السلام عليكم ورحمة الله وبركاته
كل عام وانتم بخير
الشكر لله ثم لهذا المنتدى لمساعدتي فالقد كانت التقارير والمعلومات الموجوده هي الاساس الذي اعتمدت عليه بعد الله
ولقد سهلت علي وحبيت ارد لكم بعض الجميل
اول شي بديت من الصيف الماضي بجمع معلومات عن الفيزا الامريكيه وكيفية استخراجها وتهولت من صعوبة ودقة الاجراءات لان اخر زياره لي كانت في شهر العسل عام 96 وكانت تطلع وانت واقف من عند القنصليه بجده بس طبعا الوضع تغير مررره والاجراءات اختلفت....
احنا10 اشخاص زوجي وانا و6 اطفال وخادمتين زوجي كان يدرس في امريكا وتطلب مني اني ادور على رخصته واسم الجامعه الي يدرس فيها وتاريخ زياراته واخذ مني وقت وكنت تقريبا كل يوم لمدة اسبوعين وانا اعبي بها الاوراق بعدين فجاءه قررنا نسافر لايطاليا ولندن وتركت تعبئة الابلكيشن
رجعت من السفره متحمسه وعبيتهم وجمعت الاوراق وتعريف العمل وكشف الحساب وكل شي احاول ماينقص شي تعبت تعب الله يعلم فيه قريت لدرجة اني كنت انام وانا اقرا .....لو دارسه ماجستير احسن لي
ماعلينا تعبت وحاولت انه يكون كل شي صح وخليت الخادمات يعبون ابلكيشن السفاره علشان مافيه غلط
وطبعا انا ساكنه جده .... دورت موعد يكون في اجازة الحج والحمدلله اول ماشريت المعرف لقيت يوم السبت 13 نوفمبر واخذت الموعد
اوراقي كامله وكان الخوف من الخادمات انهم مايعطونهم سوينا لهم عقد وكتبت الراتب 250 دولار وفهمتهم على كل شي وكل وحده لها 4 سنوات عندي يعني مو جديدات
مانمت من القلق ليلة السبت رحنا الساعه 8 للسفاره مع ان موعدنا 10 لكن ياللهووووول
طابور وش طوله صفينا طابور وكان الموضف ياخذ الاوراق الموعد ويتاكد ويعلمك كيف ترتب اوراقك وتدخل السفاره
وصلنا واحذ اوراقنا ودخلنا لغرفة تفتيش طبعا السوائل ممنوع والجوالات ياخذونها برا دخلنا وتفاجئت انه بالارقام مو بالمواعيد
استقبلنا الموظف واخذ جوازاتنا وقال ان جوازات اولادي الصغار لازم يكون لكل واحد جواز منفصل
وانه بيرجعونه معنا بعد المقابلة علشان نفصله
وكانت بدايةالتعب
المهم عطانا رقم وقالنا استنو
وكان فيه شاشه يطلع الرقم وجنبها الشباك الي تروح له
السفاره زحمه مررره وموعدك ماله اهميه بالدور يعني والروائح تضيق الصدر تحممو وتعطرو اقوا شي لانه خياس مره صدع راسي من الريحه والانفاس
جا رقمنا ورحنا للشباك واخذ معلومات وبدا يسولف ويمزح معنا وقال استنو المقابله مع الموضف الي بيعطيكم الفيزا وعطانا اوراق للخادمات باللغه الفلبينيه عن حقوقهم بامريكا وياليتهم ماعطوه كل وحده صارت تناظرني بطرف عينها
واستنينا واستنينا واستنينا
الساعة 12 ونص نادو علينا ورحنا لقينا موظفه بشوشه مرره وقعدت تضحك طلبت كشف حساب بس وقالت وين بتروحون وقالت الخادمات بعدكم
المهم سولفت وسالت كم سؤال عادي يعني وين بتروحون وليش بتروحون قالت خلاص اربع ايام وتجيكم الفزا واذا ماقدرنا يمكن بعد العيد وخوذو جواز المشترك وافصلوهم
نادت على الخادمتين وقابلتهم بلحالهم
خذت 5 دقايق يوم جو مع جوازاتهم وورقة الرفض لان رواتبهم قليله انا مره زعلت وتضايقت لدرجه اني قررت اني ماروح لامريكا خلاص كيف وعيالي صغيرين ومن بيرعاهم هناك و 2 تؤام
رحت قلت لزوجي لانه كان يعبي الفيديكس وضاق صدره مره
طلعنا وقلت له خل نروح لساحة الكندي نسالهم لان هناك مكاتب تعبي ابلكيشن السفاره الامريكيه
المهم قال لنا غلطتكم انكم كتبتو الراتب الصدق
انا الصراحه ماحبيت اكذب لان شي معروف بكل السعوديه رواتب الخدم ليش اكذب وافتح على نفسي باب
المهم قال اكتبو 2000 ريال وانك بتعطيهم 1600 دولار بامريكا وبطلعون لك الفيزا
طلعت من حي السفارات وانا ماشوف من ضيقة الصدر لا الخادمتين ولا عيالي
المهم رحت للبيت وشافتني امي قالت روحي ترجمي الورقه وعيالك خليهم عندي بالصيف ولا تاخذين الخادمات وترى مشاكلهم اكثر من الراحه ياكثر مانحاشو ماتدرين وين الخيره صراحه كلامها ريحني
بس الخادمات صارو ينافخون ولا كلمتهم مايردون علي قمت وترجمت شوي من الكلام الي عطوهم لقيت انها تاخذ بين 6 و7 دولار بالساعه وكل ساعه اضافيه ب15 دولار ولها الحق انها تاخذ جوازها وتبلغ ويجون ياخذونها ويوم اجازه روح للي تبي
حمدت الله انهم ماطلعو لهم والله مايدري الواحد وين الخيره فيه
المهم يوم العيد تفاجاءت ان فيديكس يتصل قال جوازاتكم عندنا
تخيلو يومين وجتناااااااااااااااااااااااااااااااااااااا الفيزا الامريكيه لمدة 5 سنوات والحمدلله
هذا ماصار لنا بالسفاره الامريكيه واي استفسار انا حاضره
مواضيع عشوائيه ممكن تكون تعجبك اخترناها لك:
المفضلات