الموضوع: على هونك يادبي تراك منتي اوروبا

متابع .......

إن شاءالله هالموضوع أخوي سامي الأسامي

مايخرب العلاقة الأخوية للأعضاء بالمنتدى العرب المسافرون

أبناء وبنات ( السعودية ،،، الإمارات ،،، قطر )

والواحد حلو يسافر ويصرف على وناااانسته ولا يفكر كم صرف اليوم ( هو ليه مسافر مسافر للوناسة )
والميزانية من قبل السفر الحلو الواحد يخلي مصروف يومي لو شخصين الف درهم 80 دينار ،، ولو عائلة من كبار وأطفال الميزانية ألفين ريال وأكثر
لــ ( المواصلات لو ما أجرتو سيارة ،، الألعاب ( تذاكر ألعاب ،، تذاكر دخول المنتزهات وسكي دبي ،، الأكواريوم ،، السينما ،، المطاعم مايقل عن مطعمين باليوم )
ومرات بس مصروف تاكسي و المطاعم ويكون أقل

وعندي دبي أسعارها مثل الخليج عامة

المشاركة الأصلية كتبت بواسطة بنت الشيخ زايد
http://www.arabtravelersforum.com/tr...3/#post6521293

السلام عليكم

انا اكيد ردي بيكون نفس رد دبي عشقي
ترا دبي ما تنقص بشي عن اوروبا عشان تقول (تراك منتي اوروبا)

بالنسبه لحديقة الخور الحديقة كلها تابعه للحكومه ولكن الاشياء اللي فيها مثل مدينة الطفل و عرض الدلافين والتلفريك هاذي تابعين لشركات خاصه واكيد الدخول لها بفلوس واتوقع اللي قلته كلها اسعار رمزيه !!
المترو انا استخدمته خط واحد من الراشديه لين مول الامارات ب 7 دراهم ,,, وبالتاكسي نفس المشوار ما يقل عن 80 درهم والمنيوم جارج للتكاسي معروفه لكل شركات التكاسي ..

وكل شي انته ذكرته من تذكرة برج خليفه لكل الاشياء معروفه للجميع واضن الاستغلال هو النصب والاحتيال!!

واصلاً الحكومه رافضه اي نوع من الاستغلال وكم مره حطينا رقم الشكاوي على زيادة الاسعار والشكاوي من دائرة الاقتصاد

الشاي حليب في القرية العالميه ب 10 !!!!!!!!!!!!!!!!!! وين هذا وفي اي قريه كل الاكشاك اللي اشرب منهم ب درهمين

انا اضم صوتي وبا الاخت وما قصرت

بصراحة ..
دبي ماتختلف عن باقي مدن دول الخليج الثانية
أنا من السعودية وزرت الامارات والكويت وأكيد جارتنا البحرين
ماحسيت أنو في فرق
حتى احنا بالسعودية عندنا غلاء فاحش وخاصة في بعض الفنادق والشقق الفندقية
مع أن مستواها أبدا مايرقى لمستوى فنادق دبي وشققها
ونفس الكلام ينطبق على بعض المطاعم والملاهي وووووو
والأسواق في دبي لا يضاهيها شيء في دول الخليج..لا مولات السعودية ولا الكويت ولا البحرين
مجرد المقارنة بينهم ظالمة..
والحق يقال..كل درهم أصرفه في دبي ماأتحسر عليه..
يكفيني فيها الرقي والتنظيم والنظافة والمتعة

السلام عليكم دبي غالية لأنها غالية حلوة و راقية بس زحمتها قلق روح قطر و شوف الغلا كيف أغلى من دبي من ناحية الأسعار بس أصغر
و كل دول الخليج غالية على قلبنا ، ب الحمد لله أمان و سلام و إستقرار الله يدوم علي الإمارات الأمان و السلام و الإستقرار بلدي الثاني و قريبا لي زيارة بس خبر تغير موعد المهرجان زعلانا يلا متى تلاقي حجز فنادق و لا طيران
و شكر لكاتب الموضوع و هذا رأيك الشخصي بالنسبة للدفع في الحمام في مكة المكرمة تبغى تتدخل تتوضاء في فنادق أبراج البيت لازم تتدفع 5 ريال عشان تستخدم الحمام و في فين تروح الفلوس و لمين الله العالم

