الموضوع: ضيف جديد بحاجه لمساعدتكم

اخواني
ارغب انا وعائلتي هذا الصيف وخلال شهر اغسطس زيارة ايطاليا . ارغب بمعرفة اماكن الترفيه للاطفال من اعمار 6 سنوات الى 14 سنه . والاماكن المناسبه للتسوق . وايضا ماهي المناطق او المدن التي تنصحونني بزيارتها
وهل الافضل ان اخذ فندق او شقق . وماهي الفنادق التي تنصحونني بالسكن فيها او الشقق
شاكرا لكم تعاونكم

مواضيع عشوائيه ممكن تكون تعجبك اخترناها لك:

• أستفتسار
• احتاج مشورات لو سمحتوا بخصوص روما فنيسيا مده اسبوع
• برجاء الافادة بخصوص فيزا من الكويت
• خبرتكم رحلة شوبنق
• ابغي منكم خدمه بااسرع وقت
• ماهي الأماكن التي تستحق الزياره بميلانو ؟
• استفسار عن الفنادق مهم ارجو االرد العاجل مع الشكر
• محتارة في ايطاليا
• من له خبرة بشركات شحن السيارات من إيطاليا إلى السعودية
• كم تبعد فينيسيا عن روما
• تم الحجز على روما وفينيس وباقي بعض الاستفسارات
• أسعار التاكسي والقطارات في ايطاليا
• وين ممكن اسكن بفلورانس وايش الاماكن الحلوه فيها
• الاخوة بنت الصقور من القلب سوار وكل خبراء ايطاليا لو سمحتوا
• هناك عدة اسئله
• ممكن اسم وموقع الاوت لت الي في ميلان
• رحلتي من ايطاليا إلى سويسرا
• شمال إيطاليا أيام أيها الخبراء النجدة
• فزعتكممم يا خبراء ايطاليا والنمسا
• الرجاء المساعد شريحه

اولا لا افضل السفر الي ايطاليا شهر 8 لأن معظم الأماكن مغلقه بعظ الأحيان حتي المطاعم اذا كان صاحب
المطعم هو اللي شغال فيه لأن اجازة الأيطالين في شهر 8 وبما انهم معقدين فالكل مره واحده ياخذ اجازه
علي اساس ان الشمس والبحر

المهم اذا اردت مكان سياحي والعاب فنصيحتي هي بيسكيرا دي لا جاردا في فيرونا هذا المكان في جميع الأشياء الحلوه العاب حديقه مائيه شلال تلفريك يوديك اعلي قمم جبال الألب وايد اشياء تقدر تسويها هناك
وهذا الرابط الحديقه www.gardaland.com وتقدر تروح فينيسيا اللي اهي البندقيه مدينه مائيه تستاهل الواحد يزورها وما ادري بالنسبه للتسوق يمكن في ميلان لأن ما احب التسوق
انشاء الله الخبراء يفيدونك
وعندك مدينة العاب ثانيه اللي هي ماريبيلندا تاخذ تذكره تتدخل لها يومين وايد حلوه هذي بتكون في ريمني
بس الجو بيكون حار في شهر 8 ليش ماتروحون شهر 7 يكون احسن شوي

طبعا اذا بتقعد في شقق وايد ارخص بس الفنادق هذي الوقت من السنه وايد غالي وما في حجز وااايد صعب بس احجز من ديرتك وتاكد من الحجز

وعندك هذي الفندق وايد حلو يصلح للعائلات ورخيص بالنسبه الي اسعار الفنادق الثانيه

هذي الفندق في بيسكيرا دي لا جاردا وهذا المكان في انواع كثيره من البروشور اللي تستطيع ان يفيدك يعني لو تقعد في هذي الديره ما بتخلص من الأنشطه وااايد اشياء حتي طاعات بحر بروحك مع العائله ووواايد اشياء لا حصر لها المهم هذي اسم الفندق والبنت اللي هناك تعرف تتكلم انجليزي اسمها ساره
hotel giardinetto
الموقع الألكتروني هو www.hotelgiardinetto.com طبعا هو سلسلة فنادق بس اضغط علي اول فندق من فوق نفس الأسم بتشوف الفندق
بعطيك التلفون 0309141704
الفاكس0309141228
العنوان viale marconi,39
25015 desenzano delgarda
تستطيعون تكلمون وحده اسمها ساره لأنها الوحيده الليتعرف انجليزي واذا في اي استفسار ممكن اساعدكم

