بسم الله الرحمن الرحيم
السلام عليكم ورحمة الله وبركاته
شكرا لك ايها المنتدى العظيم اللذي افادني بكل مااريده في اندونيسيا ولهذا اردت ان اكتب تقرير صغير ومختصر لرحلتي العائليه لاندونيسيا ليستفيد منه الجميع
اولا كانت الرحله عن طريق الخطوط القطريه انا وزوجتي وبنتي حجزتها عن طريق النت وكان خط السير الرياض الدوحه 3 ساعات جاكرتا والعوده كانت من بالي سنغافورا ساعه
الدوحه ساعتان الرياض وكان الحجز عن طريق النت ببطاقة فيزا لصاحبي وبعد الحجز اخذت رقم الحجز وتوجهت الى مكتب الخطوط القطريه لتاكيد الحجز والتاكد من صاحب البطاقه
وتم سؤال الموظف المسؤؤل وقال لايوجد مشكله صور الفيزا حقت الرجال وكتب ورقه خارجيه انه تم التأكد من صاحب الفيزا وختم الورقه وطبع خط السير واعطاني ايها
والحمد لله لم اواجه مشكله وتم حجز المقاعد في جميع الرحلات من موقع الخطوط القطريه واختيار الوجبات وكان هناك فرق في السعر من المكتب حوالي 8 بالميه
اما الفنادق اضطريت اني استخرج فيزا من الراجحي فيزا تسوق وطلبت من البنك ان تكون الفيزا بارقام محفوره وليس مطبوعه وتم ذلك في خلال اسبوع تقريبا اتتني البطاقه باراميكس
وتم اخيار الفنادق التاليه من موقع بوكنق
يومين جاكرتا في فندق Pullman Jakarta Central Park
فندق راقي وروعه وفخم وموقعه جميل بالنسبه لي في منطقه هادئه تقريبا وملاصق في ثلاث مولات من افخم اسواق جاكرتا وكانت اجراءات الدخول سريعه
ويعيبه ضيق الغرفه وكانت اجراءات الخروج بطيئه وممله ساعه تقريبا
في اليوم الاول تم الوصول الساعه 10 الليل وكان المطار فاضي وتم تعبأة تأشيرة الدخول كامله في الطائره وكنت ماخذ معي ترجمه للتاشيره
اخذنا الشنطه وخلصنا الجمرك وكان سلس وسريع ولايوجد فيه اي شي يعيبه ولا هدايا ولا احد طلب مني شي
كنت قد اتفقت مع سواق اسمه من الكوكب الطائر............/الاسم محيي الدين
كان يستنى باسمي في المطار وصراحه السواق جدا رائع ومحترم وامين وجربته اول يومين في جاكرتا حسيته كويس وكملت معاه لبونشاك وباندونق والرجوع معه لجاكرتا للسفر الى بالي اتفقت معاه
ب500 الف لليوم في جميع المناطق ويستاهل اكثر وانا زودته 100 الف لباندوق
علمته بالاماكن اللي ابي ازورها في هالمناطق وقال ماعندك مشكله والصراحه كان يخدم على اي شي ابيه يروح يجيبه لو مويه او شحن ولا اذا نقصني فلوس يعطيني
لدرجة انه يسحب لي من الصرافه من بطاقته
وانا كنت مقسم الايام يومين جاكرتا يوم جبل واربعه باندونق والذهاب من مطار باندونق
بالنسبه للتذكره بالي لقيت مافيه دايركت من باندونق لبالي لازم توقفات وانا مافيني توقفات في المطارات فاتغيرت الايام اللي في باندونق صارت ثلاث ايام والرابع في جاكرتا
وصلنا للفندق والحمدلله وريحنا ونمنا على فراش من ريش النعام الله مرره رايق الفندق
اليوم الثاني
وصحينا الصباح ولقينا السواق داق وينتظرنا طلعنا وين احسن صراف يامحيي قال اتريوم قلت تمام عليك روح صرفت 500 دولار وكان سعر الصرف احسن صرف في الرحله كلها
