الموضوع: متعة السفر ولكن بموسم المطر الى

[align=justify] السلام عليكم ....

هذا تقرير رحلتي للفبين هذا العام من 8-7 الى 12-8 اي بحدود 35 يوم بالتمام و الكمال .. وانا رجعت و كتبت التقرير في موضوع مستقل عشان يتم قرائته بشكل كامل بدون تدخل الردود و تضييع المعلومات





لكن في البدايه اتمنى تعذروني عن موضوع الصور بالوقت الحالي لحدوث مشكله لا مجال لطرحها الأن لكن نوعدكم خير أنشاءالله .....


=====================================

اول شي راح اذكر نقاط عن أهم الأيجابيات والسلبيات اللي شفتها هناك...

الأيجابيات :-

1- الشعب بشكل عام مؤدب ولا يؤذي أحد أطلاقا

2-الأغلبيه العظمى تتكلم اللغه الأنجليزيه يعني ما راح تضيع

3-تعاملهم جدا راقي مع السياح سواء بالحديث او بالفعل

3-الأسعار في أغلب الأحيان مناسبه و حلوه كلما أبتعدت عن مانيلا

4-الجو مقارنة مع جونا الصيفي بالخليج يعتبر قمه يكفي انك تقدر تتمشى الساعه 1 الظهر

5-كل منطقه او مدينه لها جوها المختلف عن المدينه الثانيه يعني ما راح تمل من الأستكشاف.

6- الأمان موجود طالما احترست و انتبهت لنفسك

7- الشعب يحترم النظام حتى في البقالات.. الا اشارات المرور ما احد يحترمها

السلبيات :-

1- مرات نتضايق من كثرة المطر لكن هاذي غلطتنا لأن هذا هو موسم المطر والمفروض ما نسافر فيه

2-بالنسبه للأستغلال فهو موجود لكن مو بشكل كبير مثل بعض الدول العربيه أو بلاد الأندومي يعني ممكن يعرض عليك السعر بالدبل و تقدر تطنشه و انتهى الموضوع..

3- منظر الناس اللي نايمين في الشارع منظر بالفعل يعور القلب و يذكرك بأنعام ربك

4- كثرة الشحاذين و خصوصا في مانيلا في ملاتي و مابيني و المناطق المجاوره.. و هناك شحاذين لكن بشكل أقل في مكاتي..

5-الأزدحام و اه يالأزدحام عندهم رهيب بس تقدر تتحاشاه اذا أجلت خروجك الى ما بعد الظهر او في المساء يكون قل الأزدحام اللي يبدأ من السابعه صباحا الى الثالثه او الرابعه عصرا.

6-عفوا على هالنقطه لكن من باب التنبيه, أغلب الناس اللي نفوسها تعبانه تعتقد بما أنك عربي فأنت تبحث عن المتعه الحرام وهذا الشي يضايقنا بسبب كثرة من يعرض علينا هالأمور بالشارع.

7- أغلب السواقين ما يحترمون قوانين المرور ولا يوقفون عند الاشاره الحمراء. انا اقترح على الحكومه تزيل الاشارات لان بس تشكل عبئ على الكهرباء من غير فايده

8- التدخين في أغلب الأماكن ممنوع.. حتى في المجمعات التجاريه.. لازم تطلع برا تدخن او تروح لستاربكس او اي مقهى اخر يفتح على برا عشان تقدر تدخن.. ( أحسن نستاهل منو قالنا ندخن أصلا ؟ )===============================================

بدأت رحلتي من مطار الكويت الدولي بحول الله و قوته بتارخ 8-7 على طيران الأمارات متوجهه الى مطار دبي (بحكم انه مافيه خط دايركت يربط الكويت بمانيلا) و كانت الرحله تقريبا ساعه و نصف و كانت جدا مريحه لأن الطيران الأماراتي فعلا كان ممتاز.. و بعد وصولنا الى قاعة الترانزيت في دبي تجولنا بالسوق الحره اللي أقدر أوصفه بمطار من الطراز النادر و فعلا مطار عالمي و شي يلفت الانتباه.. حتى الأسعار كانت ممتازه...
كان الأنتظار لمدة 4 ساعات و نص او 5 ما اذكر بالظبط لكن ما ملينا. و بعدها توجهنا الى البوابه رقم 42 و خذونا في باص الى الطياره و بعدها ركبنا الى الرحله المتعبه اللي توصل لمدة 8 ساعات الى مانيلا ... انا طبعا من وصلت تغطيت و حطيت ورقه يرجى عدم الأزعاج على الكرسي و هااااات يا نوووم نمت فتره طويله و استغربت من نفسي لاني في العاده ما اعرف انام في الطياره.. المهم نمت تقريبا 6 ساعات هناك و على ما فتحت عيني و رحت عزكم الله لدورة المياه و غسلت و شربت الشاي كان الطاقم يبلغنا بربط الأحزمه لأنه وصل موعد الهبوط..