هلا بك يااختي العزيزه.
اولا انتي راح تسافرين روما ومن روما ميلان .
طبعا بيسكيرا دي لا جاردا(peschiera del garda) تتطلعين لها من ميلان بيكون قريب تقريبا ساعه
ونص ومن روما بتكون بعيده تقريبا 4 الي 4:30 فاحسن تتطلعين من ميلان .
طبعا السكن انا اشرت اليه سابقا شوفي العنوان في الأعلي الردود السكن مناسب وحلو ومنطقته تقع
في desenzano del garda طبعا كل ما يصير ابعد يكون ارخص وطبعا متوافره الغرف لأن دائما
في peschiera del garda الفنادق الكبيره والصغيره ممتلئ فانا افضل وقت تكونين في ميلان تسوين
حجز تتصلين علي الفندق تكلمين وحده اسمها ساره وتسويلج حجز طبعا اذا ما في دوري فنادق ثانيه
بس اهم شئ مو ايام الجازات يوم السبت والأحد دايما تكون اماكن مزدحمه روحي الأيام العاديه ان شاء
الله تحصلين .
راح اتكلم عن الأماكن
1-الحديقه GARDALAND انشاءت الحديقه من سنه 1975 وهي من اكبر الحدائق في ايطاليا طبعا
الحديقه روعه اوقات العمل من بما انك رايحه شهر 7 فبكون التوقيت من 9 صباحا الي الساعه 12
ليلا . تذاكر الدخول انا افضل تروحون من بداية علشان تاخذون تذاكر لأن الحديقه تكون وااايد مزدحمه
طبعا اذا بتروحون في السياره توقفون السياره وبتمشون وبتمرون تحت نفق الي الجهه الثانيه للحديقه
وطبعا اذا بتروحون في باصات الحديقه نفسها بتشوفونها كلها عليها رسمت الحديقه وتقدرون تاخذونها من
محطة القطار لأن الباصات مجانا . سعر التذكره ليوم واحد للبالغين 24 يورو وللصغار اللي طولهم اقل من
متر واحد مجانا واذا الصغار كانوا اطول من متر طبعا السعر بيكون 20 يورو .
سعر التذكره ليومين متتالين 38 يورو والأطفال 31.50 .
بس افضل الحديقه تروحونها علي يومين علي اساس المدينه كبيره وفيها عروض كثيره منها
عروض التزحلق علي الجليد عروض الدولفين عرض الفقاعات والكثير منها
بس لازم كل عرض تروحين قبل الوقت بنصف ساعه علشان تاخذون مكان حلو .
وطبعا في داخل هذي الحديقه مكان كبير للأطفال من سنه الي 5 سنوات يسمونه
FANTASY KINGDOM وطبعا في السينما ال4D وايد حلو تلبسون نضارات وتدخلون
وكان الأشياء حقيقيه .
وطبعا الحديقه باليل ووواييد حلوه وطبعا متوفره وايد مطاعم السريعه او مطعم تاكلون فيه مثل
مطعم علاء الدين كبير وايد
وطبعا اخر الليل اذا بسكرون الحديقه بتكون هناك العاب ناريه تعلن عن انتهاء اليوم.
الموقع الرسمي للحديقه هو www.gardaland.it
2-canavaworld او يونيفرسال ورلد : هذه الحديقه عباره اوتحكي عن الأفلام بطريقة العاب
طبعا تصلح للكبار وصغار وايد حلوه
اوقات العمل فيها من ايام السبت اجازه فتكون من 10 صباحا الي 12 ليلا
والأيام الثانيه تكون من10 صباحاحا الي 7 ليلا .ساتكلم عن سعر الحديقه لاحقا .!!!!!!!!!!
وطبعا هذه الحديقه تتكلم عن افلام مثل ترمنيتر terminator2+magma+the horror house+
وطبعا في عروض مثل عرض رامبو + زورو + cartoon network وطبعا الكثير من الأشياء الحلوه