تحياتي

بأختصار دبي دار الحي

والله اني اروحها واصرف كأني في جدة

12 للموية طيب روح حياه بارك تلاقيها ب15

برج خليفة 100 طيب وش فيها بتدخله مرة في العمر
برج خليفة ب400 مين قلك تروح وقت الموسم

ياعمي دبي بإختصار(تطور-حضارة-عمران- أمااااااااااااااااااااااااااااااااااااااان والأمان بالله)

بصراحة كلامك اغلبه صحيح
تصدقون ف القرية المائية في اتلانتس شريت الموية اكوافينا ب14 درهم ؟
يعني علبة وحدة قيمة كرتون كامل .. هذا الاستغلال بعينه وعلمه
ولو اني ماكنت مضطر اشتريها كان خيست لهم

هههههههههههههه
طيب أنا سعودي والله ماقد رحت لدبي لكن عندنا حديقة أبها الجديدة في مدينة أبها جنوب المملكة الدخول للفرد 95 ريال سعودي للفرد والله ماتستاهل الدخول ببلاش على الأقل دبي تدفع وتتستانس

معليش دبي افضل من مصر وبيروت الاستغلال في هذه الدول ولايوجد خدمه للسائح دبي خدمه ولكن بعض السائحين لا يعرفون يتعاملون مع دبي يعني ليش تشتري ماء ب 12 درهم من محل اسكريم وانت تستطيع تشتريها بدرهم واحد من السوبرماركت بعدين دخول الحدائق بصراحه اسعارهم رخيصه مره في السعودية نفس الاسعار ولايوجدخدمات ولكن في دبي يوجد خدمات داخل الحدائق عدم معرفة السائح بالتصرف السليم لايجعل دبي غاليه ولكن السائح لا يعرف كيف يتعامل مع البلد مثلاً واحد ماخذ غرفه فقط في فندق بسعر 1200 ريال انا ماخذ شقه في نفس القندق بسعر 600 ريال ليش لاني انا حاجز عن طريق النت وقبل السفر بشهرين في حين هو اخذ السعر من مكتب سياحي في السعودية واخذه قبل السفر باسبوع وكان في عطلة الحج فليس المشكله في دبي ولكن المشكله في السائح غير المرتب بالنسبه للتنقلات انا الي ياخذ تكاسي لايفقه شي فدبي كبيره والتنقل فيه كثير وبعيد يعني انا مستاجر سياره لمده 9 ايام بسعر 600 ريال من موقع في النت والحمدالله لو نريد نروح ابو ظبي 120 كيلو عالم فيراري رحنا فيها لان الكيلوت مفتوحه ليش تاخذ تكسي ويمص دمك ياخي بالنسبه للاكل نحن والحمدالله نشتري من الجمعيه التعاونيه اسعار رخيص وكويسه المواد ونطبخ في الشقه وبعض الاحيان نشتري من مطعم شاورما ومشويات احنا اربعه تكلفة العشاء علينا 30 درهم لنا كلنا وفي مطاعم مندي وكبسه بسعر 15 درهم نص دجاج مع الرز يعني تقدر تضبط عمرك بس تعرف للديره اهم شي البيبسي في مطاعم المولات بين 5 دراهم الى 7 دراهم ليش يعلبون عليك تقدر تشتريها من كارفور في نفس المول بدرهم واحد فقط

فرق اربعه درهم ليس مشكله لشخص واحد بس اسره رايحه 7 اشخاص يعني اربعه ضرب سبعه درهم يصير 28 درهم بس فرق في سعر البيبسي وقيس على ذلك كل طلعه اذا لم ترتب وتعرف كيف تتصرف فانك تصرف ضعفين ما تكون مقرر تصرفه

والله لو تقول أيش تقول غير دبي مافي
لك وحشة يادبي والله ليا 8 شهور ماجيتك , يارب تكتب لي جيه لدبي عما قريب

لا والله بسم الله عليها ما شا الله تبارك الله دبي اسعارها حلووووه وعاديه جدااا والله ترا نحن ناس عاديين لا ناكل ولا نسكن بفايف ستار


