السلام عليكم ورحمة الله وبركاته .
كيف الحال ياشباب ان شاء الله بخير ...؟
انا والله يالاخوان صارت لي قصة وتجربة سيئة مع صديق لي حبيت أطرحها لكم في هالوقت لعلها تفيدكم ان شاء الله والمؤمن لا يلدغ من جحر مرتين .
زميلي هذا كانت أمنيته وحلمه السفر لكندا مثلنا كلنا عشان يكمل دراسته فكان يشتغل ويجمع من سنة ونص تقريبا عشان هالسفرية فالمهم فكر انه يسافر قبل فترة وجلس يدور في الجرائد والمواقع والمكاتب عن أفضل مكتب وارخصها ماديا فالمهم قراء اعلان في جريدة مشهورة عن المكتب وراح له طبعا انا رحت معاه للمكتب ومكتبهم في السطح تخيلوا يعني اخر دور من المبنى يعني الوضع يخوف قلت له ياخوي هالمكتب مو عاجبني شام منه ريحة خيانه فقالي ماعليك فالمهم استقبلونا شباب سوريين وعادي واتفق معاهم على مبلغ ثلاث شهور اعتقد قالوله 13.000 ريال واتعابهم 1500 ريال فالرجال مثل ماقلت لكم حلمه وامنيته كندا دفع لهم اول يوم 3500 ريال مقدما وعطوه السند وفيه اسم المكتب بعدين طلعنا من عنده ورد علينا خوينا (السوري) قالنا السفارة يقولون لازم تدفع المبلغ كامل عشان يتأكدون انك بتروح تدرس هالفترة فقالهم اوكيه ودفع لهم باقي المبلغ تقريبا 11.000 ريال وهالمرة ماكنت معاه وعطوه سند غريب صراحة مو نفس الاول يعني ورقة فيها اسم المكتب ومكتوبه بالكمبيوتر وتحت ختم بأسم شخص اسمه ياسين وخوينا السوري اسمه احمد فالوضع ملخبط صراحة وقلت له الوضع مايطمن وهو مسكين مألومه قالي لا تصير شكاك فالمهم قالنا برد عليكم خلال شهر ويمر الشهر وسحبه ماعندك ونروح المكتب مافيه احد ونسأل مكتب العقارات قالنا بينتهي عقد ايجارهم بعد ست شهور أرتحنا شوي ونتصل على السوري وقلنا له الحين مر شهرين تقريبا وش السالفة قال انا مسافر سوريا عندي زواج واول مارجع ابشر باللي يسرك وطبعا الفلوس معاه والجواز فرجع من السفر بعد اسبوعين تقريبا وبعدها نتصل عليه وجحدي يعطينا بيزي نتصل عليه يعطينا مشغول نواعده يسحب علينا يعني ظهر على حقيقته حررررررررامي سرق خوينا في يوم من الايام وبالصدفه حنا نعرف ان بيته في شارع الخزان نحصله في الشارع ولابس بجاما وخوينا مايبي المشاكل ونا والله ناويه بشر لكن ركدت قلنا له نبي نتفاهم في بيتك شوي عشان نبي ندل بيته ونصيده بالشرطة قال والله نسيت مفاتيحي في البيت ونا متوهق مقدر ادخل البيت الحين هههههه تصريفة حرامي فكلمنا الشرطة عنه قالولنا لازم تجيب بيته وين وحنا مانعرف وين بيته بالضبط والحاصل ان خوينا توهق وراح للمحكمة المستعجلة قالوا له عطنا اسمه بالكامل وحنا مانعرف اسمه بالكامل وجات المصيبة على المسكين عمل سنة كامل ضاع مع واحد حرامي استغله لانه حس ان هالشخص امنيته السفر لكندا والمكتب طبعا قفله قبل ماينتهى عقد أيجاره وواضح انه سرق كم واحد غير خوينا ووهق كثير سفرهم للخارج على معاهد مو معروفة والله يعلم بمعاناتهم كما اخبرنا صاحب مكتب العقارات فالمهم يالربع انقطع عننا ثلاث شهور ونص وحنا مثل الكلاااب اعزكم الله نطرد وراه وكأننا نطره او نبي رحمته