و هبطنا بحول الله و قوته في مطار مانيلا و كانت الساعه عندهم تقريبا 3 عصرا.. ما خذينا كثير لأن أجرأتهم ما كانت معقده مجرد تروح الكاونتر تختم جوازك ( طبعا بعد ماتعبي النموذج بالطياره) ولا اذكر انه سألنا هناك المفتش الا عن المنطقه اللي راح نسكنها و قلنا له مكاتي ( طبعا قول اي عنوان عادي) و بعدها ذهبنا لأستلام العفش اللي تقول عفش مطلقه رايحه لبيت أهلها من كثره و طلعنا برا و من هناك تلقى رجل أمن تقوله على وجهتك و يعطيك ورقه و تعطيها التاكسي و تتوكل على الله. وكان حسابنا الى أرميتا من المطار 340 بيسو... و قلنا له سق وصلنا الى الفندق و هو رالف أنتوني في منطقه ارميتا في شارع ماريا اوروسا مقابل مجمع روبنسون.. لأني عمدا أبتعدت عن مكاتي..
و حزر فزر حصل ايييييه ؟
كان هناك خطأ بالحجز.. لأنهم اعتقدو اني حاجز غرفه وحده وانا طالب شقه بغرفتين.. المهم فهموني انه الخطأ كان من عندي و بالفعل كان من عندي و بعد الأعتذار منهم قالولي راح نأخذك لفندق ثاني الليله عشان ترتاح فيه بالأول و بكرا انشاءالله اول ما تصحى راح نبعث السواق يجيبك هنا.. و طبعا ما أحاسب الفندق اللي راح اقعد فيه ليله..

المهم خذونا لفندق كان فعلا ممتاز.. اسمه اوركيد قاردن orchid garden و كان مقابله فندق ممتاز اسمه شنري بارك century park... المهم قضينا الليه الأولى في هالفندق بعد ما خلينا أغراضنا في فندقنا الأول.... و من بكرا الساعه 12 الظهر وصل السايق و اخذنا لفندق رالف انتوني مره ثانيه..

و اخذنا شقه بالدور الثاني و هي غرفه 201 وكانت بصراحه جدا عاديه.. كانت غرفتين عاديات مع مطبخ و اعزكم الله حمام واحد.. الأثاث جدا عادي.. لكن ما كانت تفرق معانا لانه السكن بالنسبه لنا مكان للنوم فقط يعني ما فيه اي مشكله.. حساب الفندق كان على أتفاقنا الأول اللي هو 50 دولار مع أمكانية التخفيض كل ما طالت المده...


بعد ما ريحنا طلعنا نأكل في مطعم ممتاز للأسف نسيت أسمه.. لكن هو في نفس شارع روبنسون و يسمون الشارع هذا ( بادري بورا) و المطعم مقابل سفن الفن و هو مطعم عربي و هندي.. طبعا الأسعار أغلى من الباقي بحكم ان المطاعم العربيه شوي اغلى هناك...

و رحنا تمشينا في مجمع روبنسون اللي صراحه كان عادي يميل للجيد بالنسبه للبضاعه الموجود فيه .. و هو يتكون من اربع أدوار و مساحته تعتبر حلوه .. الأسعار على حسب البضاعه.. في بضاعه معقوله و في بضاعه نفس أسعارنا بالكويت... لكن بشكل عام هو أرخص من قلوريتا ..