يعني اللي نشوفه بدبي معقول وما فيه فرق بين الأسعار بدول الخليج كلها


سعر الشاي 10 ف القريه اكيد غلطان اخوي


القريه السيريلانكيه يبعون الكرك 5 دراهم تبي الصدق يستااااااهل


دبي ما شا الله ما يهزها ريح لو ترجع اسعار الفنادق نفس اسعارها قبل الأزمه صدقوني السياااااااااااااااااااح ما يوقفون عن الاقبال


هي بس ف الصيف يتجنبونها الناس لحرارة الجو هذا عيبها ولا هي انا اسميها مدينة التخلص لاني اجيها وانا شايل همومي كلها وحزني واقول امسكي يا دبي انا تعبت

صدقني دبي اصبحت افضل من اوربا لمحبينها

بالعكس أنا اختلف معك ,,صحيح هناك مبالغة بعض الشي في الاسعار لكن ليست بالصورة الكبيرة في كل الاماكن
وانا من ناحيتي اشوف دبي تستاهل وهي متنفسنا الوحيد كخليجيين


ويكفي نعمة الامن والامان

تحياتي للجميع.
ياجماعة انا اشوف اللي يروح سياحة لدبي ماعنده سالفة.
شالسياحه اللي فيها غير المجمعات والقهاوي؟
اقصد مافيها طبيعه خلابة اللي مثل سويسرا.
ولافيها الاماكن السياحية اللي بفرنسا ولندن وفيينا والمانيا مثلا.
ولا فيها اي شي غير السباحة (بالصيف) في المدينة المائية والفنادق اللي عالبحر والغرف الفندقية والمجمعات وخلصنا..
يعني دبي لاتختلف عن اي بلد خليجي .
توفير الفلوس وكل سنتين تسافر لبلد اوروبي او حتا تركيا مثلا مع زيادة المدة والرحلة تكون مع قروب..
افضل من انك تسافر كل سنة لدبي.
شخصيا اروح دبي عشان السوق مع الأهل.. لكن عمرنا مارحنا اماكن سياحية..
مع الملاحظه:ان 80% او 95 % من محلات دبي عندنا وبأغلب الدول الخليجية
حتا دورة خارجية بالشغل اختار مصر بدلا من دبي...
طبعا والنعم بأهل دبي والامارات كلهم اهلنا وخوانا.. لكن النقاط اللي ذكرتها تخص موضوع السياحة بس.

خفوا على الأخ شويه ~

هو تكلم عن تجربته الخاصة بهذي الرحلة وله الحق في كل اللي قاله ~ لأنه هذا انطباعه الشخصي مب انطباعنا نحن ~ وهو حر بتجربته

ونحن مب لازم نوضح له لا الإيجابيات ولا السلبيات مع أن الأخوة ماقصروا بس تبقى لكل إنسان تجربته الخاصة في البلد اللي يزروها

وفي النهاية نحن كلنا أخوة يجمعنا دين واحد ~ وهذا الأهم ~ ومازلت أقول لم توجد المدينة المثالية إلى الآن ~

وللعلم أنا من دبي وفوق هذا أشوف بعض الأسعار مبالغ فيها مقارنة بمناطق أخرى

يعني نحن في دبي نعرف وين نشتري ووين مانشتري ... لكن السائح صعب عليه يعرف وخاصه إذا كانت الزيارة الأولى له

أنا مره كنت أبي أشتري فستان من معرض كان بشارع الممزر وللعلم الفستان عند أول كشك كان سعره 1500 درهم وحاولت أنزل من سعره صاحبته رفضت بعد مامشيت مسافه يعني مايقارب 4 كشكات حصلت نفس الفستان وبنفس اللون بس السعر كان 470 درهم من دون ماأكاسر ~

يعني ياعزيز السائح الأشياء اللي مب مسعره لاتستعجل في شراءها
والمراكز التجاريه تبقى المواد الغذائيه غالية فيها وعليك بالجمعيات والسوبرماركات في مشاريك

لكن تبقى دبي هي صاحبة ألذ مطاعم في العالم وهذا مب مجاملة لها لكن كل ماأسافر لأي بلد في العالم سواء خليجية أو أروبيه عمره الأكل في مطاعهم مايعيبني ..
علشان جيه ماأستخسر في دفع أي فاتورة غالية في أي مطعم ..

