أحبتي...
هذا الموضوع من مشاركاتي الأولى في المنتدى التي أتمنى أن تعطي البعض فكرة عن الكروزز البحرية....وكنت نشرتها بداية كرد على الأخت الباحثة في منتدى الصور....لكن لاني حسيت ان هذا المكان أنسب....راح أعيد وضع الرد هنا
enjoy it
النص الأصلي مرسل من قبل غامض
الأخت العزيزة الباحثة/
الصور اللي انتي عارضتها لواحدة من اسطول سفن شركة اسمها رويال كاريبيان. الشركة هذه من اقوى وافضل الشركات اللي تقدم كروزز حول العالم...
وانا شخصيا كان لي تجربة ما تنسى معهم الصيف الماضي خلال شهر العسل
طلعنا في رحلة لمدة 7 أيام على سفينة اسمها سبليندور اوف ذا سيز (Splendour of the Seas) من برشلونه....حركنا تقريبا الساعه 7 مساء ....
Splendour of the seas
السفينة من جوه خيال مثل ما انتي شايفة...11 دور ومسبحين وصالة رياضة وملاعب جولف وتنس طاولة....وفيه مطعمين واحد رسمي والثاني مفتوح 24 ساعه.....طبعا الاكل على قولة حقين جنغل لاند ببلااش دايم...ما تدفعين ولا هللة... و كل رحلة مخصص لها عدد من الايام حسب طول الرحلة يكون فيها لبس العشاء رسمي (يعني بدل وفساتين وحركات) وباقي الايام ما بين الكاجوال والسمارت كاجوال
اللي يشتغلون في السفينة من كل انحاء العالم..اسباني ايطاليا تايلندي هندية هولندي برازيلية......اللي يخطر على بالك....وتعاملهم اكثر من رائع....
سطح السفينة والمسبح الخارجي
الأكل في السفينة بدون مبالغة الذ اكل اكلته انا وزوجتي في حياتنا...وهذا كلام معظم اللي قابلناهم على الرحلة....علما باني مو راعي اكل
طبعا دايم فيه تصوير اما على العشاء ولا في بعض الأماكن مثل السلم (شغل تيتانك) وفي اخر النهار يعلقون الصور فوق....اذا عجبتك اشتريها ولا ما راح تدفعين شي
داخل السفينة
السفينه بعد فيها مسرح حلو وعروضه دايم تختلف وغالبا تفطس ضحك....فيه مكان بعد لتعليم الرقصات وعمل المسابقات....وفيه محل قمار (انتبهي لا تقربينه).....وفيه ديسكو في اعلى دور بعد....بالاضافة الى مجموعة محلات هدايا وملابس في حالة توهقتي
طبعا هالاشياء كلها ما راح تجينها الا في الليل.....ليه؟
لانك كل يوم راح تقومين الصبح (الساعة 6 الى 8) تلقين السفينة راسية في ميناء جديد....وممكن تنزلين لحالك....او تقعدين بالسفينة.... وهم عندهم مجموعة خيارات لرحلات سياحية في كل مكان بس تحتاج انك تدفعين لها مبالغ اضافية....
حنا رحلتنا مرت بالاماكن التالية:
اليوم الأول (Villefranche) في فرنسا
طبعا هالمدينة عبارة عن ميناء صخري صغير تطلعين منه بالقطار لنيس او كان او موناكو....اي وحدة من هذولي ما تاخذ اكثر من نص ساعه بالقطار
اليوم الثاني (Livorno/Florence) في ايطاليا
طبعا مدينة فلورنس مشهورة وحلووة ....لكن الشي الاهم هو مدينة بيزا...المشهورة ببرجها المائل
اليوم الثالث (Civitavecchia) في ايطاليا
يا صعب اسمها!! بس هي على فكرة زي فيليفرانش....مجرد ميناء تروحون منه بالقطار لروما...عاصمة ايطاليا...ما يحتاج اكلمكم عن روما
اليوم الرابع (Naples) في ايطاليا
وهالمدينة قريب منها جزيرة نسيت اسمها لاننا ما رحناها....يمدحونها بس خفنا يضيع علينا اليوم......لان فيه شي كان بالنسبة لنا اهم وانصح اي احد يروح انه ما يفوته وهو زيارة مدينة بومباي الشهيرة (غير حقت الهنود)....هذه مدينه ثار فيها بركان قبل الاف السنين وقضي على سكانها في يوم واحد....ولحسن الحظ معظم المدينة ما تضرر وقعد محفوظ تحت الركام حق البركان الين ما استخرجوه....يقولون في الليل يمشي في المدينه ارواح وخرابيط .....ما ادري
اليوم الخامس (Valletta) عاصمة مالطا
صراحة مالطا من اغرب الاماكن اللي زرتها في حياتي....طبعا هم مشهورين بمصانع الزجاج والحلي وزيارتها تعتبر متعة....(جهزوا الدراهم)....لكن الغريب ان لغة سكانها خليط من الاسباني والايطالي واللبناني!!!!!!!!!!!
