الموضوع: كاليفورنيا على الهواء مباشره

اخوي ناصر خذ راحتك في التقرير :24:

ولاتنسى تكثر من تصوير لاس فيغاس هذي الديرة مجننتني:112:

المشاركة الأصلية كتبت بواسطة na9erq8


الحمدلله على سلامتك اخوي حمد والله يعطيك العافيه على المعلومات وخصوصا السوق للاهل
وطبعا ادري فيك السياقه في امريكا تعب وارهاق تختلف عن بلادنا واللي يبط الجبد اللي يسوقون على اليسار على كيفهم وماتقدر تطلع بتوين بين السيارات على طول يخافونك او يبلغون عنك
انت ماشاء الله ساكن في سانتا مونيكا يعني كل شي عندك مثلا هوليوود وبفلري هيرلز وعند مجمع راقي حده اسمه هوليوود هاي لاند راح تشوف السياح بكثرة وخاصه بالليل تشوف العجب والعجاب وبعد بالقرب من الجمع السينما الصينيه اكبر سينما في العالم والمحلات اللي تبيع الهدايا التذكاريه لهوليوود شي مو طبيعي وفي مجمع اليوم زرته ماشاء الله شي مو طبيعي قروف grofe شي مو طبيعي وتشوف العرب ماشاء الله منتشرين فيه بشكل مو طبيعي وراقي حده وغالي بعد وانصحك تروح نيوبوت وفيها الفاشن ايلاند مكان راقي والعرب فيه والسياح بكثرة
بس ماقلت لي الطريق كم اخذ وياك اعتقد من 5 الى 6 ساعات الله يعينا انا بطلع من لاس فيغاس الى فرانسيسكو دايركت بالسيارة تقريبا 9 ساعات لكني من محبين السفر بالسيارة بلا بلاوي تفتشيهم بالمطار اللي يدوخ بدون معنى ولاتنسى بعد التدخين مهم وفي امريكا لاوم تدخن برة المطار شغله والله كل ساعه بطلع وبارجع وتفتيش منو له خلقهم خلنا على السيارة على الاقل نكتشف اشياء جديده بالطريق
ياليت تسالني اذا كنت محتاج اي شي




الله يعطيك العافية الف عافية وما قصرت .

بالنسبة للطريق خذا منا تقريبا 6 ساعات .

الطريق اللي جينا فيه اهو طريج رقم 5 كان مأساة بس حارتين رايح وحارتين جاي والسيارت والشاحنات الي تمشي على اليسار وباغصب يفتحلك الطريج .. الله يعينك .

وياريت تعطينى من معلوماتك الحلوة عن لاس فيجاس لأن بروح بعد 5 أيام ان شاء الله .

المشاركة الأصلية كتبت بواسطة hamad_555


الله يعطيك العافية الف عافية وما قصرت .
بالنسبة للطريق خذا منا تقريبا 6 ساعات .
الطريق اللي جينا فيه اهو طريج رقم 5 كان مأساة بس حارتين رايح وحارتين جاي والسيارت والشاحنات الي تمشي على اليسار وباغصب يفتحلك الطريج .. الله يعينك .
وياريت تعطينى من معلوماتك الحلوة عن لاس فيجاس لأن بروح بعد 5 أيام ان شاء الله .



[COLOR="blue"]اخوي حمد اعتقد انك غلطان لما اخذت الروت 5 المفروض تاخذ 101 لانه يقطع الولايه كلها واسرع بكثير من 5 مع انه اطول شوي

فيغاس ماتحتا جدليل لانك اذا سكنت في السترب كل شي يمك ومايمديك تخلصه في ثلاث ايام لكن اوعدك بالتفاصيل والاشياء الضروريه لما ازورها باجر ان شاء الله /COLOR]

متابعين معاك أخوي ناصر ..




وعسى الله يوفقكم ويكون بعونكم ودرب السلامه انشالله ..

معاك اخوي ناصر

وان شاء الله تردون مستانسين من لاس فيقاس

ولاتنسى تكثر الصور شوي



بالانتظار مدينة الاحلام

اشكر حظوركم الكريم وبالفعل فيغاس شي ولا في الخيال وخصوصا الطريق من ل ا الى فيغاس روعه وجميل ويستاهل المرور فيه واوعدكم بصور كثيره اذا رجعت للكويت لان مافي وقت انزل الصور

ترجعون بالسلامه انشالله ..




واخذ راحتكـ ..

مرحبا اخوي ناصر في البدايه احب اشكرك على جهودك الجباره في اثرائنا بمواضيعك المميزه

حبيت اسألك انا رايح لوس انجلس في شهر نوفمبر انشاالله (وش رايك ينفع الشهر هذا لزيارة لوس انجلس ومن بعدها لاس فيجاس ولا لا؟؟) هل الجو بيساعد والفعاليات بتكون موجوده؟ ابي رايك اخوي ناصر

شاكرلك مقدما

مشكور أخوي ناصر ....

دائما مميز..........

بالسلامة يارب ... ورحلة سعيدة إن شاء الله........

السلام عليكم و رحمة اللة



الحمد اللة علي السلامة أخوي ناصر و أنشاء اللة تستانسو في لاس فيغس و خاصة مول سيزر بالاس, بالنسبة لطرق أستخدم هذا الموقع







المشاركة الأصلية كتبت بواسطة الوطن



6- قياس المسافات بين المدن بالميل (الميل=1.6 كيلومتر)





1- :24: http://www.freetrip.com معلومات جيدة و بالساعة

2- http://www.randmcnally.com/rmc/direc...leageInput.jsp يطيك المسافة والساعة ثم أضغط علي الرابط أسفل ليعطيك خريطة الطريق.[/RIGHT]



من الموقع http://www.travel4arab.com/vb/showthread.php?t=67299



علي فكرة أحتمال راح أكون في سان فرانسسكو في يوم /8/15 و بعدها في لاس فيغس يومين

المشاركة الأصلية كتبت بواسطة Ana o Bs


مرحبا اخوي ناصر في البدايه احب اشكرك على جهودك الجباره في اثرائنا بمواضيعك المميزه
حبيت اسألك انا رايح لوس انجلس في شهر نوفمبر انشاالله (وش رايك ينفع الشهر هذا لزيارة لوس انجلس ومن بعدها لاس فيجاس ولا لا؟؟) هل الجو بيساعد والفعاليات بتكون موجوده؟ ابي رايك اخوي ناصر
شاكرلك مقدما



اخي الحبيب انت وبس العفو وانا حاظر لاي سؤال لوس انجلس ماجربنتها الا بالصيف والجو الحين بارد بالليل شلون في نوفمبر اكيد بااااااارد وبالنسبه لفيغاس اعنقد راح تصير احلى لان الحر هناك لايطاق مثل الكويت بالضبط بس الناس تشتغل عدل كل شي مكيف او في مولات كبيرة بس الاجانب يحبون الشمس وتلقاهم مسدحين بالشمس تقول ضب واحنا ننحاش من الشمس وهات كريمات للوقايه من شمسهم الحارة بس شنسوي شمسهم حارة اخوي

