هلا بالبناخي
و ألف مبروك أولاً والله يتمم لكم بخير وبالرفاه والبنين
انا بشرح لك شرح عام ما عندي برامج تبي برنامج خاص ابشر بشرط تعزمني على عرسك غيره ما عندي و الأعضاء غيري واجد
شوف وأنا ولد عمك موا ضيع الأعضاء هنا فيها جواب لكل سؤال عرسان عزابي (وبكج)
عوائل
بالنسبه لجاكرتا فيه منطقة السدرمان منطقة نظيفه بصراحه وفيها فنادق وفيها فندق حياة ريجنسي حلو اذا انت مبحبحها شوي وشاري راحة بالك والمجمعات التجاريه اللي عليها الكلام كلها قريبه منك وتقدر تحجز عليها من بدري عن طريق موقع بوكنق
اما المناطق الثانيه أغلب فنادقها تعبانه وبالأخص التكييف خايس بشكل ما تصوره جربت أغلبها وانا براسي عزابي خلاوي فراش ولا ارتحت يعني ما تصلح للمتأهلين بالمره بستثناء أستون مارينا في منطقة الأنشول تكييفه جيد و أسعاره مقبوله
و الأماكن المشبوهه للأمانه قليله لكن بعض ربعنا اسأل الله انه يهديهم يبي يجيب الشبهه لاي مكان يجيه من شارع رادان صالح بجاكرتا إلى أعلى منطقة بالجبل كوتا بونقا ولا لك الا تغض الطرف واذا جت عينكم على شي ما عجبكم و إذا اسألتك المره عنه ما لك الا ملح الرجال الكذب و أنا بناخيك وقل لها هذولا من عوائل متحضره ومنفتحه يعني عادي الواحد يطلع هو وزوجته زي كذا وسلك الأمور تسلك معك
وفي الجبل أنصحك بحكم انها أول مره لك تشوف لك حجز بفندق سيروني الا اذا انت براسك تشوف طبخ المره وتجربه من بدري ، هنا أنصحك أولا بمجمع كوتا بونقا وراح تلقى فيه اللي يناسبك وربعنا أهل الشبهات قليل ما يجونه أو تبحث في تقارير الأخوان عن بعض الفلل المناسبه للعوائل اللي موجود فيها حارس وشغاله
اما باندونق اذا ناوي تروح لها ابشرك ما فيها مكان مشبوه وربعنا ما هم عليها حريصين بالحيل وتصلح للعوائل وعليك بفندنق سينسا ممتاز جداً جداً نضيف مكانه حلو ملاصق لمجمع تجاري وعندك كنتاكي قريب حيل منه و الأسواق قريبه مره منه تقدر تقزرها رجليه من عنده وش تبي اكثر من كذا بعد
وعلى فكره حط في بالك إن الأمطار في الجبل (بونشاك) وباندوق في الفتره اللي راح تكون فيها كثيره و راح تحد من تحركاتك
و أنصحك بعد تخصص على الأقل 5 أيام لبالي فيها أماكن ممتازه جداً للعرسان وبرامج وأنشطه ويمكن بعد تزعل علي اني قلت لك 5 أيام وتقول المفروض أكثر
فيها أماكن للسكن مناسبه جداً للعوائل في نوسادوا والفلل فيها خصوصيه وفي أماكن ثانيه في بالي وأبحث في مواضيع الأعضاء عن بالي وراح تحصل العجب العجاب من مواضيعهم و أبعد في بالي عن كوتا وشاطي كوتا الجماعه هناك ما اقول انهم مشبوهين بس لبسهم مشبوه وزحفتهم بالليل لك عليها والله انهم يخربونها لكن ما هم مثل بعض ربعنا من يركب الطايره يزحف ليل نهار زاحف و إذا جت عينك على شيء ما أعجبك الله الله بملح الرجال قل الجماعه مساكين جايين من اماكن بارده وذبحهم الحر هنا والرطوبه ما هم متعودين و اختمها بكلمة الحمدلله على نعمة الإسلام
أنا حبيت أكتب لك شي عام يطمنك عن الوضع هناك وبالأخص انك متخوف من شيء محدد
و أنصحك بحكم ان زواجك قريب انك تخصص وقت وتطلع على مواضيع الأخوه الأعضاء جميله جداً وينقولك معهم كأنك مشاركهم رحلتهم وفيها تفاصيل وراح تجد كل شي تبحث عنه
و ألف مبروك مقدماً
رد مع اقتباس
اغلب السياح استراليين وماخذين راحتهم مره 
المفضلات