الموضوع: حاسب آلي معدل خريجة عام هـ طيب وش السبب ؟؟؟؟

_
السلام عليكم ورحمة الله ......
أخواني الأعزاء ..,
بصراحه انا مره مصدومه ومستغربه ..!!!
اذا كل العالم انرفض طلبهم للابتعاث من اللي ابتعث ..!؟
يالله ( وعسى ان تحبوا شيئا وهو شر لكم ) ..
الخيرهـ فيما اختاره الله ..
بس من جد مستغربه ..
انا طالبة حاسب آلي ..
دخلت الجامعة قسم تطبيقات الحاسب و المعلومات في الرياض جامعة الملك سعود بالملز .. بعدين خيرونا بين تربوي و اداري واخترت تربوي ..
وبكذا صرت تحت ما يسمى قسم المناهج و طرق التدريس في عليشه تخصص حاسب آلي ..
تخرجت بدون حمل اي مادة و بمعدل 4.32 ..!
يعني جيد جدا مرتفع .. مع مرتبة الشرف الثانيه ..
قدمت على طلب ابتعاث لـ أمريكا و بـ تخصص محاسبه .. لأن مدحت لي دكتوره اني اتخصص بهالقسم تقول شهاداتك بتكون أقوى ..!
بس للأسف .. انصدمت من الوزارة : (
طيب وش ممكن يكون السبب .؟
اذا زي ماقلت لكم معدلي كويس الحمدلله حتى بالثانوي متخرجة علمي 98.75% ..!
واذا انا خريجة عام 1426 هـ ..!
وين المشكله ياناس بس ابغى رد ........!!!
هل ممكن يكون لأني ما سبق لي اني سافرت خارج المملكة ولا كتبت رقم جواز السفر واستبدلته بكتابة كلمة ( لا يوجد ) ..!!!!!!
معقوله هذا هو السبب ..!!
طيب انا ماأحب اسافر برا الا لشيء مهم كـ دراسه او دعوه ..!
ومقتنعه بهالشيء يعني ماودي اطلع الا لـ حاجه ..
بس صدموني : (
قولولي هل ممكن يكون هذا هو السبب .؟؟؟؟؟؟؟؟
سبحانك اللهم وبحمدك أشهد ان لا اله الا انت .. استغفرك واتوب اليك ..
_

مواضيع عشوائيه ممكن تكون تعجبك اخترناها لك:

• مساعده قبول ماستر كيميا مشروط
• استفسار عن الجامعات لدرجة الماستر في المحاسبة ارجوا المشاركة من الجميع
• اندر واقوى تخصص كمبيوتر للماجستير؟
• سؤااال ويبي له جواب
• ترجمة الشهادة الثانويةمعلومات
• ما رأيكم في تعلم اللغه الأنجليزيه في ماليزيا ؟
• متى الاجازه الرسميه للمعاهد والجامعات
• اود من حاضراتكم الاجبه على بعض الاستفسارات
• موظف حكومي يريد الإبتعاث عن طريق وزارة التعليم العالي ؟؟؟
• نداء للأخ ملبورن
• سكن الطلبه او السكن عند عايله ؟؟
• جامعة تقبل خريج الأدبي في هندسة الكمبيوتر ؟
• مدينه معهد رأيكم يهمني
• مساعدة
• مشورتكم عليا
• تكفون بسرعة بعد بكرى ماشي
• تكفوون والله داخ راسي ومليت
• استفسارات عن المدن القريبه من لندن وبالاخص مدينة كانتربري
• دراستي في اغسطس وهذي مشكلتي
• اكتب اسم جامعه والمدينه والولايهارجوا المشاركه من الاعضاء

عليكم السلام ورحمة الله وبركاتة ...

اهلاً اختي الدبدوبه ..

نعم اختي مثل ما تفضلتي قد يكون عدم كتابة رقم جواز السفر هو السبب ؟؟

لكن ما وضحتي لنا الصورة ؟؟

يعني جتك رسالة تقول نعتذر عن ترشيحك ؟


انا اذكر واحد من الشباب في البعثات الماضية ما كتب رقم الجواز بسبب ان ماعنده جواز سفر

وكاتبين له في الصفحة الخاصة بمتابعة الطلب ..

الرجاء اكمال النواقص (( رقم جواز سفر ))


ما ادري اذا طبق في هذا العام اولا !!






معدلك عالي انتي احق بالابتعاث ...

راجعي الوزارة يوم الاثنين القادم مثل ماهو مكتوب في موقع الوزارة وبيكون خير ان شاء الله

_

حياك الله أخوي .. أبو فيصل ..