الفعاليات في فيغاس على مدار السنه مافي شي اسمه عندهم عطله كل شي شغال 24 ساعه في اليوم على مدار الاسبوع لاتحاتي موفق في رحلتك بس كثر من الملابس او انصحك تشتري من هني ارخص بكثير من الخليج كله

المشاركة الأصلية كتبت بواسطة الوطن


السلام عليكم و رحمة اللة
الحمد اللة علي السلامة أخوي ناصر و أنشاء اللة تستانسو في لاس فيغس و خاصة مول سيزر بالاس, بالنسبة لطرق أستخدم هذا الموقع
من الموقع http://www.travel4arab.com/vb/showthread.php?t=67299
علي فكرة أحتمال راح أكون في سان فرانسسكو في يوم /8/15 و بعدها في لاس فيغس يومين



استاذي العزيز الوطن لاخلا ولاعدم اشكرك بكل شي علمتني اياه وفعلا انا موجود في فرانسيسكو حتى 18 من الشهر والطريق الى فيغاس روعه ومافي داعي تحاف من الطريق لانه سهل وكل شي فيه والاستراحات شي ولا روعه اول مره اشوف استراحه في مطعم تشيليز ومطعم رد لوبستر شي ولا بالخيال وانا باجر ان شاء الله بروح للجبل بشوف الثلج ذبحوني العيال يبون يشوفون الثلج الله يعينا على البرد احنا بالديره والداون تاون والبرد مشلخنا شلون نصعد فوق

اتمنى لك رحله موفقه الى فيغاس وانصحك تروح سيركت سيركت فيه العاب داخل الخيمه مالتهم قد الترفيهيه عندنا بالكويت

المشاركة الأصلية كتبت بواسطة ظاعنة


مشكور أخوي ناصر ....
دائما مميز..........
بالسلامة يارب ... ورحلة سعيدة إن شاء الله........




الاخت العزيزه ظاعنه اشكرج على المرور والله يسلمج مقدما

السلام عليكم ورحمة اللة



أقول توني راجع من سان فرانسسكو 10pm وفتحت الكمبيوتر وشوف أسمك موجود. تعرف طول اليوم أنا هناك في معرض Linuxworld في Mosconi Center بعدين خذيتلي فرة صغيرة في الماركت ستريت, لو عارف أنك هناك كان شفناك و سلمنا عليك. أيضا لاتنسي:

1- تأخذ من صناديق الصحف (NEWS STANDS) يوجد Free Visitor Map فيها معلومات تنفعك و مجلتين وحدة أسمها TRAVEL COUPON GUIDE والثانية أسمها Traveler Disount Guide قد يستفيد منهم أحد لسفرات مستقبلية كمعلومات عامة و أرشادية .
2- أتبع 49mile يفرك علي المناطق السياحية

3- سان فرانسسكو Zoo ماتنفع ضيع وقتك فيها

4-ة سأضع بعض المعلومات غدا أنشاء اللة يمكن تنفعك

5-فيغس ألغيتها الأن كانت للعمل بس مليت منها


* عن أي ثلج تقصد:114: اللي في ليك تاهو....تري قليل أن وجد في هذا الوقت من الصيف وعلي قمم الجبال يعني صعب الوصول إلا إذا كان في هذا الصيف غير.

** هذا موقع لأحد شركات التزحلق علي الجليد (لشتاء) في صور و كامرة مباشرة للمشاهدة
http://www.skialpine.com/./summer/index.html

المشاركة الأصلية كتبت بواسطة الوطن


السلام عليكم ورحمة اللة
أقول توني راجع من سان فرانسسكو 10pm وفتحت الكمبيوتر وشوف أسمك موجود. تعرف طول اليوم أنا هناك في معرض Linuxworld في Mosconi Center بعدين خذيتلي فرة صغيرة في الماركت ستريت, لو عارف أنك هناك كان شفناك و سلمنا عليك. أيضا لاتنسي:
1- تأخذ من صناديق الصحف (NEWS STANDS) يوجد Free Visitor Map فيها معلومات تنفعك و مجلتين وحدة أسمها TRAVEL COUPON GUIDE والثانية أسمها Traveler Disount Guide قد يستفيد منهم أحد لسفرات مستقبلية كمعلومات عامة و أرشادية .
2- أتبع 49mile يفرك علي المناطق السياحية
3- سان فرانسسكو Zoo ماتنفع ضيع وقتك فيها
4-ة سأضع بعض المعلومات غدا أنشاء اللة يمكن تنفعك
5-فيغس ألغيتها الأن كانت للعمل بس مليت منها
* عن أي ثلج تقصد:114: اللي في ليك تاهو....تري قليل أن وجد في هذا الوقت من الصيف وعلي قمم الجبال يعني صعب الوصول إلا إذا كان في هذا الصيف غير.
** هذا موقع لأحد شركات التزحلق علي الجليد (لشتاء) في صور و كامرة مباشرة للمشاهدة
http://www.skialpine.com/./summer/index.html




استاذي العزيز الوطن اولا اسمحلي باني مارديت عليك في نفس الوقت لان النت عندنا امس وقف بالمرة ما ادري ليش وعلق وياي الجهاز لاكثر من ساعه الحيقه اللي ابي ازورها هي حديقه اليوسمايت لكن من فتحت الرابط لها وشفت درجه الحراره هونت لاني كنت حاسب ان في ثلج بالوقت هذا لكن غيرت وجهتي وباخذ جسر البوابه الذهبيه وبلف في المدينه وبروح للتوين بيكس وبشوف فرانسيسكو من فوق
وبالفعل فرانسيسكو زو ما تنفع ولافكرت فيها وليك تاهو بعيده شوي وفيها بلاوي ما تنفعني ويا الاهل

السلام عليكم و رحمة اللة



حياك اللة أخوي ناصر وتري ماسوينة شئ, أم الأن يمكن فريت سان فرانسسكو وهذي معاومات أضافية و علي فكرة وين وجهتك بعد فرسكو.



