+ الرد على الموضوع
النتائج 1 إلى 3 من 3

الموضوع: رحله من ابوظبي الى مصر 2010

  1. #1
    مراقب اداري
    تاريخ التسجيل
    Jul 2015
    المشاركات
    1,707

    رحله من ابوظبي الى مصر 2010


    بسم الله الرحمن الحيم

    رحلتنا من ابو ظبي الي مصر( براً) 2010
    اولا
    احب ان اوجه كلمة شكر لهذا المنتدي الراقي الذي اتاح لي الفرصةان اكتب لكم عن رحلتنا هذه شكرا جزيلا
    كانت رحلتنا رحله شاقه وممتعه.......ازاي يجتمعو الكلمتين اجتمعو في رحلتنا هاكتب كل شيء يخص هذه التجربه ........تعالوا بينا نعرف ازاى:
    1-التخطيط للرحله
    2- الاجراءات المطلوبه
    3-المستلزمات المطلوبه اثناء الرحلة
    4-تفاصيل الرحله
    5-تكاليف الرحله

    1- التخطيط
    الفضل الاول لله سبحانه و تعالى ثم لزوجى. الموضوع فى البدايه كان مجرد اقتراح من زوجي في بدايه الامر..... مجرد فكره تطورت بسرعه جداً والسبب الي شجعنا اكتر اننا كنا عازين نعمل عمره وبدأنا نفكر بجد ونسأل ونقرأ و نجمع معلومات و كل الي الي نعرفهم تقريبا رفضوا الموضوع تماما ونصحونا بعدم التجربه لكننا حبينا ان نخوض التجربه و المغامره بدأنا بصلاة استخارة وفعلا بدانا نمشي في الاجراءت وبداْنا نقسم لكل واحد مننا (انا و زوجى) دور يقوم به انا ابحث واقرأ واكتب وطبعا الفضل يرجع لهذا المنتدي الرائع واقوم بتجهيز كل شئ نحتاجه معانا فى الرحله اما زوجي فعليه الاوراق والاجراءات والسيارة وبدْانا التجهيز قبل الرحله بشهرين.

    2-الاجراءات
    1-جواب تسفير من المرور (200 درهم-ملكية السيارة )
    2-استخراج دفتر تربتك من اي نادي سيارت( 500 درهم- ملكية السيارة- جواب التسفير )
    3-استخراج فيزا العبور من السفاره السعودية عن طريق مكاتب الحج والعمره (خطاب التسفير- 125 درهم لكل جواز -صور شخصيه -اذن من الكفيل )
    4-خريطه من مكتب نادي السيارات
    5-تغير عملات للسعوديه و مصر

    3- مستلزمات الرحله

    1-تجهيز شنطه يد: ملابس اثناء الرحله -لبس احرام- دواء- شاحن الموبايل-مناديل -فوط-والادوات الشخصيه-وساده صغيره للاطفال و غطاء (كوفيرته)
    2-شنطه للاكل الخفيف: بسكويت -عصاير- جبن-خبز-شاي-سكر-قهوه-لب وتسالي وده اهم شئ للتنبيه بيضيع النوم-اكواب ترمس شاي مياه- غاز صغير للقهوه اي شئ تاني يخصك حبيت اذكر بس
    3- السيارة: اسبراي لرشها او سائل غسيل الاطباق ادهنها به -شبكه للشنط وحبل
    (-gps وده اهم شئ هو جهاز الملاحه او الخرائط وتقريبا هو الي وصلنا ومن غيره عمرنا ما كنا نوصل غير بفضل الله سبحانه و تعالى)
    وطبعا متنسوش الصيانه ......جهزنا كل شئ الحمد لله مش باقي الا نتوكل علي الله و نصلى صلاه الاستخاره.