وطبعا مب يوميا آكل في مطاعم لكن بين فتره وفتره ~

وياهلابك أخوي في دبي في أي وقت وزمن أنت تحبه
وإن ماشالتك الدار نشيلك فوق روسنا

ولاتزعل بس

طبيعي في ظل اوضاع الدول العربية المجاورة فاقرب أأمن وجهة هي دبي اصبر بتطبطب الاسعار اذا استقرت الدول القريبة

عزيزي الاخ كاتب الموضوع .


كونك ترمي معلومات مغلوطة وتمشي لا يعني حقيقتها .


بفند كل اللي قلته من واقع شخص سافر الى


( مصر 4 مرات - الكويت مرة - صلالة مرة - ماليزيا مرة - انجلترا مرة -


اسكتلندا مرة - دبي مرة )


نبدا خطوة خطوة :


1 : تقول التذاكر اغلى من اوروبا في مشاركة والمشاركة الثانية


تقول تقريبا وصلتها وهذا اكبر دليل على تخبصك . التذاكر على الخطوط السعودية


من مدينتي في الجنوب لدبي رايح جاي 4200 ريال لشخصين )


وعلى fly dubai من ابها رايح جاي لشخصين 2300 ريال . وترا على فكرة ما جربت العربية


او خطوط اخرى .


طبعا تاريخ السفر 21 مارس القادم باذن الله .


نجي نقارنها باوروبا بنفس التواريخ .


الخطوط السعودية باريس لندن نفس الفترة ( مش موسم ) السعر 7000 ريال للشخص !


fludubai رحلات غير مباشرة تقريبا 4500 ريال للشخص .


وتقول لي نفس السعر ... يا شيخ خاف ربك !


2 : نجي للتكاسي والمشاوير ... في اوروبا بريطانيا اقل مشوار يكلفك تاكسي 18 باوند


وبخشيش غصبا عنك تعطيه من 2 الى 3 باوند يعني صفيت 20 باوند = تقريبا 100 ريال !


المترو لو فيك خير وكفو اركبه في اي دولة اوروبية ومرتك متحجبة او حتى لابسة عباية


عادية بحجاب راس .


هذا غير الوساخة والقذارة الهائلة والريحة .


يا اخي على الاقل في دبي السعر ثابت وواضح مش مثل بعض دولنا العربية اللي ياخذ


السواق يقرقر معك ساعة عشان جنيه والا اثنين !


3 : نجي للمطاعم واسعار الشاي والمشروبات .... اوروبا اقل مطعم تطلع منه بحساب


تقريبا 120 - 130 للشخص الواحد , تراني اتكلم عن الشخص ... هذا غير البخشيش اللي


لازم تحطه كعرف اجتماعي ينبذ من يتركه .


اما المطاعم العربية في اوروبا فحدث ولا حرج ... يا اخي حلقت في الادجوار رود وتغديت


بتقريبا 1000 ريال سعودي !!! وبعد يخدمونك كانك ذابح اهلهم !!


دبي اغلى مطعم اكلت فيه في مجمع وافي مطعم لبناني هائل حاسبت ب260 درهم .


4 : نجي للحدائق والمتاحف تقول رسوم مجانية في اغلب دول العالم اقول اسمح لي


هالكلام غير صحيح ... شرق اسيا حدائق نصف متر بمتر تدفع ! الابراج صح ما تدفع


بس شرط تجي تحجز الصبح قبل 8 الصبح ... هذا ما حصل لي في البتروناس قبل تقريبا 6


سنوات . واذا جيت بعد 8 وبغيت تطلع تدفع 200 رينجت . يعني نفس نظام دبي مع الرخص لبرج


خليفة .


