الموضوع: زيارتي لوزارة التعليم العالي

سم الله الرحمن الرحيم ...

والحمدلله رب العالمين .. والصلاة والسلام على اشرف الانبيا والمرسلين

وبعد



اول شي اهداف زيارتي لوزارة التعليم العالي هي :

1- السؤال عن معامله احد الاصدقاء خارج الرياض
2- زياره الوزارة والتعرف عن قرب كيف تنجز المعاملات



قررت اني ازور الوزارة صباح يوم الثلاثاء 17\9\1426هـ

بعد التنطيش في التلفون كل ما ادق مشغول ولا محد يرد .. واذا رد يرد عليك واحد كنك داق عليه ببيتهم يرد من طرف خشمه . واذا سالته عن شي قال مدري تعال للوزارة ( نعنبو بليسك اجل منهو اللي يدري ؟؟ ) طيب افرض واحد يبي يستفسر عن شي وهو خارج الرياض ؟؟ في جدة او في الشمال او الجنوب!! تصرف غريب من مستقبل المكالمات المفروض في مثل هالمواقف تستنفر الوزارة وتفتح عدد كبير من الخطوط وتوظف شباب واشدد على كلمة شباب يفيدون المتصلين ولا وش رايكم ؟
وبالفعل قمت الصباح الساعه 10 وركبت سيارتي وتوجهت الى مقر الوزارة الواقع بوسط تقاطع المعذر مع التخصصي ..

طبعا بعد ما ضيعت شوي ودلني لموزين الله يجزاه خير ,,

لبقت سيارتي ونزلت بس الى الان ما ادري وين اروح اي باب ادخل ؟

سئلت احد المراجعين عن البعثات اشار على احد الابواب الصغيره وقالي هذا !!
دخلت مع الباب .. ولا الممرات والصاله تعج بالمراجعين ..

حاولت اكتشف مكاتب الدور الارضي .. وبالفعل خذيت لفه على مكاتب الدور الارضي .. بس انا كنت ابي مكتب الحميضي او صالح الشيخ ..لاحظت موظف الدي اتش ال (dhl) يروح ويجي ومعه اوراق كثيره اعتقد انها خطابات القبول من الجامعات الامريكية ..

سئلت السكورتي الشايب المحترم بصراحه كان موجود على مكتبه في وسط الصاله مبتسم ويساعد الجميع عن مكتب الحميضي ,, قالي اطلع مع الدرج بتحصل مكتبه في الجهه الشماليه .. شكره وطلعت الدرج .. ولا زحمه بعد فوق وكانتت الزحمة شديده عند مكتب مدير البعثات وكلهم يبون خطاب للسفاره علشان الفيزا وجمب مكتب مدير الابتعاث مكتب صالح ال شيخ وكان مقفل .. ومكتوب على الباب اللي يبي يقدم يجي الساعه 9 اليل معناتها ال شيخ ما يداوم الا الساعه9 اليل .. حاولت ادردش مع احد الطلاب .. وقالي انه من امس وهو يراجع علشان خطاب السفاره وقالي الزحمة خفت بكثيرررر عن قبل معه قبول من جامعه في فرجينا وناقصه خطاب علشان يقدم على الفيزا ..

سؤ تنظيم غريب جدا في مكتب مدير البعثات وفي الوزارة عموما .. تجد المراجعين بزدحام واقفين عند الباب ولا في لا كراسي يسترحون فيها .. واخينا في الله مدري وش فيه معطلهم !!

اللي لفت انتباهي ان اكثر المراجعين في الوزارة من الموظفين !! اقصد بالموظفين يستقيلون من وظايفهم ويقدمون على البعثات وهذا خطا .. ليش يضيقون على الطلاب في بعثاتهم !! المفروض من الوازرة تتابع هذا الموضوع .. خلاص اذا واحد توظف المفروض تبتعثه الجهه اللي متوظف فيها مهوب يروح يستقيل !! وكثير قابلتهم وتكلمت معهم .. وكذالك لاحظت مراجعين اللي يبون يدرسون ماستر ودكتوراه اكثر من مراجعين اللي يبون بكالوريس .. وكذالك لاحظت وجود العديد من الطلاب اللي اشكالهم توحي با انهم غير سعوديين يقدمون على البعثات .. اعتقد انهم من اللي حصلو على الجنسية قريب ..