صراحه نسيت كم بالضبط ولكن فوق 9 الاف روبيه شرينا شريحه للجوال وتم تفعيل خدمة البلاك بيري لمدة شهر بقيمة اسبوعين صراحه مدري نسيت لكن انها رخيصه واستفدت منها كثير
لاني افتح المنتدى وانا في السياره واشوف من التقارير والمواضيع الكثيره في المنتدى واسامي المناطق والمسافات والدخوليات وكل شي في هذا المنتدى العظيم
طلنا من السوق على انشول وانا اخترت الدلافين وكلاب البحر والسناجب وسينما الفور دي بالنسبه للسينما لانصح بها للاطفال لانهم بيصحون عليك وبتطلع ولا راح تستفيد
بعدها على مطعم بندر جاكرتا الصراحه المطعم مرتب بس مااعجني الاكل
عموما في اندونيسيا كلها مطاعمهم مااعجبتني
وبعد الغداء طلعنا للملاهي وعند الدخول للملاهي جلست ادور الفلوس اللي توي صرفتها مالقيتها ماادري وين راحت هي في السنما طاحت ماادري الصراحه حوالي 4مليون ونص المهم قفلت الاخلاق
وطلنا على الفندق
ريحنا واخذت فلوس وطلعنا للمول اللي بجمبنا تمان انقريك وتمشينا وتعشينا في ماك حبيب الكل
اليوم الثالث
توجهنا للجبل وانا كان في بالي اني اسكن في سيروني ولكن وانا في الطريق شفت محلات لبيع الغنم قلت ليش مااسكن في فيلا واجرب لحمتهم والشوي وكذا
واول ماوصلنا للجبل الا هذي بيتزا هت وكنا جوعانين قلت وقف ناخذ سفري وقفنا طلبنا البيتزا رجعت انا للسياره وانا راجع شفت سوبر ماركت في قدامي قلت خل اروح اشتري ببسي
واغراض منها قطعت الشارع وكان زحمه والسير تقريبا واقف وانا راجع قطعت السيد الاول وباقي الكتف بس انا حطيت رجلي الا وهذا الدباب اللي شالني انا واغراضي
صراحه تشقلبت في الهواء فتحت عيوني الا انا في الارض قمت حركت رجولي وقفت مشيت شوي الا والحمدلله ماجاني شي بس ضربه في الساق والبطن قمت الا والسوكرتي حق المطعم
عندي فيك شي تبي شي نطلب الشرطه الاسعاف قلت لا طبعا انا ابي السلامه والاغراض طارت مدري وينهي الا شوي ويجيني واحد فيها قلت ماابيها فكني بس جاني السواق
وقالي ليه ماقلتلي لا عاد تنزل من السياره اي شي تبيه قلي وانا اوقفك عند الباب قلت ابشر والصراحه ماقصر لو ابي مويه ينزل ويجيبها لي
فاتوجهنا لكوتا بونقا واخذنا فيلا بس الصراحه اللي ماتعود الا على الفنادق لاياخذ فيلا
من عيوبها نامس مافيها مكيفات نظام الخدمه معدوم فيها وحشه مافيها خزنه ولا امانات اغراضك لازم تزبنها نظام الاولين
اخذنا تيس واغراض من البقاله بحوالي 250 ريال مع الفله 250 ريال مع التيس حوالي 200ريال
حطيت الاغراض وجبنا شغاله تطبخ الاكل لين نرجع رحنا لحديقه الزهور صراحه حلوه ورايقه ومجسمات وجو عليل يرد الروح ومرينا مزارع الشاهي
رجعنا لقينا الشغاله جايبه اغراضها وقدر ضغط وشغل حلو وتعشينا وقسمنا باقي العشاء لاني طبخت التيس كله خليت شوي مقلقل وكبده للصبح والصراحه مااعجبتني لحمتهم
كنت سهران لحد الساعه 2 الليل لحالي والا السياره اللي عند الباب يضرب بوري واطالع من الشباك والا يأشر مدري وش يعاني الصراحه بس انواع الطنش جلس ابو خمس دقايق يحتري
ثم مشاء ونمت وقمنا الصباح
اليوم الرابع
توجهنا للسفاري صراحه انبسطنا هناك حديقه حلوه وتاكل الحيوانات وتتمشى بسيارتك على راحتك وفيها خصوصيه صراحه حديقه روعه وتستحق الزياره والعناء
