الموضوع: هذي الحكايه

السلام عليكم ورحمة الله وبركاته

اكتب هذي المشاركه ولا ادري اذا كان بيتم ارسالها بنجاح ام لا
واحب اشكر الاخ ya-masوللاداره الكريمه بالمنتدى لانهم ساعدوني في حل مشكلتي بالمنتدى ولاني اتعبتهم معاي

وبما اني احد الاعضاء الذين استفادوا من هذا المنتدى ومن معلوماته فحبيت اشاركم بهذه المشاركه

في ليله صيف باحد استراحات الرياض كان هناك مايقارب 14 شابا وكان كل منهم يغني على ليلاه فمنهم من كان في حوض السباحه ومنهم من يلعب كره طائره ومنهم من يلعب بلوت ومنهم من هو جالس على النت مثل محدثكم .
تجمع الجميع للعشاء وبدات الافكار والمقتراحات والمشاورات فمنهم من اتفق على السفر للمغرب ومنهم 000ومنهم 000وكان من بين هذه المشورات اتفاق محدثكم سالم وسعودي مفلس والامير وفاول مضيع بلنتي على السفر للفلبين والتمتع بالسياحه في هذا البلد ومن ثم الى اندونيسيا والتعرف على معالمه السياحيه ومن ثم العوده الى الفلبين اجباريا لان الرحله على الخطوط الفلبينيه وبعد الاستراحه بالفلبين كم يوم العوده الى ارض الوطن الغالي .
راح اهتم باغلب التفاصيل الماليه والاماكن السياحيه ليستفيد البعض .
سعر التذكره الرياض الى مانيلا والجلوس بها ومن ثم الى اندونيسيا على الخطوط الفلبينيه 3200 بالرغم انه كان سابقا هناك عرض على سفريات يومي الاحد والخميس بسعر 2360 ريال سعودي .لكن العرض الغي من قبل الخطوط الفلبينيه
اما اذا كانت رحلتك الى الفلبين بدون ان تجلس فيها طرانزيت الى اندونيسيا بحدود 2100 ريال على الخطوط الفلبينه لان جلستك في الفلبين ياخذون زياده
قبل اخذ التذاكر عملنا حجوزات عن طريق مكتب المؤيد وكل ماجينا عشان نطلع التذاكر ونعطيهم فلوسهم قالوا تعالوا بكره لانه لازم ننسق مع الخطوط الفلبينيه ونشوف سعر التذكره بين الفلبين واندونيسيا لانكم بتجلسون في الفلبين ومن بكره في بكره وفي المره الثالثه كان معانا واحد من الزملاء وماله علاقه بالسفر كان جايبنا على سيارته وكان مبنى المؤيد مليان ناس وزحمه لما قالوا بكره راح في الوسط وصار يصارخ انتم كل يوم بكره في بكره ثلاث ايام تلعبون على الشباب هذا تلاعب وين مديركم وين المسئولين الكل اللي في الصاله صار ساكت وعم الهدوء وبعدين طلعنا قلنا له ايش فيك خير قال بس حبيت افضح فيهم قدام عملائهم عشان مايتلاعبون في الناس ثاني مره .
واخيرا اخذنا التذاكر من سفاري
كانت رحلتنا الساحه 11 يوم الاحد وتجمعنا ومجموعه من الزملاء ودونا المطار ماشاء الله تقول وفد وقبل مانوصل المطار وحنا متاخرين الا التفتيش قدامنا ويالله يالله افتكينا من زحمتهم عشان نلحق الطياره دخلنا مبنى الخطوط الاجنبيه الا والمبنى مليان باكستانيين.
رحنا ناخذ البوردنق لقينا زحمه الله لايوريكم هنود على فلبينيين على كل الجنسيات ونروح للمشرف المناوب ونسلم عليه وربك يهديه ويشحن شناطنا ويعطينا كرت صعود الطائره ويفك فينا من السرى والزحمه.
