بسم الله الرحمن الرحيم
اولا احب اشكر المنتدى و القائمين عليه و الاعضاء المحترمين اللي مبخلوش باي معلومات عن الرحلات اللي عملوها و صدقوني ممكن معلومه صغيره عضو يكتبها و يكون في باله انها مش مهمه او مفيده و احب اقول اي معلومه بتكون مفيده لو مش ليك هتكون مفيده لحد تاني
فانا نويت باذن الله اكتب كل اللي اقدر عليه من الحاجات اللي صادفتني في رحلتي لعل و عسى حد يستفيد منها ( معلش اعزروني هكتب بالعاميه المصريه )انا هقسم التقرير علي جزئين الاول قبل السفر و التاني عند الوصول و تفاصيل الرحله و الاماكن و كده
نبتدي على بركه الله
الجزء الاول
1. اولا التخطيط للرحله وده مهم جدا لازم تكون عارف هتروح فين و هتقعد كام يوم
2. حجز الطيران و الفنادق و ايجار العربيه لو ناوي تسوق
3. اصدار تامين صحي عشان الفيزا
4. التقديم على الفيزا
5. الاستعداد للسفر ثم السفر باذن الله
1- التخطيط للسفر
نبتدي بالتخطيط للرحله و انا كان نفسي من زمان اعمل رحله معينه وهي اني اسافر من الامارات الى المانيا ( ميونخ تحديدا ) و منها على سالزبرج ( النمسا ) و منها على براغ ( التشيك ) و الرجوع لميونخ تاني و منها للامارات الحبيبه تاني
بس مظبطتش معايا ومفيش سبب معين غير اني مكنتش مرتاح , المهم مش هطول عليكم غيرت البروجرام ليكون كالتالي :
دبي- القاهره ( زياره الاهل و الذي منه و قعدت اسبوع )- فيننا ( النمسا و قضيت ليله واحده ) –براغ ( التشيك و قضيت ليلتين ) – سالزبرج ( النمسا 3 ليالي) –ميونخ ( المانيا روحت و رجعت في نفس اليوم سالزبرج تاني ) –فيننا تاني ليله واحده –القاهره و كمان مع الاهل و الذي منه اسبوع – دبي الغاليه
و الحمد لله البروجرام ظبط و كان ميه لميه و الحلو اني طلعت من مصر بدل دبي و السبب اني قضيت كام يوم مع الاهل و الاصحاب و مصر برده يا جماعه ميتزهقش منها 24 ساعه ماشاء الله الناس صاحيه و دي مشكله هتواجه اي حد بيسافر اوروبا ( بيناموا مع الفراخ يا فندم من المغرب يعني و دي ليها قصص هنحكيها بعدين ) و كمان السفر من مصر ا اقرب, الرحله كانت في حدود 3 ساعات من القاهره لفيننا
2-حجز الطيران و الفنادق و ايجار العربيه
حجز الطيران انا بستخدم ابليكيشن skyscanner وده بيجبلي اقل سعر للتذكره و يديني اسعار كل خطوط الطيران المباشره و الغير مباشره و يا اما احجز من عليه يا اما ادخل على موقع شركه الطيران اللي اخترتها و احجز منه و انا عن نفسي سافرت مصر عن طريق شركه مصر للطيران و حجزت السفر للنمسا على الخطوط النمساوية
انا عن نفسي بستخدم موقع بوكينج في حجز الاوتيلات وعن تجربه مرتاح معاه و مواجهنيش اي مشاكل لغايه النهارده الحمد لله
نتكلم باستفاضه شويه عن ازاي تختار الفندق و على اي اساس و اول حاجه تختار المدينه و التاريخ و عدد الاشخاص , هيطلع لك نتائج كتير نبتدي بعدها نعمل فلتر و تختار بناء على اراء النزلاء السابقين وده مهم اوي لان اي نزيل هيدي رأيه هو مش رأي القائمين على الفندق , بس نصيحه حاول تقرا الاراء العربيه و الانجليزيه و متاخدش بس بواحد فيهم و ده لاكتر من سبب و اهو اختلاف الثقافات احنا لينا دماغ و الاجانب ليهم دماغ تانيه خالص