يعني لو سمعت اللي تبيع تقول لاحد "سبعتاش فلس" لا تشك في نفسك...ولو سمعت " مش هاد " فهي بالضبط "موب هذا" حقت اللبنانيين
اليوم السادس كللللللللللللله في البحر
اليوم السابع رجعنا لبرشلونه
طبعا الانشطة اللي في السفينة فوق الوصف...ومن يوم تطلع يكون فيه عامل مسؤول عن غرفتك وكلهم حول ما يخمونك من الحبابة....
طبعا للي يفكر يخوض هالتجربة (اللي جددددددددددددددا تستاهل) يهمه الأسعار
هي تتفاوت من سفينة لسفينة ومن خط لاخر وحسب عدد الايام...هذا غير انه داخل كل سفينة فيه فئات للغرف ابتداء من الاجنحة اللي عادة تكون في الادوار العلوية....مرورا بالغرف اللي ببلكونة على البحر....و و و وانتهاء بالغرف الداخلية اللي مالها واجهة عالبحر...وكل ما ارتفعت الغرفة كانت اغلى
احنا حجزنا غرفة بشباك على البحر في طابق مرتفع....ويوم وصلنا للسفينة سوولنا (Upgrade) على اعتبار اننا عرسان جدد وعطونا غرفة ببلكونة في طابق اعلى
وهذه صور الغرف
الغرفة الداخلية
الغرفة اللي بشباك
والغرفة اللي ببلكونة (حقتنا)
التكلفة كانت تقريبا 13 الف ريال للشخصين (الكروز بس من غير تذكرة السفر لبرشلونة).....مع العلم انه ممكن اضافة طفلين للغرفة بدون تكاليف اضافية...والمبلغ هذا يشمل كل الانشطة اللي على السفينه والاكل 24 ساعة.....اما المبيعات من محلات الهدايا فعلى حسابك
بصراحة يستااااااااااااااااااااااااااااااهل
نصائح للي يفكر يحجز:
1) احسب حسابك في بدلة رسمية نوعا ما...وبالنسبة للحريم ما له داعي يتكلفون بزيادة....يعني اللي تلبسينه لو عندكم جمعة حريم...بالاضافة للحجاب
2) اثناء عمل الحجز احرصوا انكم تختارون وقت العشاء المتأخر (بالنسبة للعشاء الرسمي) لان فيه وقتين 6 و 9 ....وغالبا الناس يفضلون 9 عشان يمديه يكون رجع للسفينة وغير ملابسه وارتاح شوي
3) حدد حجم طاولة العشاء مسبقا....عادة فيه طاولات لشخصين..اربعة...ستة....وثمانية اشخاص
اذا تبي تاخذ راحتك انت وزوجتك خذوا طاولة على قدكم....اما اذا ما عندكم مشاكل وطفشانين من بعضفحلو انكم تجتمعون مع ناس ثانيين....وعلى فكرة المجموعة اللي معك على العشاء راح تكون ثابتة طول الرحلة
4) اذا عندك استفسار او ضايقك شي فيه عندهم هلب دسك جدا متعاونين.....لا تسكت وهم راح يساعدونك
اتمنى اكون افدتكم....واذا احد يبي اي استفسار انا بالخدمةمواضيع عشوائيه ممكن تكون تعجبك اخترناها لك:
- صور من مقناصنا للكراوين
- وين الشباب راعين البر يالله شدو الهمة نبي نشعل البوابة
- الغوص في اعماق الوطنفرصة لاتعوض
- شنطة اابلاستك اللي تتركب فوق السياره؟؟
- السفر من الدوحة للقاهرة برا عن طريق ساحل البحر الأحمر
- رحله كروز
- اليوم الوطني والمناطيد
- السفر البري
- صور من دقلة وصلبوخ
- ارجوااااا المساعدة مشكلة بالقارمن
- رحلتي السريعه الى الصمان
- هرفي مشوي على العود في ضيافة أبو جود بالصور
- رحلة موادع البرية
- شوفوا أجرة بوت في جده
- ابغى مكتب متخصص في الرحلات البحرية
- قوي قلبكواستمتع
- حياكم الله سؤال صغنون
- رأس مسندم
- المهند في وادي لجب وأدق التفاصيل هناك هـ
- هواي البر وأهل البر كشتتنآ بالبر من تصويري
رد مع اقتباس
المفضلات