أول شي هذي الصورة هديه للحلوين اللي متابعين تقريري علشان مايزعلون على التأخير
زهرة من حديقة بوزتابا بطرابزون
طرابزون وأوزونجول
اليوم الخامس في أسطنبول طلعت من الفندق واتجهت لتقسيم مقابل مكتب الخطوط التركية وبيتزا هت ...هناك ركبت باصات هاواش طبعا باصات هاواش كل نص ساعة باص رايح وجاي من والى مطار أتاتورك ومطار صبيحه .... وأنا رحلتي الى طرابزون كانت من مطار صبيحة والباص كان مكيف ونظيف ومريح وشبه فاضي والتذكرة بـ13 ليرة الى مطار صبيحة وبـ10 ليرات الى مطار أتاتورك للشخص الواحد وشوفو حجم التوفير لو اني راكب تاكسي الى مطار صبيحة يعني من القسم الأوروربي الى القسم الأسيوي أقل شي بياخذ مني 100 ليرة لنه بعييييييييد
وصلت مطار صبيحة وتغديت هناك من باباي وهذي صور المطار
وشربت قهوة تركيه بسميت سراي
ووزنت العفش وأنتبهو لازم تاخذون شنطه احتياط لن الخطوط الاقتصاديه هناك مافيه أمل يخلونك تاخذ كيلو زيادة الا بأربع ليرات للكيلو لكن الهاند باق تقدر تشيل الوزن اللي تبيه... أنا كان الوزن عندي 21 كيلو والوزن المسموح فيه 15 كيلو بس فرغت الزيادة بشنطه ثانيه ودخلت فيها للطيارة وهذي لحظة الاقلاع
لحظة الوصول الى مطار قصدي خيمة طرابزون
الطيارة من نوع أبو كلب ماصدقت اننا وصلنا والهبوط كان سيء بشكل رهيييب لدرجة ان الركاب تمسكو بالكراسي اللي قدامهم بس الحمد لله الله ستر ووصلنا بالسلامه
وعلى طول أخذت تكسي الى فندق النوفوتل يبعد عن المطار 14 كيلو تقريبا وعداد التكسي يفتح بطرابزون على 2 ليرة بعكس أسطنبول 2.50 ليرة
فندق نوفوتل حجزت فيه 4 ليالي مع الافطار ب450 ريال لليلة
والفندق فخم وراقي ويستاهل أكثر ويطل على البحر الأسود والمنظر خقاااق من الغرفه وهذي الصور مني لعيونكم
المنظر من بلكونه الغرفة مطله على حديقة الفندق والبحر الأسود آآآآه
الغرفه
الميني بار وكالعادة الشاي والقهوة مجاني والميني بار بفلوس
غرفة المساج
المسبح
أول ما وصلت على الساعة 8 مساءً وسويت تشيك ان طلعت أدور مطعم اتعشا فيه ولقيت قريب للفندق قصاب وتعشيت عنده الذ دجاج على الفحم ذقته بحياتي ومريت البقالة اللي جنب المحطة وأخذت بساكيت وخرابيط ودخلت الفندق وعادي ماقالو لي شي ونمت ...
واليوم الثاني استأجرت سيارة وهنا عندك ثلاثة طرق لإيجار السيارة
الطريقه الأولى تستأجر من المطار اذا كانت صغيرة زي اللي استأجرتها أنا رينو 2008م اليوم بـ70 ليرة بدون تأمين
وبـ140-130 ليرة مع تأمين ضد حوادث الغير والسرقة وأضرار السيارة وأنا لاحظت أن أكثر اللي بالمنتدى يستأجرون السيارة بدون تأمين وأنا أقول لا احد يستخسر 60 أو 50 ليرة زيادة علشان التأمين....لن الطرق بتركيا خطيرة وبعضها سيئة وفيها اصلاحات وخرابيط والواحد ما يأمن على عمرة لنه اذا صار لك حادث والله مايخلونك تطلع من تركيا الا وأنت دافع اللي وراك ودونك ومن زين سياراتهم وأنا طلع علي راعي تريله وأنا ماسك الخط السريع بغيت أروح كفته بس ربك ستر
وفيه
طريقة ثانيه انك تستأجر عن طريق أحد مواقع شركات تأجير السيارات الكبيرة مثل بدجت ويورو كار وهذي مواقعهم
http://www.budget.com/budgetWeb/home/home.exتحدد البلد والمكان ونوع التأمين والمدة وتجي تستلم السيارة من المطار أو الموقع اللي يحددونه لك...
بس لاحظت أن السعر مرتفع للإيجار من تركيا والحركه هذي ما تنفع تسويها الا بأوروبا لن الأسعار أرخص وان شاء الله تقريري الجاي راح يكون من اسبانيا وأفيدكم أكثر
الطريقة الثالثة انك تستأجر السيارة من الفندق وهي طريقة آمنه لكن أغلى من برا بس مو بكثير وأنا ما كان لي نيه أستأجر سيارة الا بأوزونجول .... وناوي أسترخي بالفندق بطرابزون 4أيام بس قلت يالله خلينا نقضي وقت
وأخذت السيارة من الفندق مع الـتأمين بـ130 ليرة سيارة رينو2008 ديزل وأنتبه تاخذ بنزين لنه نااااار ووصل سعرة الى 3.67 ليرة
وفيه شي أحب أوضحة بخصوص استئجار السيارات في تركيا انه يوم يسلمك مندوب الشركه السياره يكون بالمستند محدد كمية الوقود الموجود عند تسليم السيارة ويوم تجي ترجع لهم السيارة يحدد بالورقة كميه الوقود الموجودة بالسيارة ويعطيك قيمتة الوقود الزيادة الموجود..... طبعا أكثر الشركات نصابين أو لجهل المستأجرين بالأنظمه ياخذ منه السيارة والتانكي مليان فل وأنتم عارفين أسعار الوقود هناك حتى الديزل غالي لذا أنبه عليكم لاتسكتون عن حقكم وطالبو بقيمة الوقود الزايد لنه غالي ...... وبعض المندوبين حراميه يشفط البنزين ويبيعة لأحد المحطات ويسلم السيارة للشركة وأنا يوم جيت أسلم السيارة تأخر المندوب ورحت أتسبح وسلمت المفتاح للإستقبال وقلت له نادني اذا جا المندوب علشان باخذ منه الفلوس.... ويوم طلعت لقيت موظف الاستقبال عطا المندوب المفتاح و موجود واحد ثاني مكانه وأتصل على الشركه وجلسوا يستهبلون علي ويقولون سلمتنا السيارة والتانكي فاضي يحسبني ما أعرف النظام وهواش معهم وانجليزي على تركي وصفينا انه خلاص آسفين بنرسل لك مندوب يرجع لك الباقي وفعلا أخذت الباقي 50 ليره غصب
هه هععع (وأنا والله ماهمتني الفلوس بس ما أحب أحد يستغلني ويسوي ذكي علي) مع ان المفروض يرجع لي أكثر بس قلت ياالله العوض ولا القطيعة علشان كذا واختصارا للمشاكل أنتبهوا لا أحد يغلط غلطتي الغبية ويعبي فل لن نوع البنزين والديزل اللي عندهم يطول ما يحترق بسرعة تصدقون مشيت فوق 300 كيلو ومانقص الا شي بسيط
يعني عبي نص فل أو ربع التانكي ولاتخاف انه يخلص المحطات بكل مكان وهذي صورة النموذج اللي المفروض تتأكد من كمية الوقود وقت تسليم السيارة
آآآآه تعبت من تحميل الصور والكتابه بكرا أكمل لكم........
المفضلات