ودعونا الشباب وحنا دخلنا على الجوازات الا وقدامي فلبيني داخل على الجوازات بدون كرت صعود الطائره ويرفع صوته عليه العسكري روح يا ابله طلع الكرت والفلبيني يسئل وين اروح قاله بس يالله روح اذلف من زين الاخلاق في مطارنا طيب لو كنا في ديرتهم نرضى احد يرفع صوته علينا اعطيت جوازي العسكري وسعودي مفلس راح يشرح للفلبيني على المكان لاخذ كرت صعود الطائره
جيت سير التفتيش الا فاول مضيع بلنتي جاي من وراي ويسقط قدامي ويحط اغراضه قدامي ويدخل ويصيح عليه الجهاز قلت قلعتك تستاهل يالمطفوق ويرجعون وينزل الحزام والجزمه ويدخل ويصيح عليه الجهاز قلت للعسكري دخل خوينا على السير مع الشناط وراح تطلع لك بلاويه وسلاحه عندك في الجهاز نظر فيني العسكري نظره حقد وقال ارجع وراء الخط بعدها دخلنا للصالات الداخليه ونحصل لك اغلب البوابات عليها هنود وبنقاليه في حاله استنفار اذا واحد منهم وقف او تحرك تحرك الجميع وحالتهم اضطراب وتخوف قلت للشباب انتبهو لو رحلتنا هذي على الخطوط الاماراتيه كان تلقى الهنود والشله هذي معنا لان رحلات الخطوط الاماراتيه بتكون الرياض الى دبي وبعدين الى دكا او نيودلهي وتنزلهم وبعدين يودونا للفلبين وهذا عيب الخطوط الاماراتيه ونبعد عن الهنود وبوابتهم ونتجه لبوابتنا رقم 14 ونشوف بياض اخويانا الفلبينيين يلق ونجيهم ونلقاهم جالسين بهدوء ونظام عكس ال ابو هنود .
الغريب ان الباكستانيين اللي كانو مالين المطار مافيه ولا واحد داخل الصالات الداخليه
في نفس الوقت فيه رحله من الرياض للفلبين على الخطوط السعوديه طيارتهم اقلعت في الوقت المحدد ولكن حن اتاخرت مايقارب ساعه .
دخلنا الطياره وكان رقمي 41 على الجنب والمفروض جنبي فاول مضيع بلنتي ادور عليه مالقيته واسئل سعودي مفلس والامير وين خوينا قالوا ماشفناه ادق على جواله مقفل قلت مافيه الا اني اطلع من الطياره او اخذ لفه بالطياره 00000واحصله جالس في الدرجه الاولى على الكرسي 14 وانادي عليه المضيفه قلت هذا مقعده 41 وجالس في 14 رجعوه ويقومونه ويعطيني شلوت تمنيت بعد الشلوت لو اني ما ناديت عليه المضيفه وافتكيت من الشلوت.
طارت بنا الطياره شوي الا وهم جايبين لنا الوجبه الاولى . لقيت الشباب كل واحد ماخذ له اربعه كراسي في الوسط ونائم وادور للكراسي اللي في الوسط الا كلها محجوزه حتى خويي فاول مضيع بلنتي راح في اخر الطياره وحصل له كراسي فاضيه ونام عليها واجلس واحاول انام ماقدرت وطفوا الانوار بالطياره وحاولت انام ماقدرت والله مشكله مده الرحله تسع ساعات واربعين دقيقه شو اسوي الحين كنا ماخذين معنا جميع انواع الجرائد جلست اقراء واقراء واخرتها طفشت وحسيت بالام في الرجلين والوسط والرحله مضى منها ثلاث ساعات وباقي اكثر من ست ساعات وروح الف من اول الطياره الى اخرها وفرصه اتفحص وجيه الركاب وكيف نايمين وشو مسوين فضولي .