تجربة ركوب القاري او السيكل هناك بوقت المطر شي ممتع و مظحك بنفس الوقت لكن من باب الفضول حبيت اجربه و هو ما يكلف 10 بيسو هناك.. و بالفعل استمتعنا خاصة اذا كان السواق عربجي



التكاسي على العداد.. مثلا المسافه مابين أرميتا لو مكاتي كانت تقريبا 20 دقيقه الى نص ساعه بالزحمه كانت تكلف 90 بيسو الى 100 اذا كان السواق يفرفر كثير.. يعني تقريبا نص دينار او سبعه ريال..
----------------------------------------------------------------------------------------------

المجمعات هناك بشكل عام حلوه ولو أختلفت أحجامها و بضايعها و أسعارها...

الأرخص مثل ما شفت انا هناك كان لاند مارك و شو مارت .. يعني تقريبا كان أسعارهم أرخص من الباقي

و بعد فيه مجمع ما شفت أحد تطرقله يسمونه ماركت ماركت MARKET MARKET

هذا تابع لمكاتي بأتجاه سي فايف (C5) كانت أسعاره حلوه خصوصا بالسوبر ماركت اللي فيه.. والمستلزمات الرياضيه كان سعرها ممتاز مقارنة بالأسواق الثانيه.. كمثال انا أشتريت من هناك كيو بلياردو او البعض يسميه عصا بلياردو اشتريت كميه من هناك و كان سعر الواحد فيه 480 بيسو... و بنفس الوقت كنت ناوي أخذ كميه قبل فتره من مكان ثاني و كان سعر الواحد مو اقل من 1000 بيسو... يعني فرق كبير كان بينهم.. لكن بكل الحالات انت يالسايح سعرك أغلى دائما الا بالبضاعه المسعره طبعا...


انا السوق اللي كنت كل يوم فيه كان روبنسون أرميتا.. لسببين.. السبب الأول كان قدام الشارع اللي انا ساكن فيه.. يعني خطوتين منه.. والسبب الثاني عندهم سيرفس عجيب في ستاربكس و الزحمه شي شي هناك

و بنفس الوقت فيه هناك بضاعه يحطونها بالنص يعني بسطات يبيعون فيها حريم.. ساعات و شنط و الشغلات هاذي .. طبعا تقليد ماركات مو أصلي لكن أسعارهم تختلف ميه بالميه .. يعني أفتر عليهم لما توكد لك وحده سعرها حلو.. ولما تاخذ منها كميه تسويلك تخفيض... انا جربت ساعات رولكس و قوتشي.. كان سعر فايدتهم بالكويت أكثر من 500% لان سعرها كان متواضع حيل..

الملابس الرجاليه من بنطلونات و تي شيرتات هناك بالفلبين حلوه و موديلاتهم جديده لكن أسعارهم لك عليها يعني أرخص من هنا لكن مو بكثير.. و بعضهم أغلى مثل اللي بقلوريتا..

العيب اللي تلقاه فيه أغلب المجمعات هو حصولك على تاكسي بعد ما تطلع.. يعني لازم توقف بالدور هناك يسمونه TAXI STAND لحد ما يوصل دورك و تتوكل على الله ..... !! بأستثناء روبنسون لان التكاسي واقفه قدام الباب و ما عندها أحد...


انا من المؤيدين للتمشي بالمجمعات لأنها فعلا حلوه و فيه شغلات تفتح النفس.. الا اذا المشوار والزحمه سد نفسيتك عن السوق هذا شي ثاني

----------------------------------------------------------

مابيني و نرجع نقول مابيني كمااااان مره

حذروني من هالمنطقه الأخوان في المنتدى كثير.. لكن أقول ان الله ستر علي و ماشفت شي هناك... طبعا الأخوان اللي راحو من قبل أكيد يعرفون ( ال اي كافيه ) L.A CAFE... بما اني من عشاق البلياردو كنت يوميا بالكافي هذا و موقعه في مابيني بنفس شارع مطعم القدس و فندق امازونيا... و بالمناسبه امازونيا كافي موجود من زمان لكن فندقهم قالو انهم افتتحوه من فتره بسيطه... المهم نرجع حق ال اي كافي.. الدخول هناك مجاني.. الا اللي راح يصعد للدور العلوي يدفع 100 بيسو تقريبا 8 ريال عشان هناك فرقه كل يوم.. طبعا داخل الكافي تلقى كل أنواع البشر في مكان واحد.. المحترم , الغبي الصايع . و بنفس الوقت تلقى المترديه والنطيحه معاهم يعني انت خلك على لعبك و انسى الباقي و مضايقات الجرذان اللي داخل أعزكم الله طبعا المضايقات مو من الذكور طبعا ..

