الموضوع: بزور الكويت السبت الجاي

لو سمحتوا اخواني انا بزور الكويت الاسبوع الجاي فبسال سؤال عن مجمع الكوت هو مجمع حلو ويستاهل اعنا له او لا وكم ييعد عن دوار الجوازات انا ادري انه بالفحاحيل فكم يبعد عن دوار الجوازات الي بالسالميه


وبسال عن مطاعم لبنانيه حلوه بالسالميه ابي اكل حلو ما ابي اسماء وفي النهايه الاكل مو حلو لا ابي اكل زين

مواضيع عشوائيه ممكن تكون تعجبك اخترناها لك:

• فزعتكم يا اخوان الله لا يحرمنا منكم
• ابي شقه في السالميه ومالقيت
• مستقبلي في خطر تكفون الفزعه
• الى اهل الكويت الافاضل
• استفسار لأهل الكويت عن عروض مسرحيات طارق العلي
• مقتطفات من رحلتي إلى الكويت نوفمبر
• ايهما أفضل الميرديان او الميرديان تاور ؟؟؟
• وينه بالضبط سوق المعلم ؟؟؟ تعددت علينا المواقع
• استفسار حول الفنادق
• مين جرب فندق كورنيش
• مئوية التعليم في الكويت
• لوازم وحاجات مدرسيه جديدة وغريبه
• الطريق من البحرين إلى الكويت ، وبعض الإستفسارات ؟
• مساعدة بسيطة
• يابنات الكويت ابي محلات ملابس للبنات
• بلييييييز ساعدوني الصين جننتني 😢😢
• اهم شي
• اعرف اسماء الاسواق بس حابه اعرف قربهم لبعض
• انا بـالكويت وأحتاج مساعدة
• مغربي يريد زيارة الكو يتساعدوني في ايجاد فندق يستخرج فيزا

ما اعرف مجمع الكوت
ان شاء الله الاخوان يفيدونك..
لازم اكلات لبنانيه؟؟؟
انا احب مطعم قيصر(فيه صيني وهندي وغيره) و احب مطعم مغل محل (هندي وصيني) روووووووووعه

يالبيت الي يعرف مجمع الكوت يقولي شنهي امجمعات الي يحتويها

المجمع يبعد ربع ساعه بالسياره ويستحق الزياره

انا اشوف مجمع الكوت عااااااااادي من وجهة نظري الفنار والمارينا وشرق يعني افضل منه والسالمية فيها وايد مجمعات لاتروح بعيد بس مايمنع انك تاخذ فكرة عن الكوت

اما عن المطاعم اللبنانية فانصحك بقصر النخيل بالسالمية خووووش مطعم بس روحلة بليل وفي مطعم ابرج حمود بوسط البلد فوق قعدتة حلوة ورحولة لغداااااااا احسن :24:


هذا واحنا بخدمتكم باي وقت والكويت اتشرف باهلها وزوارها والله يحفظكم ودعواتكم لي بالخير

السلام عليكم ورحمة الله وبركاته

حياج الله في ديرتج إختي دلوله وشرفتينا ويا هلا ومرحبا ..

مجمع الكوت يستحق الزيارة يوجد فيه جلسات جميلة في الكوفي شوبات جهة النافورة خصوصا لما يكون الجو جميل .:24:
و تستطيعون تناول الوجبة الرئيسية في مطعم الميجانا ( لبناني ) له جلستين خارجية وداخلية .

و هناك سلسلة مطاعم في كل من .......

على ساحل بو حليفة ( فايز , دعوات , أبل بيز , ..... )

على شارع الخليج العربي
مطعم ميس الغانم / مقابل الأبراج بقرب السفارة السعودية
برج حمود / شارع فهد السالم مقابل مجمع المثني
مطاعم الابراج .
سلسلة من المطاعم خلف الشيراتون من جهة الكنيسة .

السالمية / قصر البردوني / جلساته مميزه ويستحق الزيارة ( يوجد عنه موضوع أدرج من قبل أحد الإخوة جزاه الله خير )
برج الحمام / السالمية على شارع الخليج العربي .
مغل محل / له أكثر من فرع في عدة مناطق و أفضلها برأيي إلي بالسالمية :114:
سلسلة قيصر وفايز / لهم أكثر من فرع أيضا
قصر النخيل / السالمية ( لبناني )
فيلا فيروز / الشعب البحري ( لبناني )

مطاعم داخل المجمعات في كل من ....
الكوت .
الستي سنتر ( الدروازة ) / السالمية
المارينا / له جلسات خارجية جهة البحر
كويت ماجيك / ابو حليفة
المهلب / حولي
سوق شرق ./ شارع الخليج العربي
مجمع الراية / العاصمة
البستان / السالمية
الفنار ./ السالمية

الفنادق ....
سلسة مطاعم فندق كراون بلازا ( إيراني / ياباني / سي فود / عربي / شامي )
سلسلة مطاعم داخل منتجع الهيلتون
سلسلة مطاعم فندق الشيراتون .