سان فرانسسكو

1- موقع جيد و شامل http://www.gosanfranciscocard.com/?cid=sfcvb-home&f=2

2- كما ذكرت سابقا إذا أتبعت طريق 49 ميل ( drive 49-mile ) بتشوف كل معالم فرسكو مثل: كويت تاور COIT Tower , ترجر أيلند Tresure Island ,و شارع لمبارد المتعرج:24: و الشوارع الجبلية مثل كاليفورنيا ستريت و القولدن بارك حلوة فيها متاحف و التون بيك بالليل شكل المنظر يختلف عن النهار لاكن دير بالك الطريق بالليل مظلم خرمس. خريطة طريق 49 ميل تجدها مجانا عند صناديق بيع الجرايد أسمها FREE VISITOR MAP .
وهنا تجد نبذة عن صور الأماكن هذا إذا ماشفتها لحد الأن http://pic.templetons.com/brad/pano/san-francisco.html

3- في متحف قديم جدا قريب من الفشر مان قرب الغواصة Peir 39 أذا أنت قريب منة يسوة الطلة علية في ألعاب قديمة جدا و حلوة.

4- أذا صدفت صلاة الجمعة و أنتو بسان فرانسسكو في في مسجد أسمة دار السلام علي زاوية Market street مع Jones Street قرب 7th Street المدخل علي شارع جونز بالطابق الثاني و المسجد يطل علي الماركت ستريت.

5- ملاهي قريبة من سان فرانسسكو طبعا لا يقارن بلوس أنجلس.
# SIX FLAG MARINE WORLD ساعة تقريبا http://www.sixflags.com/parks/marineworld/ التذاكر أما من رقم واحد فوق (1-) و أو خصم من الموقع و McDonald's .

# Great America جيدة وقريب(15 دقيقة) منها في IMAX و Tech Musem
http://www3.paramountparks.com/greatamerica/#actions :24: :24: :24: في يوم 27 شهر أوغست ليوم محجوز للمسلمين بس غريبة أسعار الموقع مرتفعة مقارنت بما سمعت و هو 19 دولار:114:

http://www.thetech.org/


وأذا أنت ناوي الردة لوس أنجلس من من فرسكو أخ هايوي ون HighWay ONE إلي HighWay 280 ثم إلي HighWay 17 راح تمر علي مناطق جميلة و علي المحيط خط ما ينمل يسمي البسفك هايوي (أيضا High Way one)



Yosemite Park

1- جوها جيد بس غريبة هل الحرارة علما بأنها بالجبال صدق تنزل فيها لاكن مازالت مرتفعة, و الصراح هي تسوة و خاصة إذا أنت من يمر بالطريق بين فيغس و فرانسسكو

2- من عيوبها الأن:
# أحد الطرق مسكر لتصليح بسبب تساقط الحجر و يفتح لساعات قليلة و يزدخم أم المدخل الثاني فهو مفتوح.

# أسعار الفنادق مرتفعة جدا ولا تحصل حجز لكثرة الطلب عليها يعني يب خمتك للشتة إذا بتنام. طبيعتها علي كيفك.

3- حديقة قريبة من يوسمتي لاكن قير مشهورة Sequoia and Kings Canyon National Parkshttp://www.sequoia.national-park.com/



الصور في الرد التالي لليوسمتي

السلام عليكم و رحمة اللة


الحقيقة لم أحب أحط صور حتي تكون خصوصية الصور لك ولاكن بما أنك هونت عن اليوسمتي نضع لك نبذة.







المشاركة الأصلية كتبت بواسطة الوطن


اليوسميتي بارك تعتبر من أشهر الحدائق الطبيعية


حجم الصور كبيرة فنتظر قليلا حتي يتم تحميلها

أيضا بأمكانك الضغط علي المفتاح F11 او الوضيفة 11 حتي تملاء الشاشة بالحجم الاكبر لمشاهدة الصور---- ثم استخدم الاسهم في الكيبورد لتحريك الصورة يمين او يسار فوق او تحت كانها بنوراما وبعد الأنتهاء اضغط F11 للعودة لحجم الطبيعي


قرب مركز الحديقة




منظر عام من احد الجبال




صورة في الطريق عند الاقتراب من قلب الحديقة الطبيعية

انا لما سميتك استاذي انا مو غلطان فانت استاذ اتعلم منه الكثير وجزاك الله كل الخير وعندك الرابط حط كل الصور اللي تبيها

انا ياخوي جدولي هاليومين مزدحم حده لاني بارجع الى ل ا ليله وحده وبروح مينابوليس او مول اوف اميركا لمده خمسه ايام طبعا تسوق للمدام ومعاي الوالده بعد بخليهم يشبعون من السوق من الصبح لليل على كيفهم ومنها برجع ليله ل ا وبرح نيويورك ثلاث ايام وبطير من نيويورك للكويت حاولت اغير خط الرحله لكن للاسف ماوافقوا شركه الطيران وطلعت علي اكثر من بيع السوق فقلت خلني على جدولي
وهني في فرانسيسكو متمتع بالبراد وقايل للاهل مافي سوق خلونا نشوف المناظر الحلوة والوالده الله يطول عمرها من محبين لبنان الجريح وكل ماشافت غابه قالت نفس لبنان هذا في ل ا طبعا لكن يوم يت فرانسيسكو شافت العجب والعجاب وصارت الديره الحين حلوة بس
انا متحسف لاني مازرت فرانسيسكو من زمان ما ادري ليش اهون عليها مع انها قريبه في كل مرة لكن هالمره خالفت القاعده وزرتها وبصراحه من اجمل المدن في العالم واللي يقول عنها غاليه فهي لاتختلف عن ل ا او فيغاس في الاسعار

انا ان شاء الله بروح ل ا والطريق اللي كتبته لي كاني ماشي فيه من قبل لاني رحت سانتا باربرا من طريق 101 من ل ا اذا نفس الطريق راح اخذه بكل تاكيد لانه ممتع وحلو والمحيط على يمينك منظر ولا اروع ذاك اليوم البطاريه مالت الكاميرا خلصت من كثر ماصورت وفي مكان ممنوع الوقوف فيه وقفت وصورت الضباب مع الاجبال مع البحر شي مو طبيعي

واذا في طريق مختصر ياليت تدلني عليه لاني عندي جهاز جارمر وانا متكل على الله ثم عليه في كل شي

السلام عليكم و رحمة اللة


حياك اللة وهذي الساعة المباركة. أم اللي بالصورة لا مو أنا:109: :109: :109: حبيت أحط صورة تبين بعض الحركات الغريبة في ذاك المكان و في رابط الموقع تحت المنيو يوجد صور أخري غريبة. بس صورتي راح أحطة في موضوع لاحق عن سباق السيارات و صور السباق.

وإنشاء اللة رحلة سعيدة و بالسلامة

اشكرك على الرد السريع الظاهر راكب سياره سباق او ناسكار

الله يسلمك ويحفظك من سباق السيارات
ادري انها مو صورتك ودخلت على الموضوع وشفت الصور الجميله والغريبه
وان شاء الله راح ازورها وجزاك الله خير وكثر الله من امثالك

السلام عليكم و رحمة اللة




عزيز وغالي و تستاهل كل خير. وتقول ناس كار...........هم:114: :114:


إذا أجلح أملح :101: هذا أنا ماركة مسجلة وهذي الصورة لك

أخوي ناصر السلام عليكم

إن شاء الله تكون انت والعائلة مبسوطين ومرتاحين.

