الموضوع: كريم سبله يحدثكم من كندا ، أي استفسار انا بالخدمه

أخي الحبيب والغالي كريم سبلة أهنيك على هالروح العالية وسعة صدرك على إجابتك للأعضاء
والله مادري وشلون أشكرك على الافادة اللي استفدتها منك وهي الكثير الكثير وعندي أسئلة صغيرونه ياقلبي اتمنى منك الاجابه عليه وانت ما تقصر...

انا رايح أدرس انجليزي ومستواي فوق المتوسط لكن شلون بالنسبة للمعهد كيف راح يعرفون مستواي؟؟؟

هل تبدأ الدراسة في المعهد من أول يوم؟؟؟ وكم مدة الدراسة فيها ؟؟؟ وعادة من الساعة كم ل كم؟؟؟

هل المعاهد في تورينتو قريبة من سكن العايلة؟؟؟

وش اسم البطاقة اللي تبيعها المراكز حق الباص ؟؟؟( in English )

وعندي سؤال لك شخصي إذا حبيت تجاوب عليه أنا ممتن لك وإذا رفضت فأنت حر ...

إنت في كندا وش تدرس هاللي عندك خبرة كثيرة بالأماكن؟؟

تحياتي لك من قلبي وشكرا

اخوي كريم كفيت ووفيت بس بخصوص الفنادق ماكو شي ؟؟ بتعبك معي يا جدي ...

اخي كريم سبله ....

بغيت اسأل عن سعر التذكرة من تورنتو الى كالجري بالطائرة ؟ بالنسبة للكبي والطفل؟
وهل الافضل نقص التذكرة من السعوديه او من كندا ؟ وهل تفرق في السعر؟

شاكرين ومقدرين جهودك

اخوي صديق الهمس يااهلااا بك ..

بالنسبه للمعهد يسوون لك اختبار شامل .. قرامر + كتابه + قراءه + مفردات ( فوكاب )

وبعد الاختبار يحددون مستواك .. وتقريباً يكون مناسب لك ..




وسؤالك الثاني ..

تبدأ الدراسه بعد الظهر .. وتختلف مدة الدراسه على حسب اللي مختاره انت .. اما يكون فل تايم .. او بارت تايم .. وبعض المعاهد توفر جدول صباحي .. وجدول مسائي .. يعني بعد الظهر .. وانت تختار اللي تبي .. وانصحكم بالمسائي .. لأن الصباحي يكون سامج ومحد له خلق قومة الصباح ..



وسؤالك الثالث ..

المعاهد غالباً ماتكون في الداون تاون .. والداون تاون مافيها عوائل HOMESTAYS .. الا ماندر (( هذا اللي اعرف )) .. يعني اضرب لك مثال عني انا .. انا ساكن بأقصى الشمال .. ومعهدي في اقصى الجنوب .. واخذ تقريباً ساعه كامله رايح .. وساعه كامله جاي .. واصحى قبل الدوام بساعتين .. بس مرتاح مع العائله وماهمني البعد ..
وفيه بعض المعاهد سكنها قريب من المعهد .. بس حاول انك تتأكد بنفسك ..



سؤالك الرابع ,,

اسم البطاقه Metro Bus..

فيه اسبوعي وشهري .. الاسبوعي بـ 30 دولار .. والشهري بـ 99.75 دولار ..

والشهري اوفر لك ..




سؤالك الخامس ..

ادرس لغه .. ومادري وش تقصد بالاماكن ..؟؟

بس انا ماعندي ذيك الخبره .. بس لو بغيت شي آمر .. وانا ان شاء الله بحاول اساعدك ..



واي خدمه لاتردد ..

ابا .. فنادق وين فيه .. في فكتوريا؟؟؟؟؟؟؟؟؟؟

http://www.hotel--canada.com/victoria_canada_hotel.html


هذي في فكتورياااااااااا ..

اختي نبت الوسم ..

فيه طيران محلي في كندا .. ورخيص .. واخذي تذكرتك من هنا احسن لك .. لأن ماتوقع بالسعوديه بيعطونك تذكره داخليه لطيران محلي بكندا ..

الموقع اللي بعطيك اياه الحين جداً جداً ممتاااااز ورااااااااائع .. يطلع لك اسعار التذاكر من الارخص الى الاغلى .. وجميع الخطوط المتاحه ..


http://www.cheapticketscanada.com/


واي خدمه لاترددين ..

على فكره اختي نبت الوسم ..

ترى بعض الخطوط مايوفرون اكل بالطياره .. والله ناسي اي وحده منهم .. بس اسألوا قبل تحجزون ..

وتوصلون بالسلامه يارب ..

من يد مانعدمهاش يبطل

اخي كريم ....
لما اختار البلد تطلع لي هذي الاختيارات للمطارات واحترت ماادري وش المفروض اني اختار؟ بانتظارك؟
هذي الاختيارات:
Leaving From:
Toronto - ON - Downtown Rail service (YBZ)
Toronto - ON - Guildwood Rail service (XLQ)
Toronto - ON - International (YYZ)
Toronto - ON - Toronto Island Airport (YTZ)


انا جربت اخترت الانترناشيونال وطلعت لي عدة اختيارات (air canada -canjet -west jet) بس تدري ايهم افضل ؟ انا لقيت الايركندا اغلى بس ارتحت لها هي اكثر(يمكن عشان عقدة الاغلى)p:

الف شكر عالموقع جدا مفيد

اخي كريم...