    4-تفاصيل الرحله
    بدأنا الرحله يوم الخميس 27\5\2010 وقبل مانتحرك صلينا بنية تسهل رحلتنا واتحركنا الساعه 8م سلكنا طريق ابوظبي - الغويفات حتي وصلنا الي السلع ومنها الي حدود الامارات المسافه تقريبا 380كم ملحوظه الطريق صعب جدا وضيق وكله شاحنات ومفيش اضاءه المهم كانت اول وقفه لينا في محطة بترول الرويس س11,5م فولنا بترول و بعدها اتحركنا الي الحدود وصلنا س 12 ليلا وصلنا منفذ الغويفات ختمنا بكل سهوله وبعد 5كم وصلنا الحدود السعودية منفذ البطحاء وختمنا في 5 دقائق تقريبا وبعدها علي الجمارك طبعا كنا خايفين من الفك والربط قلنا نستغفر بنية التسهيل والحمدلله السياره الوحيدة في الي موجودين تقريبا لم يتم تفتيشها على الاطلاق ......الاستغفار له سحر مزهل ......سبحان الله الي الان لا يوجد اي عقبات والحمد لله خلصنا س1,45 صباحا واتحركنا ودخلنا فولنا بترول واشترينا خط موبايل علي فكره البترول في السعوديه رخيص جدا حاولوا تستغلوا الفرصه واتحركنا الي الرياض وهنا فيه طريقين يوصلنا طريق اصعب واقصر وطريق اطول واسهل وهو ده الي سلكناه وهو طريق الهفوف سلوي الي الرياض 600كم الشئ الي انا كنت خايفه منه وهو قلة نوم زوجي سبحان الله ربنا اداله قوه وانا الي بقيت انام المهم وصلنا الرياض طبعا ريحنا في الطريق واكلنا وشربا وصلنا الرياض س 1ظهرا قضينا اليوم فيها واتحركنا يوم السبت 29 \5 الساعه 10 ص الي المدينه المنوره والمسافه 800كم الطريق مزود باللوح الارشاديه وكل شئ .......وصلنا المدينة س 4 العصر دخلنا المسجد طبعا احساس لايوصف يكفي ان احنا نسينا تعب الرحله وصلينا ودعينا وشربنا ماء زمزم بنية تتيسير رحلتنا وزجي بنية الاستيقاظ ماء زمزم لما شرب اليه من التعب ماقدرناش نكمل لمكه للعمره اجلناها للرجوع واتحركنا المغرب الي ينبع 230كم ثم املج 120كم ثم الي الوجه 155كم ثم الي ضباء 150كم ووصلنا ضباء 4 الفجر وساْلنا علي مكتب السفر فى بلدة اسمها "البلاغه"

    وحجزنا علي اللنش السريع
    اسعار الحجز -
    السيارة 8 سلندر 1100 ريال
    الركاب الفرد 320 ريال
    الاطفال 225 اقل من 12 سنه
    بعد ما اخذنا التذاكر 11,5ص اتجهنا الي ميناء ضبا علي بعد 28كم وصلنا الساعة 12 ظهرا انهينا اجراءات الختم وانتظرنا في المينا الي ميعاد العباره الساعة 4 عصرا وطلعنا الي العباره انا والاولاد وانتظر زوجي في السيارة حتي يكون اخر سياره تدخل العباره وبالفعل ده الي حصل كان الي قبل الاخير وكانت تاني سياره تنزل من العباره ماتنسوش حاولوا يكون معاكو واسطه انتو عافين مصر المهم اتحركت العباره الساعه 6 م وعلي فكره العباره نظيفه جدا ومجهزه بل شئ نمنا طبعا ووصلت العباره الساعه10م ونزلنا 11 م وبدأنا اصعب مرحله فب الرحله ودخول المينا بدأ زوجى في الجري لتخليص الاجراءت والصعب في كل ده ان لازم كل الي في السياره ينزل علي الارض نحاول مانحاول مفيش فايدة واتفكت كل الشنط ونزلت ودخلت علي السير ورجعنا ربطنا تاني مش عاوزه اقولكو كان شكلنا ايه... وفيه رسوم تخليص في حدود 1000 جنيه تقريبا انا مش فاكره المبغ بصراحه من الي شفناه اما عن زوجي في المرحله والوقت ده خلاص وصل للنهايه انا بقيت واقفه ادعيله واقول الله يصبره لا؟ وكمان ال ينرفز ان الموظف يقولك لازم تشتري طفاية الحريق يقلو معايا ماتنفعش اديني عقلك الحمد لله طلعنا الساعه 2,5 ص دخلنا سفاجا ومنها علي الغردقة طبعا الي شفناه في المطبات يكفي اوي زوجي خلاص عند الجونه مقدش يتحرك خطوه واحده دخلنا الجونه وبتنا ليله واتحركنا تاني يوم الي هو الاثنين الساعه 1 الظهر ومن هنا علي القاهرة ثم المنصورة وصلنا المغرب الحمد لله
    5-الرجوع
    كان الجوع يوم 21\7\2010 س2ظهرا طبعا لازم نحجز قبل الرجوع بفتره كافيه من مكاتب السياحة ووصلنا الغردقه 10 م علي اساس ان العباره هاتتحرك الساعة 2 ص لكن لسوء الاحوال الجويه اتأجلت الرحلة لتاني يوم طبعا في كل مرحله تمر علينا اول واخر مره نعملها دا كانت غلطه الحمد لله حجز المكتب للركاب غرف في فندق المهم اهو كانت ليله وعدت قضينا اليوم علي البحر كان رائع وخلص اليوم واتحركنا ودخلنا المينا الساعه 11م بعد ما اكدنا الحجز من المكتب وخلصت الاجراءات والمصاريف تقريبا كانت 3000 جنيه بالحجز وركبنا الساعه 2 ص وصلنا 8ص وخلصنا اجراءات الجمارك والتفتيش في السعودية واتحركنا 10 ص الي مكه 900كم ووصلنا الي الجحفه واحرمنا ومنها الي مكه ووصلنا الحرم الساعه 8 م عملنا العمره الحمد لله وبعدها اتحركنا الي الرياض ثم الهفوف ثم الحدود الامارتيه المسافه حوالي 1000كم ووصلنا ابوظبي الحمد لله.

