السلام عليكم ورحمة الله وبركاته
أخواني خبراء السفر والترحال
خبرتنا في السفر تفرض علينا واجب النصيحة، وإنتوا يا أصدقائي خير من يعطي النصيحة..
حبكم للمساعدة والتجارب اللي مريتوا فيها تأهلكم عشان تكونون خبراء في تخطيط رحلات روعة!
ولهالسبب أخواني أحب انكم تشاركوني بنصائحكم اللي تحبون تقدموها لكل مسافر ومسافرة، وخاصة للي بيسافر لأول مرة وما عندهم أي خبرة عن اللي لازم يهتمون فيه في اجازتهم.
تذكرون أول مرة سافرتوا فيها بروحكم؟ والمواقف اللي صارتلكم ؟ والحلول اللي اتبعتوها عشان تكون إجازتكم اللي بعدها أحلى ومميزة أكثر ؟
أتذكر أول مرة سافرت فيها، ما كنت أعرف ضرورة التخطيط الكامل للرحلة وخاصة معرفة المسافات بين الأماكن اللي حبيت أزورها والأوقات اللي أزورها فيها، وهالشي خلاني أضيع وقت وااايد فالزحمات المرورية وأوصل فالأوقات الغلط. وهالشي طبعا كلفني مبالغ زيادة ووقت كنت ممكن استفيد منه في زيارة أماكن أكثر.
بالنسبة لي عندي خمس نصائح مهمة لازم تنتبهون لها عشان تخططون لرحلتكم القادمة وهي :
١- المعرفة
كل ما تقدرون تعرفون أكثر عن الجهة اللي حابين تزورونها، كل ما تكون رحلتكم أحلى..
حاولوا تاخذون فكرة عن المدينة والمعالم اللي فيها والأسعار وطبيعة أهل البلد عشان توفرون على نفسكم وقت وجهد وبالتالي تقضون وقت أجمل
٢- نتعلم من أخطاء الآخرين
دائما حاولوا تسألون أصدقائكم وأهلكم اللي زاروا المنطقة من قبل، والمشاكل او الأمور اللطيفة اللي صارت معاهم فرحلتهم، وعن النصائح اللي ممكن تآخدونها منهم قبل السفر.
٣- الإجازة أحلى مع المشاركة
دائما وانتوا تخططون لإجازتكم فكروا فالأشخاص اللي بيكونون معاكم فالرحلة وخططوا لزيارة أماكن بتعجبهم، مثلا لما تاخذون الزوجة والأولاد رتبوا أماكن تستانسون بوقتكم مع بعض، ولا تخططون لفعالية لكم، وفعالية للأولاد لان هالشي ممكن يضيع وقتكم، فالأفضل تختارون فعالية مشتركة ومسلية للكل
٤- الأول ليس دائما الأفضل
بعض الأشخاص لما يحجزون الفنادق أو المطاعم أو اي شي قبل الرحلة يعتمدون أول خيار يطلعلهم يوم يسوون بحث على أساس أن المتصفح يعمل على إظهار الخيارات حسب الجودة، لكن بعض الأحيان يكون هالمكان معروض كدعاية، فدائما احرصوا على قراءة التفاصيل والبحث بشكل اعمق عن المكان عشان تختارون الأفضل
٥- كن سائح ذكي
بعض الأماكن السياحية والتكاسي والتجار يحاولون استغلال السياح فرفع الأسعار واستغلال الموقف. عشان جي حاولوا قد ما تقدرون تعرفون الأسعار المتداولة في المدينة اللي تزورونها وحاولوا تقايضون او "تكاسرون فالسعر مثل ما نقل ههههه" وخاصة فالأسواق الشعبية
ببساطة هذي بعض النصائح اللي أحب اشارككم فيها أخواني
واكيد ان عندكم نصائح أكثر فائدة تحبون تشاركونها فيها
انتظرها منكم أخواني
وبارك الله فيكم مسبقا
مواضيع عشوائيه ممكن تكون تعجبك اخترناها لك:
- خدمة لوجة اللة يا اخوان
- الى خبراء ابو ظبي
- الطقس في أبو ظبي الإمارات العربية المتحدة
- أريد السكن في أم القيوين بالقرب من النادي الجوي
- عااااجل جداً
- عالم فراري عالم من المتعة والجمال تقرير
- عاجل سفري آخر الأسبوع هل يوجد شاليهات في دبي
- أفتتاح فندق جميرا زعبيل سراي في م
- ارجو افادتي وين اروح في دبي وهل موقع شيراتون طريق الشيخ زايد مناسب للتنزه؟
- استفسار دبي المجمعات والاسواق يوم الجمعه ؟
- سلبيات السياحة في دبي وكيف نتجاوزها
- مارينا
- ابغى احجز في فندق سيتي ماكس آرائكم فديتكم؟؟؟
- استقسار عن شقق ليجانسي
- ايهما افضل فنادق الممشى او المارينا
- مقيم فرنسا
- احجز والا اروح مباشرة
- دارالحي
- استفسار بسيط عن اكوافنتشر وباقي الاماكن السياحيه
- سؤال عن الجو والسباحه
رد مع اقتباس
المفضلات