وجبات إفطار مميزة في كل من
الابراج / فندق المارينا / كراون بلازا / مركز سلطان ( سوق شرق )

وان تذكرت شي راح أدرجه إن شاء الله
تمنياتنا لكم بقضاء امتع الاوقات
و ان شاء الله تستانسون بس الله يعينكم على الحر :101:


تحياتي ...........

السلام عليكم و رحمة اللة



المطاعم اللبنانية







المشاركة الأصلية كتبت بواسطة kuwait2world


في الكويت يوجد انواع من المطاعم والمقاهي اللي تختلف اشكالها وانواعها ولكن اليوم راح نتكلم عن المطاعم ذات الطابع اللبناني فقط
يعني فيلا وحديقه وطاولات وكراسي ومشويات وشيشه وفيروز وناس رايحه وناس راده وجرسونات واكلات لبنانيه
بالبدايه كانت في قصر النخيل من بداية الثمانينات وكانت له دعايه شهيره الي اليوم اتذكرها
(قصر النخيل الهادي رجعني لجو بلادي )
اكيد تذكرتوها اخواني الكويتيين او اللي كانوا يتابعون تلفزيون الكويت ايامها
المهم المطاعم هذي لها جو عجيب في بعض الايام
نذكرها اول واحد واقدم واحد
1- قصر النخيل - السالميه
2- بعلبك بالاس - السالميه
3- كلاسيكال - السالميه بجانب مارينا مول
4- جراند كافيه - السالميه بجانب مارينا مول دائما مزدحم.
5- قصر السرايا - السالميه رهيب.
6 - كافيه هاوس - السالميه ماجربته بس شكله موذاك الزود.
7- البردوني - الشعب البحري - شغل كلاس وجوه عالمي خصوصا كل مادخلت داخل.
8 - تنورين - الفحيحيل طبعا مايحتاج يكفيه بس انه بالفحيحيل جوه حلو وبعيد عن الازعاج والشيف اللبناني مالهم علي مستوى.
9- قلعة كلاسيكال - الاحمدي - بس اذا ما وياك صغار مو حلو لانه كله العاب اطفال.
علي العموم هذي نبذه عن المطاعم اللي من النوعيه واتمني انها اتعجبكم




مجموعة أخري للمطاعم اللبنانية:
1. قصر البردوني.......... تلفون= 5661117 العنوان = السالمية ، مجمع الخالد
2. قصر السرايا............ تلفون= 5711101 العنوان = السالمية ، شارع الخليج العربي
3. ميس الغانم.............. تلفون= 2460456 العنوان = شرق شارع الخليج العربي مقابل ابراج الكويت
4. فيلا فيروز............... تلفون= 2652030 العنوان = الشعب ،قطعه 8 ، شارع 80 ، بناية 1
5. البستان.................. تلفون= 5652589 العنوان = الشعب ، شارع الخليج العربي
6. قصر يلدز................ تلفون= 2455212 العنوان = مدينة الكويت ،شارع الشهداء برج حمود
7. برج الحمام.............. تلفون= 2529095 العنوان = شارع الخليج العربي
8. كبابجي.................. العنوان = ابو حليفه الطريق الساحلي مجمع المطاعم
9. زعتر وزيت.............. تلفون= 2244944 العنوان = مارينا مول
10- الطربوش.............. تلفون= 4818154 العنوان = فندق الشيراتون
11- قصر فخر الدين....... تلفون= 2423180 2423182 العنوان: العاصمة مركز الدويلة
12- بنورامة................. تلفون= 5727458 5727459 العنوان: السالمية شارع قطر
13- زهرة تونس........... تلفون= 2662444 2662333 العنوان: حولي شارع تونس عند دوار صادق


أم بالنسبة لتقيم هذي المطاعم سواء الجودة أو الأسعار عندكم أخويkuwait2world خبير المطاعم:24:
وهنا رابط لبقية المطاعم اللبنانية http://www.ekwt.com/restaurants_lebanese.html



مجمع الكوت

عشرات الصور بالرابط
1- http://www.flickr.com/photos/tags/alkout/
2- http://www.flickr.com/photos/tags/kout/