ارخص حجز لقيته من تورنتو الى كالجري 1404 ريال عن طريق الموقع اللي عطيتني وحجزلنا المكتب السياحي ( الطيار)900 ريال للكبير و700 ريال للاطفال.
يعني من هنا ارخص واريح.

وتسلم على الافاده , بس حبيت افيد اللي عنده هالتساؤل

حياك الله اختي نبت الوسم ..

بالنسبه للمطار

Toronto - ON - International (YYZ


اللي هو مطار تورنتو الدولي ..


وبالنسبه للحجوزات ..

أولاً .. تأكدي من الخطوط اللي حجز لكم عليها ..
ثانياً .. تأكدي من مكان الاقلاع والوصول ..
ثالثاً .. تأكدي من التاريخ والوقت هل هو نفسه اللي حطيتيه بالنت ولا لا ..
رابعاً .. تأكدي هل التذكره ذهاب و اياب أم ذهاب فقط ..


انا حسبتها طلعت بالدولار الكندي 438 .. اللي تساوي 1533 .. غير شامله التاكس ..

لشخص كبير + طفل بين ستين الى 11 سنه ..

يعني تقريباً فرق بسيط على خطوط ال CanJET .. وهذي مافيها اكل


عموماً .. توصلون بالسلامه ورحله موفقه ..

وياويلك لو ماتنزلين موضوع مصور

اهاااااا

طيب اشوف الفاوتشرات واقولكم السالفه.

تيب ......................

مشكور اخوي ويعطيك العافيه على رد على استفسارات الاعضاء
عندي استفسر ..
بالنسبه لتغير العملات من دولار الامريكي الي الدولار الكنديه ( هل هناك اماكن مخصص التغير العملات )
اذا تشرفت اخوي اخبريني عن الاماكن
------------
انا عن قريب سوف اقلع الي فانكوفر وسوف اخذ معي دولار امريكي . نظرا لعدم وجود دولار الكندي بالرياض
علمأ بأن سوف اخذ معي مبلغ كامل ( نظرا الخوف من عدم استطاعتي صرف من مكائن الصرف )
وذلك بسبب تعرضي الي هذا الموقف اكثر من مره
-------------
واشكراخوي ويعطيك الف عافيه ياليت تفيديني

حياك الله وانا اخوك ..

ايه .. فيه اماكن تبديل عملات كثيره .. حتى في المطار يمديك تغير العمله .. ولاتخاف لأن الدولار الامريكي هنا ماشي زي الحلاوه ... بس ترى اغلى من الدولار الكندي حبتين .. يعني مش حالك اول يوم او يومين على ماتلقى صراف .. والصرافين غالباً يكونون متواجدين في الداون تاون او في المجمعات الكبيره ..

اسامي المحلات غالباً تحصلها money exchange او currency exchange




ملاحظه:

قلت





انا عن قريب سوف اقلع الي فانكوفر وسوف اخذ معي دولار امريكي .



ماقلت ان شاء الله ................

عموماً . . . اذا كان مبلغك كبير اخذ شيكات سياحيه احسن لك .. ومبلغ 500 الى 1000 دولار كاش معاك احتياط ..


توصل بالسلامه وانا اخوك .. ورحله موفقه

طلعت الخطوط اللي حجز لنا عليها هي air canada ومن المطار الدولي لتورنتو الى كالجري.

بس عفوا انا قلت انهم الطيار لكن ماطلعوا الطيار طلعوا(داناتا)


والف شكر للجميع

سعر ممتاز جداً .. مع انه غريب بصراحه يعطينا الموقع كلام ثاني والمفروض يكون ارخص


عموماً .. الله يستر عليكم في حلّـكم وترحاالكم

وبانتظار تقريرك @_*

أخوي كريم سبله الله لايهينك
وش نظام إجازة رأس السنة تاريخ بدايتها ومدتها

بارك الله فيك:24:

الله يسعدلي مساك اخوي كريم سبلــــــــــــــــــــــــــــــــــــة

من جد الله يعطيك العافية على المعلومات الجميلة والمفيدة بنفس الوقت ..

وســـــــــــــــؤالي لك الله يطولي بعمرك:

انا جاي لتورونتو بإذن الله في 16 اغسطس 2006م وبجلس فيها شهر كامل لدراسة اللغة الانجليزية بمعهد هانسا (Hansa Language School Center) فا وش رأيك بالمعهد من خلال تقييمك ومعرفتك للمعاهد اللي هناك لان بإمكاني اني اغيره لو قلتلي انه سيئ ؟؟؟

تحياتي لك وبالتوفيق

قطاف

انا اول مره راح اجي كندا ومحتاج بعض نصايحكم القيّمه
انا ودي اجي سياحه مع زوجتي وناس كثير قالوا لي وش لك بالأذيه ووجع الرآس مقابلات وهم وغم ولا تسوى عليك هالفيزه .. رح اوروبا ارحم لك .. وانا بصراحة لما قريت المواضيع بهالمنتدى عن كندا قلت لازم اشوف هالديرة بأم عيني .. علشان كذا يا ترى هل الكلام صحيح عن موضوع الفيزه ..
او ان الاجراءات سهله ؟؟ ثاني شيء هل لازم اخذ معي شيكات سياحيه والا الكاش والكريديت تكفي؟؟

ارجوكم لا تبخلون علينا بنصايحكم الفذّه ..

