الموضوع: موريشس حلوه ولكن؟

السلام عليكم...

أبشركم وصلت قبل 3أيام من موريشس, والحمدلله أنبسطنا آخر بسطه, واستانسنا على الآخر.

طبعا الرحله كان فيها بعض الأخطاء:110: ,لكن على قولتهم الواحد مايتعلم ببلاشششش!:24:

كانت المده 8 أيام, شخصين وطفل3سنوات, في فندق لي بافيلون(بصراحه تمنينا انا قعدنا طول المده في الفندق وماطلعنا أي مكان!!بعدين أقولكم ليه؟؟! ),

طبعا المنتجع كان مرره حلو, خدماتهم لا يعلا عليها,الأكل جيد, العشا كان كل يوم بلد(هندي,صيني,بحري, موريشي) وأحيانا يكون نص بوفيه-يعني سلطات و حلى- والطبق الرئيسي تطلبه من المنيو. المساج أيضا كويس,نادي أطفالbombo clubصغير بس حليو ويفي بالغرض, مخصص للأطفال من3-11سنه.

موقع الفندق: من ناحية المنظر جدا رائع مع خلفية جبل le mornواللي ممكن كل يوم تقوم برحله حوله بالسيكل.
أم موقعه بالنسبه للجزيره, فهو بعيد جدا جدا عن الشمال(جراند باي و بورت لوي وأماكن سياحيه أخرى ). وبالإضافه إلى أن لأماكن السياحيه القريبه نوعاما منه قليله ومحدوده وهي

1-caselaحديقة حيوانات (عاديه و مافيها زود) .
2-معبدgrand bassin والرمال الملونه, بالكثير ينقعد فيها ربع ساعه.
3- شلالات(بالنسبه لنا مالين منها في ماليزيا و اوروبا)
4- black river وترى مافيه لا نهر أسود ولايحزنون, كل الموضوع مطل على منظر جميل, برضو بالكثير ربع ساعه.



نجي للأخطاء:

1- أخذت المده كامله في فندق واحد, والله زوجتي ماقصرت تعبت وهي تقول خلنا ناخذ فندقين, لكن علا قولة المثل (تف علا لحيتي ما طعت شور مريتي) المفروض فندقين واحد شمال واحد جنوب, أو شرق وغرب, مع أنهم يقولون في هذا الوقت الشرق ما يصلح لانه رياح قويه.

2-أحنا رايحيين إستجمام واسترخاء, يعني المفروض أنطقينا:36_11_13: في الفندق على البحر والرياضات المائيه والمساج. لكننا ضيعنا وقت وجهد في الدوران في التكاسي على أماكن بعيده وطرقها متعبه ومتعرجه وفي الأخير (من وجهة نظري) مافيها زود, بإستثناء الغواصه طبعا.

3-أخذنا رحله من شركةwhite sand tours إلى جزيرة جميلهle auo cerfs وأكتشفنا بعدين انهم نصابين وأسعارهم غاليه جدا مقارنة بالتكاسى(لأنهم يتكاسرون). تخيلو حاولت فينا المندوبه تبعت الشركه ناخذ الرحله حقت الغواصه وأحنا رفضنا لأنا متفقين مع تاكسي أرخص:24: , فقالت لنا خلاص روحوا مع التاكسي وأنا أحجز لكم بس التذاكر وهذي خدمه مننا واحنا مالنا دخل في سعرها(280دولار شخصين وطفل), قلنا أوكي ,ودفعنا لها كاش:110: ,بعدها رحنا وأتصلنا بنفسنا على الغواصه(الرقم كاتبه أبو عزيز في موضوعه), وتفاجأنا ان السعر210 دولار فقط!!!! يعني لعبت علينا وأخذت منا زيادة70 دولار!! من جد ولعنا :112: .....,الحمد الله تدركنا الوضع والغينا الحجز (لازم قبل 36ساعه) ورجعت لنا فلوسنا وحجزنا بأنفسنا.