3- اكوا بردايس ( AQUA PARDISE ) هذه حديقه مائيه وااايد حلوه طبعا هي مشتركه في نفس مكان
CANAVAWORLD
طبعا سعر التذاكر في منفصل ومشترك AQUA PARDISE +CANAVAWORLD
يوم واحد وحديقه واحده للكبار 19 يورو والصغار اقل من 1,40 متر 16 يورو
يوم واحد حديقتين للكبار 25 يورو واقل من 1,40 متر 21 يورو
يومين وحديقتين للكبار 30 يورو واقل من 1,40 متر 25
والأطفال اقل من متر مجانا
الموقع الرسمي لهم www.canevaworld.it
الموقع الرسمي الثاني www.aquaparadise.it
4-medieval times resturant &show التوقيت يكون في عرضين
العرض الأولي من 7 ليلا
العرض الثاني من 9 ليللا
سعر التذاكر للكبار 25 يورو
للصغار اقل من 1,40 متر 15 يورو
الأطفال تحت المتر مجانا
طبعا قصة المطعم عباره عن يقسمون كل فريق قبل دخول المطعم الي اربعة اقسام وانته تشتري التذاكر
يسون عرض بالخارج وبعدين تصفون كأنه في المدرسه وتدخلون المطعم المهم كل جماعه لون
تنزلون تحت في الطابق السفلي بتشوفون ملك وملكه واقفين يصورون مع الناس
المهم بتشوفون قاعه كبيره والناس قاعدين علي الكراسي جماعات نفس العصور القديمه لين يتقاتلون
بالحصان ولآبسين دروع وعندهم سيوف والناس قاعده بالمدرج هذي نفس الحركه
المهم يبتدأ العرض الحصن والمقاتله وانتوا قاعدين تتعشون علي زمن العصور القديمه طبعا ما في ملآعق
ولا شوك باليد طبعا في شوربه وخبز بس لذيذ وبعدين يصبون لكل ماء او بيبس او !!!
خمر فالحذر بيسالونكم فطلبوا البيبسي المهم وبعدين يجيبون دجاجه كامله وبعدين يجيبون اليسكريم
طبعا يعطونكم ملعقه خشبيه كل هذي مع العرض وفي الأخير بيكون توزيع الصور
مو غالي اعتقد 5 يورو بس وايد حلوه الصور لا تفوتكم
5- المطعم الثاني اسمه ROCK STAR CAFE هذا طبعا الطلبات بالقائمه ووااايد حلو يسون عرض
راقص بالداخل طبعا الستايل امريكي
وقبل لا انسي كل اللي سبق ذكره يقعون علي نفس الخط وكلش فريبين بجانب بعض
6- حديقة الحيوانات (PARCO NATURA VIVA)
التوقيت مفتوح من شهر 3 الي شهر 10 يوميا من الساعه 9 صباحا الي 6 مساءا
سعر التذكره للكبار من سن ال 12 سنه 11 يورو
والصغار من 3 سنوات الي 12 سنه ب9 يورو
طبعا ممنوع اصطحاب الكلاب وممنوع الذهاب في سياره مكشوفه
طبعا اذا عندكم سياره اجار وايد احسن بيكون بس هم عنده باصات توديكم داخل
وطبعا الحديقه وايد حلو مسوينها في الطبيعه تشوفون جميع انواع الحيوانات في الطبيعه
احلي شئ عجبني الزرافه تجي لين السياره والأسد تشوفونه وايد المنظر حلو طبعا كله في الطبيعه
يتمشون حوالين السياره
7- التلفريك : في منطقه اسمها MALCESINE واسم الجبل MONTE BALDO
طبعا هذي يبعد عن منطقة الألعاب 45 دقيقه الي ساعه تقريبا بس كلهم علي نفس الطرق او الخط طبعا تحتاجون سياره اجار لأنكم بتستمتعون بالمناظر اللي بطوفون عليها وصولا الي التلفريك ووااايد حلوه المنطقه بتشوفون الجبال من كل صوب والبحيره والخضره اللي من كل مكان تطلع كانها جنة الله في الأرض .