وبعدها توجهنا الى العروض والكابوي وبعدها على بيتزا هوت وبعدها سألت السواق عن محلات الفيكتري اوت وقالي فيه محل في جبل لايفوتك مرررره حلو ورحنا للمحل
اسمه براسكو صراحه محل حلو واسعاره حلوه وهو احلى محل دخلته فكتري اوت احلى من محلات باندوق واسعار التيشيرتات من 40 ريال تقريبا الجنز من 100 الى 150 ريال
وفيه ماركات عالميه معروفه
من عيوب الجبل ان الشارع ضيق ومكسر ولا فيه نظافه ولا اهتمام وكثرة الدبابات الله لايعيدها وازعاجها وعموما الدبابات مزعجه في اندونيسيا كلها
توجهنا لباندونق وتوقعت الطريق لها بيكون موحش ومقطعه ولكن كان الطريق كله بيوت ومحالات ومزارع وقرى
وصلنا باندونق وسكنا بفندق Sensa Hotel
الفندق روعه وتعامله روعه وتصميمه وموقعه وكل شي فيه حلو اخذت غرفه فيها بلكونه بسريرين منفصلين لاني مالقيت الا هي ولزقت السريرين بجنب بعض وكانت اكثر من رائعه صارت سرير كبير
اكبر من المزدوجه وكان الفندق جدا مريح وملاصق في المول وشارع الجنز وقريب من محلات الفيكتري اوت
اليوم الخامس
صحينا الصباح افطرنا في الفندق وكان افضل فطور الفنادق اللي سكنتها واجملها منظر وتعدد الانواع في الافطار طبعا باندونق حلوه وجوها مثل الجبل وانا زرتها في الويك اند وكانت ممتعه
رحنا للجبل البركاني وطبعا انا مافيني امشي ابد ولا اهلي شفنا الجبل من فوق ورجعنا للتشايتر المسابح والمياه الحاره دخلنا المتنزه صراحه كان زحمه ويك اند وكان مقرف مااعجبني ابد
طلعنا رحنا على مزارع الفراوله ودخلنا وخلينا البنت تقطف وتعبي وكانت الزياره للمزرعه حلوه وبعدها توجهنا الى الانناس واكلنا منها وكانت طعععمه وكأنها عصير وكذلك الفراوله
في الطريق سألت عن المطعم الرومنسي ورحنا له يوم وقفنا وسالته وش المطعم قالت اكلات اندونيسيه قلت لا معليش شوف اقرب ماك رجعنا الى المحلات الفكتري اوت
ولفنينا في كم محل ولقيت محلين فقط هم اللي يستاهلون وتقدر تقارنهم باللي في الجبل طبعا الوقت كان تاخر وقلنا نرجع بكره ونزور المحلات
رجعنا للفندق وريحنا وطلعنا للمول اللي بجنبنا وكان مريح ومحات الكوفي في ساحه وسط المول ومحل العاب للاطفال وهذه الساحه كان فيها اغاني وناس متجمعه وكانت جوله حلوه
اليوم السادس
سألت السواق وش رايك بشلال ماربيا قال ماانصحك فيه قلت اجل على تشيبوداي وكانت الرحله طويله نوعا ما ولكن اول مابدينا في طلوع الجبل سبحان الله اجواء ومناظر ماقد شفت مثلها
الله يرزقنا الجنه شي عجيب وخيالي امطار سحاب خضره جو ليس بارد جدا ولكنه عليل وصلنا للبحيره البيضاء وتمشينا فيها ورجعنا الى البحيره الثانيه وكانت انزل منها اقل بروده في الجو
واخذنا قارب وجوله جميله على البحيره ومناظر خلابه سبحان الله على هذه الاجواء والمناظر فهي تذهب عنك جميع التعب والعناء وتريحك نفسيا
وبعدها رجعنا فيه مزارع للفراوله ولكن كان مافيه وقت وكنا زايرنها امس في لمبانق توجهنا على المحلين اللي شفتاهم امس وتقضينا وهدايا وكان التسوق ممتاز واسعاره ممتازه