ياساتر معقوله عشان جواز سفر يتخربط مستقبلي كله ..!!!!

يعني وش المطلوب مني الحين ..؟

اذا انا ماقدر اروح الوزاره ولا عندي احد ممكن يروح خصوصا هاليومين لظرف حادث حرج أصاب ولد عمتي و يرقد بالمستشفى والكل معه ..

يعني احس مو وقته انادي اخوي او ابوي و اقولهم تأكدوا من طلبي ..!!

وش يبوني اسوي اجلس واضرب بطموحي عرض الحائط ..!

أخوي ..

الرسال على الإيميل هي بهالشكل ..\\

السلام عليكم و رحمة الله و بركاته ..
عزيزي مقدم طلب الإبتعاث (( اسمي رباعي ))
تعتذر وزارة التعليم العالي عن قبول طلبك وذلك لأن البيانات المدخلة غير متوفرة في سجلات الجامعة وفي حالة تأكدك من إنطباق شروط الإبتعاث عليك , يمكنك مراجعه الوزارة مصطحباً أصول الشهادات و ذلك من 19/6/2006 إلى 23/6/2006 من الساعة الخامسة مساءاً إلى التاسعة مساءاً علماً أنه لن ينظر في صور الشهادات أو الشهادات المصدقة

وتمنياتنا لكم بالتوفيق في فرص أخرى
للإستفسار الاتصال على 4415555 تحويلة صفر


أما في متابعة الطلب فهو بهالشكل ..\\

تم إستلام طلبك و جاري مراجعته
1427/06/07
03/07/2006





تم مراجعة طلبك ولاتنطبق عليك شروط الابتعاث
البيانات المدخلة غير متوفرة في سجلات الجامعة
1427/06/19
15/07/2006


.
.

حسبي الله ونعم الوكيل .. اللهم أجرني في مصيبتي و أخلف لي خيرا منها ..

شاكره لك اخوي على حسن تجاوبك وسرعته ..

عالأقل عرفت ان الوزارة ماعندك احد .. وكله واحد عندها اللي بيروح يدرس و يرفع سمعتها والا اللي بيروح للأسف بس لمجرد شهاده من برا ..

الله المستعان ..!!

ياربِ تسهل أموري وترزقني من حيث لا أحتسب ..

شاكره لك مره ثانيه أخوي ..,

_

الدبدوبة الله يعطيك على قد نيتك ويوفقك لكل خير

لكن واضح ان الرفض كان بسبب (يمكن) اختلاف تخصص البكالوريوس عن التخصص اللي قدمتي علية
وصراحة اشوف ان دكتورتك اللي نصحتك ما عندة سالفة:101:

المهم ولا يهمك انت تعتبرين من المميزات وينطبق عليك كل شروط البعثة الجديدة
افتحي جريدة الرياض حقت اليوم صفحة 25-28-29 تقريبا وانت تكونين مبسوطه انشاءالله:24:

وادعيلي :115:

وبالتوفيق،،

لا يرتفع ظغطم ولا شئ فيه الناس معدلهم في الثانويه 94

وجاهم رفض لكنت السبب غلط في نظام في الموقع

وطلبو منهم مراجعه ماعليك الى تراجعين الوزاره قبل 28/6/1427

وتكلميهم عن السبب ولو معك جواز او تطلعين ترا افضل

والاحتمالين عندك يا اما لم تضعي رقم الجواز

يا اما غلط في الانظمه عندهم وراجعيهم قبل 28/6/1427

ومفقه انشاء الله

_
حياك الله أخوي .. الشيب ..
جزاك الله خير على ردك .. و الجريدهـ شفتها اليوم وبصراحه انبسطت بس يوم تذكرت خيبة أملي فيهم قلت غريبه أتفائل مره ثانيه اني اتعامل معاهم ..!!!
طيب يعني رأيك أقدم فيها وبنفس تخصصي ..؟؟!
أجل غريبه ليه قالت لي هالكلام .!
طيب والدوله أختار نفس الشيء أمريكا .؟
لأني محتاره بين أمريكا وبريطانيا ..؟!
بصراحه تعقدت من هالطلب هذا (( اللي هو امريكا )) وودي أغيره بالجاي ان شاء الله (( لبريطانيا ))..
وش رايك .؟ جامعاتهم زي ماسمعت مره قويه مثل امريكا ..!
الله يكتب لنا اللي فيه الخير ..
شاكره لك تعاونك معنا ..
*
حياك الله أخوي .. Mr.sa ..
طيب وش ذنب اللي ذبح نفسه وضيع حياته وعمره بين أربع جدران عشان هاللحظه و آخرتها كلمتين ورد غطاها .. تخليك تكره اللحظه اللي فكرت فيها تكمل دراستك ..!
حرام عليهم والله حرام ..
جزاك الجنه ووفقك لما تحبه وترضاهـ ..
_