هلا بك ياغالي ..
اتصلت لك على المعهد حقك ..
ردت علي وحده الآكسنت حقها ماش كأنه اسباني .. وحولتني على واحد تمام
المدرسه عندهم مبنيين .. جنب بعض تقريباً بينهم دقيقه وحده
المبنى الأول للطلاب من المستوى 1 الى مستوى 6 .. يعني البقنرز والانترميديت
المبنى الثاني للطلاب من المستوى 7 الى 12 .. يعني الأدفانسد ( المتقدمين
وشكل المدرسه في الصور حلوه .. لكن غالباً مدارسهم ماتكون اللي في بالك .. مثل مدرستي يوم شفت صورها قلت شكلها ديره .. ويوم جيتها حصلت مافيها الا الخرطي ... الطلاب يجلسون برا المدرسه من الزحمه .. شي طبيعي يعني
وسألتهم عن الطلاب العرب فيها .. قال لي أقل من 1% بالميه ..

المشاركة الأصلية كتبت بواسطة مسافر بالعفرته


انا اول مره راح اجي كندا ومحتاج بعض نصايحكم القيّمه
انا ودي اجي سياحه مع زوجتي وناس كثير قالوا لي وش لك بالأذيه ووجع الرآس مقابلات وهم وغم ولا تسوى عليك هالفيزه .. رح اوروبا ارحم لك .. وانا بصراحة لما قريت المواضيع بهالمنتدى عن كندا قلت لازم اشوف هالديرة بأم عيني .. علشان كذا يا ترى هل الكلام صحيح عن موضوع الفيزه ..
او ان الاجراءات سهله ؟؟ ثاني شيء هل لازم اخذ معي شيكات سياحيه والا الكاش والكريديت تكفي؟؟
ارجوكم لا تبخلون علينا بنصايحكم الفذّه ..



راح اجاوب عليك بعد اذن اخي كريم سبله
اول شي من قال انها اذيه وجع راس اجراءات السفاره مثلها مثل اوروبا ويمكن اسهل شوي
ولا بعض سفارات اوروبا يطلبون حجز سكن وصوره من التذكره لكن كندا امورهم بسيطه
ثاني شي الديره مررررره حلوه وتستاهل العنوه جو وطبيعه وطيبة ناس
انا ماني ذاك الخبره في كندا رحت لها قبل 6سنوات لمدة 5 ايام عن طريق امريكا ايام ماكان السعودي
ما يحتاج فيزه.
وان شاالله في 12/8 اي بعد 19 يوم رايح لكندا ان شاالله انا والمدام
وراح ازور ان شاالله فانكوفر - ويسلر - وفكتوريا- وتورونتو - ونياقرا فولس
واذا فيه اي استفسار انا في الخدمه

Keep Away

يسلم رآسك يالغالي على ردك .. وبالنسبة للسفارة كذا شخص قال عطهم حجوزات الفنادق والطيران علشان ما يقعدون لك .. ويسوون فيها لطعة ومش عارف ايش .. واللي مبهذلني ان كذا شخص قال الفيزة تآخذ من اربع الى خمس اسابيع يعني احتمال تآخذ اكثر من شهر لين تطلع !

حياك الله كيب أوي ..

ومشكور على الافاده وانا اخوك .. ماقصرت

وحياك الله بأي وقت ترد ترى الموضوع مفتوح للكللللللل ..

[b]




س انصحك خذ فايدو .. اذا لابد من الجوال .. ولا انا بصراحه تمنيت اني ماطلعته لأنه ياكل فلوسك على قل سنع .. خلال اسبوع عبيته تقريباً حول ال 200 دولار !! ..
حسيت انه نصب بقوه .. يالبا قلب Aljawwal بسسس



من جد يا لبى قلب الجوال هههههه انا رحت تورونتو في شهر جون اللي راح ذا و معاي شريحة الجوال معممها دولي و انكبت نكبه عالميه !! اذكر انه كان باقي على الحد الائتماني تقريبا 800 ريال و استخدمت شبكة روجر المشئوومه و ربي ما كمل يوم و نص الا قافله الشريحه و لا من زود مكالمات و الله.. بس غثتني رسايل الاقتصاديه حقت الاسهم كل شوي جايتني و ما ادري عاد كم يحسبون على الرساله.. و صار لي نكبات هناك غير هذي يمكن افرد لها موضوع خاص... خصوصا التكسي النكبة

هلا بك يافايز

وينك ماشفتك .. انا موجود في جون بس ماشفتك :112:

هههههههههه لا لا مالك حق من جد .. لازم تنزل موضوع مصور وتعبّـيه من الصور واللقطات ورحلاتك ومغامراتك وانا اخوك ..
انا والله ابددددددددد ماعندي مانع تحط صورك هنا الموضوع موضوعك ياغاالي .. بس احسن انك تحطها بموضوع مستقل حتى الناس كلها تشوفها وتستفيد .. واللي تشوفه صح سوّه ..:106:
زنزبار؟؟؟؟؟؟ ماعرفه :114:
ههههههههههههه والله منتب بسيط .. وصلت زنزبار .. زين انك رجعت السعوديه الحين !!
تصدق اشوفه من برا واقول وشهو ذا .. بس يوم قريت اللوحه (( بقاله مهب كلوب )) عرفت وش السالفه

اممممممممم

والله ياأخ ماجد ليبيا انا بفيدك بالجامعات اللي شفتها هنا .. ومبانيها عالميه .. ومعتمده ..