أنا رحت للوس انجلس في تاريخ 12/7/2006 وكانت الرجعة من Jfk قبل امس وكانت صراحة رحلة العمر.
واحلى صدفة واجهتني في السفرة إنه يوم الاثنين 17/7/2006 كنت انا وزوجتي وطفلي في هوليود وشفتك ماسك سرا عند العرض اللي حق شرينك لكن للاسف ماحصل لي الشرف إني اجيك واتعرف عليك.
وصفك ماشاءالله عليك جدا ممتاز والاحلى منه روحك الطيبة في الوصف بس لو تمر اسبن وتروح للناشيونال بارك اللي فيها إن كان تكمل سفرتك.
واتمنى لك التوفيق في الايام الاخيرة من سفرتك.

[QUOTE=Mr.X]أخوي ناصر السلام عليكم
إن شاء الله تكون انت والعائلة مبسوطين ومرتاحين.
أنا رحت للوس انجلس في تاريخ 12/7/2006 وكانت الرجعة من Jfk قبل امس وكانت صراحة رحلة العمر.
واحلى صدفة واجهتني في السفرة إنه يوم الاثنين 17/7/2006 كنت انا وزوجتي وطفلي في هوليود وشفتك ماسك سرا عند العرض اللي حق شرينك لكن للاسف ماحصل لي الشرف إني اجيك واتعرف عليك.
وصفك ماشاءالله عليك جدا ممتاز والاحلى منه روحك الطيبة في الوصف بس لو تمر اسبن وتروح للناشيونال بارك اللي فيها إن كان تكمل سفرتك.
واتمنى لك التوفيق في الايام الاخيرة من سفرتك]

مستر اكس كلامك احزنيي واسعدني في نفس الكويت يعني معقوله تشوفني ولاتسلم على الاقل ونتعرف عليك والاهل يتعرفون على بعض المهم ملحوقه ان شاء الله ونشوف بعض اكثر
الحقيقه انا زرت دنفر واسبن البارده وركبت التلفريك وصعدنا الجبل فوق شفنا البرد انواع واشكال وتثلجنا بعز الصيف والمنطقه هاديه وحله وتصلح للطلبه بس اللي فيها مو زين البرد وخاصه في الشتا الله يعينك اذا تدرس هناك وقت الشتا درجه الحراره توصل 40 تحت الصفر

الله يسلمك وشاكر لك مرورك الكريم

المشاركة الأصلية كتبت بواسطة الوطن


السلام عليكم و رحمة اللة

عزيز وغالي و تستاهل كل خير. وتقول ناس كار...........هم:114: :114:
إذا أجلح أملح :101: هذا أنا ماركة مسجلة وهذي الصورة لك





منهو الخطير هذا وااااااااااو تقول سكوني ولا شبكوه ايام زمان لووووووووووووووووووول اذا تعرف سكوني او شبكوه اذا كنت كويتي اكيد تعرفهم

عندي ولد خالي ينصحني باني ازور الناس كار واصور وياهم وانا مالي بالسوالف هذي ابد لان سياراتهم غير والحلبه تختلف عن الكويت بوايد وعشاق الرياضه هذي كثار وبجنون وانا مرة دخلت سينما 3 دي للناس كار دخت من التصوير والسرعه بالسيارة

اما عن اجلح واملح اعذرني اخوي جنك البخت لانت اجلح ولا املح وكاشخ بعد يعني على زنقه عشره

تسلم على الصورة ويارب اشوفك بالسباق الاول اذا شاركت

اليوم راح اتلكم عن سانتا باربرا وكنت مواعدكم باني اكمل تقريري اذا وصلت الكويت لكن شفت لي وقت فارغ خصوصا انا حاليا في منييابوليس او مول اوف امريكا وانا مالي بالسوق اي شغله بس الاهل من الصبح يروحون هناك ويرجعون بالليل وطبعا السوق للحريم شي مو طبيعي وافضل مافي السفر للمراه هو السوق وبس بتكلم شوي عن مينيبوليس الحقيقه ماشفت الا ثلاث اماكن المطار والفندق والمول بس وسلامتكم لانها مقصد السياحه في هذي اولايه المول وبس وهو كبير جدا جدا اكبر سوق شفته في حياتي وفيه كل شي وطبعا البضاعه اول باول يعني كل شي جديد ينزل هني اول شي في امريكا واسعاره زينه بالنسبه لامريكا ورخيصه بالنسبه لنا اهل الخليج وخصوصا انها ماركات عالميه
نرجع لموضوع حديثنا بالاول
سانتا باربرا

تقع سانتا باربرا 90 ميل شمال لاس انجلس وتاخذ طريق 101 نورث للوصول اليها بعد ماتخلص من زحمه ل ا تطلع على الطريق 101 وتشوف معارض السيارات بالجمله هناك من كثرهم وبعدين تمشي لمده نصف ساعه تشوف مناظر ولا اروع جبال والمحيط على شمالك والضباب
المهم المدينه هاديه وحلوه وبيتش حلو وفيه المطاعم الايطاليه على كيف كيفك ومشهوره بالمطاعم الايطاليه والسي فود والجو ولا اروع باااااااارد والضباب والجبال شي مو طبيعي الانسان يعجز عن الوصف والكاميرا لايمكن لها ان تصور كل المنظر الحلوه طبعا وانا مو محترف تصوير مثل بعض الناس الله يعطيهم العافيه لكن صورت لكم علشان تشوفون شنو اتكلم عنه طبعا الاولاد ودهم يتسبحون في البحر او المحيط لكن البرد منعهم من السبوح فيه والناس تتسبح عادي لكن لنا مو عادي لاننا بشر وهم للاسف مو بشر برد ودرجه الحراره تقريبا 20 ويتسبحون اعتقد انهم موبشر اترككم الحين مع الصور وهي تمثل الطريق من لوس انجلس حتى سانتا باربرا والعوده منها




الضباب

الطريق الى البيتش يمر من تحت الجسر المزروع الجميل

الشارع الايطالي


واخير وليس اخر جهاز الجارمن الصديق وقت الضيق وانصح فيه كل المسافرن لانه يغنيك عن السؤال لاي شي فندق او مطعم او مركز تسوق او اي شي تحب تزوره

هذا التقرير عن سانتا باربرا وفي الطريق سان دييغو الجمليه
اتمنى انها تعجبكم اخوكم ناصر كويتي