المهم اول ماتوصلون في مواقف سيارات في الطوابق السفليه من التلفريك طبعا $$$$$$$$
مو غالي هههههههههههههههه
المهم اخذوا معاكم التذكرة مواقف السيارات معاكم علشان لين خلصتوا من الجبل والدواره من فوق تدفعون
مدة الوقوف في الموقف من عند نفس المكان اللي بتاخذون تذاكر التلفريك .
كان سعر التذاكر انا ما ادري كم بس اذا كنتوا عائله 2 كبار و2 صغار خذوا علينا 44 يورو لازم تقولون لها
عائله احسن وارخص
طبعا في تلفريك 2 اول واحد يوديك ربع الجبل بعدين تركبون التلفريك الثاني بس روعه التلفريك كبير وهو نفسه يدور علشان الكل يشوف المنظر من فوق روعه
طبعا لين وصلتو فوق بيكون الجو بارد يعتمد علي حالة الجو ذاك اليوم اذا كانت مثلا 30 درجه فوق بيكون 15 او 10 درجات طبعا الأطفال لازم لابسن شئ عدل خصوصا باليل الجو يتغير
طبعا فوق الجبل في مطعم واحد صغير يقدم الوجبات الغداء والعشاء علي حسب القائمه اللي تتطلبونها
احلي شئ المعكرونه عباره عن 4 اجبان في طبق المعكرونه كواتروا فرماجوا وعندكم الدجاج واحلي شئ
ولازم تجربونه الترماسو ووواااايد حلو اذا رحتي ابيج تيبين لي بالعافيه اذا كليتي تذكريني .
طبعا فوق الجبل المنظر بروحه يحكي عن نفسه بتشوفين الأبقار تمشي هناك والحصن تمشي منظر وايد حلو
وفي الوسط بتشوفين بحيره صغيره طبعا في الشتاء يستخدمون الجبل للتزحلق
وتحتاجون نص يوم فوق الجبل طبعا اخر وقت هو اذا مانسيت هو الساعه 6 مساءا بس لازم تقرون التواقيت تري تنزلون مشي صج موغشمره
8- الشلال : طبعا هذي الشلال ما اعرف اسم المنطقه بس يستاهل الواحد يروح له وايد حلو بس علي نفس خط التلفريك تواصلون بتشوفون علامات حق الشلال واصلوا علي العلامات بتوديكم لين هناك طعا هذي الشلال فيه تذاكر يمكن 5 يورو للشخص تروحون داخل الجبل وتشوفون من وين ينزل الشلال طبعا وايد حلو المنظر وبعدين في حديقة زهور تركبون علي الجبل وتشوفون انواع الزهور
9-طبعا في تاجير قارب تقدرون تروحون تاجير من منطقة DESENZANO
لازم تحتاجون سياره للتنقل في بيسكيرا وايد مهم
تحتاجون خريطه في محل تاجير السياره في خرايط مفصله للأيطاليا
طبعا في مجمع عندهم بعيد عن منطقة الألعاب بس عادي مو نفس مجمعاتنا كشخه
وفي الفندق اللي بتسكنون فيه في كتيبات صغيره عن الأنشطه اللي تقدرون تسونها في بيسكيرا دي لا جاردا
طبعا لاتنسون تتذوقون الماء من البحيره عجيب بارد وحلو سبحان الله
وبعد بتشوفون في الشارع وايد اشجار من الزيتون والفواكه الأخري
البحيره اسمها لاجو دي جاردا LAGO DI GARDA
وطبعا نسيت اقولكم الجبل اللي في التلفريك هي اعلي نقطه من جبال اللألب في ايطاليا .
وتحتاجون من 4 الي 5 ايام في بيسكيرا دي لاجاردا
ارجوا ان اكون وفقت في شرح بيسكيرا دي لا جاردا
وان شاء الله تستانسون في الرحله مع الأطفال
رحله سعيده وموفقه