اللعب له طعم هناك لأنه قمة التحدي .. خروج المغلوب واللي يفوز يكمل.. و يشوفون منو اللي يصمد على الطاوله أكثر و لو انه اغلبهم حظهم يكسر الصخر على كل حال اذا خسرت تدفع 25 بيسو و تطلع تقريبا 2 ريال.. و اذا حاب تلعب من جديد تسجل أسمك وتنطر دورك.

بعض المرات لما أزهق في الليل كنت اشيل سيفي :11ight: اللي هو الكيو او عصا البلياردو و أتوجه حق الكافي هذا,, مشي طبعا كعاااابي.. لانه قريب ما ياخذ 5 دقايق .. و مرات يكون الوقت متأخر تقريبا 2 بالليل.. بما ان الحذر مطلوب أيضا الثقه مطلوبه لأن الشوارع هاذي ماشيه 24 ساعه يعني ما تكون فاضيه.. و اذا مشيت و تتلفت كثير راح تكون فريسه سهله ههههههههههه أما عاد فريسه هاذي قويه ما فيه الا الخير لأني يوميا اروح هناك و لا يعترضني الا الشحاذين مرات يبون فلوس.. و انت و مدة يدك.. و ترى يمدحون الخمسه بيسو ولا تكثر وانا أخوك.... يعني وانت رايح خلك بجيبك عشرين بيسو فكه عشان توزعهم


و نفس الكلام ينطبق على كذا منطقه والحذر فيه واجب مثل ملاتي و أرميتا و باساي اللي يعتبرون شبه مناطق شعبيه...

ايييييييييييي قلنا باساي و ما ادراك ما باساااي.. مع أحترامي الشديد لكل الأخوه هناك منظر ماحبيت أشوفه و كان في باساي .. و في مكان أسمه فاير هاوس أكيد كلكم تعرفونه... يا أخي الواحد يبهذل نفسه بشكل مو طبيعي و بالأخير يقولك يا أخي كيفي انا مبسوووووط أحتراما للموجودين ما راح اتكلم عن الموضوع هذا.....
========================
نقطه صغيره تذكرتها الحين ... السحب الألي ..... متعب و مكلف بشكل كبير

والسبب يرجع انك اذا حبيت تسحب مبلغ و فرضا قلنا 100 دينار يعني 1200 ريال
بحسبه بسيطه يطلع لنا الناتج تقريبا نقول 18 الف ؟ 19 الف؟ و ممكن عشرين على حسب سعر الصرف

المهم حدك الاقصى للسحب يكون 4 الاف في بعض البنوك والبعض 5 الاف ... يعني راح تسحب و تطلع البطاقه و تحطها من جديد عشان تسحب 4 الاف ثانيه او 5 !!!! يعني كذا مره راح تسحب بنفس الوقت.
و كل عمليه مصرفيه تنحسب عليك عموله في بلدك ... و نتفني أكثر

يعني الكاش أحسن.. و ما جربت استعمل الفيزا بالمحلات أو غيرها من باب الأحتياط.. جيب فلوسك كلها كاش و خلها في السفتي بوكس بالفندق أظمن لك و المفتاح عندك... و بعض الفنادق مثل بست ويسترن يكون السفتي بوكس بمكان سري في غرفتك و برقم سري انت اللي تحطه و تغيره بأي وقت تحب و المفتاح معاك.. يعني أمان 100% ....

خلصنا من هالنقطه
-------------------------------------------------------------------------

تجربة الذهاب للجزر ممتعه و لو ان الفرص ما سنحت لي كثير هناك لأرتباطي بشوية اعمل... لكن سنحت لي فرصه ذهبيه للذهاب لبوراكاي و توكلت على الله و رحت....