4-رحنا لمكان أسمه etoilعباره عن رحله بالدبابات للجبال, لاكن النكبه انه لازم تحجز قبل واحنا ماحجزنا, والنكبه الثانيه انه ممنوع ركوب الأطفال أقل من 12 سنه حتى لو مع أبائهم على نفس الدباب, (يعني بالله وين نحط ولدنا!!؟


بالنسبه لي أصنف موريشس علا أنها شبييييهه ب لنكاوي في ماليزيا ( شواطئ هادئه و منتجعات على شكل أكواخ, حديقةتماسيح وسلاحف,عالم ما تحت البحار,حدائق ومنتزهات طبيعيه وخضره و بحر على مد النظر , طرق متعرجه ومافيه تطور) طبعا مع الأفضليه لموريشس باالنسبه للجو, والأفضليه بمراحل لماليزيا فيما يخص التطور.



أخيرا.. فقد كتبت هذا التقرير المختصر لاعطاء تصوري الخاص عن هذه الجزيره الجميله,
ولكي يستفيد الأخوه في هذا المنتدى من أخطائنا ولا يقعوا فيها.



وإذا كان هناك أي أستفسارات... أحاول الرد عليها بكل سرور :101:

مواضيع عشوائيه ممكن تكون تعجبك اخترناها لك:

• جزر المالديف شهر مارس
• تجربة السفر اثناء الحمل
• هل هذا العرض مناسب موريشيس
• المالديف ثم ماذا سريلانكا ام الفلبين
• إسبوع عسل في المالديف
• كم تكلف اربع ايام بالمالديف
• استفسارات بخصوص المالديف للاستاذ ابو عزيز والجميع
• فزعتكم تكفون للي بيروح لموريشوس الله يوفقكم
• مساعده في رحلة عمري
• المالديف موريشوس ماليزيا لشهر العسل ارائكم
• جديد على المالديف ولدي اساله
• عروض القطرية للمالديف ايهم افضل ؟
• مجموعه من الأستفسارات عن زنجبار للخبراء الرجاء المساعدة
• أسئلة فقط عن موريشيوس ولكم خالص الشكر
• مواقع فنادق موريشيوس
• المالديف وسيرلنكا في ايام هيلتون
• وين اسكن في موريشوس
• شهر عسل متأخر بعد قرابة سنوات زواج خبراء المالديف من فضلكم مساعده
• ضروووري ارجو الرد العاجل
• أجمل الجزر

الحمد لله على السلامة

ومشكور على التقرير المختصر والمفيد

والله أخي : بدر هيجت فيني المشاعر لموريشوس إللي نفسي أروحها ثاني اليوم قبل بكرة ،،،،،

تحياتي لك بلا حدود ،،،،،

هلا والله بالأخوان looklook & matrix ومشكورين على مروركم..

ومثل ما قلت أخوي looklook الفندق روووعه, والسعر ممتاز مقارنه بالخدمات والنظافه والمعامله الراقيه, وحتى توهم معينين مدير جديد للفندق توه جاي من سويسرا من شهرين فقط, وجا بنفسه ورحب فينا أول ماوصلنا, وكل ماشافنا يسئل إذا كان مرتاحين أو في أي مشاكل.

وبالنسبه للدبابات أنا ماأقصد أنا أخطأنا بالذهاب لها, ولكن الخطاء كان اننا ماحجزنا مسبقا, وأيضا أننا مادرينا عن نظامهم بالنسبه للأطفال (يعني ضربنا مشوار ودفعنا حق التاكسي علا الفاضي) , بالعكس المكان جدا جميل وأتوقع أن التجربه رائعه , لكن شنسوي ظروفنا ماسمحت.

الحمدلله على السلامة اخوي بدر

اتمنى انكم انبسطتوا في موريشوس

و العيوب لابد منها في كل ديرة و الاخطاء تحصل مهما حرصت

لكني لاحظت انك ما خططت زين للرحلة او على الاقل كان بامكانك تفادي بعض الاخطاء

يعني لو قرأت تقارير الاعضاء و ملاحظاتهم كان انتبهت لها

على سبيل المثال سعر رحلة الغواصة انا وقعت في نفس المشكلة و كتبتها في تقريري و حذرت من الحجز عن طريق وايت ساند

ايضا كثير من الاعضاء ينصحون بتغيير الفندق و تقسيم الفترة بين الشمال و الجنوب او الشرق و الغرب و منهم منذر و فهد و غيرهم حتى تتوزع المشاوير

لكن عموما الواحد يستفيد من اخطاءه و يعتبرها درس من دروس الحياة
و جزاك الله خير انك لفت انتباه الاعضاء لهذه الاخطاء حتى يستفيدوا منها

تحياتي

طيب كيف معاملة الشعب هناك وهل هم يستغلون الخليجي

مكة

لا تاخذ هم الفطور......... تنويع و اكلات حلوة بتناسبك انت و الصغار

خذ هاف بورد فطور و عشا عليهم و انت مطمن ....