لكن هل هي توفر كورسات باللي طلبت ام لا .. لاأعلم .. ولكن اعطيك مواقعهم وتراسلهم .. واعذرني لأني ماأقدر افيدك اكثر من كذا ياعزيزي ..

جامعة تورنتو

http://www.utoronto.ca/


جامعة رايرسن

http://www.ryerson.ca/home.html

..

هذي اللي اعرفها هنا وشفتها بنفسي ..

وباالتوفيق وانا اخوك

المشاركة الأصلية كتبت بواسطة كريم سبله


اممممممممم
والله ياأخ ماجد ليبيا انا بفيدك بالجامعات اللي شفتها هنا .. ومبانيها عالميه .. ومعتمده ..
لكن هل هي توفر كورسات باللي طلبت ام لا .. لاأعلم .. ولكن اعطيك مواقعهم وتراسلهم .. واعذرني لأني ماأقدر افيدك اكثر من كذا ياعزيزي ..
جامعة تورنتو
http://www.utoronto.ca/
جامعة رايرسن
http://www.ryerson.ca/home.html
..
هذي اللي اعرفها هنا وشفتها بنفسي ..
وباالتوفيق وانا اخوك




مشكور ما قصرت ... وفعلا جهدك غير عادي ...أنا متحصل على عروض بس في مدينة هاليفاكس
بس مش مرتاح للمدينة ... يعني حاب أروح لمدينة ثانية ... أكيد سأتصفح مواقع الجامعات
وأنشوف أذا فيه المطلوب .. مشكور مرة ثانية ...

حياك الله عزيزي

بالخدمه

والله يوفقك

حبيب الكل .. كريم السبلة ... علل . جوازي في السفارة له تقريباا 21 يوم واليوم الخميس وطالب فيزا لدراسة لمدة شهر وما طلعت وش تضن السبب في التأخير وش توقع ممكن عشان الدول الي انا مسافر لها او في سبب ثاني ؟

عادي ياقلبي 21 يوم ..

انا اعرف ناس اخذت معاهم شهر وعليها كم يوم ..

واكثر مايركزون عليه هو الحساب البنكي .. الرصيد وان شاء الله يتصلون عليك الاسبوع الجاي ..

وعسى المكتب اللي مقدم عن طريقه يكون معروف وله سمعته..

وبالتوفيق..

كريم سبله

كيف الجو عنكم هالأيام

المشاركة الأصلية كتبت بواسطة مسافر بالعفرته


Keep Away
يسلم رآسك يالغالي على ردك .. وبالنسبة للسفارة كذا شخص قال عطهم حجوزات الفنادق والطيران علشان ما يقعدون لك .. ويسوون فيها لطعة ومش عارف ايش .. واللي مبهذلني ان كذا شخص قال الفيزة تآخذ من اربع الى خمس اسابيع يعني احتمال تآخذ اكثر من شهر لين تطلع !



انا سويت الفيزا عن طريق مكتب الفيفا في الخبر

قدمت على فيزة اوروبا وكنداو خلال 25 يوم والفيز كلها جاهزه

اختي ام منصور

مابه ذاك البرد ..

الحراره بين 18 الى 35 درجه ..

النهار يكون حار غالباً .. والليل يكون براد .. واحياناً يكون هواء ..

والجو بشكل عام ..

حلووووووووو ... والنهار يكون احياناً مطر .. واحياناً بس غيم لكن معتدل ..

عالبركه Keep Away ..

علمني استقبلك في المطار بس ..

ماقلت لي جاي سياحه ولا دراسه؟ واذا دراسه في أي معهد ؟؟

الحساب طال عمرك فية 28 الف وكاتب المدة الي بجلسها شهر والمكتب اسمة( كنة)ويقولي الي في المكتب دايم الفيز تطلع علا 17 يوم بس انت وضعك غريب ! :114: بس انشالله انها خيره انا السبت بروح لسفارة يا انا يا هم خلاااص ابي الجواز لو ما يتفيز الله يسلم نيوزلندا لافيزه ولا قلق ..[ يقالي مهددهم ] :15:

المشاركة الأصلية كتبت بواسطة كريم سبله


عالبركه Keep Away ..
علمني استقبلك في المطار بس ..
ماقلت لي جاي سياحه ولا دراسه؟ واذا دراسه في أي معهد ؟؟




الله يبارك فيك وانا اخوك
انا جاي سياحه ان شاالله انا والمعزبه
والبدايه راح تكون من فانكوفر والعوده من تورنتو ان شاالله
توصينا بشي من الديره قبل لاامشي

المشاركة الأصلية كتبت بواسطة ولد يوسف


أخوي كريم سبله الله لايهينك
وش نظام إجازة رأس السنة تاريخ بدايتها ومدتها
بارك الله فيك:24:



هل أجد عندكم معلومة؟؟

غريبه يا ا ب ا ..

