نصائح للمسافرين لمصر "لكي تكون سفرتك اجمل"

السلام عليكم لكل عشاق مصر الحبيبه

وحشتيني يا ام الدنيا..و وحشتني ايامك الحلوة..و حشوني ناسك الحلوين..

وحشني النيل و مراكب النيل..وحشني شارع الهرم..و حشتني كثير يا ام الدنيا..

الحقيقه الموضوع هذا فكرت كثير قبل ما اكتبه..و السبب اني لا املك الخبرة الكافيه مثل بعض الاعضاء اللي معانا بالمنتدى..

لكن قررت في النهايه اكتب مجموعه من النصائح.. و في النهايه كل واحد عنده عقل يفكر فيه.. و المثل يقول عقلك في راسك تعرف خلاصك..

الشهر الماضي كنت في مصر وكتبت موضوع عن رحلتي لمصر.. كانت الرحلة الاولى الى مصر.. واكيد لن تكون الاخيرة.. كنت اخطط اقعد اربعه ايام .. ومع الجو والفله و البسطة مددتها الى عشره ايام..

مصر يا ساده بلد جميل.. و اهل البلد طيبين..الاماكن السياحية متوفرة..يرضي جميع الاذواق الشبابيه و العائلية..

اول خطوة عشان تستانس في سفرتك لازم تكون صريح مع نفسك و مع القروب اللي انت بتروح معهم..

و تحدد وش تبي من السفرة..سياحه..سهر..متاحف..تسوق..الخ..

بعدين مرحلة التخطيط للرحلة من الناحية الماليه و التنظيميه و حجز التذاكر باسرع وقت..

بعد ذلك الوصول الى مصر وهذه بعض النصائح

اذا وصلت المطار حاول انك ما تدفع اي بخاشيش لانك في غني عن الشيء هذا و البخشيش مثل السبحه اذا انفرطت.. يعني اذا دفعت لواحد الله يعينك ما راح تخلص من الباقين

فالافضل عدم دفع البخاشيش اطلاقا.. حتى لو تاخرت خمس او عشر دقايق..و تقدر تشيل شنطتك بيدك او تاخذ عربيه..يعني حاول تعتمد على نفسك في الامور هذي..

بعد كذا اذا طلعت من المطار بيجونك سواقيين واجد تلقاهم في المطار.. حاول انك تتجنبهم باحترام وابتسامه.. وخذ تاكسي المطار.. اتفق معاه على سعر واشترط عليه يكون شامل كل شيء.. التاكسي راح يحاول يزيد السعر اذا وصلت و راح يحاول يبيع شريحه جوال و راح يعرض عليك شقق.. اعتذر منه بابتسامه و قوله انك حاجز مرتب امورك و اذا فيه فرصه المره الجايه..

و صلت السكن..مهما يكون لا تدفع ابدا ابد اكثر من اجار ثلاثة ايام حتى لو كنت بتقعد سنه..حتى لو اعجبك السكن..

حاول انك ماترتبط بسواق..لان التكاسي(البيضاء) ما شاء الله متوفره بكثرة.. الا اذا كانت مشاوريك كثيرة..فالافضل استجار سيارة مع السائق..

الصرف خل معاك في جيبك خمسة الاف ريال و اصرف الفين في المطار والباقي في محلات الصرافه داخل البلد..و اذا احتجت تقدر تستخدم بطاقه الصراف..بس في نقطة مهمه ان بعض اجهزة الصراف ما تقدر تستخدمها في مصر و السبب والله اعلم يعود انها ليست مغطاه باتفاقية فيزا الكترون..تجنب الصرف من الصراف او الخروج في اوقات الليل المتاخره..

تجنب عروض سواقيين التكاسي و السماسرة اللي في بتحصلهم في الشارع مهما تكون مغريه..

بالنسبه للسهر..الافضل تجي بدري عشان تختار مكان زين.. و تحضر الحفلة من بدايتها..بس مشكلة السهر يبدأ السعه 12 الليل حتى 7 الصبح.. يعني يبيلك تضبط نومك الله يعينك..
طبعا بتحصل خبلان في اماكن السهر يرشون بالالوف..و بعضهم متعاون مع المرقص.. ما عليك منهم اضحك عليهم و لا تنقط بريال و احد..و الله انك تعيش جو احسن من جو الخبلان اللي ما يقدرون يكملون السهره لاخرها لان ما عاد عنده كاش..و يستحي يجلس بدون ما ينقط.. وكل شوي ينادون يعيش ابو فلان احلى تحيه لابو فلان..و تلقاه ملحط مجمع قرشين و جاء صرفهم في ليله وحدة..
و فر فلوسك.. تقدر تسافر مرتين في السنه او ثلاث مرات في السنه او اكثر اذا انت تجنبت الشيء هذا

في نقطه مهمه نسيت اذكرها اهم شيء في السفر لاي بلد عربي هو السكن..اذا كان سكنك حلو و اموره طيبه..راح تكون تكون سفرتك حلوه و العكس صحيح..

وفي النهايه انت رايح تستانس وتنبسط..عشان كذا لا تخلي شيء في بالك ..اللي تبي تسويه سوه..انتبه ترجع وفي حاجه في بالك ماسويتها..راح تقعد تفكر في الحاجه هذي..لين ترجع تسويها.. طبعا مع احترامك لنفسك و للاخرين..

باختصار مصر ممكن تعيش فيها بريال في اليوم وممكن تعيش بمليون في اليوم

همسه: افكر اروح لمصر ويك اند وارجع من كثر ما انا مشتاق لها