ومن القهر اجلس في مقعدي وادق لهم موال يعجبك واللي جنبي كلهم صحيوا ومن بينهم سعودي مفلس والامير لكن للاسف فاول مضيع بلنتي في اخر الطياره وما سمع الموال وفرصه بعد المضيفين بعيدين ماراح يسمعون يعني اخذ راحتي سعودي مفلس هز راسه وقال الله يشفيك ورجع ينام والامير يقول لي كم الساعه وكم باقي ومارديت عليه والركاب اللي جنبي يناظرون لي نظرات حقد طبعا اكيد مش اعجاب وشوي الا واحد يروح وراء للحمامات وكلها ثواني بعدها الا والمضيفه جايتني تبغاني اسكت والله واسكت من خاف سلم.
وبعد ساعه وينورون لك الانوار ويعطونا كروت عشان نعبيها عشان الجوازات عندهم في المطار 0 في بدايه الرحله كانوا اعطونا شنطه صغيره هديه فيها معجون وشراب
وبعد ستبع ساعات تقريبا من الاقلاع يعطونا الوجبه الثانيه دجاج ورز وكيك وشاي وقهوه .
وقربنا من الفلبين ومناظر بيوتهم من فوق من الطياره تقول بيوتهم علب بيبسي فاضيه مرميه في المحرقه والوان احمر على اخضر كل بيوتهم من فوق جمالون .
نزلنا في المطار ونلقى اربع كونترات سرى لختم الجوازات والمشكله خوينا الامير جوازه باقي سبع شهور وخايفين يقولون عنه شي خصوصا انحنا راح نجلس في الفلبين وبعدين نروح اندونيسيا ونرجع الفلبين لان اغلب الدول تشترط ان يتبقى اكثر من سته شهور في الجواز عدينا من جوزاتهم على خير واخلاقهم ممتازه احسن من اخلاق جوازات ديرتنا وبعدين ماياخذون بغشيش مثل بعض الدول ويعاملونك باحترام فائق اخذنا عفشنا ونحصل لك واحد شغال في المطار اسمه filio ويودينا لعروض الفنادق اللي في المطار وكان معنا بعض التوصيات ان فندق مالينيوم بلازا من احسن الفنادق وارخصها لقينا سعر السويت المكون من غرفتين 110 دولار والسويت روم 70 دولار وكان من ضمن التوصيات ان الحجز عن طريق المطار بيكون اغلى من السعر الحقيقي اخذنا تكاسي لفندق مالينيوم بلازا وايجار التاكسي بواحد وعشرين دولار وشكلهم نصبوا علينا وصلنا الفندق خلال ثلث ساعه ولقينا الفندق اقل بعشر دولارات 100 والغرفه السريرين ب 60 دولار والمعلومات اللي معي تقول ان الاسعار بتكون حدود 37 دولار فقط ليش الغلا هذا كنا تعبانيين والساعه 3 عصرا بتوقيت الفلبين قالوا الشباب ناخذها اليوم نريح مافينا خلق ندور فندق ثاني وبكره يحلها حلال خليناها نومه لحد الساعه 7 المساء وطلعنا بعدها لسوق كبير اسمه s.m من اكبر الاسواق بالفلبين واشهرها
كان معانا دولارات لانك لما تصرف دولار الى بيسو بيكون اوفر لك من ان تصرف سعودي الى بيسو لذلك قبل ماتسافر حول فلوسك دولارات
الدولار = 54.8 بيسو
بعد ماعطيناهم الدولارات عشان نصرفها قالوا سجلوا ارقام الدولاراتحقتكم وسجلوا اسمائكم ؟؟؟غريبه ؟؟؟ قلنا لهم معصيين احنا لو نجلس انسجل في ارقام الدولارات بيجي الصبح وحنا باقي نسجل في ارقامها خذوها هم وسجلوا ارقامها واعطونا الصرف
بالنسبه اذا كان جوالك معمم فيوجد لديهم ثلاث شبكات وهي smart gold والاخرى globe والاخرى ديجتل وعلى كلامهم قلوب هي الاحسن