5 : نجي للفنادق ... حنا يالسعوديين كذا نسوي زحمة والشارع فاضي ... انا سكنت الصيف اللي


فات في امواج روتانا دبي فندق 5 نجوم وارقى وانظف وافضل خدمة لفندق في حياتي ب 4000


سعودي فقط لا غير - لمدة 8 ايام - وارجو تركز على الرقم 8 ... طبعا حاجز قبل السفر بشهرين


غرفة كلاسيك ورقيتها سوبيريور تطل على ال jbr وعلى ال walk مباشرة بالف ريال فقط !


يا اخي دبي افضل ديرة منظمة جيتها في حياتي ... ما تتعطل ابدا ....


ما تحس بعدم الامان ابدا ... شعب مضياف وبشوش وخدوم جدا جدا ... وديرة تستاهل كل


فلس يندفع فيها .


6 : نجي للحدائق ... الحديثة الي جيتها انا جيتها وانبسطت فيها ...


وكمان ركبت سيكل ابو عربتين ... واقولك دخلت حدائق


اكبر منها داخل وخارج المملكة ما لقيت مثلها ... الهايد بارك مثلا ما تحصل اي عربة حتى


لو بالف ريال ! ... صلالة مسطحات خضراء عملاقة جميلة بها دورات مياه نعم ويحرصون


على نظافة المسطحات ولكن للاسف لا توجد مرافق . ... السعودية ... ودك اعلم بحدائق ابها


والسودة والطائف ولا كورنيش جدة والا نخلي الطابق مستور احسن !


عيب دبي الوحيد هو الطقس وهذا شان الهي بحت لا يستطيع الانسان تغييره !


يا اخي لو دبي مش دبي ما كان جاها السواح من جميع انحاء العالم وكمان تملكوا فيها .


روح اي مكان في دبي شوف كم تحصل عوائل سعودية مرتاحين مبسوطين . ...


يا اخي من اول ما دخلت


وبغيت اخذ شريحة جوال لازم اسجلها لدى هيئة المعلومات عشان ما اذي خلق الله .


تدري وش مشكلة دبي الحقيقية ؟


انها منظمة وواضحة وحن شعوب لم نعتد على النظام والتنظيم .

موضوع فيه ظلم لدبي دبي مفخرة العالم وليس العالم العربي
هل يعقل ان تقيم دوله بسبب قيمة شاى حليب تشربه بالقرية العالمية ولم تستطيع المفاصله
او لسعر تذكرة حديقة او لتاكسى يعمل بنظام العداد العالمى
اتوقع لك قصد من وراء هذا التقرير

السلام عليكم

اتمنا تكون استمتعت برحلتك بس السموحه منك اخوي سوء التخطيط هو الي يخلي الشي غالي

لو كان التخطيط من البدايه على اسلوب التنقل ومن وين تاكل وتشتري ما كان راح تدفع وايد

ببدا وياك بالتكسي في رقم ممكن يا اخوي تتصل فيه اذا طلب منك راعي التكسي درهم زيادة واذا مافتح لك العداد الرحله مجانيه يعني مب مجبور تعطيه اي شي

ممكن تروح اي سوبر ماركت تشتري فيه حاجياتك البيبسي والماي بدرهم واحد بس بدون اي زياده اما المطاعم لازم تكون اغلى

وبخصوص المقارنه بين الدوحه ودبي الدوحه فنادقها غالي وحتا دبي فيها شغلات غاليه مثلا انا رحت كاترا بالدوحه رسوم دخول الشاطي 100 ريال بالذمه مش غالي وعندنا بوظبي ببلاش ودبي بعد اظن التطور في الامارات بكل مرافقها الاولى بالخليج وطبعا كل دول الخليج متطورة اهم شي طيبه ناسها فديتهم

بعطيك مثلا ع تركيا انا رحت مع الاهل لمده 10 ايام كل الرحله مع كل شي وتذاكر ب 13000 وربيعي راح مع هله شخصين كلفو جريب 30000 ونقس المده والاماكن الي رحناها ولكن السبب فقط سوء تخطيط

والسموحه منكم

تراك منتي اوروبا ..

انا اعتبرها أقرب مدينة اوروبية للخليج ..
القرية العالمية تدخلها بـ 10 درهم .. بكم تدخل حديقة الملك فهد بالهدا ؟
والسكن وما الى ذلك قارن بين الفنادق المعروفة عندنا .. وعندهم وشف الاسعار