هذي ابرز ملاحظتي من خلال زيارتي الاخيره ..










مع السلامه

مواضيع عشوائيه ممكن تكون تعجبك اخترناها لك:

• بريطانيا الإبتعاث والإلحاق ببعثة
• استفسار معاهد اللغة في ولاية كارولينا الشمالية
• اريد الدراسه فى امريكا
• كرت التطعيم واهميته في امريكا مهم
• اهل كالفورنيا بليييييييييييييييييييز
• طياركنداأمريكادراسة
• لمعرفة فروق التوقيت بين مدينتك واي مدينه
• اللي يعرف عن نيو جيرسي يدخل ضروري بحاجتكم
• للي يعرف انقليزي كويس ؟ وخبرة بالجامعات
• الفاكس والايميل اللي ترسل اله الشيك الملغي للملحقية ؟
• كم تكلفة دراسة لغه لاقل من سنه ؟؟؟؟؟؟؟؟
• هل يوجد معهد لغة نسائي في أمريكا؟؟؟
• موظف حكومي ويرغب بأكمال الماستر في القانون الدولي
• ابي معهد لغه تبع جامعه والله طفشت من
• بخصوص التسجيل لبعثات الوزارة من جديد
• قبل تمشي ملبورن تعال ابيك بكلمة راس
• الدورات الصحيه لطلاب السنوات التأسيسيه بالطب في أمريكآ
• ضاع كرت السفارة
• هاااام،، اي مستندات اصطحبها معي للتقديم على الماجستير بعد اجتياز اللغه ياخبراء؟؟
• البيضاني ميسون ملبورن ولا يهون البقية