لأن اللي اعرفه من 20 يوم وفوق .. وطبيعي لو توصل شهر !!

بس يمكن المكتب يسوي دعايه ..

والله ماتدري وش الخيره فيه وانا اخوك ..

الله يكتب لك اللي فيه الخير ياخوك..

Keep Away

توصلون بالسلامه وانا اخوك ..

سلامتك .. بس لقافه فيني

المهم لااوصيك بالقهوه ان كانك راعي قهوه ..

واخذ معك بساط تجلسون عليه في الكشتات ..

وشنطه للعزبه (( ترمس + زمزمية قهوه )) الاشياء الضروريه للكشته ..

ولاتنسى تجيب معاك صنادل وتكثّـر من الشرّابات

ياهلاا بك ياولد يوسف ..

اجازة رأس السنه تبدأ مثل كل العالم .. والله اني ماعندي خلفيه

ولكن تقريباً من 21 ديسمبر .. تبدأ الاجازه .. وتنتهي في بداية جانواري الله العالم في 1 او 2 او 3 ..

والله اعلم

اخي كريم...لدي اخ للتو تخرج من الثانوية هذا العام...ونريده ان يدرس اللغة في تورنتو...ويوجد في جدة مكتب " وكالة عطلات العمودي " ولديهم برامج تعليم اللغة الإنجليزية تتراوح بين شهر ونصف إلى 8 شهور
شاملة التالي: (الأسعار تتراوح 6700 ريال إلى 48000 ريال)

إسم المعهد: Aspect

1. رسوم التسجيل والدراسة والكتب
2. الإستقبال في المطار
3. الإقامة مع عائلة في غرفة مستقلة
4. وجبتين مع العائلة إفطار وعشاء
5. شهادة معتمدة في نهاية الكورس
6. إستخدتم الكمبيوتر مجانا
7. التامين الطبي

الرجاء توضيح الأتي:

1. هل موقع المهد في مكان آمن , بإعتبار إنه موجود في الداون تاون واللي عادة ماتكون اماكن تجمع السود والهوملس.

2. سكن العائلة ( هل توجد عوائل مسلمة. وهل يوجد سكن عوائل بالقرب من المعهد المذكور. هل تتكفل العائلة بغسل الملابس وكيها مقابل مبالغ إضافية).

وجزاك الله الف خير

حياك الله اختي سامبا ..
1- المعهد موجود في الداون تاون على شارع يونق ، ومكانه ممتاز ..
والداون تاون كل الفصائل موجوده هناك.. عرب (( جميع الجنسيات والاشكال والالوان )) وأجانب (( جميع الجنسيات والاشكال والألوان )) .. واخوك لو بيدرس بيكون في النهار .. وماعليه خوف لأن الناس تمشي وتروح وتجي والشارع اللي فيه المعهد بالنهار مزحوم بالناس ..


2- في آسبكت انا قابلت كذا واحد يدرسون فيه يقولون عوائلهم بعيده عن المدرسه .. يعني بين نص ساعه الى ساعه بالصب وي .. وبالنسبه للعوائل المسلمه ماأتوقع لأني ماقد سمعت بهالشي، ولا أظن أن شخص مسلم سيسمح لأحد بالسكن عنده في بيته بين أهله وهو مسلم ويغار ويعرف الحلال من الحرام .. والله أعلم .. وبالنسبه للملابس يعتمد على العائله .. أعرف ناس عوائلهم يغسلون ملابسهم لهم ببلاش كل اسبوع .. وناس يعطونهم مبالغ اضافيه عشان الغسيل والكوي .. وفيه ناس (( أمثال حضرتي )) يكرفون ويغسلون ويكوون ملابسهم على خششهم :110: ..


بس أشوف إن المعهد غالي عن طريق العامودي ..

قبل كم يوم مشيّـك عن طريق الموقع حقهم على دراسه 6 شامل اللي قلتيه كلّـه .. تقريباً بـ 36 او 37 الف ريال !!

ماتوقع شهرين بتكون فرق 11 الف ريال !! ..

لو حابّـه اشيّـك لكم أو أنتي تشيكين بنفسك على الموقع التالي:

https://ssl12.chi.us.securedata.net/...G,5&School=TOR


وشوفي الحسبه بنفسك .. واتوقع انه بيطلع أرخص ..

وترى استخدام الحاسب اذا كان في المدرسه يكون مجاناً بدون ماتطلبون .. واذا في البيت بس اعطوهم خبر انكم تبون انترنت ولاياخذون عليكم رسوم زياده .. وأيضاً الشهاده يعطونك اياها أكيد ..

وبالتوفيق يارب .. وأتمنى اكون خدمتك ..

المشاركة الأصلية كتبت بواسطة مسافر بالعفرته


Keep Away
متى رحلتك يالغالي ,,, وعلى أي خطوط حجزت .. وكم حاط لك ميزانيه ..