بالنسبة للسوبرماركت ما فيه ... و ها الشي في كل الفنادق لانها تكون منتجعات بعيدة عن المدينة

لكن انا كنت كل رحلة اطلعها و انا راجع اقول لسايق التاكسي يمر سوبرماركت و خذ لك من كل شي


اربعة ايام ممكن اقول لك كافية ....... بس خشارة ها التذاكر و المسافة البعيدة عشان اربع ايام

خلها 6 عشاني

انا حاب اسافر انا والاهل اربع او خمس ايام للاستجمام والراحه فقط ومحتار بين سيشل وموريشوس ايش رايكم وهل في سيشل ناموس وشكرا

مشكورييييييييييييييييييييين كثييييييييييييييييييييييييييييير على تعليقاتكم الحلوه...


تصدق أخوي فتى الشرقيه من جد هذي اكثر سفره خططت لها وقريت عنها, وتقريرك أنت بالذات قريته شخصيا, لكن الظاهر من كثر ماجمعنامعلومات خربطنا الوضع.

وحتى سالفة تغيير الفندق فكرت فيها , لكن حسيت أصلا ان مدة 8ايام مافيها مجال تقسيم
(مايمدينا حاطين غراضنا إلا نرجع نشيلها) وأنا بصراحه أحب الاستقرار وماحب كثر التنقلات, وأنت عارف معاي طفل وحوسه, بالإضافه لعفش المدام اللي شكثره....

يعني بالرغم من هذا قضينا أوقات رائعه لاتنسى:smile105:

الله يسلمكم جميعا... وأسف كثيييييييييييييير على التأخييييييييييييييييييير .

أبوعزيييييييييييز.. ياسلام عليك والله انك رهيب, الكلام اللي قلتاه هو المغزى من تقريري..!


taraf : الشعب جدا محترم ومعاملتهم راقيه, خاصه العاملين بالفنادق, واحنا ماحسينا ان فيه استغلال للسياح بشكل عام(باستثناء سالفة الغواصه) عموما الواحد لازم ينتبه.

الاخ مكه: الفندق اللي سكنت فيه فطورهم أوروبي بحت (خبز,زبده,كروسان,كيك,كورن فليكس, بيض,فواكه,وأحيانا جبن شيدر) بالنسبه لنا كان جيد , لكن طبعا ماياقارن بماليزيا.

بالنسبه للأعاصير أنا ماسمعت أي شي عنها, لكن مثل ما قالو الأخوان, في الوقت الحالي ماينصح بالشرق لأن الرياح قويه , وبتحرمكم من السباحه والرياضات المائيه.

wabwab الناموس في موريشس قليل, ولا يصل لدرجة الأزعاج.
بالنسبه لسيشل اللي أعرفه عنها انها غاليه جدا.

:115: سلاااااااااااااااااااااااام..

اخوي...مشكور على التقرير ..وصراحة شوقتنا للديرة ..لكن لي سؤال..بالنسبة للاكل الحلال هل هو متوفر ام لا؟؟ لان لي تجربة سابقة بالفيليبين مع عدم توفر الاكل الحلال ولا ابي اكررها..
abonjoud

مرحبا أخوي ابو نجود,,,
الفندق اللي أنا ساكن فيه(وأتوقع جميع الفنادق) غالبية الاكل حلال, وكان رئيس الخدم مسلم, وكل يوم ينبهنا على الأكل الحرام, وحتى لو كان عندك أي شك ممكن تسأل أي واحد من الطاقم وبيساعدونك فورا, أحيانا على الفطور ماكنا نلاقي الجبن الشيدر فنسألهم عنه ويجيبون لنا على طول.
وفي كل الأحوال يكون الأكل الحلال اكثر وعندك منه خيارات متعدده(لا تشيل هم)

الحمد لله على السلامة

الحمد لله على السلامه

عندي سؤال ماحد سكن في فندق (لي سان جيرمان ) يقع في الشمال وهو 6 نجوم
حتى يسمونه ( ون اند اونلي )
بعدين مستغربه من الاخ بدر يشيل هم الاغراض والترتيب
لما رحنا هناك اول ما نوصل الفندق كانوا يستقبلونا ويجلسونا ويقدمون لنا العصير
وبعدين يقولون اتفضلوا على الغرفه
اقول لزوجي والشنط ؟؟؟؟؟؟
ولما دخلنا الغرفه لقيناهم مرتبين جميع اللى بالشنط وحاطينها بالدولاب
اللللللللله احلى شي ريحوني
وكذلك لما نخرج من الفندق واحنا سكنا ب 3 فناق
واحد بالشرق وواحد بالشمال وواحد بالغرب

الأخ شاقي لوف& wted ..
الله يسلمكم ومشكورين على المرور.

الفيصصصصصصل..
بالنسبه لفندق السانت جيرمان, مافيه كلام, فندق رائع وفخم.. لكن قليل اللي يسكنون فيه(من وجهة نظري) لسببين:

1/ غاااااااااالي , ممكن تسكن في فندق ثاني5أو4 نجوم ممتاز ويفي بالغرض وبسعر أقل:24:

2/الفندق موجود في الساحل الشرقي اللي غالبا ماتكون فيه الرياح قويه وبالتالي مايستمتع بالسباحه والرياضات البحريه..

أما سالفة الترتيب, أنا زرت دول كثيره, بس بصراحه ماعمري شفت أحد يرتب الأغراض اللي بالشنطه, والله وناسه:36_1_11:

الفيصل

إيش الفنادق إلي سكنتو فيها ..؟؟

بالنسبه لفندق le saint geran هو بالتحديد يقع في الشمال الشرقي على (شرم ) تقريبا وله ساحلين
شرقي وشمالي يعني يمتد من الشرق الى الشمال وعشان هو على شرم يعني يعتبر له شاطيء غربي
ما ادري فهمتوا شرحي او لا (( المشكله ما اعرف احط الصور كان حطيتها لكم ))
وبعدين لما نروح الغرف نلقى ترحيب على شكل كروت من مدير الفندق باسم العيله وحده لى وحده لزوجي
الى الان معي


وبالنسبه للفناق اللى سكنا فيها
اولا : the residence
يقع في الشرق وجميل جدا وماكان فيه عوض بالليل بس موسيقى على البيانو وقت العشا وشفنا
عايلتين عربيتين فيه بس
ثانيا : le saint geran
يقع في الشمال تقريبا 6 نجوم مميز جدا يسمونه (one & only )فعلا جميل جدا
ومافيه ولا ابن امه عربي وتحس الاجانب اللى فيه على مستوى يعني ممكن تشوف فيه ممثل عالمي
السنه الماضيه سمعت ان الامير الوليد حجزه بالكامل
المهم بالليل تعال تفرج على انواع الكشخه بالبوفيه والسهره حقتهم مرررررررررره مميزه
تجنن حتى الفرق اللى يعرضون يقلدون الفديو كلبات العالميه كان قدامك مادونا او ففتي سنت
وناسه مرررررررررره
ثالثا : الهلتون طبعا اقل من اللى قبله وماعجبني وفيه عرب كثييييييييير ويقع بالغرب
واللى يقول ان الرياح بس بالشرق لا حتى بالغرب فيه ولما كنا بالهلتون كانت مرررررره قويه
وهي بالغرب

أنا ماقلت أنها بتكون في الشرق فقط :108:

(يعني بالعقل:114: الرياح بتهب عالشرق وبتوقف ومابتجي عالغرب !! )

أنا اللي أقصده أنها تكون أقوى على الشرق لأنه يتصدى لها بالأول وبالتالي تخف عالغرب,
وإذا كانت الرياح الي شفتيها بالغرب قويه فكوني على يقين أنها قويه جدا بالشرق..

