الموضوع: بحاجتكم يااهل الكويت لاتخيبون املي الله يخليكم

السلام عليكم

الله يعطيكم العافية ابي مساعدتكم لي
انا وزوجي مسافرين من الدمام للكويت بيوم 6/6 باذن الله
طبعا زيارة خفيفة لمدة ماتحددت مابين يومين لثلاثة
وتخيلوا هاذي الزيارة اول زيارة بالنسبة لي ولزوجي لدول الخليج وبنبدا بالكويت اذا الله راد
حنا بنتحرك من الدمام بالليل بحيث نصل الكويت ع الفجر
طبعا الميزانية مو مرة وباقي ورانا الامارات وقطر
وبما انها اول زيارة حبيت استفسر عن مايلي ؛؛؛
1/الفنادق والاجنحة والشقق المفروشة الحلوة والقريبة من الفخامة يعني راقية ونظيفة واسعارها معقولة ومناسبةيعني تكون الغرفة بالريال السعودي حول 300 ريال ونفسي تكون اطلالتها حلوة مثلا ع البحر يعني على شئ حلوو الله يحلي ايامكم
وودي احجز من الان كيف الطريقة..؟
2/ابي الله يسعدكم نفر الكويت الحبيبة كلها في هاليومين (اسواق+اماكن سياحية+سينما) اذا احد يقدر يرتب لي جدول الله يخليكم
3/نفسي احضر مسرحية لطارق العلي امنيتي بس ماادري هل يوجد ووين؟؟
4/كم يساوي الدينار الكويتي ريال سعودي وكم يساوي فلس ريال سعودي؟ومن وين تنصحوني نصرف العمله سواء بالسعودية او الكويت؟
5/ابي مطاعم حلللوة شرقية وخليجية واسعاها حلوة وفي متناول الجميع لان الوضع مايساعد..



اااااسفة حبايبي بس والله العظيم بحاجتكم واعرف انكم اهل نخوة وبتساعدوني

ومالكم مني الا الدعاوي بالسفر

ربي ييسر اموركم جميعا...

مواضيع عشوائيه ممكن تكون تعجبك اخترناها لك:

• رايح الكويت بعيد الأضحى أبي من يساعدني
• اكبر سنتر بوينت
• للكويتيين المساعدة
• لآتردووووني
• زائر من السعودية
• فلل مفروشة بالكويت
• ياخبراء شيرو علي متى احسن وقت للسفر للكويت
• تاشيرة دخول الكويت بري " بالعربية "
• سوق الفقع
• فنــــادق الكــــويت
• السلام عليكم استفسار سريع
• باقي على صلاحية الجواز اشهر فهل يسمح لي بالدخول ؟
• هل استطيع استخدام بطاقات الصراف الخاصه بالبنوك السعوديه فى اجهزة الصراف الكويتيه
• البطاقة المدنية القديمة تصلح للسفر ؟
• مطلوب رقم جوازات منفذ النويصيب بدولة الكويت
• اريد افضل محلات جلبيات بيت حريمي في الكويت
• المفاجأه ايس كريم يجنن من بكداش الشـــــــــــــــــــــام
• المرور بالبطاقة الشخصية
• استفسار اذا ممكن يأهل الكويت
• اي اوتيل اختار ؟ بسرعه تكفون الوقت يمضي

وعليكم السلام ورحمه الله وبركاته

وياهلا ومرحبا فيكم في بلدكم الثاني الكويت


http://www.arabtravelersforum.com/travel503712/

http://www.arabtravelersforum.com/travel525398/


ان شاء الله يفيدونج

[QUOTE=عضوية;5219010]السلام عليكم

الله يعطيكم العافية ابي مساعدتكم لي
وعليكم السلام ورحمه الله وبركاته .. الله يعافيج ..
انا وزوجي مسافرين من الدمام للكويت بيوم 6/6 باذن الله
طبعا زيارة خفيفة لمدة ماتحددت مابين يومين لثلاثة
وتخيلوا هاذي الزيارة اول زيارة بالنسبة لي ولزوجي لدول الخليج وبنبدا بالكويت اذا الله راد
حياكم الله في ديرتكم الكويت
حنا بنتحرك من الدمام بالليل بحيث نصل الكويت ع الفجر
طبعا الميزانية مو مرة وباقي ورانا الامارات وقطر
وبما انها اول زيارة حبيت استفسر عن مايلي ؛؛؛
1/الفنادق والاجنحة والشقق المفروشة الحلوة والقريبة من الفخامة يعني راقية ونظيفة واسعارها معقولة ومناسبةيعني تكون الغرفة بالريال السعودي حول 300 ريال ونفسي تكون اطلالتها حلوة مثلا ع البحر يعني على شئ حلوو الله يحلي ايامكم
وودي احجز من الان كيف الطريقة..؟
انتي اتكلمين عن 300 ريال - تقريبا 22 دينار كويتي عندج هالجم شقق فندقيه وان شاء الله يعجبونكم من سايت booking تقدرين تحجزين
عندج 1 - بودل 3 ليالي 78 دينار ..
2- ميراج سويت 3 ليالي 75 دينار ..
واللي عطاج اياهم اخوي مستر كويت شوفيهم واخذي فكره ..
http://www.booking.com/searchresults...=1&aid=1329869
2/ابي الله يسعدكم نفر الكويت الحبيبة كلها في هاليومين (اسواق+اماكن سياحية+سينما) اذا احد يقدر يرتب لي جدول الله يخليكم
حرام عليج تفرين الكويت بيومين صج ديرتنا صغيره بس ما اتخلص بيومين شوفي هالجدول وان شاء الله يعجبكم ..