هلا اختي بديرتج الكويت.... اما بالنسبه لمجمع الكوت لازم لازم تزورينه... مثل ماانتي شايفه الصور اللي حطهم اخونا الوطن ماشالله عليه ما قصر.... هو مجمع حلوو فيه سينماا ويوجد فيه مطعم لبناني وااايد حلوو لازم تتغدون او تتعشون فيه... ولاتطوفك الجلسه في الكوفي شوب مقابل النافووره جداا روعه بس على فكره النافوره يشغلونها بعد المغرب .... وحياج الله

مجمع الكوت حلو بس فيه نوعيات راح تنصدم منها

واحلى مطعم لبناني في الكويت ميس الغانم وبعده على طول طربوش (بالشيراتون) وريتز مقبلاتهم حلوه

اما برج الحمام ابعد عن الشر وغنيلو

الله يجزاكم خير
يا اخوان

والله انه عندي الكويت احلى من اي ديره يا حلوها الكويت

طيب يا اخوي كويتي ورد بما انك خبير مطلعم
ابي لو سمحت وين مطعم البردوني عن مجمع لسالميه ( الدروازات ) اوصفها لي ترى انا اشوي ادل بالكويت

السلام عليكم و رحمة اللة









المشاركة الأصلية كتبت بواسطة daloolh


طيب يا اخوي كويتي ورد بما انك خبير مطلعم
ابي لو سمحت وين مطعم البردوني عن مجمع لسالميه ( الدروازات ) اوصفها لي ترى انا اشوي ادل بالكويت




تجدين أجابة الأخ Kuwait2world بالرد رقم 13 في هذا الرابط
http://www.travel4arab.com/vb/showthread.php?t=63537

اخوي الوطن هذا الوصف من الشعب انا ابي من دوار الجوازات

السلام عليكم و رحمة اللة



حياكي اللة أختي. أنا أرشدت الي وصف كويتي2 ورلد لأني ما أذكر وين بالضبط دوار الجوازات:108: يمكن في ميدان حولي. ولاكن أنشاء اللة أحد الأخوة يوصف الطريق لكي وهذي الخريطة يمكن تنفع.

أختي دلولة ، يرجى العلم بأن دوار الجوازات حاليا يتم به تنفيذ طريق جديد وستجدين الشارع متغير قليلا ولكن ، بالنسبة لمجمع الكوت وهو متميز جدا بالنسبة لي خاصة عندما يكون الجو لطيفا حيث أن المطاعم والكافيهات الموجودة به والمطلة على النافورة(بالضبط مثل دبي مارينا للي ذهب هناك بالجميرا ) فلو إفترضنا أنك عند دورا الجوازات ويسارك يكون (مبنى الجوازات) أمشي للأمام مسافة 1200 متر بالسيارة وستجدين دوارا صغيرا أخر (دوار البدع) هذا الدوار اخذيه يمين ثم أكملي المسير (على يسارك عدة فنادق ومطاعم) إلى أن تصلي لغشارة تحت جسر ، اخذي الإشارة يسار ثم أكملي (سيده) للامام بحدود 20 دقيقة غلى أن تجدي لوحة على اليميمن تشير إلى منطقة الفحيحيل (وتكون على اليمين وبالقرب من جسر ) إذهبي يمين وستجدين إشارة صغيرة اخذيها يسار (الآن دخلتي الفحيحيل) أكملي سيده وستجدين إشارة اخذيها سيده ثم إشارة أخرى (اخذيها فرعي يمين) وستجدين البحر على يسارك أكملي سيدة ستجدين مجمع الكوت على يسارك (ولو تهت مجرد ماتصلين الفحيحيل اسئلي عن الكوت فهو معروف للجميع) وبالقرب منه مجمع أجيال حوالي 4 دقائق بالسيارة (بالفحيحيل أيضا) هو جيد للملبوسات النسائية وللأطفال وأسعاره جيدة .
أما بالنسبة لمطعم البردوني فهو سهل (لوكنت على شارع الخليج ) أكملي سيدة وستمرين على المارينا مول حيث يكون على يسارك وعنده اشارة أكملي للأمام وعندما ترين حديقة الشعب أمامك الإشارة اللي قبل الحديقة إخذيها يسار وستجدين محل الكنفاني على يسارك وبعد 200 متر تجدين اشارة (اخذيها يو تيرن) وأول لفة على اليمين ادخليها أكملي سيده وستجدين المطعم على يسارك مطعم متميز من ناحية الطعم والأجواء وكذلك السعر المعقول (به صالة خاصة بدون شيشة) .أرجو أن أكون قد أفدتك ومعلش طولت عليج .