اشهر المناطق الموجوده في مانيلا مكاتي وهي احسن وانظف من ارميتا وكلها مناطق بالعاصمه مانيلا ومشاوير التكسي داخل مكاتي من 40 الى 50 بيسو ( 3 ريال تقريبا ) ومن مكاتي الى ارميتا 70 بيسو وتتوقف على حسب الزحمه
اكثر شي يضيق صدرك في مانيلا الزحمه الزحمه واكثر ماتجد في الاسواق المطاعم المطاعم المطاعم شكلهم مايطبخون في بيوتهم واكثر ماتشوف في الشوارع البنات اكثر من الرجال
ومشكله الاكل عندهم انك ماتلقى الدجاج او اللحم المذبوح على الطريقه الاسلاميه ولكن يوجد لديهم في مكاتي مطعم فلسطين وهو لوحده فلبينيه مسلمه وقباله مطعم الكباب الايراني وعلى كلامهم ان الدجاج واللحم مذبوح على الطريقه الاسلاميه وتلقى لديهم الحمص والتبوله وبابا غنوج ولكن انصحك بالسمك وخل دجاجهم ولحمهم لهم

بعد وصولنا بيوم جاتنا امطار استمرت ثلاث ايام متواصله ليل ونهار وماقدرنا نطلع نتمشى فقط في الاماكن المغلقه كالاسواق لدرجه ان الشباب صار عندهم احباط ثلاث ايام راحت هدر ماحنا قادرين نطلع نتمشى فيها والفنادق تلقى فيها مظلات للمطر ما شاء الله عليهم عاملين حسابهم
بالنسبه للفنادق اول يوم جينا في فندق مالينيوم بلازا غالي وتعبان وغالي على الفاضي اخذنا غرفه في الدور 23 واخرى في الدور 22 وكان سعر الغرفه الواحده 60 دولار ثاني يوم غيرنا الفندق اخذنا فندق يبعد خمسين متر عن مالينيوم بلازا واسم الفندق ريجنس اخذنا غرفتين كل غرفه فيها سريرين وفرن غاز وكنب غرفه جميله جدا وكان سعر الغرفه 21 دولار فقط وهي انظف وارقى من غرف فندق مالينيوم بلازا اضافه على اخلاق وحسن استقبالهم اضافه انه أي ضيف غريب يكون نازل من عندك مايخلونه السكرتيه اللي تحت يطلع الا باذن منك يمسكونه تحت ويتصلون عليك نخليه يروح ولا لا وهو فندق امن جدا

في مشاويرنا مع اصحاب التكاسي اركب في المرتبه الخلفيه واعطيهم مواويل واشعار واقول للشباب اذا كان صاحب التكسي عيونه خط تراه مبسوط من الموال واذا شفتوا عيونهم صارت دائره والخشم صار يتوسع عطوني خبر اسكت واترك الهبال عني وفي احد الايام ناظر لي صاحب تاكسي وقال انت ابو سياف واشر لللامير وقال له انت ابن لادن وكان شكله حاقد علينا لكن حن ردينا علينا باغنيه هي هي ياقلوه وخليناها اغاني لحد ماوصلنا
قناه السعوديه الاولى كانت شغاله هناك وهي القناه العربيه اللي حصلناها في الفندقين مالينيوم وريجنس

اشهر الاسواق بمانيلا سوق s.m وسوق غلوريتا وهو بجانب s.m وهي بمنطقه مكاتي
ويوجد سوق كبير في ارميتا واسمه سوق روبنسون وياكثر المطاعم فيه بين كل مطعم ومطعم عشرين مطعم
ويوجد سوق اخر اسمه قمول

الجزء الاول من الرحله كان في مانيلا وكان عدد الايام محدوود اضافه الى الامطار التي منعتنا من الذهاب للمناطق السياحيه والمنتزهات

انتظروا الجزء الثاني مع استكمال رحلتنا الى اندونيسيا والعزائم وحضورنا زواج بعض السعوديين هناك وقصتنا مع شرطتهم والتفتيش ( وراح اذكرها كامله في بوابه اندونيسيا فيما بعد )
وانتظروا ايضا قصه عودتنا الى الفلبين وماتم هناك ومرض فاول مضيع بلنتي والمستشفى ولقانا بالشياب المنافس وابو محمد ( زملاء لنا ) وكيف خربوا علينا رحلتنا هم ووجيهم وكيف استنذل فينا سعودي مفلس وسافر وخلانا

ملاحظه : راح احاول في الايام القادمه وضع لبعض الصور للفلبين ووضع خريطه توضح الشارع الفنادق وتوضح محل للانترنت والذي يقع بالقرب من فندق مالينيوم بلازا وفندق ريجنسي وكذلك يوضح المطاعم العربيه في مكاتي
لي عده ايام كنت احاول اني اشارك وما قدرت الا اليوم
واتمنى ان لاتحصل لي مشكله في الاشتراك في المنتدى تمنعني من استكمال سرد القصه

وشوكورن لا ايلكم وثانكيو لا ايلي

مواضيع عشوائيه ممكن تكون تعجبك اخترناها لك:

• أخر أسعار الفنادق بمانيلا بالدولار
• هام جدا لدراسة الإنجليزى بالفلبين
• هبوط اضطراري لطائرة في مانيلا بسبب فجوة في الجسم الطائرة
• استفسارات خفيفة قبل الرحلة المخيفة
• مـسـافـر لحـالـي ع مانيــلا
• مسافر جديد ومحتاج معلوماتكم
• مسافر الفلبين في اكتوبر هل اجد مرشد فلبيني هناك
• زلزال يضرب وسط مانيلا صباح اليوم
• استفسار
• طلب مساعده عاجله
• فنادق بوراكاي
• استفسارات عن الجزيرة الحلم
• يا اهل الخبرةممكن؟
• استقالات جماعية لطياري الخطوط الفلبينية تربك حركة السفر
• عمالة مقهى
• ارجــــو النصيحه الان الان ضرووري الرجااء عدم التهاون
• الف مبرووووك لـــ مميزين وخبراء بوابة الفبين
• عاصفة بيباه تقتل فلبينيين
• ماهي أفضل أجنحة فندقية في مكاتي؟
• ماهو عنوان السفارة السعودية بمانيلا ؟ و