حجزنا عن طريق سيبو باسيفك بتاريخ 21-7 المتوجه من مانيلا الى مطار كاليبو....
كانت التذكره الواحد بمبلغ 115 دولار ذهاب و عوده...
الرحله لمدة ساعه تصل بعدها الى مطار كاليبو ,, و من هناك وانت طالع من المطار تلقى أصحاب الباصات يعرضون خدماتهم.. و السعر نفس الشي لكن أنت تختار اللي تبي.. بالنسبه لي أخترت الباص اللي كان المكيف فيه أبرد و بنفس الوقت انت تأجر القارب اللي ياخذك للجزيره من نفس المكان.. يعني الباص مع القارب يكلف الشخص الواحد مبلغ 175 بيسو... يعني دينارين تقريبا و تاخذ التذاكر معاك.. والباص مو من الحجم الكبير.. يعني انت و ربعك بس يشيل 8 أشخاص...

الطريق بالباص تقريبا مشوار ساعه او أكثر بشي بسيط لكن المناظر بالطريق قمه بالروعه و لاتطوفك و لا تفكر تنام :113:
بعدها تاصل للشاطئ و من هناك تروح للكشك حق التذاكر و تعطيه التذاكر و تكتب اسمك و تتوكلون على الله .. بالبدايه ركبونا قارب صغير لمسافة 150 متر لأن القوارب الأكبر ما تقدر تاصل للشاطى عشان الصخور اللي على الشاطئ.. و ركبنا القارب الكبير و طبعا بماكينه يعني قارب سريع مو تجديف أو شراع.

أحاول اتذكر المده لكنها مو في بالي تقريبا تقريبا 20 دقيقه و يمكن اقل او اكثر ماني ذاكر للجزيره.. بعدها تلقى باصات نقل صغيره ( وهاذي السيارات الوحيده اللي شفتها بالجزيره) تركب بالباص و تقوله اسمه الفندق.. انا سكنت في فندق كوينز QUEENS غرفه لشخصين بمبلغ 1500 بيسو.. و هذا الشي الوحيد الرخيص في الجزيره هي بشكل عام غاليه لكن مو بفرق كبير....

الجزيره مافيها جو ليلي.. لأنها ميته بعد الساعه 11 بالليل... الجزيره الفجر قمه بالروعه خصوصا منظر البحر.. اول مره اشوف رمل أبيض لهالدرجه و بحرهم صافي جدا يعني ممكن تشوف اللي تحتك وانت بنص البحر و نظيف بنفس الوقت... السباحه هناك متعه من نوع ثاني و ما تقدر تفوتها..

الشي الوحيد اللي عكر مزاجنا هناك غير المطر هو نظرات الطمع من الفلبينيين هناك !!! لأنهم عارفين ماحد رايح لبوراكاي للشغل.. طبعا للسياحه و اكيد دراهمه ترس الجيب بس خلك حذر و خل عنك التسكع بالليل.

تأجير السياكل هناك والجيتي سكي روعه.. و اذا كنت مغامر أركب BANANA BOAT راح تظحك لمده سنه على نفسك و على ربعك

بعد فيه تاجير البانشي ما اعرف شنو تسمونه بالسعوديه لكن ممتع بعد و ساعته ب 20 دولار و هذا أرخص واحد حصلناه... قلتلكم غاليه :109:

المطاعم هناك بكل متر و انواع المطاعم لكن لاتدور مطاعم مشهور مثل ماكدونالدز او هارديز لأنها مو موجوده.. و فيه مطعمين عربيات هناك على البحر او بالأحرى مطاعم هنديه يعني بالعربي راح تلقى الكبسه و المندي والبرياني عندهم

الفنادق هناك عاديه و ما شفت فندق 3 أدوار .. كلهم دورين يعني مافيه 5 نجوم ولا حتى 3 نجوم... فنادق بسيطه بعضهم على شكل أكواخ لكن حلوه بس تأكد بالأول اذا كان فيه تكييف والا لا .. لأن بعضهم مافيه و يستعملون مراوح ...

قعدنا بالجزيره 5 أيام و حسينا أنها كثيره لأن الجزيره صغيره و فريناها كلها في 3 أيام ... استانسنا بالرحله و رجعنا لزحمة مانيلا

-------------------------------------------------------------------------------------------------

النقاط الرئيسيه اللي أنتبهت لها هناك و حاب أذكرها للي ما سافر لها الى الأن هي :

1- قال البعض أصرف من مكاتي .. وانا شفت الصرافين هناك و سعرهم مو نفس سعر الصرافين اللي في أرميتا... يعني بعض اللي في مكاتي سعر صرفهم أفضل بكثير و خصوصا اللي مقابلين مجمع روبنسون.. و راح يبين معاك الفرق لما تصرف مبالغ كبيره...