أول شيء راجيعهم .. ناس كثير حسب ما شفت امس راجعوا عشان مثل هذا الخطأ
ثانيا وش تنتظرين طلعي جواز
غير كذا شوفي عدد امس جريدة الرياض في اعلان عن بعثات طيبة راح تنزل قريب
لا تحزني الخطأ يحدث في اي برنامج مثل ما هو حادث معك الان في هذا المنتدى
من عام 2005 و حاطين لك مشاركة واحدة مع انك شاركتِ مرتين في هذا الموضوع ! :114:

النظام مربوط بجامعات المملكة وكلياتها ومركز القياس

حينما راجعو طلبك لكي يتأكدون من صحة درجاتك لم يوجد لديك سجل بالجامعة

وبذالك تراجعينهم بوثيقة التخرج الاصلية

النظام عندهم شوي تعبان

يالله روحيلهم دبري عمرك

اقسم بربي شر البلية ما يضحك

تخصص تطبيقات حاسب ترغب الحصول على ماجستير محاسبه، لا أعلم هل هي مجرد رغبة بالسفر فقط والا استحلفكم بالله مالذي نرجوه من ابتعاث شخص لايحمل اي خلفيه ماليه أو ادارية، ماذا سيستفيد الوطن، والغريب أن الأخت تتسائل عن سبب رفض طلبها!!!!!!!!!!!!!!!!

[mark=cc0000]

***** تنبيه هام *****
إلى جميع المتقدمين الذين تم رفض طلباتهم آلياً لعدم إنطباق شروط الابتعاث عليهم، و في حاله تأكدهم من إنطباق شروط الابتعاث عليهم،
يمكنهم مراجعه الوزارة مصطحبين أصول الشهادات (لن ينظر في صور الشهادات أو الصور المصدقه) في موعد أقصاه يوم
الاثنين 28/6/1427 هـ. ولن ينظر في أي إعتراض بعد ذلك التاريخ[/mark].
السالفة وما فيها ان الوزارة تراجع برقم السجل المدني لكل مقدم طلب مع سجلات وزارة التربية والجامعات ..الخ
وما لقوا برقم سجلك بياناتك يمكن زي اكثر الناس سجلاتهم تكون بأرقام ابوهم
على كل حال يراجعهم أحد بأصل الشهادة وتنحل أمورك بإذن الله
و بالتوفيق للجميع

والله اعلم تم رفض طلبك لاختلاف التخصص

بصراحة ماني عارف كيف راح تدرسي ماستر في المحاسبة وانتي خريجة حاسب

لا بد من مواد تأسيس لمدة سنة على الاقل

إختي الغالية ...
أولاً :
ماشاء الله تبارك الله بصراحةمعدل يرفع الرأس .. الله يخليك ذخر لوالديك ويوفقك لكل خير ..
ثانياً :
أنا خريج جامعة الملك سعود وتخصص هندسة حاسب آلي ومعدلي مقارب ومتخرج لي فترة .. جتني رسالة مقاربة لرسالتك أمس السبت الموافق 22/7/2006 واتجهت اليوم الأحد 23/7/2006 في الساعة 1.30 ظهراً ووجدت الكثير ممن يواجهون نفس المشكلة واتجهت إلى أحد الزملاء بإدارة الحاسب الآلي ((واسطة يعني )) وكنت قد أرسلتها عن طريق الفاكس من قبل .. عندما رآني أستغرب وسئلني لماذا حضرت ؟؟ قلت وصلني على E-mail رسالة إني أرسل أوراقي قال عادي كان قلتلي ولا حضرت ولا سويت كل هالغلبة ..
المطلوب منك اختي تحضرين للوزارة اليوم لأن يوم الأثنين 24/7/2006 آخر فرصة وأشد على أخر فرصة لا تخلين لهم عذر عليك أختي حتى يرفضونك .. وبإذن الله إنتي مبتعثة :24:

_
أخوي .. فهد بن خالد ..
شكرا أخوي .. كلماتكم أعادت لنفسي الأمل : )
_
جوليــانــو
ان شاء الله بحاول بأخوي .. و يارب يتفضى لي ..
جزاك الله خير .. الله يسلمك أخوي وعساكـ ماتشوف المكروهـ ..والله مريضنا لازال يرقد في غيبوبه ..
أحس نفسي مشتته بين مستقبلي واهلي ..
الله ييسر يارب .
_
فـارس نـجـد
تصدق توي افهم سالفة (( البيانات المدخله غير متوفره في سجلات الجامعه )) ..!!!
ماحاولت أفكر فيها من الصدمه : )
جزاك الجنه ومن تحب ..
_
alnaif_23
فعلا أتوقع انو هذا اللي صار معي ..
لأني لما راجعت شهادة الثانوي لقيت مكتوب فيها عند رقم السجل المدني رقم الوالد ..!!
ياسلام عالجامعات اللي عندنا : (
وش فايدة عشر صور من الهويه عند التسجيل .!
اللهم لا شماته ..,
مشكور أخوي ماقصرت وربي ..
الله يوفقك دنيا وآخرهـ ،
_
The Old Boy
حياك أخوي .. بالنسبه لسنه تحضيريه ، عادي أنا مستعدهـ ان شاء الله لها ..،
اللي فهمته منها اني راح أواجه صعوبه وتحدي في البدايه لكن بالمقابل راح يكون لصالحي .. ولا أدري اذا رأي كثير من الدكاتره كذا والا لا ..؟
أتمنى ألاقي انسان فاهم بهالأمور وأسأله .. لأني اذا ماقدرت اليوم أقول لأخوي يروح ..
بتروح علي و مايصير قدامي الا فرصه الابتعاث الجديده .. فأصحح فيها الخطأ اللي صار ..
ولا أدري للحين هل هو خطأ والا كلامها صحيح .!
احترت بصراحه : (
_
swcc2004
آمين ويخليك لكل عين ترجيك ..،
ماشاء الله تبارك الله .. قدرت تعدل وضعك .. الله يكتب لك الخير دوم ..
اليوم اسولف مع زميلتي .. اقولها لو كنت رجال .. كان سويت كل شيء أبيه بس المشكله اننا حريم ومو كل شيء بإيدك متى مابغيت .!
الظروف تحكمك وأنا أختك .. في حال كنت بنت و أهلك مشغولين بعزيز عليهم راح تتفشل انك تفتح معهم موضوعك .. حتى ولو كان هذا مستقبلك .. لأنو موب وقته فعلا .. انا استغرب من نفسي اني مازلت اطمح بالموضوع الى يومك ..!!!
بصراحه كلمتك الأخيره شجعتني كثير . بحاول اتكلم مع أخوي ..
أدعولي يروح بكرا و يصححون خطأهم : )
موفق أخوي .. بس عندي سؤال واذا كان فيه نوع من التطفل سامحني ولا تجاوب ..
بس بما ان تخصصك مقارب لتخصصي نوعاً ما ..
وش كان التخصص اللي اخترته لرحلتك في الماستر بإذن الله ..؟
شاكرهـ لك وقفتك ...
_

في البداية .. الله يشفي مريضكم ويقومه بالسلامة " وطهور بإذن الله " .. لاحظت من كلامك أختي انهزامية وتبريرات مالها معنى لأن فيه نساء عن ألف رجل وليس هذا عذر بل تبريرات واهية منك ..

أختي الغالية.. صحيح أني لست أمر بنفس الوضع اللي أنتي تمرين فيه لكن أختي هذا مستقبلك وليس من المعقول أنه لا يوجد قريب لك من أخ أو زوج أخت أو خال أو عم أو عن طريق ابن الجيران "إذا تعرفين أخواته" أو أخ زميلتك .. الدنيا فيها خير أختي بس الحياء .. الحياء يمنع الإنسان أحياناً من التحرك فكوني أكثر جرأة .. لا أحد يمكن أن يلومك على التفكير بمستقبلك ويربطه بوضعك الأسري الحالي بس أنا متأكد لم تجربي مع أهلك طرح الموضوع وهذا إنما يدل على حسن التربية والتكافل فيما بينكم و بالتضحية بمستقبلك على الحديث مع عائلتك ..

أختي الغالية هل جلوسك سيمنع قضاء الله وقدره ؟؟ بالطبع لا .. وحتى موضوع إجراءات الوزارة سوف يأخذ منك الكثير من الوقت وبإذن الله سيشفى مريضكم بس لا تؤجلين موضوع الوزارة .. هذا نصيحتي لك لأن هذا القرار الذي سوف تتخذينه سيكون له أثار إيجابية أو سلبية على بقية حياتك .. و أذكرك أختي باللجوء في هذه الأوقات إلى الله بالدعاء لمريضكم بالشفاء وتقرير مصيرك الدراسي ولا تنسي الاستخارة والدعاء في كل وقت وبالأخص الثلث الأخير من الليل .. وبإذن الله ستختارين الطريق الأنسب لك ..