[size=2.5]
وعليكم السلام ورحمة الله وبركاتة

حياك الله اخوي سالم وحمدالله على السلامه من السفر والسلامه بدخولك المنتدى ...

اولاً اسم خويك " مضيع بلنتي " طويل مالقيتو غيره ؟
ثانياً ماشفته من معامله في مطارنا ومطار الفلبين يجب الوقف عنده لأنه فعلاً أحنا نشتكي من معاملت الغير لنا ولكن لا نتفوه عن انفسنا !!!!

ثالثاً بيت القصيد وهو بالنسبة لرحلة الفلبين .... وماجاء فيها .. تقولي فندق ريجنس بـ 21$ رخيص جداً .. كم نجمه هذا الفندق .... وهل هو فعلاً جيد للسكن من فرش وخلافه ؟ وهل هو قريب من شارع برقص " يعني رجليه موب تكاسي " ؟

وفعلاً منطقة مكاتي جميله جداً وماسمعته أخيراً بان عمدة " مكاتي " السيد " روبرتو " أطلق حملة " لا للتدخين " وطبقة تطبيقاً تاماً وفي كل مكان وفي كل شارع ... واعطاء مخالفه لأي شخص فلبيني كان أو سائح ... هل هذا ما وجهتموه وسمعتو به ؟

بما انك ذكرت مطعم الكباب الأيراني ذكرتني بشربة الدجاج حقتهم والرز البرياني... يمممم أكل يرم العضم بعد عناء أيام وليالي ... :d

ماقلتلنا كم يوم جلستو في بداية رحلتكم للفلبين ؟ ومن بعدها لجاكرتا! وأبيك بعد ماتنتهي نعمل مقارنة بالأسعار بين مانيلا وبين جاكرتا ومدى الفارق الكبير بالتكلفة اليومية !!!

وللحديث بقية وننتظر المزيد وأن شاءالله كل شي تمام معك ولا راح تواجه أي مشاكل

تحياتي
[/size]

والله انك روعه وباين عليك انبسطت هناك
سرد قصصي جميل واسماء الاصدقاء روعه منين جابوها الله يقطع بليسك
اما صورتك عاد حلوه بس باين انك راعي هوشات من هلحين ماسك العقال وانت هناك اجل عندنا وش تسوي .
ما قصرت والله يعطيك العافيه .

الحمد لله على السلا مه اخوي سالم ما غيره رحله موفقه نعم الفندق جميل جدآ وسعره حلو تسلم على هذه الصور [align=center]معتحياتالبــــــــــــــــــــــــــــــــــــــدر[/align]

أبونورة
صورتي هذي وانا اعلم فيهم الرقص تصدق ياحبهم للرقص لو توقف في الشارع العام في الزحمه وتشغل اغنيه وترقص تصدق راح يخلون سياراتهم ويوقفون جنبك ويرقصون
ولا تخاف اعطيتهم هناك دروس مجانيه في الرقص الشرقي والعرضه النجديه بعد

وشوكورن لا ايلك اخوي ابو نوره



البدر
الله يسلمك وشوكورن لا ايلك


ارسال الردود فيه مشكله وردي هذا الان احاول فيه ربع ساعه عشان يروح
وان شاء الله راح اكمل لكم الجزء الثاني من الرحله في اقرب وقت

هلا بلأخ العزيز ...سالم ماغيره


يعطيك العافيه.........وشكر على المجهود الرائع.......يالزيز يرايق


صحيح إن ها الشقه الجميله حقا 50 دولار

كيف التعامل معكم في المطار وغيره


عساهم أضبطوا العرضه زين


واصل الله يعطيك العافيه.......


تحياتي لكم

مسفار

[size=2.5]
هلا والله فك اخوي سالم ...