2- لا تصعد مع تاكسي قبل ما تتأكد انه شغل العداد عشان لا ينصب عليك...

3- لا تطلع بمبلغ كبير و لا تطلع فلوسك في مكان عام عشان لا تكون مطمع لضعاف النفوس...

4- شغله وحده أمش عليها هناك .. انت محترم ؟؟ الكل يحترمك

5- عندهم أعتقاد لاحظته بأغلبهم انهم يعتقدون ان العرب متكبرين... حاول تتواضع و تبين لهم العكس كثر ما تقدر ...

6- شارع برقص X في X يعني فاااااااااااشل مع مرتبة الشرف.. رحت اشوف شنو فيها و شفت المصخره بجد و خصوصا و ارجع و اقول خصوصا في دندشه عالم ضايعه :109:

7- الجنسيات العربيه لا تخالطها كثير هناك.. وانا أقصد العرب المقيمين هناك من غير تحديد جنسيه لأنهم يشوفونك مصدر رزق لهم...

8- الدخاااااااااااااااااااااااااااااااااان و كماااااااااااااان الدخاااااااااااااااان خذ معاك طن من ديرتك دخانهم مرض صراحه..

------------------------------------------------------------------------------------

ماني عارف شنو أكتب بعد !!! أنا أحاول أتذكر وهذا السبب اللي يخلي مواضيعي داشه في بعض مره اتكلم عن السوق و مره الصرف
بس اي سؤال أنا حاظر و بالخدمه...

و على فكره لنا عوده قريبا
------------------------------------------------------------------------------------

أخوكم تلاقا [/align]

مواضيع عشوائيه ممكن تكون تعجبك اخترناها لك:

• السلام عليكم ورحمة الله تعالي وبركاته
• طلب صغير اتمنى تلبوه لاهنتوا
• الفلبين بلد حقيقة أم خيال مسافر يتمنى يلقى جواب
• قبل امس وصلت من الفلبين منحاش لاتروحون ابدا
• ايش فرق المنتجع عن الفندق وايهما افضل
• ஹஇ ஹஇ ஹஇ دليلك السياحي للفلبين برنامج سياحي இஹ இஹ இஹ
• استفسار عن التقارير
• من حاليا من الاعضاء بالفلبين ويقدر يساعدني
• الجزر الفقيرة و المناطق الريفية بالفلبين؟؟
• يوم كيف اقضيهابلورده
• مسافر لأول مره لمدينة سيبو الفلبين ارجو المساعده
• نداء الى
• الفلبين يامحبي الورود
• المساعدة ياخوان وفقكم الله
• طريقة اصدار فيزا
• الفزعه يا اهل الخبره
• هام جدا لدراسة الإنجليزى بالفلبين
• استفسار عن ليغازبي
• محتاج برنامج سياحي في الفلبين مطلوب
• شقق فندقيه في مانيلا

تسلم ياتلاقا
كفيت ووفيت
المهم حدك الاقصى للسحب يكون 4 الاف في بعض البنوك والبعض 5 الاف ... يعني راح تسحب و تطلع البطاقه و تحطها من جديد عشان تسحب 4 الاف ثانيه او 5 !!!! يعني كذا مره راح تسحب بنفس الوقت.
فيه صراف بمجمع روبنسون hsboالظاهر انه كذا في الوسط جنب الدرج الالي وهو بنك بريطاني اذا ماني غلطان تقدلا تسحب منه الى حد 20000 مره وحده
البلياردو وما ادراك مالبلياردو من الاشياء الممتعه في مانيلا ورخيص مره عندهم
وصراحه العصا اللي شريته رخيص مره
يوجد مكان جميل في روبنسون قريب من الصراف السابق فيه صاله كبيره يوجد بها اكثر من 30 طاوله والقسم الاخر للبولينغ

