم وعيايزكم ترا يذبحون من الضحك خخخخخ

https://travel.maktoob.com/photo/sho...1111&cat=12329

اختي احلى من العقد


سجلي اعجابي بإبداعك موضوع في قمة الروعه والدقه

اتمنى ان اصل في يوم من الايام الى هذا الابداع...

تحياتي لك ولما سطرت اناملك من ذوق عالي في فن الكتابه

احلي من العقد ما ندري وش نقول ولا وش نوصف عزلله انتي والمغامسي مبدعين بتقريركم

وين صورة الشنطه خخخخخخخخخخخ

غيرنا المعرف ما قصر المدير العام بهذلته كل يوم اقوله وين معرفي القديم

المشاركة الأصلية كتبت بواسطة همس المسافات
http://www.arabtravelersforum.com/tr...9/#post4172769

اختي احلى من العقد


سجلي اعجابي بإبداعك موضوع في قمة الروعه والدقه

اتمنى ان اصل في يوم من الايام الى هذا الابداع...

تحياتي لك ولما سطرت اناملك من ذوق عالي في فن الكتابه



هلا والله همس المسافات واشكرج على الكلام الي كتبتيه ... ماقصرتي واسعدني وجودج







المشاركة الأصلية كتبت بواسطة فيصل 2006
http://www.arabtravelersforum.com/tr...8/#post4175108

احلي من العقد ما ندري وش نقول ولا وش نوصف عزلله انتي والمغامسي مبدعين بتقريركم

وين صورة الشنطه خخخخخخخخخخخ

غيرنا المعرف ما قصر المدير العام بهذلته كل يوم اقوله وين معرفي القديم




فيصل يافيصل


ركز مع الجزء الي بقتبسه لك من التقرير .. لو كنت مركز عدل في الصوره جان شفت الشنطه .. شوفها عند الباب تحت ...







وهاي الصوره مخصوصه للاخ فيصل .. شوف جمب الباب في شنطة مسدوحه ملونه .. هذه شنطتي شنطة هاواي خخ

متابعين معاج الموضوع اختي

بس صراحه طافتج لعبه هوليوود تاور مو طبيعيه احلى لعبه ركبتها بديزني لاند كلها

المشاركة الأصلية كتبت بواسطة أديــــــــــم
http://www.arabtravelersforum.com/tr...5/#post4176795

متابعين معاج الموضوع اختي

بس صراحه طافتج لعبه هوليوود تاور مو طبيعيه احلى لعبه ركبتها بديزني لاند كلها





والله صح كلامج طافتني اللعبه اصلا مبين عليها انها حلوه بس الزحمه الغير طبيعيه تطفش الواحد تخيلي ننتظر 50 دقيقه يعني ساعه قبل ماندخل واحنا اصلا تعابه ....


بس احس اصلا اني ماحللت ديزني لاند ولازم نرجع لها مره ثانيه ونبات فيها لان من كثر الزحمه على بعض الالعاب احس ان صعب نركبها كلها ..

تصدقين في وحده قالت لي اصلا هي في ديزني لاند مالعبت الا لعبتين من كثر الزحمه بس هاي مايمنع انها استانست وااايد

هااااااا شوقتييييييني لديزني لاند

إن شاءالله ينكتب لنا روووحة في فبراير من عقب ماكان يوليو
بس خيرة من الله نروحلها بالشتاء أفضل من الصيف
وتنصحين الإقامة فيها ولا نروحلها من باريس ونرجع
وهي المدينة بكبرها من المولات و الألعاب والأستديو متى يقفلون إذا متأخر حلو وإذا مبجر يصير ملل صح

وعلى طارئ الألعاب لأمي وخالاتي لعبة الأرجوحة بمزرعتنا بالكويت ندزهم من وراى يتشهدون فشلون الألعاب الكهربائية السهلة ههههههههههههه

ومتاااااااابعة للباقي

[size="4"][color="Purple"]الله وش هالتقرير ياسديقتي ...رووووعه من جد ... ويني عنه !!
اخيرا شفت اماكن جديده في باريس تستحق الزياره ...
عاد كله كووم ودزني كوم ثاني .. ربي يكتب لنا زياره لها يارب ...
متابعيين معك يالغلا ...

مداخله تذكرت يا سارونه تقريرك عن كوريا يوم مره دخلت مول ولا اشوف اربع ايام لكوريا الجنوبيه قلت شكلهم دروا عن سارنه وتقريرها ويسوم تروويج
بس احلي شيء يوم وقفوك نص ساعه خخخ وأكل السينكرز