بسم الله الرحمن الرحيم السلام عليكم ورحمة الله وبركاته
أول شيء أعضاء منتدانا الجميل الله يتقبل صيامكم وطاعتكم يارب ومبارك عليكم الشهر
صراحة أنا نزلت هالموضوع وأنا في حالة يأس شديد لأن مابقى على سفرتنا الا أقل من 3 أسابيع باذن الله وباقي لي من الجدول أيام مارتبتها وهذا والله مو تقصير بس لما شخص واحد يسافر لأول مره لأوروبا و يتحمل مسؤولية عائلة هذا اللي يصير 
أنا والله قريت كثير عن انترلاكن وما حولها وكل واحد يمدح مكان ويقول ما يتفوت وتشتت حتى حسيت انها هم على قلبي أقرا ألاقي أشياء حلوه مدري كيف أوصل مع اني والله لي فترة طويله جدا أكثر مما تتخيلون ما أقوم عن اللاب توب من لما أصحى لما أنام انترلاكن مليانه أشياء حلوه بس أكيد فيه شيء حلو وفيه شيء أحلى وأنا مررره احترت اللي يشوف بالصور مو نفس اللي جرب واللي شاف ودار انترلاكن
عشان كذا اتمنى من كل من زارها ويعرفها يساعدني بترتيب جدول ل 5 أيام منها يوم كامل لأوروبا بارك مع العلم بأننا سكنين بكوخ ب Hasliberg ( 31 كيلو عن انترلاكين )
ملاحظة :
وهالخمس أيام بيتخللها يوم أحد فكرت أخليه لأوروبا بارك بس سمعت انه زحمة فضيعة وبعد مافيه تذاكر vip مع انها مو خيار متاح لكن حبيت أشوف فرق السعر ، عشان كذا هل فيه خيار آخر لهاليوم ؟
من الأشياء اللي ودي نزورها :
مطل ال harder kulm
بحيرة أوشن سي
وبلوسي
قمة تتلس الثلجية ( ذا كانت فعلا أفضل قمة ثلجية برأيكم )
أنا ما ودي نزور أكثر من قمة ثلجية وحدة انتم وش رايكم ؟
وودي نروح زحليقة صيفية تكون تستاهل وتناسب طفل يعني واحد عمره 11 سنه وبنفس الوقت حلوه للكبار 20 فما فوق يعني اتمنى نرضي كل الطرفين 
مطل لونجرين
مدينة لوزرين
القفز بالبراشوت لأربع أو خمس أشخاص
----
وفيه جبل بعد قريت عنه اسمه جبل schynige platte ( بحثت عنه باليوتيوب وحصلت مقطع مرررره عجبني المطل اللي بالفيديو مع انه مرعب بس جميييل ، لكن عجزت أعرف مدة الرحلة كم بتكون تقريبا طلوع ونزول من غير الوقت اللي بنجلس فيه بالجبل وعجزت أعرف كم سعره للبالغ والطفل ، وهل فعلا هو بهالجمال اللي بالفيديو حتى ببداية شهر أغسطس )
طبعا مو مسموح لي أضيف روابط عشان كذا اتمنى تفتحونه
بحيث تكتبون schynige platte في محرك بحث اليوتيوب تجدونه سابع فيديو بعنوان Schynige Platte
والشخص اللي منزله اسمه jungfraurailways
أخيرا .. يارب كل من رد علي وساعدني يفتح له أبواب رحمته ويجعله هو وذيته وكل من يحب ما يكمل هالشهر الا وهم من العتقاااء من النار يارب 
مواضيع عشوائيه ممكن تكون تعجبك اخترناها لك:
رد مع اقتباس
المشاركة الأصلية كتبت بواسطة abo_yussef
المفضلات