تسلم يا اخ talaga
بصراحه كفيت ووفيت زي ماقال اخونا بدر لكن ينقص التقرير شوية صور شكرا لمجهودك المتميز، وياليت الاخوان يحذون حذوك
عودا حميدا

مشـــــــــــــكور اخوي talaga

ممكن توضح الاسعار للفنادق الغاليه والفنادق الرخيصه
حتى يكون الواحد على علم من امره يعني سعر الخمس نجوم سعر الاربع وهكذا
حتى يكون هناك تصور للاسعار وهل الشعب معاملتهم في الجزر تختلف عن اهل المدن

لك تحياتي

شكرا اخوي talaga

ولكن الرحلة ممتعة جدا وكل الكلام جميل ولكن بعض الكلام غريب


1- قال البعض أصرف من مكاتي .. وانا شفت الصرافين هناك و سعرهم مو نفس سعر الصرافين اللي في أرميتا... يعني بعض اللي في مكاتي سعر صرفهم أفضل بكثير و خصوصا اللي مقابلين مجمع روبنسون.. و راح يبين معاك الفرق لما تصرف مبالغ كبيره... (( الصرف من اين من الصرافين او البنك))؟؟؟؟؟؟؟

2- لا تصعد مع تاكسي قبل ما تتأكد انه شغل العداد عشان لا ينصب عليك... (( حتى لو تصعد تكلم وقول شغل العدد))

3- لا تطلع بمبلغ كبير و لا تطلع فلوسك في مكان عام عشان لا تكون مطمع لضعاف النفوس...(( هذا كلام ؟؟؟؟؟))
&
بس هناك نقطة من حيث الصرف وهو في مقاتي تصرف من البنك هناك الى 40000 في اليوم اخوي0

انت تقول انك تلعب بلياردو بشكل كثير هناك في السوق في الدر الثاني صالة جميلة فية اكثر من 25 طاولة وليست كثل ال كافي ؟؟؟ وانت تعرف السبب


شكر لك اخوي العزيز على التقرير ولكن الصور مع التقرير تكون اجملللللللللللللللللللللل

تحياتي لك اخوك حمودي مع العلم ان هناك باقي للحديث عن الموضوع؟

أخوي تلاقا

الحمدلله على سلامتكم

وتقرير قرائته جداً ممتعه ومفيده

وبالنسبة لعبارة ( انت محترم ؟؟ الكل يحترمك )

هذا لابد من تطبيقها في كل مكان حتى في بلدك

والإنسان المحترم يفرض إحترامه

أشكرك أخوي تلاقا على التقرير الجميل والممتع

يعطيك الف الف عافية حبيبي تلاقا على ها التقرير الحلو. وننتظر الصور...

التدخين في أغلب الأماكن ممنوع.. حتى في المجمعات التجاريه.. لازم تطلع برا تدخن او تروح لستاربكس او اي مقهى اخر يفتح على برا عشان تقدر تدخن.. ( أحسن نستاهل منو قالنا ندخن أصلا ؟



:109: :109: :109:




طيب ليه ماجربت التنباك

السلام عليكم

شاكر لكم تواصلكم وتفاعلكم مع الموضوع جميعا...

أخوي حمودي ... حبيت ارد على استفساراتك الثمينه والنقاط اللي وضحتها حضرتك بالرد...

بالنسبه للتاكسي انا حبيت أوضح انه مو كل التكاسي عداد في أوقات معينه مثل تالي الليل.. و حتى لو مركب عداد يقولك انا سيرفس ما أمشي على العداد وهذا حصل بكثره هناك.. والحل الأفضل أنزل و تلقى مليون غيره..

- لا تطلع بمبلغ كبير و لا تطلع فلوسك في مكان عام عشان لا تكون مطمع لضعاف النفوس...(( هذا كلام ؟؟؟؟؟))
بالنسبه لهالجمله أخوي حمودي ما أعتقد فيها غلط و هاذي نصيحه بعدم حمل أو أظهار مبالغ كبيره في أماكن عامه. اذا كانت قصدك شي ثاني أرجو التوضيح...