الرحله ان شاالله في 11/8 او 12/8
من البحرين لندن على البريطانيه
لندن فانكوفر عل الكنديه
فانكوفر تورونتو على الكنديه
تورونتو باريس على الكنديه
باريس البحرين على الخليج (للأسف)
وباالنسبه للميزانيه على حسبتي الان تقريبا في حدود 50 الف لمدة 29 يوم
ولكن معي بطاقة الفيزا للطوارئ

سؤال اخوي كريم سبله
ايش رايك فيه فندقHilton Toronto على Richmond St W ويتقاطع مع university ave
او فندق Marriott Bloor Toronto على Bloor St E مع park rd
بخصوص مواقع الفندقين ايهما افضل من ناحية قربهم من الاسواق والمطاعم
ولك جزيل الشكر

Keep Away

حبيب قلبي اتمنى تنبسط برحلتك هذي .. بس يا ترى فيزتك طلعت والا بعد ؟؟ واذا طلعت كم يوم ظلت بالسفارة؟ طلبوا منك مقابلة؟؟

هلا بك ياكيب أوي ..


أولاً .. ماأقول الا الله يعينك على الكنديه .. لأن كل الشباب اللي جاو عليها .. يسبونها من جد .. وتوصل بالسلامه وانا اخوك .. :24:


بالنسبه للفنادق .. الأفضل من ناحية القرب من الداون تاون أكثر ومن الفله هو هيلتون .. والفندق مره شكله من برا حلو حلو حلو حلو ..
واذا تقدر بعد تمر على الشيراتون يكون ممتاز جداً .. انا دخلت الشيراتون .. وصورته .. والفندق خيالي .. لدرجة اني دخلت دورات المياه حقته وانتم بكرامه .. مابغيت اطلع !!
ياشيخ يلعن ام الراحه :115:
وهذي صورتين للفندق .. وبصراحه مامداني التقط صور للفندق فقط .. فـماعندي الا الصورتين هذي انا مو فيها .. والباقي كاشخ فيها :109:

وصورة داخليه

..
وبالنسبه للفنادق اللي اخترتها انا اشوف ان هيلتون أقرب للداون تاون أكثر والمطاعم والاسواق :108:
وقريب من السي ان تاور أيضاً .. :106:
ولو احتجت شي ولا شي .. أو تبي أي مساعده راسلني على الخاص اعطيك رقمي وتتصل علي لو احتجت تستفسر عن شي أو نقصك شيء ..
لاتردد وانا اخوك :113:

اخي كريم سبله.. جزاك الله خير

المشاركة الأصلية كتبت بواسطة مسافر بالعفرته


Keep Away
حبيب قلبي اتمنى تنبسط برحلتك هذي .. بس يا ترى فيزتك طلعت والا بعد ؟؟ واذا طلعت كم يوم ظلت بالسفارة؟ طلبوا منك مقابلة؟؟



ابشرك طلعت الحمدلله
انا قدمت على الفيزا الكنديه والايطاليه
واخذت معي 25 يوم
ولم يطلبو مني مقابله

المشاركة الأصلية كتبت بواسطة كريم سبله


هلا بك ياكيب أوي ..
أولاً .. ماأقول الا الله يعينك على الكنديه .. لأن كل الشباب اللي جاو عليها .. يسبونها من جد .. وتوصل بالسلامه وانا اخوك .. :24:
بالنسبه للفنادق .. الأفضل من ناحية القرب من الداون تاون أكثر ومن الفله هو هيلتون .. والفندق مره شكله من برا حلو حلو حلو حلو ..
واذا تقدر بعد تمر على الشيراتون يكون ممتاز جداً .. انا دخلت الشيراتون .. وصورته .. والفندق خيالي .. لدرجة اني دخلت دورات المياه حقته وانتم بكرامه .. مابغيت اطلع !!
ياشيخ يلعن ام الراحه :115:
وبالنسبه للفنادق اللي اخترتها انا اشوف ان هيلتون أقرب للداون تاون أكثر والمطاعم والاسواق :108:
وقريب من السي ان تاور أيضاً .. :106:
ولو احتجت شي ولا شي .. أو تبي أي مساعده راسلني على الخاص اعطيك رقمي وتتصل علي لو احتجت تستفسر عن شي أو نقصك شيء ..
لاتردد وانا اخوك :113:



الله يعطيك العافيه ياكريم سبله وماقصرت ياالغالي ماشاالله عليك كريم على اسمك
واذا احتجت شي ماراح استحي منك ان شاالله
خلاص الشيرتون افضل اجل نحجز فيه ان شاالله
وشيكت عل السعر في موقع Expedia الليله 176 دولار امريكي
وسعره مناسب اتوقع
بس وش رايك في موقع Expedia زين والا
انا شيكت على الاسعار بينه وبين مواقع بعض الفنادق على الانترنت ومكتب سفر وسياحه في الخبر
حصلته ارخص منهم كلهم , وعملت حجز عن طريقهم اليوم في ويسلر وبعد ماخلصت
اتصلت على الفندق وسئلتهم عن حجزي قالولي عندك حجز مؤكد .