المشاركة الأصلية كتبت بواسطة Thunder


لاتقطع قلبي الفيزا ماتعوق تخليني اطنش للشغل واجيك :110:
انشاءالله السنة الجاية نتلاقى هناك ونتشرف بمعرفتك
بس يليت تعطينا اخوي ناصر صور وتقرير حلو عن الماجيك ماونتين
لم نستطع الذهاب اليها لضيق الوقت



سلامت قلبك وملحوق ان شاء الله تجي السنه الجايه وتستانس بس اي ماجيك ماوتن اللي تسال عنه والله ماعرفته لاني الحين بالوقت هذا مقفل اسمحلي بس ياليت تنورني

السلام عليكم و رحمة اللة



تسلم أخوي علي ردك الكريم

1- أكيد أعرف سكوني و شبكوه و في واحد ثالث ما أذكر أسمة و واحد ولد فريجنا دوخ الشرطة بوقتها كان عندة ترانز أم أيام فيلم القذيفة:109: (قديم ها)

2- بالنسبة لهذا السباق بأمكانك تركب معاهم في يوم التسخين و التصفية عن طريق مزاد ما بين 100$ وطالع حسب شهرة سايق السيارة.

3- الفيلم الي شفتة أسمة NASCAR IMAX ويباع DVD بس تشوفة عادي بالتلفزيون بدون تأثيرات IMAX .

4- الأخ يقصد مدينة الألعاب ماجيك ماونتين MAGIC MOUNTAIN SIX FLAG أفضل مدينة ألعاب بالعالم لوجود أخطر الألعاب فيها وهي كبيرة, وأنا توقعت أنك رحت لها وهي في شمال لوس أنجلس. أيضا كانت في فيلم جفي جيس National Lampoon . ونصيحتي أذا واحد بيرك ألعابها أن يضع قلبة في صندوق الأمانات لأن راح يطير من السرعة:115: وتحتاج أكثر من يوم حتي تتمتع بركوب جميع ألعابها .

http://www.sixflags.com/parks/magicm...sp?flash=false

المشاركة الأصلية كتبت بواسطة الوطن


السلام عليكم و رحمة اللة
تسلم أخوي علي ردك الكريم
1- أكيد أعرف سكوني و شبكوه و في واحد ثالث ما أذكر أسمة و واحد ولد فريجنا دوخ الشرطة بوقتها كان عندة ترانز أم أيام فيلم القذيفة:109: (قديم ها)
2- بالنسبة لهذا السباق بأمكانك تركب معاهم في يوم التسخين و التصفية عن طريق مزاد ما بين 100$ وطالع حسب شهرة سايق السيارة.
3- الفيلم الي شفتة أسمة NASCAR IMAX ويباع DVD بس تشوفة عادي بالتلفزيون بدون تأثيرات IMAX .
4- الأخ يقصد مدينة الألعاب ماجيك ماونتين MAGIC MOUNTAIN SIX FLAG أفضل مدينة ألعاب بالعالم لوجود أخطر الألعاب فيها وهي كبير, وأنا توقعت أنك رحت لها وهي في شمال لوس أنجلس. أيضا كانت في فيلم جفي جيس National Lampoon . ونصيحتي أذا واحد بيرك ألعابها أن يضع قلبة في صندوق الأمانات لأن راح يطير من السرعة:115:
http://www.sixflags.com/parks/magicm...sp?flash=false



اولا انا عارف انك تعرف سكوني من شكلك تحب السيارات في واحد مايعرف سكوني وشبكوه واللي عنده ترانز ام اكيد هذا بالروضه صح

وفلم الناس كار شايفه 3 دي في امريكا مو في الكويت
السكس فلاق رحت لها واسمها سكس فلاق بس حيرني يوم قال ماجيك ماوتن الاسم المتعارف عليه هو االسكس فلاق وهو بكل بمكان في امريكا في الشمال والجنوب والشرق والغرب
وفعلا العابهم مو طبيعيه وان شاء الله الصور جايه بالطريق بس صبروا علي شوي

اخوي الغالي ناصر الله عيطيك العافية يالغالي ...

وانا مستمر معك ..

وانتظر تقرير سان دييقو على احر من الجمر لاني ان شاء الله قريب راح ادرس في جامعتها ....



يعطيك العافية ولاتتاخر علينا بتقرير سان دييقو




بالتوفيق

المشاركة الأصلية كتبت بواسطة ما في احد مرتاح


اخوي الغالي ناصر الله عيطيك العافية يالغالي ...
وانا مستمر معك ..
وانتظر تقرير سان دييقو على احر من الجمر لاني ان شاء الله قريب راح ادرس في جامعتها ....
يعطيك العافية ولاتتاخر علينا بتقرير سان دييقو
بالتوفيق



الاخ مافي احد مرتاح اشكرك على مرورك واستمرارك معي لكن اعذرني اخوي لان الوةقت مو بيدي لكن احاول انزل سان دييغو باسرع وقت انا حاليا في مينابوليس وبسافر اليوم الى لوس انجلس بقعد فيها ليله ومنها بروح نيويورك ثلاث ايام وبرجع الكويت يعني جدولي مزحوم حده وانت عارف نيويورك محد يقعد فيها لانها هيصه ليل ونهار

اما عن سان دييغو اله يعينك عليها فهي بكل صراحه جميله الجميلات والجو قيها روعه والمرتفعات والاجبال والمحيط شي مو طبيعي بس لازم تتعلم اسباني علشان تمشي امورك لاننا اشكالنا مكسيسكان بس مو مشلكه تقدر تلكم اي لغه لان العرب كثار وفي مطعم مغربي عجيب وقديم بعد صارله 20 سنه فاتح والاكل فيه لذيذ جدا

المهم اختيارك موفق ولا تحاتي المنطقه لانها جميله وبالقرب من المكسيسك ان شاء الله تزورها لانها رخيصه وسهله زيارتها وبعد لوس انجلس مو بعيده عنك مجرد 90 ميل وتكون فيها

ان شاء الله اذا وصلت الكويت بالسلامه اول شي انزله سان دييغو واذا لقيت فرصه قبل اوعدك ماراح اتاخر عنك

حبيبي والله ياناصر فديت راسك يالغالي ....

خذ راحتك ... وان شاء الله بعد ما ترجع للكويت بالسلامه تتحفنا بتقرير مميز عن سان دييغو ...


وشكرا على المعلومات عن سان دييغو ,,,


لكن يالغالي معليش سؤال بس ها لاتضحك علي ههههههههههههه

الميل كم يساوي كليو متر ؟ لووول

لان كل شوارعنا بالكيلو


يعني كم ساعه بين سان ديييغو و la سياره ...




وقواك الله ...