و بالنسبه للصرف اللي ذكرته مقابل روبنسون ارميتا .. هذا طال عمرك من الصرافين اللي بالشارع تقريبا خمس و لو أختلفت اسعارهم دايما.. تلقى عندهم سعر زين... كمثال انا صرفت من صراف في مكاتي المية دولار في 5500 و من بكرا صرفت من أرميتا الميه في 5580.. يمكن تقول ما تفرق كثير لكن تفرق لما تصرف مبالغ كبيره من 100 دولار و فوق.. و كل ميه فيها فرق كذا بيسو و عليك الحساب

و شاكر لكم

أخي الجميل تلاقاء ...................................... حفظك الله

ألف شكر على تقرير مرتب وجميل ومفيد لمن يريد معلومات عن الاماكن ... وطبيعت الشعب .

بارك الله فيك ووفقك لما يحب ويرضى ..

تقبل خالص سلامي
أسير الصمت

أمتعتنا أخوي talaga الله يمتع قليبك بالعافية







العيب اللي تلقاه فيه أغلب المجمعات هو حصولك على تاكسي بعد ما تطلع.. يعني لازم توقف بالدور هناك يسمونه TAXI STAND



سنايدي عربي ما تحب النظام ،،،







بعض المرات لما أزهق في الليل كنت اشيل سيفي اللي هو الكيو او عصا البلياردو و أتوجه حق الكافي هذا,, مشي طبعا كعاااابي.. لانه قريب ما ياخذ 5 دقايق .. و مرات يكون الوقت متأخر تقريبا 2 بالليل.. بما ان الحذر مطلوب أيضا الثقه مطلوبه



أي ثقة معك عصى البلياردو و تبيهم يقربون منك ،،،

أختصار الكلام ،،، الشارع هذا آمن لكن بالعربي لا تطلع سكران ،،،








نقطه صغيره تذكرتها الحين ... السحب الألي ..... متعب و مكلف بشكل كبير




فيه صراف خارج سوق روبنسون اذكر أني سحبت منه 13 الف بيسو و تقدر تسحب منه الى 20000 الف بيسو ،،،







حجزنا عن طريق سيبو باسيفك بتاريخ 21-7 المتوجه من مانيلا الى مطار كاليبو....
كانت التذكره الواحد بمبلغ 115 دولار ذهاب و عوده...
الرحله لمدة ساعه تصل بعدها الى مطار كاليبو ,, و من هناك وانت طالع من المطار تلقى أصحاب الباصات يعرضون خدماتهم.. و السعر نفس الشي لكن أنت تختار اللي تبي.. بالنسبه لي أخترت الباص اللي كان المكيف فيه أبرد و بنفس الوقت انت تأجر القارب اللي ياخذك للجزيره من نفس المكان.. يعني الباص مع القارب يكلف الشخص الواحد مبلغ 175 بيسو... يعني دينارين تقريبا و تاخذ التذاكر معاك.. والباص مو من الحجم الكبير.. يعني انت و ربعك بس يشيل 8 أشخاص...




الله يهديك لو انك رايح لمطار كاتيكلان ( catiklan ) أقرب لك عن بوراكاي بس البحر و تذكرت الذهاب و العودة ما توصل 100 بيسو

وبالنسبة للألعاب ما آخذها من اللي يعرضون على الشاطئ ،،، آخذها من المكاتب السياحية الموجودة واللي ما توصل 13 دولار ،،،

وبذلك تتحاشى الغلاء ،،،


و بيض الله وجهك على هالنصائح و المعلومات الحلوة ،،،

كبيان

أخوي أسير الصمت انت من الناس اللي أتشرف بمرورهم صراحه شروا السامعين.. شكرا لك

هههههههههههههههههههههههه كبيان المسائله ماهي مسألة ما نحب النظام بس الوقوف بأنتظار التاكسي في الليل متعب صراحه.. حتى هم يتمللون منه... و بعدين الشارع أمن بالفعل و ملاحظتك اللي قلتها في محلها

والله يا أخوك حجزنا كان على الله يعني نمشي حالنا و كل ظربه بتعلومه

و يشرفنا مرورك طال عمرك...

يعطيك الف الف عافية

سرد جميل ومنظم مع انك شقلبت مخنا مره جزيرة ومره صرف ومره بلياردوا ومره سوق !!!!!!!

... بس ولايهمك مجهود جميل وتقريرك أكيد راح اعتمد عليه انشالله في زيارة الفلبين قريبا :101: