السلام عليكم ورحمة الله وبركاته
كيفكم ياعضاء منتدى المسافرون العرب واحد واحد
ان شاء الله انكم تمآآم
مثل ماانتم شايفين النك نيم تبعي
انا الحمد لله ملكت على بنت الناس
واتفقنا انا نقضي شهر العسل في اندونيسيا تحديدا في بالي
طبعا الزواج بيكون 7 يوليو 2011 يعني السنه الجايه بتقولون ليش بعد سنه لان بنت الناس المذكورة اعلاه تبي تكمل الثانويه فارق السنتين بيني وبينها في العمر يعني الحمد لله علشان محد يقول هذا شايب
توني مخلص الثانويه وتوني متوظف
تخطيطي للسفرة
يعاب علينا نحن العرب عدم التخطيط للخمس سنوات القادمه بس انا نويت اصلح هالعيب
مثل ماقلت زواجي بيكون يوم الخميس 7 يوليو في الرياض اللي بيحضر لاينسى العانيه في الحساب ويحاول يسحبها يوم الثلاثاء تعرفون الصرافات عندنا ماتخرب الا الخميس والجمعه سبحان الله المهم راح اقضي اول ليله في الرياض والساعه 14 من بكرة 8 يوليو ابي اروح لمكه لعمل العمرة يعني توقيت الوصول بيكون 22تقريبا ونكون احرمنا من السيل الكبير وخلصنا امورنا
اذا خلصنا من العمره نتوكل على الله ونمسك طريق جده ونقضي يوم هناك (
+تمشيه)وبعدها وينك يالمطار الرحله على الخطوط السعوديه بتكون يوم السبت 9 يوليو الساعه 21.25 والوصول الى جاكرتا الاحد الساعه 11.20 (15.20بتوقيت جاكرتا) وبعدها على طيران ليون والمغادرة من جاكرتا الساعه 18.45 والوصول الى بالي 21.35 والتوجه الى الفندق مباشره
وفي يوم الاثنين يبدأ شهر العسل الفعلي بيكون 12 يوم بالتمام والكمال يعني بيخلص يوم الجمعه الثاني.
طيب بعد شوي بنشوف الـ12 يوم ايش بسوي فيها.
اهم شيء الرجعه
المغادرة من بالي بتكون يوم السبت 23 يوليو الساعه 6.40 طيران ليون والوصول الى جاكرتا الساعه 7.30 نفطر وبعدها وينك يالخطوط السعوديه.
المغادرة من جاكرتا بتكون في نفس اليوم الساعه 11.35 بتوقيت جاكا (7.35 بتوقيت السعوديه) والوصول الى جده يوم الاحد الساعه 20.45 بتوقيت السعوديه ثم التوجه الى الفندق والمكوث يوم واحد نوووووم(اهم شيء في الحياة هو النوم) وعند الساعه 13 من ظهيره يوم الاثنين يتوجه العريس وعروسه الى الرياض ويحاولون يلحقون يتعشون مع ابو العريس وخلاص
طبعا كل شيء قريتوه واللي بتقرونه بعد شوي بيكون بعد قول ان شاء الله
طيب جينا للاهم
سالفة الـ12 يوم الذهبيه
انا بحياتي ماركبت طياره (مو خوف) بس السيارة احسن توقف متى تبي وتمشي متى تبي
المهم انا ياشباب ابي اعلمكم اللي ابيه في بالي (قصدي مو انا اللي ابيه حتى المدام) ماأجمل المشاركه
نبي التالي/
سكن ممتاز مو فشخره ابيها للترويشه والنوم فقط ويكون مو غالي يعني من 80 الى 100 دولار باليوم
شلالات
حديقه الطيور والقرود والفراشات والفيله
حديقه سفاري
حديقة ترتا قانجا
رحله جيب سفاري
مدرجات الارز
بحيرة باتور
بحيرة براتان
البحيرتان اللي تفصلهم اشجار
طبعا هذا اللي اعرفه عن بالي
ابي منكم طلب يااخوان
ابي جدول لهابرامج لمدة 12 يوم
اللي موجود بالقائمة مو شرط يكون الزامي ممكن يتغير بشي ثاني مو مشكله
طيب جينا للاهم
الفلوووووس صدق انها وسخ دنيا بس نحبها واجد
جميع تذاكر الطيران تكلف 4500 ريال معي لها الى 5000 ريال (الحجز بيكون شهر 3 ميلادي ان شاء الله)
السكن حدي فيه 4500 ريال للـ12 يوم يعني باليوم 375 ريال بالضبط 100 دولار
التكاسي ان شاء الله مااحتاجهم بس بعطيهم 1350 ريال للـ12 يوم يعني باليوم 112.5 ريال بالضبط 30 دولار ( ياليت لو فيه عروض للاماكن اللي فوق ويكون فيه توصيل مجاني يكون احسن)
المطاعم بعطيها 1200 ريال يعني للـ 12 يوم 100 ريال يالضبط 26 الى 30 دولار
المشروبات الخفيفه والتسالي والليز وغيره اعطيه 120 ريال يعني للـ12 يوم 10 ريال بالضبط 23800 روبيه
التمشيات والعروض وتذاكر الدخول من الى 4000 ريال يعني للـ12 يوم333 الى 350 ريال بالضبط 89 الى 100دولار
ملخص الرحله
تذاكر طيران من جده الى جاكرتا الخطوط السعوديه & من جاكرتا الى بالي طيران ليون تكلف 5000 ريال
السكن يكلف 4500 ريال
التكاسي1350 ريال
المطاعم 1200 ريال
المشروبات الخفيفه والتسالي والليز وغيره 120 ريال
التمشيات والعروض وتذاكر الدخول من الى تكلف 4000 ريال
يعني شهر العسل بيكلفني 16170 ريال سعودي بالضبط 4312 دولار امريكي
لاتنسون اني عامل حساب الزنقات برصيد مفتوح
يعني اختصار للحوسه وهالارقام بقولكم ان الميزانيه 11170 ريال غير تذاكر الطيران
بتكفي ويبقى منها ان شاء الله
الزبده
انا خليت بين وصولي الى جاكرتا الخطوط السعوديه والمغادرة منها الى بالي طيران ليون 3 ساعات ومثلها في الرجعه , هل هي كافيه علشان اخلص امور الفيز وتنقيل العفش من طيارة لطياره
..؟؟؟
ابي منكم الله لايهينكم جدول مفصل للـ12 يوم الذهبيه يعني متى اقوم ومتى انام لاتصدقون هاه ماابي اتوهق مع المعزبه ):)
اهم نقطه كيف تبوني اسوي بالفلوس كم احول منها للدولار وكم للروبيه؟
وسالفة الملابس كم نآخذ لبسه ونبي نآحذ شناط ظهر زي حقت المدارس نحط فيه الفسحه وش رايكم؟
ومشكورين على رحابة صدوركم مقدما
وان شاء الله اذا براسي سؤال بطرحه هنا
والسلام عليكم ورحمة الله وبركاته
مواضيع عشوائيه ممكن تكون تعجبك اخترناها لك:
رد مع اقتباس
ودي افيدك لاكن الموضوع راح يروح عليك يعني لاتستعجل
المفضلات