شكرا لوصفك اخي فهد الاحمد بس ياحليل الطريق عند دوار الجوازات ما اخلصوا من تصليحه انا جايه الصيف الماضي وكان فيه شغل وانهم بيسون توسيعات وحوسه تاخروا واجد عشان يخلصونه

اخوي فهد الاحمد انت متاكد ان المارينا يكون على يساري وانا بروح البردوني لان ان كان على يساري الابراج على يمين واذا بتلت سيده بوصل لسوق شرق

اتمنى تفيدني

يا هلا باختي دلولة ما ذكرته سابقا صحيح ، لو افترضنا ان المارينا مول على يسارج والمارينا كريسنت على يمينج (ملحق بالمارينا مول كله مطاعم وكافيهات) اخذي سيده وتجدين اشارة أكملي سيده وبعدها ستجدين اشارة ثانية اخذيها يسار وستجدين على يسارك مجمع كبير به حلويات الكنفاني (واضح) أكملي تقريبا 600 متر وستجدين اشارة صغيرة (اخذيها يو تيرن) وأول دخلة يمين ثم سيده بعدها ستجدين على اليسار مطعم البردوني ، وأي سؤال احنا حاضرين.

مشكور يا اخوي وان شاء الله الاربعاء الصباح بننطلق الى الكويت


وباذن الله بضع لكم تقرير عن الرحله بس من الحين اقولكم التقرير كله عن الاسواق

انشالله السفرة تكون موفقة وتستمتعون فيها واحنا حاضرين وكل المشاركين ببوابة الكويت بالخدمة وانتوا ضيوف على الكويت

اخواني ادري كثرة بالاسئله بس اخر سؤال


لو سمحتوا متى يفتح السوق يوم الجمعه ؟؟؟؟؟

روح للبحرين والامارات ابرك لك
لان نظرة الكويتيين لسعودي ماتغيرت
مدري على ايش

انا جيت منها امس وقولها بحرقة ومرارة فعلن ماتغيرو

الله يهداك اخوي شفيها نظرت الكويتيين للسعودي
اكيد نظرت الكويتي للسعودي نظره كلها ود واحترام
ولك مني كل ود واحترام

المشاركة الأصلية كتبت بواسطة جساس911


روح للبحرين والامارات ابرك لك
لان نظرة الكويتيين لسعودي ماتغيرت
مدري على ايش
انا جيت منها امس وقولها بحرقة ومرارة فعلن ماتغيرو



الكويتي اللي ماينظر لك بنظرة اخ هذا اكيد خسيس وناكر للجميل وماعنده اصل صدقني
وبس

اخوك مكسيما من الكويت

مطعم الميجانا في مجمع الكوت اكله وايد لذيذ
مطعم برج الحمام راقي وايد
مطعم قصر النخيل - ممتاز
مطعم ميس الغانم
الطربوش في شيراتون
ريم البوادي ممتاز لكن أفضل اطلب منه ويوصلي الطلب لي البيت

اولا احب اقولك انا اليوم رجعت من الكويت اليوم لاني قدمنا رحلتنا الى يوم الاربعاء الفجر
بس اهم رسالة شكر اقدمها لاخوي فهد الاحمدلان والله العظيم مشيت على وصفه ولا احتجنا ليموزين ابدا الا عن قولة والله يوم طلعنا من الكوت وبنروح العربيد احتجنا ليموزين يمشي قدامنا

وعن كلمة الاخ الي يقول نفسهم خائسه وما ادري ايش بلعكس اقسم بالله انهم محترمين معانا لابعد حد وكل من شافنا يعني لما نتعامل معاهم في احد البياعين بالمحلات او بالستي سنتر او باي مكان او نطلب من احد يوصف لنا شي اقسم بالله الكل يرحب ويهللي وهلا وهلا فيكم حتى موظفين الجمارك كلهم حياك الله بديرتك حياك الله

والله ماشفنا شي من الي يقولون

الأخت دلووعه حياك الله بالكويت في اي وقت في بلدك الثاني وبين اهلك

والله من جد يا اخوي كويتي الكويت ديرتنا الثانيه تجنن بمعنى الكلمه والله يكتب لي بالاضحى جيه اهلي واحنا راجعين يقولون بالاضحى نرجع الكويت ان شاء الله