اليوم الثالث :

الصبح اتريقون على 9:30 او 10 مطعم لونوتر في مول 360 منطقة جنوب السره على الدائري السادس ريوقهم وااايد حلوو بوفيه وبعد الريوق اتمشون واتسوقون في المول وتوهم فاتحين لادوريه كافيه عندهم خوووش ماكروون عقب ما اتخلصون سوق وتمشي اتغدون في مطعم B+F (امريكي ) اعتقد بس وااااااايد لذيييييذ واتحجزون لكم فيلم ودشونه بعد الغدا ..

عقب الفيلم العصر على 4:30 او 5 تروحون سوق السالميه عند دوار الجوزات الدائري الخامس اتسوقون فيه كل شي واسعاره حلو وزينه ..

العشا بالسالميه شارع البلاجات مطعم الصنوبر ( لبناني)..

او تختار اليوم الثالث وتحط معاه المسيان او العصر paint ball وبعدين تروحون مارينا اتمشون واتحجزون فيلم متأخر وقبل الفيلم تقعدون في مارينا ويفز اللي صوب المرسى اتعشون في احد المطاعم وبعدها تدخلون سينما ..


اليوم الرابع :

الصبح اتريقون في الفندق اتسون ريوق بيتوتي نخي وباجيلا وخبز ايراني جبن وخيار وزيتون من هالسوالف ومبجر على شان وراكم الفروانيه تروحون مبجر لانها زحمه الاسواق ( الحمرا مول دراريه ونفانيف سهرات - والعربيد دراريع وكل شي بعد في الفروانيه واسواقهم ..

الظهر اتروحون الافنيوز واتمشوووووون فيه واتغدون المطاعم واااااايده وبذكرلج جم واحد ( نابكت ايطالي - سواح لبناني - ليلي لبناني - لورنزو ايطالي- رايس شبه كويتي - جاردن ايراني - واسابي ياباني - ماكي ياباني نينو ايطالي والخ ... وادشون سينما واتعشووون يعني اتكلون يومكم كله في الافنيوز على الدائري الخامس وجريب من الفراوانيه ..

او اليوم الرابع بس اتغيرون الصبح تروحون المباركيه الصبح اتريقون في القهاوي الشعبيه وبعد الصلاه تروحون الافنيوز تقضون يومكم فيه .. وبالليل اتعشون في فريج صويلح واذا ماتبون عشا فريج صويلح .. تروحون منطقه البدع القعده حلوه بالليل وكلها كافيهات ومطاعم ( شوكليت بار - بيزا اكسبرس - ستاربكس - شيليز - فرايديز - سراي - كوستا - وسابي - برايم توست - المياس والخ )

او اذا تبون طلعه بحريه

تأجير يخت لمده ساعتين او ساعه

http://www.silsan.net/new/

http://www.nuzhatours.com/


http://www.arabtravelersforum.com/travel487746/
3/نفسي احضر مسرحية لطارق العلي امنيتي بس ماادري هل يوجد ووين؟؟
للاسف مافي ..
4/كم يساوي الدينار الكويتي ريال سعودي وكم يساوي فلس ريال سعودي؟ومن وين تنصحوني نصرف العمله سواء بالسعودية او الكويت؟
1SAR = 0.0732465 KWD
5/ابي مطاعم حلللوة شرقية وخليجية واسعاها حلوة وفي متناول الجميع لان الوضع مايساعد..
تقدرين تشوفين المواضيع اللي حطهم اخوي مستر كويت .. وانا حطيت لج جم مطعم


اااااسفة حبايبي بس والله العظيم بحاجتكم واعرف انكم اهل نخوة وبتساعدوني

ومالكم مني الا الدعاوي بالسفر

ربي ييسر اموركم جميعا...
اللهم اميين ويسر امورج ان شاء الله وحياكم الله في ديرتكم واي استفسار بالخدمه

من ذوقكم الراقي انكم اخترتوا الكويت اول شي //شكرا
ان شاء الله تنور فيكم

حياكم الله وتشرفونا والساعه المباركة


وابد ... طلعتوا من السعودية ودشيتوا السعودية ...


وما اوصيج تمرين مول الافنيوز و 360 .. رااح يعجبكم



والله يعطي الشباب العافية اللي افادوا

عفوا ليش التحرك بالليل؟
طلعوا من الدمام بعد شروق الشمس
على الساعة 5 تقريبا
ساعة 10 او 11 الصبح بالكثير واصلين بالسلامة
إن شاء الله