هلا ابوداحم

والله لخبطه في لخبطه

حرام يسمونها وزاره هذي خرابه

والقهر انو مافيه تنسيق بينهم وبين السفاره

انا صارلي 3 شهور ابغى موعد مع السفاره ومافيه فايده

واتصل على الوزاره اقول وش الحل يقولون ماعلينا منك

اسلوب غبي الصراحه

حسبي الله عليهم الي دمروا الشباب

انا اعرف 5 فصلوا من العمل يوم طلع لهم خطاب السفاره يعني خلاص انتهاء كل شي

باقي فيزاء ويتوكلون

لكن مافيه تنسيق بينهم وبين السفاره الامريكيه

ياحيف بس

لك كل الود

والله أنا رحت الوزارة أكثر من مرة قمة في الاحترام والمعاملة والخدمة
وخاصة حارس الأمن مثل ما قال أبو داحم الشايب الله يوفقه دنيا وآخره
يشهد الله ان انفتح له باب دعاء من مجموعة كثيرة من حيث لا يحتسب وهو يستاهل
لكن المشكلة في الناس قبلهم في الوقت اللي الناس صارت اما تسلم الفيز او i20 تجي
ناس تبي تقدم وعلى ما يعملون من سرى وتنظيم يخلفون النظام واللي توه داخل يطنش أم السير والعالم
اللي واقفه وتخش قدام واللي واقف ورى الموظف ينتظر فرصة أو حنية مثل الكلاب اللي تنتظر لحمة
تطيح من يد راعيها
ليش نلومهم وحنا محنا مرتبين أوراقنا ناقصة وهم في كل باب في الدور الثاني مكتوب الأوراق المطلوبة
لكل خطوة خطاها الطالب من الضمان المالي وحتى خطاب الابتعاث وحتى موقع النت موفر كل شي بدون ما تروح لهم تصلح كل شي بالنت بس تروح لهم تسلم أوراق والسرى ما يطول فيها وامشي وانت متطمن
ما قالوا خطاب السفارة ينزل بعد العيد العالم زعلانة وكل شوي طابه الوزارة وزعيق ونهيق
واللي راح بعد العيد مباشرة يضارب يقول وين الخطاب
عن نفسي جاني الخطاب في أول أسبوع من الدوام بدون ما أكلف على نفسي واتصل أو
أروح وأصلح زحام جاني على النت وطبعته وخلاص
لو طعت المتخلفين من الشباب كان ما فتح باب الوزارة الا وانا أول الحضور
تقول كأن كل شي بيطير عنك لا ويقولن روح تأكد طيب ماالخطاب قدامي أروح أصلح أيش
بالله مو قمة في التخلف
هم شوي وتحصل عشرة انفار طابين عند مسئول ناقصة اوراقهم تكفى يا شيخ الله يوفقك مشيها لنا :112:
يشهد الله ان وزارة التعليم العالي خدمة ناس كثير بإحترامها لما يحتاجه المواطن ويا ليت كلامي وحدي
بل كلام مجموعة كبيرة من الشباب اللي راحت
شباب مو شياب
بعدين مو لازم من شخص نحكم على جماعة بكبرها
الركادة زينه ومثل منت مستعجل هم برضوا مضغوطين انت مو لحالك معاك بشر كثيرة
فلا تحولوا النعمة نقمة واحمدوا الله وتمدنوا شوي يرحم والديكم
بالنسبة للموظفين بصراحة بعثات البكالوريس خطأ من الدولة
هي ما قصرت جزاها الله خير تبي من الشباب التطور والرقي بس الآن بيصير عندنا تنافس في الوظائف
المفروض ما يبعثوا الا المميزين فقط من 95 وما فوق صار عندنا السنة هذه 11 جامعة حكومية والسنة الجاية راح تكون 15 جامعة حكومية موزعة على أغلب مناطق المملكة غير الكليات بالاضافة انهم مراهقين
ينخاف عليهم من الانحلال والفساد
كان المفروض تفتح البعثات للماجستير والدكتوراه فقط
والله يوفق الحكومة والشعب لما يحبه سبحانه ويرضاه
هذا رأيي

يا هلا والله امير القلوب


والله يكون في عونكم ..

والله صحيح المفروض يكون في تنسيق بينهم وبين السفاره بدل ماهم مبهذلينكم كذا ...



لكن وش تقول ؟

الشكوى لله !!



وشاكرلك مرورك ..

انا مع النقطة المهمة التي ذكرها ابن السعودية بخصوص ان تنحصر البعثات على الماجستير والدكتوراه

فعلا الامر خطير

السلام عليكم
والله انا صراحه متفق مع صاحب الموضوع 100% بخصوص الزحام وعدم التنظيم الجيد داخل اروقة الوزاره بس ياشباب لاتنسون ان الظغط الكبير عليهم هو الي سبب هذا الشئ وبعدين الوزارة لها خطة ماليه سنويه ومن الصعب انها تعين موظفين جدد لانها مقيده بالميزانيه . ومع ذلك ويشهد الله ان تعامل موظفي الوزارة كان في قمة الادب والاحترام مع وجود هذا الضغظ.
بس الشئ الي صراحه يرفع الضغط ان فيه ناس مخلصه اوراقها واجراءاتها وجايه الوزارة على قولتهم يشمشمون الاخبار وهذولا الناس هم سبب الزحمه ويكرهون الموظف في شغله يسألونه 6000 سؤال بالثانيه وبعد الموسوين تلقاهم يلفون على كل الموظفين ولو حاصلهم يروحون مكتب الوزير يسألون ماعندهم مانع وشغالين تحطيم في الشباب قال فلان ودخلت على فلان :112:
وبالنسبه لرا ي الشباب بخصوص اقتصار البعثه على طلبة الماجستير والدكتوراه انا مؤيد وبعنف , لدرجة والله وصل الامر اني قابلت طالب مبتعث عمره 17 سنه اقسم بالله انصدمت قلت ياولد فتحوا ابتعاث لطلاب المتوسط الحق ماتلحق قل لااخوك :101:
ولايفهم من كلامي هذا اني ماابي الخير لااخواني خريجين الثانوي بس صدقوني نظام الدراسه الجامعيه مختلف جدا عن الثانوي وفيه الطالب يعتمد على نفسه ميه بالميه وبعدين فكر الطالب ينضج في الجامعه وتتوسع مداركه ويحتك مع الدكاترة ويكون التعامل رجل لرجل عكس الثانوي طالب لمعلم .
تحياتي عبادي

كلمة وحدة ولي عودة،،، اللي مايعرف يشغل الكمميوتر او مايعرف للانترنت او حتى ماعنده ايميل
امووت واعرف هذا وش بيسوي بامريكا هذا مايروح ارحم له ...

أنا رايي من راي فارس باللي قاله
وأعارض اللي يقولون المفروض البعثات تقتصر على الماجسير والدكتوراة
وما ادري هل هذا حسد لان الفرصة ما حصلت لهم يوم تخرجوا من الثانوية وان شا الله يكون غير هالسبب
واذا كان مثل ما قال بعض الناس انهم مراهقين وواحد عمره 17 سنة بيرووح امريكا
أنا اعتقد ان هالناس هم مستقبل البلد واذا كان على العمر والنضج ترى لو نرجع ايام الصحابة
نلقى الرسول يأمر اسامة بن زيد وعمره 17 سنة على المسلمين وفيهم من فيهم من كبار الصحابة فلا أعتقد ان العمر يسبب اي مشكلة ولا يجي واحد يقولي انت تقارن شباب هالايام بالصحابة لا لا
لكن هذا مثال يبين ان فيه من خريجي الثانوية من هم انضج من بعض خريجي البكالوريوس
ومن هم فلتات ان صح التعبير في دراستهم فمن اللاعدل انك تحرمهم من تطوير مواهبهم وعقولهم على حساب بعض المراهقين الذين يرون في بعثات امريكا سياحة
لكن يكون الحل مثل ما قال أخوي بوداحم انك تبعثهم لكن تصير متابعة لهم وهالمتابعة المفترض انها ما تقتصر على طلاب البكالوريس فقط
والحل ايضا انهم ما يتساهلون في النسب مثل ماهو حاصل شرعي نسبته 80% أو علمي نسبته 70% صدر لهم قرار البعثة ولا يكون أيضا مثل ما سمعنا ان ناس خريجي شرعي نسبتهم 75% راحو يدرسون هندسة كهربائية في امريكا فأي شهادة بيحصلوونها وأي خبرة بيكتسبونها
اذا فحوى كلامي انه ما في مانع من بعثة خريجي الثانوية لكن بنظامية اكثر وعقلانية أكثر أيضا
والإختلاف في الراي لا يفسد للود قضية

اهلا عزيزي . فارس المسافرين .. ما تقدر تلوم الشباب وتحرمهم من البتعثات علشان ماعنده ايميل او ما يعرف يشتغل على الانترنت .. صحيح التعليم الان يعتمد بشكل كبير على التكنلوجيا .. لكن مو ذنب الشباب انهم ما يعرفون للكمبيوتر .. هذا امر وواقع ولازم نتعترف فيه نسبه كبيره جدا من سكان المملكة ما يعرفون يستخدمون النت .. وهذي لو نفسرها بتدخلنا في قضية ثانية ساسية التعليم والمفترض من الابتدائية يكون في مواد مخصصه للحاسب والشبكة العالمية ..

يعطيك العافيه اخوي ..



عزيزي منسم تنسم مشاء الله درر



صحيح لا مانع من ابتعثات خرجي الثانوية العامه
نقطه مهمه عدم ابتعاث من نسبهم طاااايحه بالعامية ..

انا اعرف شخص زميل لي تخرج من الثانوية قبل كم سنه وكانت نسبته 76 شرعي ابتعث بالواسطه في تخصص هندسة الحاسب .. اخينا في الله دج اربع سنوات ابوه يصرف عليه والدولة تصرف عليه .. وبعدها رجع ومامعه شهاده يوم سئلوه وين الشهاده قال والله الدراسة صعبه هناك !!!




ويعطيكم العافيه

السلام عليكم
الاحظ ان الموضوع المطروح اخذ منحى ثاني وهو اننا حاسدين طلاب الثانوي على الفرصه الي وفرت لهم وهذا كلام 100% غير صحيح لانه وباختصار خريجين الثانوي هذولا منهم يامنسم هم اخوي واخوك وولد عمي وولد عمك ومااتوقع فيه انسان مايحب الخير لخوه لكن الله ماشفناه بالعقل عرفناه انسان مايملك ادنى مقومات الاعتماد على النفس واحتكاكه كان بسيط بالمدرسين والطلاب فقط لدرجه انهم ضاعوا باجراءات البعثه هنا فما بالك انهم راح يتغربون وفيه فرق من انك تطلع واساسك قوي وعندك نضج بسيط وبين انك من المدرسه الى امريكا .
وبالنسبه لموضوع الصحابه تم اختيارهم وهم صغار السن نعم انا اوافقك على هاذي النقطه لكن اعتقد اختارهم الرسول اللهم صلي وسلم عليه بسبب حماسهم واندفاعهم , لكن الاندفاع والحماس في الوقت هذا غير مطلوب ابدا بسبب العلاقات المتوترة حاليا والعين المترصده على السعوديه فلابد ان يكون الطلاب المبتعثين يحملون درجه من النضج والمسؤليه لتمثيل السعوديه خير تمثيل .
أما مسألة ان فيه ناس صغيره عقولها كبيره هذا كلام غلط وكنا نقوله يوم تخرجنا من الثانوي لان باختصار ياعزيزي العقل الكبير يحصل عليه الشخص من التجارب والمواقف الي مرت عليه وكيفيه تعامله مع المشاكل وبعدين من معايير الحكم على رجاحه العقل هو معيار العمر واكبر دليل على ذلك ان اغلب المعاملات اليوميه واصدرا الجواز وغيرها في اغلب دول العالم تكون للي عمره تجاوز الــ 21 سنه وهذا العمر اختاروه بناء على دراسات وليس عبثا.
وسؤالي لك بالتحديد يامنسم كيف تحكم على شخص انه ناضج ومسؤل؟؟؟؟ نتمنى اجابتك علشان نستفيد في حياتنا حنا بعد ونصير نعرف نميز .
وللمعلوميه اخوي منسم اغلب دكاترة الجامعات حصلوا على البكالوريوس من السعوديه وبعدها اكملوا دراسات عليا في دول العالم المختلفه واعتقد مافيه احد يشكك في قدرات اساتذة الجامعات السعوديه الآن الا اذا كان عندك راي آخر ياعزيزي منسم .
** وللمعلوميه انا ضد ابتعاث جميع الطلاب للدراسات العليا لان كثير منهم لايستحق هاذي الفرصه اما بسبب عدم الرغبه في اكمال الدراسه او ان طموحهم الحصول على وظيفه فقط
وعموما اتمنى التوفيق للجميع في هذه البعثه او البعثات القادمه بمشيئة الله
تحياتي عبادي

اخوي عبادي





لكن الاندفاع والحماس في الوقت هذا غير مطلوب ابدا بسبب العلاقات المتوترة حاليا والعين المترصده على السعوديه فلابد ان يكون الطلاب المبتعثين يحملون درجه من النضج والمسؤليه لتمثيل السعوديه خير تمثيل



ماذا تقصد بالاندفاع والحماس ايكون الاندفاع في طلب العلم والحماس له سبب في توتر العلاقات بين الدول؟؟؟؟ لا اعتقد ذلك واي الحماس تقصد سبب في توتر العلاقة؟؟
ولا أعتقد ايضا ان الحماس والنضج صفتان متضادتان اذا كانت الاولى نفت الثانية واذا كانت الثانية نفت الأولى!!! فلا اعتقد العظيم اصبح عظيما الا بحماسه واندفاعه ونضجه أيضا





العقل الكبير يحصل عليه الشخص من التجارب والمواقف الي مرت عليه وكيفيه تعامله مع المشاكل








وسؤالي لك بالتحديد يامنسم كيف تحكم على شخص انه ناضج ومسؤل؟؟؟؟ نتمنى اجابتك علشان نستفيد في حياتنا حنا بعد ونصير نعرف نميز .



(لا نستطيع ربط التجارب بالعمر) . وانا اقصد التجارب التي تبني شخصية الفرد فلربما عاش تجارب أكثر من تجارب من يكبره سنا ، ( ولا يكتسب العقل نضجه بالتجارب فقط )، (ولا نستطيع ايضا ربط سعة العقل ونضجه بعدد التجارب) بل باستفادة المرء من هذه التجارب والنضج يكون بالتربية أكثر مما يكون بالتجارب دون اهمال العامل الثاني حقه





وللمعلوميه اخوي منسم اغلب دكاترة الجامعات حصلوا على البكالوريوس من السعوديه وبعدها اكملوا دراسات عليا في دول العالم المختلفه واعتقد مافيه احد يشكك في قدرات اساتذة الجامعات السعوديه الآن الا اذا كان عندك راي آخر ياعزيزي منسم .



برغم أن هذه النقطة ليست مبررا لعدم ابتعاث طلاب الثانوية الا انني سأبدي رأيي
قد تختلف قدرات اساتذة الجامعة عن بعضها البعض ولكن مما لاشك فيه قدرتهم ومدى علمهم وآفاق عقولهم ولو كان قليل منهم غير ذلك فإنني أوافقك الرأي على قدرتهم
ولكن اخي هللا تساءلت من يمتلك المناصب العليا في الدولة الان ومن هم معظم رجالاتها؟؟
انهم ممن ابتعثو في السبعينات واوائل الثمانينات ابتعثوا اما بكالوريس او ما جستير ودوكتوراة مع الفرق الشاسع بين صعوبة اخذ المعلومة في ذاك الوقت عن البلد التي سيذهبون اليها وسهولتها الان فهل برأيك ان الذين نجحوا في ذلك الوقت من خريجي الثانوي هم أكفأ من طلابنا في هذا الوقت فإن كنت تعتقد ذلك فأنا لا اعتقد انه هناك اختلاف بينهم بل وأجزم ان طلاب هذا الجيل هم أكثر مسؤولية من من سبقوهم أو ان صح التعبير اكثر من سبقوهم في تلك السنين
لعدة اسباب منها أننا كنا نعيش في ذلك الوقت وقت طفرة فمن في ذلك الوقت يعتقد ان يرجع من أمريكا ولا يحصل على وظيفة مرموقة لها مكانتها بعكس هذا الجيل فستكون المنافسة أقوى واشد في محاولة تطوير قدراتهم .
وأن الدولة كانت تعاني نقص من الموارد البشرية في ذلك الوقت بعكس التشبع منها في هذا الوقت
فهذه الأمور ستكون في نفس طالب البكالوريوس عند الذهاب الى هناك مما سيشعره بالمسؤولية.

وأعتقد أن خمس سنوات من الغربة كفيلة بصقل شخصيات عظيمة كفيلة بأن تقود بلادها الى التقدم والرقي

المهم ان الطيور طارت بأرزاقها

والله يوفق الجميع ويصلح حالهم
وان شاء الله يمثلون بلدهم أحسن تمثيل

انا يمكن اول واحد قلت مافي داعي للبكالوريس
مع العلم اني طالع بكالوريوس
بس عمري 23 وعندي الشهادة الجامعية المتوسطة من الكلية التقنية
وعندي خبرة وظيفية ولازلت على رأس العمل بالإضافة لعدد 7 دورات منها ccna
احنا كله خوفنا عليهم من الضياع يشهد الله والله يوفقهم

وان شاء الله يكون عند وزارة التعليم العالي خطط ثابتة وواضحة أكبر في المستقبل
وأن يكون فيه تنسيق مع العمل أكبر (يعني الموظفين حالي)

وسامحوني والله يوفق الجميع