    . واهم شئ انه يرجع الفضل الكبير بعد ربنا ودعاء الوالدين لزوجي مشاء الله عليه وعلي قوة تحمله وخوفه علينا يارب احميه وخليه وبارك لينا فيه
    اما بناتي ربنا هديهم طول الرحله كان بيلعبوا ومن اول ما خرجنا من ابوظبي كل الي عليهم يقولو ا كل دقيقه وصلنا مصر......... الحمد لله ..........
    6- التكاليف( تقريبا )
    1-1000 درهم الاوراق
    2-2200 الحجز ذهاب
    3-1000 بترول
    4- 3000 الرجوع
    الاجمالي=7200 درهم
    طبعا دا غيرمصاريف تجهيز الرحله واثناء الرحله وبعدها

    اخيرا سامحوني علي الاطالة بس حبيت اوضح كل شئ بقدر الامكان لان قبل الرحله كنت محتاجه اقرأ مثل هذا وعلي فكره انا اول مرة اشترك في كتابه موضوع بس لاهميته انا حبيت اكتبه لان اكيد في ناس محتاجين يعرفوا وهاتستفيد منه واتمني لكم التوفيق شكر لمروركم .
    اضافة من الادارة:
    شاهد المعلوةمات الجديدة عن اهم 35 فندق في ابو ظبي
    https://www.otlaat.com/best/abu-dhabi-hotels/

    مواضيع عشوائيه ممكن تكون تعجبك اخترناها لك:

    فنادق عطلات


    التعديل الأخير تم بواسطة Rana2016 ; 12-05-2020 الساعة 08:51 PM

  2. #2
    عضو مسجل
    تاريخ التسجيل
    Jul 2015
    المشاركات
    1

    رد: رحله من ابوظبي الى مصر 2010

    جزاكي الله خيرا
    ومن الواضح ان اصعب مرحلة هي مصر

    فنادق عطلات


  3. #3
    عضو مسجل
    تاريخ التسجيل
    Aug 2015
    الدولة
    أبوظبي
    المشاركات
    2

    رد: رحله من ابوظبي الى مصر 2010

    بارك الله فيكي ي أستاذة
    خليني أكتبلكم المصاريف كاملة داخل مصر:
    320 ج تأمين اجباري ع الباخرة
    400 ج اذن شحن
    60 ج كرته
    155 ج مفرقعات
    505 ج تربتك
    110 ج تراخيص مرور
    20 ج الراجل بتاع البصمة
    25 ج تصوير ملفات
    50 ج تربتك - مش عارف بتوع ايه
    250 ج عاتشف - مخلصاتي
    10 ج كل سنة وانت طيب ي باشا

    فنادق عطلات


+ الرد على الموضوع

المواضيع المتشابهه

  1. فى ابوظبي
    بواسطة Robot في المنتدى بوابة السفر إلى الإمارات U.A.E
    مشاركات: 0
    آخر مشاركة: 02-03-2015, 04:08 AM
  2. رحله من ابوظبي
    بواسطة Robot في المنتدى بوابة السفر إلى الإمارات U.A.E
    مشاركات: 0
    آخر مشاركة: 02-02-2015, 10:06 PM
  3. دبي ابوظبي
    بواسطة Robot في المنتدى بوابة السفر إلى الإمارات U.A.E
    مشاركات: 1
    آخر مشاركة: 02-02-2015, 07:35 PM
  4. في ابوظبي
    بواسطة Robot في المنتدى بوابة السفر إلى الإمارات U.A.E
    مشاركات: 8
    آخر مشاركة: 01-30-2015, 10:32 PM
  5. ابوظبى
    بواسطة Robot في المنتدى Italy بوابة السفر إلى ايطاليا
    مشاركات: 1
    آخر مشاركة: 01-20-2015, 02:20 AM

المفضلات

المفضلات

ضوابط المشاركة

  • تستطيع إضافة مواضيع جديدة
  • تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  
X