حبيبي قبل كل شي وش قصتك انت والمنتدى ... وراه مايبيك من اولها ... اخوي يمكن الكوكز عندك مضروبه ... شفلك خبير كمبيوتر يزبط وضعك ....

نرجع لموضوع فلب الخير ... والله اخوي ان كان الأثاث بمثل الصور والله غرف حلوه .. وآخذ شقه أحسن من الغرفه غريبه منكم .. شقتين من أروع شي ولا شقه وغرفه ... الشقه فيها الطبخ والنفخ وجلستكم... والغرفه حقت الزعيم حقكم ...

اخوي قاعد اقلب الخارطه واقتلب راسي معها مادري وش السالفه ... لاني اخبر فيه شارع على طول من عند مطعم فلسطين ... وغير فندق ماندارين شلون جاي .. وين شارع برقص من الخارطه .. وش في راسي مبترم ...

على فكره فيه مقهى انترنت بجوار الأيراني أول مره اشوف سرعه بمثل سرعة هالنت عندهم .. وززززززززززززززز طع التنزيل ...

تسلم حبيب ألبي على هيك سرد وننتظر البقيه الباقيه من الموضوع ...

تحياتي
[/size]

[align=center]أخونا سالم لحاله :d


ماشاء الله عليك أمتعتنا بإسلوبك الرائع والحقيقه الشقه {السويت }

رايقه من حيث الآثاث والسعر أيضا رخيصه جدا



وبإنتظار طلتك علينا


تحياتي[/align]

[SIZE=2.5]
ياهلا والله بطلتك الجميله وانا بصير وراك وراك بسردك للرحلة الجميلة ...

ان شاءالله خير اخوي من ناحية الأسم ودخولك للمنتدى ... وجرب الحين وخبرني ...

اخوي عرفت الفندق لأنه بعد سردك تذكرته وخبرت انه فيه الشقه رقم 702 او شي من هالقبيل وهي تكون غير عن الشقق الباقيه .. لفخامته وجمالية أثاثها .. وبنفس القيمه لكن امسك سرا عليها ...!!!

اخوي الشارع اللي تقصد وتتفرج عليه من المطعم الأيراني هو " برقص " الله يدندش راسك ... أما الشارع اللي فيه النت هذا يوديك برضه لبرقص ويوقفك عند فندق " أكسفورد " ...

[ALIGN=CENTER]-------------[/ALIGN]

اخوي الحين انت بديت تسرد جزء من رحلتك لأندونيسيا هنا لكن يالله مايخالف ....لكن بما انك بتعيدها وبشكل مفصل في ساحة اندونيسيا خلاص بننتظر روعتك ... تقولي اول مره تسافر لأندونيسيا .. يعني الفلبين كذا مره ..؟ كم؟

بالنسبة للمطعم اللي في الجبل أسمه " ريندو عدن " وتراه وسخ بجد الله يكرمكم ... لكن يالله اتركو العجز عنكم .. وأميركم وينه ولا هو العجاز القائد ... عاد تصدق لو تجيب صورة الجواز مع الجهتين والأختام .. بيطلعون لك سالفه غير ويمكن يقولولك وين ختم طبق الأصل من الفندق .. اهم شي بخشيش ... واللي مكثرهم علينا هو أحنا يالسعوديين ...

يالله اخوي ننتظر مزيدك وأبداعك ....

تحياتي[/SIZE]

هلا بسالم ((مفلس))

يامرحبا والله..............ماشاء الله عيني عليك بارده...........


با النسبه لموضوع أندنوسياء.............كان علمنتني عشان تخطبلي با النيابه...........

لاو الشيخ بعد من جنبها.........وزاقاره ورا زقاره أمحق من شيخ


كيف الخطوط الفلبنيه...من ناحة الأسعار والنظافه والدقه في المواعيد


ودمتم..........سالم الخير

مسفار

[size=2.5]أولا اخوي حمد الله على سلامة أخونا " فاول مضيع بلنتي " ومايشوف شر إن شاء الله ... أما بخصوص " سعودي مفلس " لأنه مفلس ولا وش يودية لمصر ويترك وناسة الشرق ....

وغير اخوي وش لك بالعنتره أعدمت الرجال وخليته يدخل المستشفى :d ...

أخوي فيه شلالات أسمها " باكسانهانق " على ما اعتقد ... وهي قريبه من مانيلا بمثل ماتفضلت بحوالي ساعتين او أكثر ... هل هي ماتقصد ؟ " باتانقاس " ...