وبالنسبة لدراستي راح أدرس ماستر في تقنية معلومات (Information Technology)
وبتخصص في (Software Engineering) وإذا ربي قدر لي بأخذ (Double Major) راح أغوص قليلاً في مجالي بالعمل والأقرب لقلبي (Networking) ..

تحياتي

_
swcc2004
جزاك الله خير على كل حرف كتبته أخوي ..
من جد كلامك صحيح وواقعي .. بس انا انهزاميتي مو بس عشان قريبي اللي بالمستشفى لا والله ..
صح انه ماخذ حيز كبير في حياتنا هاليومين والكل مشدودهـ و منعدمه أعصابه .. خصوصا بعد ماشافوهـ .!
لكن برضو شايله هم أهلي وطريقة اقناعهم بإبتعاثي .. فأنت ياأخي لا ترى الا انهزاميه وموضوع واهي بنظرك اني المفروض ماهتم فيه عند تحديد مستقبلي ...
صح عليك وكلامك عين العقل ..
بس انا كنت مقدمه على البعثه على أساس أني بروح اكمل الماستر هناك واخوي البكالوريوس خصوصا انه نفس تخصصي ..
واتفقنا ان اخر خطوه هي اقناع الأهل على أساس ان كل شيء صار و صدرت الموافقه و نادرا ماتتكرر مثل هذه الفرص ..!
وبصراحه كم مره لمحت للوالده والوالد الله يحفظهم وماكنت أشوف ذاك الرفض الشديد على أساسه قدمت وتوكلت على الله واستخرت ..
بس البارح فتحت معهم الموضوع بعد ماقريت كلماتك : (
والظاهر انو مافيه أمل ببعثتي .........!
للأسف وأقولها بكل حزن راح أقفل على مستقبلي الباب لحين يحين الوقت المناسب لإطلاق سراحه .. : (
لعل وعسى يجيني من يقدر طموحي و يصير مثلي : )
المشكله ان الوالد مارفض بشدهـ .. مثل الوالده الله يحفظها .. هي حنون مره وماتتحمل فراق احد ..
حتى تصدق قالت لي بالحرف الواحد :\ أنتي وشلون أصلا لك نفس تفكرين بهالموضوع وولد عمتك بين الحياة والموت : (
حسيت وقتها اني مالي داعي أأأبد ..!!
أحس اني مقهوووره والله امس مانمت الا بعد نياح وصياح بغرفتي ..
حتى ابوي مسك شهادتي قبل افتح الموضوع معهم كنت منزلتها عندي وقت ماكلمت على الوزارة .. قال ماشاء الله وجلس يمدح فيها .. بصراحه هذا اللي شجعني أكثر افتح الموضوع معهم بهاللحظه .. قلت له اجل مثل هالشهادات مو حرام تجلس في البيت .؟
أمي رافضه مررره اروح مع أخوي كان شرطها للسفر .. سفر الوالد معي .. والوالد طبعا كل مصالحه هنا فـ مستحيل بيروح ويخليها ..!!!
الله يجزاكم خير اخواني كلكم على ردودكم ووقفتكم معي ..
متأكدهـ ان في الموضوع خيره من رب العالمين ..
من جد عاجزهـ عن شكركم .. و اعتذر عن كل دقيقه أخذها موضوعي من وقتكم ..
أستودعكم الرحمن ،
سبحانك اللهم وبحمدك .. أشهد أن لا إله الا أنت استغفرك وأتوب إليك ..
_

.. لعل فيها خيرة إنشاء الله ..
.. بهذه الكلمات البسيطة أعبر عن شعوري تجاه ما مررت فيه ..
.. الدنيا بخير و لازال الأمل في بدايته ..
.. ربنا يشافي ويعافي قريبكم عاجل غير آجل .. إنه سميع مجيب ..
.. وبالتوفيق في فرص الحياة الآخرى ..

اختي طلبك ماانرفض عشان الجواز .. انرفض عشان مالقوا اسمك في سجلات الجامعه

وهذي صارت لناس كثيييير

انا صارت لقريبتي نفس الشي وراحت الوزاره ومعاها الشهاده الاصليه وصوره منها وتصحح الخطأ والحين ترشحت للمفاضله


بس الحين الظاهر خلاص انتهت المدة للاعتراض

عموماً دقي عالوزاره وانشبي لهم وان شالله تلاقي حل



تحياتي