ثم الى الفندق ريحنا وطلعنا لشارع الجنز ولكن انا مااعجبني ابد لا بضاعه ولا اسعار ولا تعامل وزحمه سير ولا يوجد رصيف ودبابات كثيره وانا ماخذ درس قبل
رجعت للمول وتعشيت في مطعم A&W ورجعت للفندق
اليوم السابع
التوجه لجاكرتا وانا كنت مخلي اخر يوم في باندوق من غير حجز للفنادق لاني ماادري من وين ابطلع لبالي ولكن تم الحجز في فندق في جاكرتا ب800 الف
وكانت الغرف كبيره ويوجد بانيو فيها ولكن الفندق مكتوم وارضياته موكيت ومسبب رائحه في الغرف والممرات
مرينا في جاكرتا سوق منقى دوا ولا اعجبني ابد ومريت سوق للساعت نسيت اسمه ولا اعجبني لانهم ينصبون عيني عينك وانا مااحب المكاسر والنصب
تعشينا في مطعم الباشا طبعا المطعم مايقارن ابد بالمطاعم العربيه في كوالالمبو لا فخامه ولا نظافه ولا طعم ولكن هذا المطعم لديه جلسات خاصه وجلسات مغطات يعني تاخذ راحتك
وكان طلبنا كبسه وحمص وكباب لحم ولكن الكباب الله يديم النعمه ولكن الكبسه حلوه عندهم نزلت من المطعم لقيت محل عود وانا كنت قد سالت السواق محيي عن العود وقالي في جبل
وجاكرتا قلت اذا رجعنا لجاكرتا ودني له المهم نزلنا ودخلنا المحل وجربنا العود اللي عنده اعجبني نوع واحد عنده وكان اسمه موروكي كان سعر الكيلو 350 دولار
كاسرته لحد 300 ووافق قلت ليتني منقص بعد المهم اخذت نص كيلو قلت الكيلو كثير واخاف مايطلع حلو رجعنا للفندق وريحنا وتجهزنا للذهاب لبالي
اليوم الثامن
بعد عمل التشيك اوت توجهنا للمطار والسفر لبالي على طيران ليون الساعه 1 الظهر وسعر التذكره 200 ريال تقريبا ذهاب فقط ولكل شخص 20 كيلو
انا كنت جايب معي شنطه وحده كبيره وشنطه يد اشيلها معي في الطياره المهم وصلنا للتحميل الشنط صارت الشنطه وزنها 40 كيلو ورفض انها تدخليقول اكثر شي 30 توهقت انا الصراحه
ولكن كان جنبي سعوديين الله يجزاهم بالخير ماقصرو وعرضو علي المساعده وواحد منهم كان معه شنطه يد وراح جاب كيس وفضى شنطته واعطاني ايها شخص في قمة الاخلاق راعي فزعه
وطلعت بعض الاغراض من الشنطه الكبيره ورتبت الوضع وادخلتها ثانيه ومشت الامور
وانا مااقول الا والله اني ماشفت هناك من الشباب الا كل خير ومساعده وكل من رأيت من الشباب كان يبتعد او يصد لوجود العائله معي
هنا ختام الجزء الاول من الرحله
مواضيع عشوائيه ممكن تكون تعجبك اخترناها لك:
- ارجوا المساعدة من اهل الخبرة
- أحتاج مساعدتكم ورأيكم في التخطيط المرفق
- استفسار ات متعددة للعضو
- استفسار ضروري الله لا يهينكم
- محتاجه معلومات عن مطعم مانشستريونايتد
- رحلتي بعد ساعات شلون نتصرف بالفلوس ناخذها كلها كاش
- استفسار لأهل الخبرة في الجبل
- افضل وسيلة مواصلات مطار جاكرتا باندونج
- المساعدة في برنامج
- استفسآر بسيط ،، ولآهنتم
- خبراء بالي من يرتب لي جدولي في بالي ؟؟؟انا في حيره
- اسبوع واحد فقط
- الى اخواني
- استفسار ضروري
- استفسارات عاجلة
- خطأ فادح سويته في حجزي أبي حل عاجل
- منتجع صحي
- اندونيسيا في رمضان والعيد
- مساءك نقي كنقاء قلوبكم
- سؤال لاهل الخبره فى السفر
رد مع اقتباس
المفضلات