سؤال اخر ياطويل العمر
انا معظم رحلتي راح تكون في فانكوفر
وراح اجي تورونتو لزيارة نياقرا فولس
انا مخطط اني اجلس في تورنتو 3 او اربع ايام
ونياقرا فولس 3 ايام
بخصوص تورونتو هل 3 ايام كفايه والا نزودها شوي.
واذا انك زرت مدينة الوندرلاند عطنى معلومات عنها كم تبعد عن وسط تورنتو وسعر التذكره وهل يكفيها
يوم واحد .
وسؤال اخير بخصوص شريحة الجوال ما هي افضل شريحه لمكالمة الاهل باالسعوديه
اواذا تعرف كذلك بطاقات الاتصال العاديه عن طريق الهاتف الثابت عطنى اسمها الله لا يهينك
واسف جدا جدا على كثرة الاسئله
ولك جزيل الشكر

هلا بك اختي سامبا .. وياك يارب

هلا بك ياغالي ولو حاضرين للحبايب..



وبالنسبه لموقع اكسبيديا والله ماعندي خلفيه عنه.. لو تبي ادق على الفندق دايركت واسالهم ابشر..

اتوقع ثلاث ايام كفايه لو كنت بتجلس ثلاث ايام كامله..

اول يوم روح تمشى في الداون تاون ...
ثاني يوم روح للسنتر ايلند .. Center Island

ثالث يوم روح للوندرلاند .. وانصحك يكون وس الاسبوع يعني مهب في الويكند عشان الزحمه..

وهي تبعد حوالي نص ساعه .. انا ماعندي كيبورد عربي الحين ان شاء الله بكره او بعده يصلح النت في البيت واشرح لك كيف تروح للوندر لاند بالتفصيل ..

وبالنسبه لشرائح الجوال انصحك ب Fido

هي احسن شيء.. مسبوقة الدفع..

بس كلها تصرف عليك اذا استقبلت مكالمات

وبطاقات الاتصالات كثيره وانا اخوك وتفرق اذا تتصل على ثابت في الرياض او جده او الدمام تطلع عندك فوق 100 دقيقه في بطاقة CiCi

واذا تتصل جوال عندك حول 20 او 25 دقيقه ...

بس اعرف ان سي سي هذي حلوه للثابت في المدن اللي قلت لك

واسال على كيفك لاتستحي ولاتردد حاضرين وانا اخوك ..

انا ماا قد اقول الا الله يجزاك خير ويوفقك ان شاالله
على هاالمعلومات القيمه
وشكرا

الله يعطيك العافية على المجهور الرائع ياكريم سبله ......ويجعله في موازين حسناتك....
انا بودي اسئلك كم سؤال ....
ماهي المدينة المناسبة مادياً للطالب في كندا.......يعني انا قلت هاليفاكس بعض الطلاب في المنتديات الثانية يقولون انها غالية.....
الآن أستقر الرأي على اوتاوا .....هل صحيح ان تكاليفها المادية قليلة ....أقصد السكن والمعيشة ....
اذا فيه مدينة ثانية ياليت انك تذكرها..... مع ملاحظة اني لا أهتم لجمال المدينة وعامل الجو فيها
-----
النقطة الثانية اخي كريم سبله .... كم تقدر التكاليف السنوية في كندا عموماً ( المعيشة ، السكن ، الدراسة ، رسوم طبية وغيرها) .....يعني لو تقدر تقولي المتوسط يكون كم بين كل المدن اللي فيها جامعات معترف بها
الاجابات بالنسبة لهذا الموضوع اختلفت ....المواقع الرسمية الكندية تقول انها تكلف سنوياً مايعادل 65000 ، سئلت مكتب مختص بالبعثات ...قالي انها راح تكلفك من 70 الف الى 80 الف .....بعض الطلاب يقولون انها تكلف حوالي 100 ....
أرجو اني اشوف اجابتك...لانها مهمة لي وبتحدد اني اروح او لا .....مع الملاحظة اني حريص على الأمور المادية ...لاني بصراحة ماودي اكلف على اهلي ...
اخوك بسام

السلام عليكم ورحمة الله وبركاته ..
كيف حالكم حبايبي أنشالله بخير ،،، أنا حبيت أطرح موضوعي وأتمنى اللي عنده جواب ومتأكد منه يرد علي وللي حاب يشارك مافيه أشكال .

أنا يالربع رجعت من نيوزيلاندا قبل اسبوعين تقريبا وكنت جالس فيها أربع شهور دراسة لغة المهم انا من قبل مأسافر كانت نيتي أهاجر يعني أشتغل هناك وأكمل دراستي لكن صارت لي ظروف مع الاهل وكان فيه واحد تعبان الله يشفيه ورجعت عشانه المهم أنا في بالي وأفكر من زمان أني اسافر لكندا لما سمعته عنها من شهره وفائدة ووظائف وخاصتن أني اعرف ناس هناك ولكن للاسف مايحك جلدك الا ظفرك مامنهم فايدة والله وموظفين هؤلاء اللي اعرفهم فأنا أبي من اللي عايشين في كندا الأن يردون علي أستفساراتي التالية :ـ

1- أنا أريد السفر هناك والدراسة ثلاث أشهر على حسابي الخاص تمام يعني راح اسافر عن طريق معهد وادفع له مقدم تعب ثلاث أشهر حلو ولكن قبل هذا أبي أسئلكم تنصحوني أروح مع معهد أو اروح وادور لي معهد أهناك بس المشكلة المعهد قالي بأجيب لك تاشيرة الدخول بالمبلغ الفلاني وخلال أسبوعين حلو ،، فمأدري وش رايكم ماعلينا خلونا نقول أبروح مع معهد حلو ،،،
* وين تنصحوني أروح أي منطقة ممكن أحصل فيها أستفادة في الدراسة وممكن أحصل فيها عمل .
2- الشغلة الثانية بعد الثلاث أشهر أنا ابي اشتغل وأدرس حلوو يعني أشتغل ومن فلوس الشغل أسجل في كلية واللي اعرفه هناك قالي تعال وفيه وظايف ماعليك ،، بس أنا مادري فيه وظايف او يلعب علي لأن والله ماودي أرجع بعد الثلاث أشهر ابي استمر أقل شي سنتين ،،، وبعدين أذا فيه وظايف يالأخوان ياليت أعرف كم يعطونك في الساعة الوحدة تقريبا ياليت أحصل أجابة ممتازة من أخواني اللي في كندا الآن .