بالنسبه لباجيو .. ماتسوى روحتها 6 ساعات ثم ترجعون ... والله غربله بس .. طيب اخوي وين سكنتو في باجيو فندق ولا أيش ؟؟ وبكم وهل السكن جميل مقارنةً بفندق ريجنس ...

يمكن تقصد الفندق بأسم سيتادل ولا سانتيا... لأنه هو اللي قريب من أسعار فندق ريجنس ....

تسلم اخوي وتحملنا بكثرة الأسئله ....

تحياتي[/size]

مشكور اخوي سالم على السرد الجميل والمفصل عن الرحلة...
واحنا بانتظار... تكملة قصة اندونيسيا.. وبكذا نقدر نسألك من جديد :d

تحياتي ،،،

السلام عليكم
اسف على التاخير كانت شويه ظروف اضافه الى الجهاز عندي كنت اتضارب معاه كل يوم لانه مايرسل المشاركات
اخوي msfar
الخطوط الفلبينيه رائعه واخلاقهم اروع ومواعيدهم تمام الا في الذهاب من الرياض الى مانيلا تاخرنا حوالي ساعه في المطار وماتعتبر مشكله
طائرات الخطوط الفلبينيه لايوجد فيها شاشه خاصه لكل مقعد واللعاب للتسليه ولكن يوجد تلفزيون في الوسط
وسعر التذكره للفلبين فقط الرياض – مانيلا – الرياض تكلف من 2000 –ألى 2100 وطبعا الاسعار في اخر الصيفيه تقل وعموما الخطوط الفلبينيه ارخص من الخطوط السعوديه

اخوي ya-mas
عارف اني اتعبتك انا ومشاكلي مع جهازي والمنتدى الف شكر لك والله يجزيك الف خير
بالنسبه فاول مضيع بلنتي الحمدلله بخير والرجال يطامر الحين ويتمنى العوده للفلبين لكن التوبه اسافر معه مره ثانيه
وبالنسبه لسعودي مفلس هذا صديق العمر وسافر معي اغلب سفرياتي ويكفي انه فاهمني لكنه مفلس من كثر سفرياته ويكرهني فيه روحاته لمصر لاني ما ارتاح في مصر

بالنسبه للشلالات اعطتنا عناوينها بنت حلال وكاتبه الاسم بالانقليزي نفس الكلام هذا
BATANGAS
وقالت روحو لمنطقه LAGUNA لكن منطقه لاقونا مارحنا لها واعتقد انها شاطي وقالت روحو لمنطقه CAUIFE يمكني غلطان في الاسم CAUIFE كاتبتها بخط مو واضح لانها قالت الاخيره CAUIFE هذي مو لذيك الدرجه
فمادري عن اسم منطقه BATANGAS هو اللي تقصده وحتى لو كانت البنت غلطانه في الاسم على الاقل صاحب التاكسي كان انتبه وصلح لنا الاسم

بالنسبه للفندق المقابل لفندق مالينيوم بلازا كلمت الشباب وخذيت منهم الاسم والاسعار ويبعد حوالي 200 متر من فندق مالينيوم بلازا على نفس الخط واسمه GREAT EASTERN HOTEL

واسعاره في الليله الواحده
غرفه سريرين مفروشه موكيت لكنها صغيره ومافيها كنب ولا فيها مطبخ 1330 بيسو وطبعا اللي بياخذ اكثر من ليله بتطلع اقل لانهم بيعملون له خصم
غرفه سريرين واسعه وتقريبا في مستوي ريجنس 1700 بيسو وطبعا كل مازادت المده كلما قل السعر

ملاحظه مهمه :
اسعار الفنادق بالنسبه لنا كانت مقبوله وفيها تخفيضات ويمكن عشان سفريتنا مو في اول الصيفيه كانت في اخر الصيفيه وكلما كان عدد الايام اكثر كل ماكان التخفيض اكثر وياخذون المبلغ دفعه واحده لكل الايام شرطهم للخصم
لكن المشكله يمكن تاخذ الفندق لعده ايام وبعدين يجي عندك نيه سفر لمكان ما او تطفش من الفندق وتبي تغيره وتكون انت متفق لعده ايام معهم وماتقدر تطلع