والله ياخوي انا جيتها مع شباب وشفت بعيني محد قالي
روح سوق شرق وتشوف بعينك وخلها شباب على شان تشوف بعينك
ونا سفرتين للكويت بينت لي كل شي وحرمت اجيها مره ثانيه
لاكن الكويتيين ماهم زي بعض فيهم الطيب وفيهم الردي لاكن هذا الي صار معي مرتين
بصراحة انا معجب بفهد الأحمد ليتهم زية

عزيزي جساس911 يعني تتوقع اهل الكويت كلهم مايحبونك ؟؟
عزيزي تأكد انه الكويتي ماعنده مشكله مع السعودي وبالعكس يعز ويغلي السعودي المحترم
اما الشخص الغير محترم حتى السعوديين انفسهم مايرحبون فيه فلا اتلوم الكويتيين اذا تضايقوا من بعض الشباب سواء كانوا سعوديين او كويتيين او غيرهم ... واسمحلي على هالكلام

يا أخــــــــــــــوان
أولا أحب ان اقول للاخت دلولة الحمد لله على السلامة ولا شكر على واجب وانشالله استمتعتي بالكويت ونبي تذكرين لنا الأماكن اللي زرتيها بالكويت مع الصور إن أمكن (ترى طلبت هالطلب بموضوع اخر لج ) بس ابي الجواب عبر هذه المشاركة .:24:
خواني من السعودية وخاصة جساس 911 ارجو ان يكون واضح ان الكويتيين ما عندهم مشكلة مع اي مواطن خليجي هذا بالمقام الأول أما ماتراه من مضايقات أو عدم احترام للبعض تجاه السعوديين يكون بسبب الاتي :
1- عن جهل أو صفة للانسان نفسه سواء هذا الأمر مع الكويتيين انفسهم أو أي جنسية أخرى (واضح)
2- هناك نظرة لدى لدى البعض من الكويت حول بعض الشباب السعودي وتكونت من خلال مخالطتم خاصة بالبحرين مما سبب هذه النظرة اللي أظن انها مودقيقة ، يا ناس كل جنسية فيها الزين وفيها الشين أخوان من أبو واحد تلقى واحد زين والثاني شين .
أرجو عدم التعميم وصدقوني سابقا كانت عندي نظرة مشابهة لما سبق ان طرحت (على بعض الشباب السعودي مو الكل) لكل اذكر في سنة 1999 (عمري بذلك الوقت 20 سنة ) ذهبنا للإحساء للسكن عند أحد اقارب صديقي وشفنا الكرم أول ما سمعوا انا جايين من الكويت والله كل يوم عزيمة ببيت (ما نعرفهم ولا هم يعرفون صاحبنا اللي اقرباؤه من الاحساء ) لكن الضيافة والكرم بعدها قلت صج السعوديين والنعم والله كنت ماخذ فكرة خاطئة وبعدين مع الوقت وخاصة عندما شاركت بهذا المنتدى الرائع خاصة ببوابة السعودية لما أشارك واسال اي سؤال ترى الاخوة يبادرون بالاجابة حقيقة والنعم فيكم يالسعوديين وتكفون غيروا النظرة عن الكويتيين وانتوا بالكويتيين أصابعكم ما هي سوا
عموما خليجنا واحد وشعبنا واحد
أطلت ولكن الموضوع يتطلب ذلك وشكرا
ملاحظة : ما نبي نسمع أو نقرأ بعدها ان الكويتيين ما يحبون السعوديين أو العكس اوكي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟:113: :113: :113:

اخوي كويتي2 انا الطبق مقولة ياغريب خلك اديب
لاكن حتى الأدب ماعاد ينفع
اخوي فهد الأحمد الله يكثر من امثالك
وصابعك ماهي متساوية لاكن الصبع السبابة ماحبة يوجه لي .

انتهى الموظوع خلاص

هلا فيك اخوي فهد الاحمد اولا الله يسلمك ان شاء الله من كل مكروه

وعن موضوع اني استمتعت اكيد استمتعت تبي احد يجي الكويت وما ينبسط

وعن الصور والله ما قدرت اصور الا في المناره الي في مجمع الكوت ومطعم ميجانا ( الي اكله عذاااااااااااااااااااااااااااب ) يجنن اكله وانا والله كان لي نيه اصور بس تعرف الاسواق موت زحمة ولو صورت اخاف تكون على بنت او شي فقلتت الافضل اني ما اصور عشان ما اسبب لنفسي سالفه لان انا نفسي ما ارضى احد يصورني حتى وانا بعباتي

المهم ان شالله بقولكم وين رحت

أخوي جساس حلو الكلام
وكلنا حبايب