بالتوفيق

يعطيك العافيه حبيبي والله ناصر ... تسلم يالغالي

na9erq8
الف الف الف الف الف الف شكر اخوي صور ولا اروع

شكرا للتوضيح اخوي الوطن
هذي اخوي السكس فلاغز ماجيك ماونتين

اخوي ناصر والله مفتقدك يالغالي
الحمدلله على السلامة .. لي فترة عنك عسى خير.. وين الناس ..
تقريرك رائع بروعة راعية وطيبته .. ترانا مشتاقين للغالي


اخوك المحب :101:

المشاركة الأصلية كتبت بواسطة الصحافه


na9erq8
الف الف الف الف الف الف شكر اخوي صور ولا اروع



اخي الصحافه الف الف الف الف عفوا وسعيد بمرورك على الموضوع ومشكور وماقصرت

المشاركة الأصلية كتبت بواسطة الباخص


اخوي ناصر والله مفتقدك يالغالي
الحمدلله على السلامة .. لي فترة عنك عسى خير.. وين الناس ..
تقريرك رائع بروعة راعية وطيبته .. ترانا مشتاقين للغالي
اخوك المحب :101:



هلا والله بوعبدالرحمن غالي والله وعساك ماتفقد غالي وانا بعد فاقدك ومو شايف لك مواشيع مع اني مسافر لكني متواصل مع المنتدى يوميا اسرق الدقايق من الاهل واشبك على طول والتحلطم وراي وراي

هذا من طيبك السؤال عني واله ماقصر واتمنى ان التقرير يعجبك ويستحق انك تشوفه
شاكر لك مرورك الكريم

امس بالليل وصلت حبايبي من مينيسوتا مينابوليس واليوم بالليل بعد بسافر الى نيويورك لمده ثلاث ايام ومنها بروح الكويت يمكن ما اشبك الا بالكويت فاسمحولي اذا قاطعتكم كم يوم والحقيقه المنتدى من اقرب الناس عندي اللي ما اقدر افارقه ابد لكن شسوي الجدول راح يصير مزحوم جدا وماعندي وقت اشبك

فاعذروني لمده قصيرة وارجع لكم

اخوكم المحب ناصر كويتي

[align=center]
[cell="filter:;"][align=center]

أخي العزيز ناصر

بصراحة انا ماعندي وقت ادش البوابات الاخرى مع الاسف والسبب الاشراف

ولكن بصراحة شفت نفسي فاضي والبوابة هادئه قلت خلني ادش بوابة امريكا وبصراحة شفت

موضوعك اللي اخذ مني ساعة ونصف تقريبا في قراءة كل شاردة ووارد من التقرير والاجابات على

الاخوان على الاخت ام احمد وحمد والاخوان جميعاً بصراحة هذا يعتبر مرجع للاخوان المسافرين الى أمريكا

بالذات الغرب الامريكي وانا اشكر لك سعة صدرك وكرمك وعطائك ....


أخي العزيز

ترد بالسلامة أنت والاهل جميعاً وان شاءلله نشوف الكثير من ما حملته لنا عن الولايات التي زرتها والمدن
الف الف شكر لك على امتاعنا ونحنً متابعين أن شاءلله لك


كما أود هنا أن اتقدم بجزيل الشكر حق أخونا ... الوطن ...

بصراحة لمساته في موضوعك واضحة ويعتبر منهل لنا في أي معلومه نبيها منه وبصماته ايضا واضحة في بوابة الكويت

جزاه الله خير وعساه على القوه والله لايحرمنا من كرمه الحاتمي

تقبلوا جميعاً خالص تحياتي

وترد بالسلامة

[/align][/cell]
[/align]

السلام عليكم

تقرير رائع جدآ

شكلي قابلت بمطعم قهوه حبيبي اللي على شاع وست وود

ابوضاري ابو فيصل

المشاركة الأصلية كتبت بواسطة الباب العالي


[ALIGN=CENTER]
[CELL="filter:;"][ALIGN=center]
أخي العزيز ناصر
بصراحة انا ماعندي وقت ادش البوابات الاخرى مع الاسف والسبب الاشراف
ولكن بصراحة شفت نفسي فاضي والبوابة هادئه قلت خلني ادش بوابة امريكا وبصراحة شفت
موضوعك اللي اخذ مني ساعة ونصف تقريبا في قراءة كل شاردة ووارد من التقرير والاجابات على
الاخوان على الاخت ام احمد وحمد والاخوان جميعاً بصراحة هذا يعتبر مرجع للاخوان المسافرين الى أمريكا
بالذات الغرب الامريكي وانا اشكر لك سعة صدرك وكرمك وعطائك ....
أخي العزيز
ترد بالسلامة أنت والاهل جميعاً وان شاءلله نشوف الكثير من ما حملته لنا عن الولايات التي زرتها والمدن
الف الف شكر لك على امتاعنا ونحنً متابعين أن شاءلله لك

كما أود هنا أن اتقدم بجزيل الشكر حق أخونا ... الوطن ...
بصراحة لمساته في موضوعك واضحة ويعتبر منهل لنا في أي معلومه نبيها منه وبصماته ايضا واضحة في بوابة الكويت
جزاه الله خير وعساه على القوه والله لايحرمنا من كرمه الحاتمي
تقبلوا جميعاً خالص تحياتي
وترد بالسلامة
[/ALIGN][/CELL]
[/ALIGN]



استاذي العزيز الباب العالي زيارتك لي شرف اضعه على صدري وشاكر لك مديحي وهذا هو الاوجب انا اول ماتعرفت على المنتدى دخلت للسؤال عن قطر بالذات لاني ماعرفها ولا اعرف مناطقها وكانو الاخوان خير مساعد لي ودلوني على كل شارع في قطر وساعدوني وانا من ذاك اليوم ماتركت النتدى حبيت افيد الناس على قد معلوماتي لاني مانسيت يوم ساعدوني اول مره والمثل البدوي يقول راعي الاوله

واانا وياك في الانقلاب اللي سواه بوسعود في واحه العرب المسافرون

اشكرك على المرور لكن مافهمت منو قابلت بالضبط





المشاركة الأصلية كتبت بواسطة القدهى


السلام عليكم
تقرير رائع جدآ
شكلي قابلت بمطعم قهوه حبيبي اللي على شاع وست وود
ابوضاري ابو فيصل

السلام عليكم ورحمه الله وبركاته

حبايبي واخواني واخواتي كل من شارك او زرا تقريري من الاول الى الان النهايه بعد لها وقت طويل احب اقول لكم باني قد وصلت الكويت الحبيبه بحمد الله ورعايته في يوم الاثنين 28 من شهر اوغطس او شهر ثمانيه وكانت الرحله بحمد الله بكل روعه وسهوله ولمده شهرين قظيناها في ربوع امريكا الجميله وهانحن عدنا للروتين والعزايم والله من يوم الاثنين العزايم واتخلص وانا مليت من اللحم والذبايح كل يوم غذا وعشا صرت طير جارح الله يعينا وياكم طبعا بعد الرحله الطويله الاستعدادات ايضا طويله للمدارس ولرمضان اللذي على الابواب يعني بالعربي اسمحولي كم يوم اخلص من البلاوي هذي واعود لكم بتكمله التقرير عن رحلتي لامريكا

اشكركم على المرور والتعليق على التقرير

اخوكم ناصر كويتي من الكويت الحبيبه

يعطيك العافية اخوي ناصر ...