هلا بك يا اخي

اولا لا اعرف عن الفنادق حيث سكنت هناك في بيت مؤجر لمدة 3 سنوات فليس لدي فكره عن الفنادق سوي

فندق واحد في بيسكيرا دي لاجاردا وهو:
www.hotelgiardinetto

hotel giardinetto
بعطيك التلفون 0309141704
الفاكس0309141228
العنوان viale marconi,39
25015 desenzano delgarda

طبعا هذا الفندق رائع جدا لكنه بعيد نصف ساعه عن منطقة الألعاب

وعندك هذا الفندق 5 نجوم طبعا كل شئ حولينك يعني تستطيع الذهاب حتي مشي علي ألأقدام وبعد تتوافر باصات الحدائق هذا هو العنوان
www.gardalandhotel.it
tel 045 64.04.000
fax 045 64.04.444

الموقع الرسمي للحديقه
www.gardaland.com

المسافه هي بين الحديقتين تقريبا من ثلاث ساعات ونصف الي اربع ساعات

طبعا كل حديقه لها مميزاتها gardaland كبيره جدا وكل ألألعاب للكبار تقريبا

والعروض اللي فيها جدا جميله وووااايد حلوه حتي الأطفال يستانسون عليها لأنها علي مستوي كبير

منها عرض علي الجليد وعرض الفقاعات وغيرها

mirabilandia
حديقه جميله والتذكره تؤهلك للدخول مرتين متتاليتين

الحديقه متوسطه لكن العابها احلي وعروضها لابئس بها علي الصغير
بس انسب للأطفال

وطبعا الحريه لك بما انك سوف تزور بيسكيرا تستطيع الذهاب الي gardaland

وعندما تزور ريمني تستطيع الذهاب الي ravena التي تبعد ساعه او اقل بالقطار الي حديقة mirabilandia.

المناطق السياحيه تستطيع ان تراجع كتابة الأخوه لكل منطقه لأنه يطول الشرح لكل مدينه
روما: منطقه اثريه بحته يعني كل الأشياء بجانب بعضها البعض و اثريه بدأ من الكوليسوم والنوافير والخ.....................وتستطيع زياره الأسواق.

ميلان : اذا كنت تحب التسوق والمتاحف ستجدها في ميلان ليس بها الكثير وانا لا افضلها تستطيع مراجعة التقرير الذي كتبته السيده الأولي في المنتدي هي تتكلم عن ميلان بشكل مفصل .

فنيسيا :رائعه وتستحق المبيت 2 لأن المدينه مائيه ليس بها الكثير فقط مشاهدة الجندول الركوب فيه وتكلف 100 يورو والتسوق والجلوس في ساحة الميدان للتمتع باجواء فينيسيا الرائعه.

ريمني + ريتشوني : مدينه ليليه بها الأنشطه المائيه وفيها حديقه مائيه صغيره وبها حديقه متنقله جميله صغيره بس حلوه طبعا ريمني وريتشوني هو بحر وهواء وشمس فقط

انصحك وبشده اذا معك الأطفال بما انك سوف تزور ريمني فأذهب الي ravena كما قلت لك لزيارة الحديقه

واذا سكنت في ميلان تستطيع الذهاب الي بيسكيرا دي لاجاردا وتروح gardaland

سفره سعيده

-روما الي ريمني 4 ساعات ونصف

2-ريمني + ريتشوني + رافينا كلهم علي نفس الخط يبعد بينهم نصف ساعه فقط

3-برج بيزا بس بيكون وايد بعيد لأن هو جريب من روما بس ما اعرف كم تبعد

4- فينيسيا

5- بيسكيرا دي لاجاردا

6- ميلان

انصح بشده بزيارة مدينة كابري وايد حلوه وهادئه بس اذا عندك وقت ما شاء الله البرنامج حافل

ورحله سعيده موفقه

التوقيع :