هذا اللي سمعت من أهل البلد(أهل مكة أدرى بشعابها) الله يشرف مكه.

ولا أنا رحت وجيت ماجتنا أي رياح....

السلام عليكم
اخيرا اقدر اشارك في المنتدى بعد طول انتظار
حجزت لمورشيوس 5 ليال 6 ايام ولأول مرة للجزيرة اعتقد تكفي لي ولزوجتي طبعا الواحد رايح يستانس على الشاطئو مغامرات في الجزيرة بتكون متعه انشالله
تمنوا لي التوفيق

لدى سؤال مهم للاخوان . وهذا السؤال لم اجد له اجابة سابقا وحتى الان . حتى اننى غيرت وجهتى عن موريشس سابقا بسبب هذا السؤال .

سؤالى هوهل هناك احراج لنا بسبب ان زوجتى تلبس العباية المحتشمه ( نقاب فقط ) من حيث التعامل ونضرتهم لنا .


اتمنا منكم الاجابة على هذا السؤال

-بالنسبه للمطار لاتشيل هم أبد, إذا جيت عند الجوازات توجه للمكتب اللي فيه حرمه, وهي إذا شافت زوجتك مغطيه بتاخذها لغرفه قريبه عشان تكشف فيها وتختم جوازها.


- بالنسبه للعبايه والغطاء(أفضل ماتكون سوداء)و لابد مايكون فيه بعض نظرات وأستغراب من السياح خصوصا (شي غريب بالنسبه لهم) , لكن مضياقات مافيه أبدا أبدا أبدا. البلد مرره أمان, والشعب حبوب ومحترم جدا.


-على فكره لما رحنا العاصمه شفنا كم وحده من اهل البلد لابسين عبايات سوداء ونقاب عادي.

-بالنسبه للخصوصيه على الشاطئ, في ساعات الصباح الأولى.


أتمنى أكون افدتك.:101:

اخوى الغالى badr كلامك دفعنى وخلى حماسي يزداد كثيرا لسفر لتلك الجزيرة الساحرة . واتمنى لك التوفيق

ok ok ok okay ya shapaaap

طيب بالنسبه للتعري على السواحل كيف

يعني انا أشوف صعبه ان الواحد يروح ويجلس ويمينه ويساره كله 00000000000

وضحوا لي وشلون

وهل ممكن الواحد ياخذ شاليه ويكون فيه خصوصيه تامه

أخي m@r

طبعا الواحد يقدر يدبر نفسه هناك..
يعني الشاطئ طويل عريض تحاول تبعد عنهم وتلاقي مكان صاد شوي..

وبعدين مثل ماقلت الفتره هذي من السنه السياح الأوروبيين يكونون قليل..

وأيضا سبق وذكرت أن أفضل وقت للخصوصيه على الشاطئ في الصباح.

بالنسبه للفلل بشاطئ ومسبح خاص فيه
منتجعone&only le touessrok

يعطيك العاااااااااااااافيه

السلام عليكم ..
انا من الامارات ..
وعندما اتصلت بالامارات للعطلات للاستفسار عن السعر ..
قالوا.. تذاكر طيران لشخصين وطفلين ( 3 و 5 سنوات ) ( دبي - موريشوس- دبي ) لمدة سبع ايام فقط في شوقر بيتش في غرفة من نوع Beach Villa طلعــت بــ 24800 درهم ! ( 24800 ريال )
اليس السعر غالي جدا وانا موجود في الامارات ..
هل اذهب للسعودية واحجز الرياض دبي موريشيوس دبي الرياض .. يمكن يطلع السعر ارخص :114:

أرض الامارات

الأسعار نفسها ماتفررررق من الرياض من دبي

وعليكم السلام..

أخوي بصراحه أنا أشوف أن السعر غالي , خصوصا أن الفتره هذي من السنه لا تعتبر موسم سياحي بالنسبه لموريشيوس, فبالتالي المفروض الأسعار تنزل..

أرى أنك تتصل أولا على مكتب الأماراتيه في الرياض وتشوف كم بيعطونك سعر, وإذا كان فيه فرق يستاهل ,
أحجز من عندهم..