الحمدلله على سلامتك ...

وننتظر بقية التقارير ...

المشاركة الأصلية كتبت بواسطة أبوداحم


يعطيك العافية اخوي ناصر ...
الحمدلله على سلامتك ...
وننتظر بقية التقارير ...



الله يسلمك اخوي بوداحم وان شاء الله عن قريب اوافيك في بقيه التقرير

هلا والله .........


الحمدلله على سلامتكم ان شاء الله استانستو ... عاد بعد هالبراد والتمشي رجعتو للحر والروتين الممل

والله يعينك على مدارس العيال ومقاضي رمضان

بس هذا لا ينعني انك ماتكمل التقرير ههههههههه

مره ثانية الحمدلله على السلامة

بالانتظار دايماً وابداً مــــــــعك ,,,,,,,,,,,,,,

الله يسلمك وانشاء الله عن قريب اكمل التقرير اوعدكم

[blink][move=up]

الحمد لله على الســـــــلامه،،،،

ومن طول الغيبات جاب الغنـــايــــم ،،،

[/move][/blink]

الحمدالله على السـلامـة اخوي ناصر .... شلون النفسيـة ؟

أنا لاهيـه هالأيام ..... أزهب اليهال للمدارس و نزهب ملابسهم و أغراضهم .

المشاركة الأصلية كتبت بواسطة رزينه


[blink][move=up]

الحمد لله على الســـــــلامه،،،،

ومن طول الغيبات جاب الغنـــايــــم ،،،

[/move][/blink]




الله يسلمج والخير بوجهج ان شاء الله

المشاركة الأصلية كتبت بواسطة Luxury_Traveller


الحمدالله على السـلامـة اخوي ناصر .... شلون النفسيـة ؟
أنا لاهيـه هالأيام ..... أزهب اليهال للمدارس و نزهب ملابسهم و أغراضهم .



الله يسلمج اختي ام احمد والنفسيه عال العال مثل ماقال المثل ماطير طيرا الا وقع وهذا حالنا مهما سافرنا لازم نرد للروتين والشغل والمدراس وباجر راح تبتدي المدارس عندنا الله يعينا بس للحين ميت من الحر وعلى طول معرق ما ادري ليش
والحمدلله كنت شاري ملابس لليهال قبل لا اسافر ادري راح يكون زحمه وخاصه مدرسه اليهال على طول زحمه وملابسهم خاصه مو مثل الحكومه
بس الحمدلله الاستعدادات كثيرة وخاصه رمضان على الابواب يعني يبيلنا رحله حق الحفر نشتري السمن والتمر وشويه مواعين للوالده

الحمدلله على السلامة اخوي ناصر سلامة الأسفار
نبغي انطباعك عن السفرة وكيف تقارنها بأوروبا من ناحية الوناسة الصرف
وسهولة التعامل وخصوصا بريطانيا وفرنسا إذا كنت رايح لهم من قبل
ولك اجمل تحية

المشاركة الأصلية كتبت بواسطة Thunder


الحمدلله على السلامة اخوي ناصر سلامة الأسفار
نبغي انطباعك عن السفرة وكيف تقارنها بأوروبا من ناحية الوناسة الصرف
وسهولة التعامل وخصوصا بريطانيا وفرنسا إذا كنت رايح لهم من قبل
ولك اجمل تحية



الله يسلمك اخوي ثندر اولا انطباعي في امريكا هو مجروح فيه لاني من محبين امريكا اما في المقارنه اخوي انا اقولك وانت تقارن مثلا اذا كنت ناوي تروح لندن نيوريوك مثل لندن واحسن يعني لندن عندهم شارع الاسكفورد والادجورد رود وامريكا فيها نفس الشوارع على اكبر ويمكن ست شوارع والافضل فايف افنيو وعندهم حديقه السنترال بارك تقدر تقارنها بالهايدبارك اما الجو الحلو والمطر فنيويورك افضل لانها جوها ممطر لكن البرد اقل من لندن البارد بالليل جدا والاسعار نيويورك اقل بكثير من ناحيه السكن والتكسي والمعيشه والمشتريات والاماكن السياحيه الكثيرة والمتاحف وارحلات السياحيه الكثيرة فيها

اما كاليفورنيا فهي تمثل اوروبا كلها من لوس انجلس تقارنها في باريس وخاصه سانتا مونيكا وبفيرلي هيلز وهاي لاند وهولييود
اما سان دييغو تقريبا مثل ايطاليا بالمرتفعات الجميله
وسان فرانسيسكو هذي ماشفت دوله اوروبيه تظاهيها
وهذا انطباعي عنها

اليوم راح اتكلم عن سان دييغو الجميله وراح ادعم الموضوع بالصور بالبيت ان شاء الله اذا رجعت له اليوم بالليل

المهم سان دييغو تنقسم الى منطقتين رئيسييتين سان دييغو ومنطقه سان لاجولا او تنطق سان لايولا باللهجه الاسبانيه
وهي تبعد 90 ميل او 150 الطريق ولا اروع ولا اجمل طرق جبليه على ساحل المحيط الباسفيكي والخضرة والمرتفعات ولا اروع والواحد يمشي مسافه طويله ومايحس بالطريق ومايصدق انه وصل من جمال الطريق
والاستراحات شي مو طبيعي الله يرحم حالنا خصوصا اللي يسافر دول الخليج يكره الاكل والاستراحات لما يشوف الفرق الكبير بينا وبينهم يعني مثلا كل استراحه فيها مطعم عالمي تشيليز او ماكدونالز او برجر كنغ او بيتزا والمحطه فيها كل شي من اكل وشرب والسعر مايفرق كثير عن البلد الا 20 او 30 سنت يعنيمو فارقه كثير او تقدر توقف في الاستراحات العامه وهي فيها كل شي ونظيفه ونتوا بكرامه الحمام انظف من الفنادق الموجوده في بعض دول الخليج وتلقى فيها كل شي وانتوا بكرامه من ورق للمرحاض والتواليت والصابون والنشافه على الهوا وفي الاستراحه تشوف المكاين اللي تبيع كل شي من مشروبات حارة وبارده وسندويشات والحاجات الضروريه من اسبرين او تايلانول او فرشه اسنان ومعجون وابره خياطه وازره يعني كل شي تفكر فيه موجود وانا اقول هالكلام من الحره اللي فيني اذا سافرت الى الدول الخليجيه الواحد لاياكل ولا يشرب من زود النظافه الله يسامحهم واحنا مو ناقصنا شي كل موجود عندنا بس الربح السريع هو الاهم والخدمات صفر للاسف