مثلا معظم الاراء العربيه بتشتكي كتير ومتزعلوش من صراحتي مثلا ان الغرف صغيره و مفيش ساعات مصاعد او اسانسيرات , مفيش حد بيساعد في توصيل الشنط للغرف و يروح مدي تقييم قليل بسبب الحاجات دي ( كل ده عشان احنا متدلعين في بلادنا و لله الحمد ) في حين الاجانب بيشتكوا مثلا من ان الفندق مبيسمحش باصطحاب حيوانات , دوشه من الغرف اللي حواليه معنوش تاجير عجل , و حاجات من كده
فانا عن نفسي بختار الفندق عموما بناء على اراء النظافه و ان الاثاث يكون مريح و جديد و الباقي كماليات مش فارقه معايا بس المره دي في حاجات كنت لازم احطها في عين الاعتبار و هي
- الباركينج لأني بستاجر سياره
- قرب الفندق من المواصلات العامه
ايه ده ؟ طبعا مستغربين اني بدور على باركينج و في نفس الوقت المواصلات العامه و الاجابه هي . البراكينج في اوروبا عموما غاليه و صعب انك تلاقيها بسهوله و في نفس الوقت شبكه المواصلات في اوروبا كلها متطوره جدا و نضيفه جدا
عشان كده خطتي كانت اني اتنقل بالعربيه من مدينه لمدينه ومن بلد لبلد بس و اركنها في الفندق و استخدم المواصلات العامه داخل المدينه نفسها و الحمد لله كان تفكير موفق و مريح جدا جدا
تاني ابليكيشن او موقع تستخدمه عشان تختار فندق هو TripAdvisor و ده هيديلك اراء اكتر من بوكينج و تفاصيل اكتر و كمان قرب هيوريلك ايه المطاعم و الاماكن السياحيه القريبه من الفندق و كمان و ده الاهم صور النزلاء للفندق نفسه لان الفندق مش هيحط على الموقع صور مش كويسه لكن النزيل هيصور كل حاجه و هيحطها بالنسبه للفنادق انا اختارت فندق اسمه motel one في فيننا و في سالزبرج وفي براغ التشيك اخترت selsky Dvur و كانت الحمد لله اختيارات موفقه و هشرح بعد كده مميزات و عيوب كل اوتيل من وجهه نظري ان شاء الله
بالنسبه لايجار العربيه استخدمت موقع rentalcars.com و كانوا ممتازين لان بيعرضلك اسعار اكتر من شركه وانت بتختار اللي يناسبك
انا عن نفسي اخترت مرسيدس A class 2015 هي صغيره شويه بس مكانش يفرق معايا لاني كنت مسافر مع اخويا بس و كانت تكلفتها علينا في 8 ايام ب 250 يورو شامل تامين شامل و سائق اضافي انا اخدتها بصراحه جير عادي مش اوتوماتيك و ده لانها اوفر بس بصراحه مفرقتش معايا و كانت مريحه جدا
انا اخترت العربيه عن طريق شركه Budget و اخترت التسليم و الاارجاع مطار فيننا و كان الوصول ليهم سهل امشي على اللوح الارشاديه في المطار و انت هتوصل بسهوله المهم يكون معاك جواز السفر و حجز الانترنت و رخصه سواقه اللغه اللي مكتوبه بيها فيها انجليزي على الاقل يعني مينفعش رخصه سواقه مكتوبه بالعربي بس , انا عن نفسي استخدمت رخصه سواقه اماراتيه بس برده كان معايا رخصه سواقه دوليه و دي بتطلع في الامارات من اي مكتب بريد و رسومه باين 150 درهم على ما اتذكر بس مهمه جدا لان لو وقفك اي شرطي مرور ممكن يرخم عليك و ميعترفش الا بالرخصه الدوليه
و هنا لازم نتكلم شويه عن السواقه في اوروبا. النفيجيشن وده مهم جدا , انا عن نفسي استخدمت ابليكيشن اسمه I go Europe و الميزه في الابليكيشن ده انه بيشتغل على ال GPS ومبيحتجش انه يكون متوصل بالانترنت و كان زي الفل الحمد لله
, من احسن الاماكن اللي سوقت فيها في حياتي و بالذات على الطرق السريعه الناس كلها ملتزمه بالحارات محدش بيزنق على حد ولا حتى بينورلك النور العالي لو انت ماشي قدامه بالراحه بجد ناس قمه في التحضر , المهم الالتزام بالسرعه المحدده وكانت الميزه في ابليكيشن I go انه بيعطيك سرعه الطريق المسموح بيها وهي في الغالب داخل المدن من 50 ل 80 كيلو في الساعه و على الطرق السريعه 130 كيلو في الساعه بس طبعا بيكون في مرات السرعه بتتغير حسب الطريق , حصل معايا موقف اول يوم كنت ماشي و انا مش واخد بالي اني ماشي فوق ال 100 و كنت لسه في حدود مدينه و مطلعتش منها , المهم ببص فجأه لقيت شرطي طلعلي في وسط الطريق فجأه و بيشاورلي اني اركن
المهم ركنت جالي لقيته بيقولي انت ماشي بسرعه و لقيته جايب في ايده رادار صغير و بيوريني اني ماشي على 117 كيلو و المنطقه دي سرعتها 100 قولت استعبط واقوله انا سائح و معرفش و الكلام ده , قالي ماليش فيه هتدفع غرامه فوريه 20 يورو و فعلا دفعت و من بعدها بحترم نفسي و بركز جدا في موضوع السرعه
في نقطه مهمه انا وقعت فيها و عايزكم تاخدوا بالكم منها و هي ان في موقع تاجير السيارات بيعرضوا عليك التامين الشامل و هو طبعا بفلوس اضافيه و انا وافقت و خصموا الفلوس كلها من الكريدت كارد ولما روحت استلم العربيه عرضوا كمان عليا التامين فقولتلهم اني مشترك فيه قبل كده فقالولي ان التامين اللي انا اشتركت فيه هو عن طريق الموقع بتاع التاجير لكن مش عن طريق شركه التاجير نفسها فلو حصل لا قدر الله حادث انت مضطر تدفع و بعدين تطالب موقع الايجار بالمبلغ
فطبعا تشتريت تامين مره تانيه لكن مش شركه التاجير المره دي و في الحاله دي لا قدر الله لو حصل حاجه انت مش مطالب انك تدفع مليم غخدوا بالكم
3- اصدار التامين الصحي
وده عملته اون لاين عن طريق شركه axa و كانت تكلفته للشخص 120 درهم وكان فيه ارخص بس بمميزات اقل ب 70 درهم و الموقع سهل جدا و بيبعتلك البوليصه على الايميل فورا
4- التقديم علي الفيزا
في الامارات لازم تتقدم عن طريق visa center و الطريقه انك تدخل علي الموقع و تحجز موعد لتقديم الورق و مكنش فيه مواعيد الا بعد اسبوع فلازم تاخدوا بالكم لو الوقت ضيق انا صراحه حجزت خدمه vip عشان هي الوحيده اللي كانت متاحه و دي كلفتني 100 درهم
المهم روحت في الموعد و معايا كل الاوراق وهي
1- جواز السفر الاصلي و صوره منه
2- بطاقه الهويه الاماراتيه و صوره منها
3- الابليكيشن متعبي بالبيانات و متوقع منك
4- صوره شخصيه حديثه و مفيش فيها اي تعديل بالفوتوشوب و متعملش نفسك ناصح و تبعت صور قديمه عشان ممكن يرجعوالك المعامله
5- شهاده راتب من مكان عملك
6- كشف حساب بنكي لمده 6 شهور و لازم يكون فيه فلوس مش فاضي
7- تامين صحي يغطي مده السفر
8-لو عندك اي فيزا شنجن قديمه صورها
9- حجز الفنادق
10- حجز الطيران ( انا عشان هسافر من مصر طلبوا مني تذكره السفر لمصر ذهاب وعوده بالاضافه لتذاكر السفر ذهاب و عوده للنمسا )
المفروض انك بتقدم في سفاره الدوله اللي هتدخل منها وعشان كده انا قدمت في النمسا ، العادي ان الفيزا بتاخد من 5 ل 10 ايام عمل و ممكن السفاره تطلب تقابلك في انترفيو و ممكن متطلبش
5- الاستعداد للسفر
بعد ما الفيزا طلعت و الحمد لله ابتديت اجهز نفسي و اشوف اللبس والكاميرا و دي كانت اهم حاجه عندي لان التصوير عشقي و الطبيعه في النمسا فعلا رائعه و تستاهل انك تفضل تصور فيها طول اليوم ، المهم الحاجات الاساسيه اللي كانت معايا كانت
1- الموبيل و عليه الابليكيشنز المهمه زي ( فاذكروني ) انا بحب الابليكيشن ده لانه بيعطيك مواعيد الصلاه و الاذان و القبله ودي حاجه مهمه لان فعلا هتفتقد الاذان هناك
2- شاحس سياره و ده مهم لو هتستخدم الموبيايل كنفيجيشن لانه البرنامج ده بياكلالبطاريه اكل
3- محول لتوصيل شاحن الموبايل في الكهربا لان اوروبا بتستخدم الفيشه الثنائيه
4- لو انت كييف شاي يبقى تاخد معاك كاتل و شاي و سكر لان معظم الفنادق مبتحطش كاتل في الغرفه و الشاي في المحلات مبيعجبنيش و كتيير مش هتلاقي غير شاي الايرل جراي و انا عن نفسي مبحبوش
5- كريدت كارد و احتياطي خلي معاك اتنين من بنكين مختلفين لان ممكن واحد فجاه يقف ، و كمان خد كاش احتياطي
6- ادويه للصداع و البطن احتياطي
7- احذيه مريحه لانك هتمشي كتييييييييير اوي
8- انا روحت في الصيف في اخر شهر 7 تحديدا و كان الجو جميل و ساعات حر بس لازم تاخد معاك جاكت احتياطي لان الجو فجاه بيقلب و تمطر
و كده خلصت الجزء الاول و ان شاء الله نبتدي في الجزء التاني قريبا جدا و فيه هنتكلم بالتفصيل عن الاماكن اللي زرتها و نصايح هتفيدكم كتير و اوعدكم هيكون في صور كتييييييييييييييير ان شاء الله
و دي صوره واحده مؤقتا عشان اشوقكم
مواضيع عشوائيه ممكن تكون تعجبك اخترناها لك:
- استفسار عن فيينا
- برنامج سياحي لقلب اوروبا
- المساعدة يا أخوان لتخطيط لشهر عسل في شعبان مابقى شيء عليها
- المانيا نمسا سويسرا
- مطعم وادي أبو زاد في بلودان ساحة أبو زاد
- سفرتي قريب فزعتكــــم
- طلب مساعده واستفسارات
- سَافَرَ الَيَّ زْلامُسيّ تَقْرِيْرِ سُفْرَتَيْ الِاحْتِرَافِيْهُ
- كابرون وين اسكن ؟
- طيران الوفتهانزا
- تكفووون يا شباب مساعده
- الجزء الثاني من رحلتي الى ايطاليا والنمسا وسويسرا وفرنسا
- جدول مقترح لزيلامسي والمعالم القريبة منها
- طلب مساعدة عاجلة جدا في اختيار الجدول
- الجـــــــــــــولان معلومة وصور ؟
- اخواني فزعتكم ثلاث استفسارات بسيطهشهر عسل
- رحلتي العائلية الى سوريا
- اهم الاماكن السياحية في النمسا ؟
- ممكن برنامـــج
- كيف اسلم السيارة في مطار النمسا لو سمحتو ضروري
رد مع اقتباس
المفضلات