كل ماتصلنا عليه يعطينا بيزي او مشغول ومرات يقفل الجوال ومرات يرد ويواعدنا بكره ويسحب علينا يعني تعبنا فقلنا مافيه الا حل واحد رحنا لمطعم معروف في الرياض كان يعزمنا فيه الحرامي هذا وسألنا عنه عرفوه وقالوا هذا نذل ونصاب وعنده اخو واب مافي مثلهم فقلنا حلوو فيه فرصة وخذينا رقم اخوه وفهمناه السالفة وعلى كلامه قالنا اوكيه انا اتفاهم معاه وقابلنا بعد كم يوم ورجع لنا ألفين ريال وقالنا انا ضربت اخوي ومن هالكلام ونا راح ارجع لك فلوسك والحين مر حول الشهرين وهو كل يوم يعطينا موعد جديد واذا وصلنا للموعد يقفل جواله يعني تعبونا بشكل غير طبيعي واللي يومك هذا خوينا يعاني من هالمشكلة واللي ماخلته يسافر وماوده يعلم اهله لانهم راح يهزأونه ويضحكون عليه فكلمنا واحد من الشرطة خوينا قالنا لازم تجيبون عنوان بيته وللاسف ماعندنا هالشي او تضاربون معاه وتمسكم الشرطة وتعلمهم بعدين لكن هينا المشكلة اكبر لان مثل ماقلت لكم الاوراق اللي معانا شاك فيها بشكل كبيررر يعني ممكن السند القبض الاول 3500 ريال صحيح لكن الورقه الثانية حاس انها ملعوبة يعني تخوف صراحة وماودنا نغامر خاصتا ان اخوه (مادري نقول جزاه الله خير او انه يبي يماطل ويضيع وقت علينا ) قالنا بسدد الفلوس نيابة عنه ....... ومعانات خوينا مستمرة إلى يومك هذا من اتصال على اخوه لموعد وهمي لأمل مفقود ...
انا والله يالاخوان ذكرت لكم هالسالفة للعظة والعبرة والمؤمن لايلدغ من جحر مرتين انتبهوا من اصحاب المكاتب واذا سلمت له جوازك مافيه مشكلة لو تخليه يعطيك ورقه تثبت فيها انك مسلمه جوازك شيك على السندات زين تأكد ان المكتب معروف هذي ايام السرقات حقتهم وايام شغلهم يعني انتبهوا يالاخوان حتى انا والله بنفسي قبل كم اسبوع رايح لمكتب سامعه يكلم واحد يقوله اجيب لك فيزه طالب كنديه وقبول بألفين ريال وغير الشيك على حسابك ايوالله ياشباب والدعوة ماتستاهل حتى 300 ريال ماودي اطيل عليكم بالكلام والله يوفق الجميع وادعوا لخوينا مع السلامة ....مواضيع عشوائيه ممكن تكون تعجبك اخترناها لك:
- وصلت وبحمدلله الى تورنتو وصايا لكل من سيأتي عبر مطار هيثرو
- ساعدوني بسرعه تكفون
- يا زوار كندا أفتونا في أمر المحمول ؟؟ الرجاء الدخول
- ايهم افضل الجامعات ام المعاهد لتعلم اللغه ؟
- اريد السفر لكندا اروجو المساعدة مدينة هاليفاكس
- هندسة الاتصالات
- سؤال غريب شوي
- اسعار التذاكر لتورنتو
- الدنماركيون اسعد شعوب العالم والكنديون في المرتبة العاشرة
- عيادة دكتور مصري للاسنان بشارع قرانفل
- كم تبعد بانف وبلوموتن عن تورنتو؟؟؟ارجو الإفادة
- سوال بسيط
- لأصحاب الخبرة والتجربة
- افضل معهد لغة في تورنتو؟؟
- اريد مشورتكم هل هناك طريقة لتقديم شكوى ضد السفارة الكندية ومعاملتها لنا في السعودية
- افضل المدن للدراسه في كندا
- موضوع حساس ومهم جداً جداً
- حق الفيفا طفشني انتو شوفو طريقة رفض السفاره والي مر بنفس الختم دا يقولي ايش سوا
- افضل طيران من جدة الى كندا
- اريد معرفه اسعار التذاكر
المفضلات