نرجع لموضوعنا ادري شطيت شوي ادري من احب تكون دول الخليج من الدول الاولى في العالم واتمنى ان نتطور وان نصبح مثل الدول المتقدمه بس شويه شغل والكسل هو اللي ذابحنا

حجزت في فندق امباسي سويت سان لاجولا او لايولا وهو من سلسه فنادق هلتون وهو فندق جميل وراقي والمهم انه التدخين ممنوع فيه نهائيا ليش ما ادري وعيبه الثاني ان المواقف بعد بفلوس يعني 15 دولار لليوم وهذي عادي في سان دييغو لان المةاقف عندهم محدوده مثل نيويورك الموقف صعب جدا

طبعا انا من لوس انجلس سجلت العنوان في الجارمن او الجي بي اس وعلى طول وصلني للفندق بدون لف ودوران وعطاني خط الرحله وساعه الوصول وهو بالمناسبه جهاز مهم جدا لكل من يسوق السيارة في امريكا او اوروبا وهو رخيص نسبيا في امريكا بالنسبه لكويت مثلا

ان شاء الله راح انزل صور عن رحله سان دييغو اليوم اذا الله احيانا

اخوكم ناصر كويتي

الله يذكرك بالشهاده
رجعت لي ذكرياتي بسان ديغو الجميله
الاليت الشباب يعود يوما :110:

السلام عليكم و رحمة اللة





الحمد للة علي السلامة أخوي ناصر و اللة يعنكم علي المدارس. أم الجو فأكيد من بعد البراد لمدة شهرين بيتغير الجو عليك بس واللة ضحكتني بهل الجملة :109: " وعلى طول معرق ما ادري ليش " . أقولك قصة بسيطة في أحد السنوات وأنا راجع لأمريكا علي الكويتية بالصيف كان بجمبي أسرة بريطانية أم و3 بنات بين 10-14 سنة و زعلانين ودهم:110: و كانو يقولون أنظري أمي هذا أخر يوم نشاهد فية الشمس و الجو الدافي ( يمكن الدرجة كانت 45 :104: ) وطبعن كانو لازقين بالنوافذ قبل أقلاع الطائرة حتي يتمتعون بأخر النظرات للجو المشمس.



# أم العزايم فهي من الأمور الحميدة وللة الحمد هو أستمرار هذا التواصل مع الأهل و الأصدقاء الذي تجدة محافظ علية بالخليج و هناك حديث بمعنئ أن اللة سبحانة يرزق و يبارك لمن يصل أرحامة.



# خدمة الأستراحات هنا وصلت لمرحلة متقدمة لخدمة مسافرين الطرق لكثرتهم ومن أسباب تطور الخدمة:
1- تكفل الحكومة المحلية بالبنية التحتية لها وصيانتها الدورية.

2- أفساح المجال للقطاع الخاص بأنشاء خدماتة بدون أحتكار ليعطي خدمة و أسعار أفضل للمسافر.

3- الوعي لدي الكثير من مرتاديها بل الحفاظ علي مرافقها من التخريب و رمي المخلفات.

4- التصاميم و بعضها يطل علي منظر جميل.



# لتحميل الصور. هذي البرامج المجانية تساعد علي تحرير و وضع أسم وشعار علي الصورأو أسترجاع المحذوف.

1- برنامج لتحرير الصور و تعديل ال إضائة و أختيارات كثيرة photofilter 1.6MB ......جيد:24:
http://photofiltre.free.fr/utils/pf-setup-en.exe

2- برنامج لسترجاع الصور في حالة المسح الخطأ (عيبى لاتستطيع تحديد الفولدر)............... جيد:24:
http://download.pcinspector.de/pci_us_smartrecovery.exe

3- برامج وضع الأسم أو شعار مع تغير حجم الصور بخطوة واحدة و يحفظ الصور التي جري عليها التغير في فولدر جديد

برنامج حجمة 5.5MB موقع التحميل http://www.freeimagebrowser.com/resize/
فيديو تعليمي للبرنامج :24: http://www.freeimagebrowser.com/resi...sizepage=video


طبعا هناك غيرهم أفضل بس هذي المجانية

يعطيك العافية اخوي ناصر ....

ايييييييييه يا سان دييغو شغل عدل ,,



ذكرتني بالمحطات والاستراحات اللي عندنا بين المدن انوواع النظافه هههههههههههههه


والله تعبنا لازم يكون فيه متابعه من الدوله للمحطات الخاصة اللي همهم مثل ماقلت الكسب السريع ... من دون تقديم اي خدمة تذكر

الاستراحات بين المدن في اوربا وامريكا حرام نقارنها بالمحطات الموجوده في الخليج وحتى في الدول العربية !!


لوووووووول


عموما با انتظارك يا مبدع

أخي ناصر كويتي


الحمد الله عالسلامة وفي اتظار باقي التفاصيل والصور.
بس الهدايا ما وصلتنا:114: (يعني ما توزعهم الا بعزيمة:109: )
تحياتي

المشاركة الأصلية كتبت بواسطة fw_kw


الله يذكرك بالشهاده
رجعت لي ذكرياتي بسان ديغو الجميله
الاليت الشباب يعود يوما :110:



لله يذكرج بالشهاده انتي بعد وفعلا سان دييغو حلوة وذكرياتها اجمل

يعني من كبرج الله يهداج توج صغيرونه

المشاركة الأصلية كتبت بواسطة ما في احد مرتاح


يعطيك العافية اخوي ناصر ....
ايييييييييه يا سان دييغو شغل عدل ,,
ذكرتني بالمحطات والاستراحات اللي عندنا بين المدن انوواع النظافه هههههههههههههه
والله تعبنا لازم يكون فيه متابعه من الدوله للمحطات الخاصة اللي همهم مثل ماقلت الكسب السريع ... من دون تقديم اي خدمة تذكر
الاستراحات بين المدن في اوربا وامريكا حرام نقارنها بالمحطات الموجوده في الخليج وحتى في الدول العربية !!
لوووووووول
عموما با انتظارك يا مبدع



الله يعافيك اخوي المبدع وانا امس حاولت ساعتين ادخل المنتدى ماقدرت ما ادري شفيه علق وياي او الزحمه على السيرفر كانت مو طبيعيه

انا اتكلم عن الاستراحات بدافع حبي لاهل الخليج كلهم لان اللي يسافر لابد له ان يوقف للاكل او للراحه لكن شنو يشوف العجب والعجاب ودي تصير استراحاتنا مثلهم احلى بعد بس شنسوي
وان شاء الله ابشر بالخير