شغلة ثانية أريد أن اعرف كم بيكلفني مصاريف في الشهر بالريال السعودي ياليت وتراني أنسان مأحب الصرفيات ،،،

أسئلة كثيرة بس أتمنى بالأول الاجابة على أسئلتي هذي ولكم جزيل الشكر والعرفان من أخوكم راشد ...

وتحياتي لكم .....

اخ كر يم بعد قلبي شكلي قابلتك وانا مادري اي واحد انت فيهم لاني الاسبوع الماضي كنت مع 2 من الشباب

تجمعنا مع طلاب ا ل ef والله انكم زاحفين

المهم مووووو هذا موضوي

قولي في اماكن جديده طحت عليها لاني زهقت مافي اماكن واجد اروح لها مافي الا الداون تاون حتى هو رهق منا

وعسى عمرك طويل

مشكووور اخوي كريم سبلة على حبك للخير ومساااعدة الناااس وهذا ان دل على شيء دل على طيب اصلك واسمك صرااحة اسم على مسمي كريم بمعنى الكلمة وكريم في معلومااته
على كل حاال انا عندي كم استفساار بخصوص الدراسة في كندا
اول شيء انا ناوي اني ادرس الطب على الحساب الخاااص السوال هنا هل يجب علي انا ادرس في معهد للغة الانجليزية قبل مالتحق بالجامعة لدراسة الطب او اني ادرس اللغة في نفس الجااامعة ؟؟
سوالي الثاني كم مدة دراسة الطب بكلريوس في كندا ؟
السوال الثالث مارايك في منطقة اوتاوا من الناحية المعيشية والسكن والطعام وتكاليف الدراسة ؟؟

حياكم الله وآسف جداً على التأخير .. لأن النت انقطع في البيت وتوهقنا مع العائله الله يبلشها ..

وبالنسبه لسؤال اخوي بسام ..

والله حظك حلو لأني اليوم مريت على اوتاوا .. وبيني وبينك لاتقولي عامل جمال المدينه لايهم .. لأنه والله انك راح تحتاج ان المدينه تكون حلوه .. مهما كنت من النوع الـ ( مزلّـب ) للجمال والطبيعه راح تحتاجها في كندا .. عموماً انا مريت على اوتاوا اليوم وماشفت فيها شي بصراحه .. والمدينه هي عاصمة كندا ويتكلمون فيها اللغتين الفرنسيه والانجليزيه كلغه رسميه .. وبالنسبه لتكاليفها والله ماعندي خلفيه عنها .. لكن انا وقفت عند مركز وشريت منه وشفت ان الاسعار نفسها اسعار تورنتو مافيه فرق ... وان زادت ولا ماراح تنقص لأنها العاصمه

وبالنسبه للمعيشه والله مدري وش اقولك .. بس ماحد يقدر يفتيك فيها لأنه يعتمد على معيشتك .. اضرب لك مثال مباشر وحي ّ .. انا جيت تورنتو والحين لي فيها تقريباً شهرين .. وصرفت تقريباً الفين دولار .. معيشه .. وفيه اكثر من واحد اعرفهم صرفوا اكثر مني .. وناس صرفوا أقل ّ مني .. يعني يعتمد عليك وعلى صرفيتك أنت .. ماحد يقدر يفيدك .. ولو بغيت نسبه تقريبيه اتوقع ان في السنه ماراح يقل عن 70 الف ريال .. معيشه وماشابهها ..

وبالنسبه لمتوسط الصرفيات ياعزيزي ماأقول لك غاليه ولا رخيصه .. لكن الدوله متوسّـطه .. يعني بالنسبه للسعوديه تعتبر غاليه نوعاً ما .. لكن انت وتفكيرك وحسن تصرفك راح يوفر عليك كثير .. مثلاً تعرف طريق البيت .. ماتوهق بحيث انك تضطر كل يومين او ثلاثه تضيع وتاخذ لك تاكسي بـ 30 الى 50 دولار !! .. هذا اللي يطير الميزانيه وانت ماتدري

أخ رشودي بالنسبه للهجره والمعيشه والله مادري عنها
لكن ماظن احد يقدر يجيب لك فيزا بدون قبول في مدرسه او جامعه ..

وانصحك بتورنتو .. ولاتفكر ولا تحتاااااااار ابد ..


وبيكلفك حوالي (( السعر التقريبي )) من الف الى الف وخمسمائة دولار ...


واسف ماقدرت افيدك في باقي اسئلتك لأن ماعندي خلفيه عنها ..