Awal_7abib
مشكور والمشاركه منوره بردك وبالنسبه لاندونيسيا طلعاتنا وتمشيانا فيها اكثر من الفلبين لان الفلبين الظروف ماخدمتنا من امطار ومرض خوينا واخويانا اللي جونا وخربوا علينا رجله باقيو
وللعلم كنا نقول لهم باجيو وما يفهمون علينا لحد مانقول باقيو

وان شاءالله احاول اكمل قصه اندونيسيا في بوابه اندونيسيا بالرغم ان اشتراكي في المنتدى مبهذل فيني وشكلي باسوي فورمات للجهاز

والف شكر لكم جميعا على المتابعه وان شالله اكون وفقت اني اوصل بعض المعلومات لكم

السلام عليكم

حياك الله اخوي سالمومالك غير عزك وأحنا هنا لخدمك وخدمة الأحبه الكرام .... واللي تآمر فيه بيكون ..

ماقصرت والله اخوي بوصفك الجميل ومكتمل ... وننتظرك في ساحة اندونيسيا ...

تحياتي

أتحفنا بمزيد من أبداعاتك................وروي عطشنا بفيض قلمك السيال

لك التحيه والتقدير.............وننتظر المزيد......من التقارير

تحياتي لكم

مسفار

الف شوكورن لا ايلكم وعارف اني تاخرت بالرد
لكن من البارح فقط انحلت مشكلتي بالمنتدى

الف شوكورن والفين ثانكيو لكل من شارك معنا في هذي المشاركه ولك انت اخي القارئ

في الختام احب اوضح الاتي
الفلبين اكثر شعب يحب النظام ولكن يعاب على البلد تباعد المناطق السياحيه فيه
حيث تضطر على السفر بالطائره داخل الفلبين لتنقل بين المناطق السياحيه مما يكون
اكبر عائق للسياح خصوصا لمن وقتهم ايام محدوده

اندونيسيا توفر فيها اماكن كثيره ممكن تذهب لها ومتقاربه تقريبا واسعارها ارخص من الفلبين

ولا انسى دقه الاختيار الاصدقاء في السفر ومن تجاربي بالسفر احسن عدد للسفر هو ثلاثه اشخاص

واحب اشكر اخوي المنافس لانه من دلني على هذا المنتدى الاكثر من رائع

والف شكر لاخوي ya-mas وعارف اني اتعبته معاي وبمساعدته لي هي سبب استمراري معكم بالمنتدى

وهذي صور لزملائي في الرحله

**********



سعودي مفلس انسان كسول الواحد يسافر عشان يتمشى وهو يسافر عشان ينااام وبعدين في اي لحظه يمكن يتلقى اتصال ويسافر ويخلي اخوياه لذلك وضعته في القائمه السوداء

**********



فاول مضيع بلنتي التوبه اسافر معه اخاف يمرض علي واتورط فيه وبعدين هو انسان هادئ وانا ماحب الهدوء

********



الامير مطفوق وملقوف وينخاف منه وعنيد ومايراعي شعور اخوياااه والتوبه اسافر معه


********



المنافس غامض ويتعبك معه ولما تدور عليه ماتلقاه وحرمت اسافر معه

*************




ابو محمد نسميه الشيبه افكاره غير ويعاملك كأنك واحد من اولاده واشطب عليه الف مره

ويبقى صديق لي اسمه هاجوس هو الصديق اللي مافيه مثله اي حاجه تطلبها منه يقول لك موااافق موااافق 000مواااافق 00موافق هههههههههه

وشوكورن لا ايلكم

تسلم لي اخوي ya-mas
وجزاك الله خير وما قصرت معي وعارف اني ا تعبتك
بالنسبه للرخص لاحظت في الفلبين ان اي فندق تجيه يسئلك سؤال كم تجلس
يركزون على المده اللي بتجلسها
ولا حظت في الفلبين انك تقدر تكاسر فيهم في واذا طحت لك في ابن حلال ولا بنت حلال في الاستقبال رح تزين امورك ويسوون لك تخفيض فوق ما تتصور
وبناتهم اخير وابرك من رجالهم هههههههههه
بعكس فندق مالينيوم بلازا تصدق مانوا يعطونا وجه بالرغم ان الفندق كان شبه فاضي وحنا كنا في اخر الصيفيه000ليش مادري

واذا تبي الصدق الفلبين واندونيسيا ديار حبيبه ورخيصه والله لا يحرمنا منها
ولو ان اكثر شي طفشني في اندونيسيا حبهم للبخشيش اكره شي عندي ان ادفع بخشيش