بعض المعلومات المفيده والاقتصادية للمسافر للمغرب

بعد سفري خلال هذه الاجازه وعودتي يوم السبت 6/ 8 / 1428 هـ الموافق 8/ 8/ 2008م استفدت امور وحبيت افيد واستفيد مثل ما افدوني قبل السفر وهي :
1. طريقة الفلوس افضل شي تاخذ معك نقود سعوديه ماله داعي للخساير بالتحويل الى يورواو دولار بالعكس العمله السعوديه صرفها افضل من اليورو.واصرف من البنوك الموجوده في المطار مايحتاج تحول من هنا عملتهم لانها بتكون هنا في مصارف السعودية اقل من هناك .
2. المواصلات داخل المدينه افضل شي التاكسي الصغير يسمونه ( طاكسي ) ودائما خلك بالعداد افضل من القطوعه في النهار اما في الليل القطوعه افضل اتفق معه لانهم يدبلونها .
3. المواصلات بين المدن افضل شي القطار الدرجة الاولى لانه بيكون لك مقعد مضمون وبعدين ممتازه ومكيفه وقطاراتهم افضل من اللي عندنا اما الدرجه الثانية اركب في القطار وغير مضمون الكرسي ممكن تكون واقف في ممر القطار وكراسيه مش ولا بد بس افضل من كراسي قطارنا .الا مدينة أغادير مايصلها القطار الى الان فبأمكانك الذهاب بالباصات المكيفة فهناك محطة باصات متطوره للنقل الى اغادير ورخيصة الشخص تقريبا ب 100 درهم من مراكش ارحم من التاكسي اللي بيوديك ب 1000 الف درهم لاغادير
4. التنقل للمنتزهات والقرى القريبه من المدينة افضل شي تاخذ باص صغير لسببين اولا اقل ثمن وانت كاسره واعرف كم الفرق لانه مايصرف بنزين .
والثاني انه رفيع تشاهد وتفرج وانت راكب وهذا افضل في كل الدول
وارخص تكلفه
5. بالنسبه لكازا حذر منها كذا شخص واول ما نزلنا في الفندق قال لنا واحد لاتروحون في الليل مع هذا الشارع لوحدكم ترى فيه سرق وجانا 3 شباب بعد ماطلعنا من الفندق وقالو لنا تبون حارس شخصي يعني ادر ان الامن مش ولا بد في الليل خاصة في كازا فقط اما المدن الباقة ما احد اشتكى اطلاقا .
6. الاسواق عندهم مثل اللي عندنا مايحتاج تشتري هدايا من عندهم ( شيل وحط واغلى سعر ) اذا وصلت بلدك رح للسوق واشتر اللي تبي ثم رح للبيت .
7. حاول انك تطلب تخفيض دائما في الفنادق
8. يكثر الشحاذين في اماكن التنزه بس ما يلحون عليك حليلين .
9. شرطة المطار ( الدرك ) وما قيل عنهم انهم يبون بخشيش انا ما شفت شي ولا طلب أي واحد منهم شي .
10. السيارات عندهم اجارها غالي والبنزين اغلى واذا كنت بتستاجر السياره يوم او يومين ارفعو عليك السعر مرره
11. الاكل والله اذا كنتو 2 فأكثر افضل شي انكم تطبخون احلى واوفر والبعد عن الدهنيات والسمنه شي جيد . والعزبه سهله واطبخ بالقدر الكاتم وطباخة الكهرباء في أي فندق حتى لو كان 5 نجوم يكون الطبخ عند الشباك مفتوح والباب سكره وضع الفوطه مبلله بالماء تحته لسد الفراغ السفلي من الباب ولا من درى ولا شم ريحة الطبخ ، وبقية الاكل حطها في كيس وانت طالع خذها معك واقرب نفايات ، طبعا اغراض الطبخ جبها معك انا مسوي طريقه حلوه لكل طبخه مسويه في كيس نايلو صغير ما عليك الا ان تشتري من اقرب محل فص بصل و3 فلفل وطماطه ونصف دجاجه مبرد ونظفهن وانزع جلد الدجاجه ونظفها بالماء واطبخ وخذ كبسه على كيفك او مكرونه سبقتي والله شي ماتلقاه عندهم في أي مطعم واقل تكلفه .وخذ معك تمر برحي وعزبة القهوه والشاي
12. خل معك شنطه صغيره هند باق على الكتف في حالة التنقل بالقطار ومعك الفصفص والمكسرات والبسكويت وترمس الشاي اللي مسويه في الفندق وبعض الفواكه والله ماتمل ودك القطار مايوقف ، وطبعا القطار يبعون كبتشينو وشاي اذا تبي ماتشيل ترمس وقيمة الكاس 9 دراهم للشاي او الكبتشينو سعرهم واحد وهو كاس صغير بس غالي كم يعني الشاي ب 5 ريال الكبتشينو معقول الشاي لا .
13. بالنسبة للبارات والسينما والكلام هذا انا مارحت لها اطلاقا وهي منتشره بس اتوقع انها ضرب فلوس وانصح بتجنب مثل هذه الاماكن ومخافة الله في كل مكان ونقل صوره جيده عن بلدك .وتذكر كم شخص اصيب بالايدز في السعودية وكم يزيدون كل سنه حافظ على صحتك وشرفك. العجيب ان بعض الشباب هدهم الله يفتخر عند اصحابه بانه كان مع بنت وهذه صورتها وكلام فاضي طيب استر على نفسك والرسول صلى الله عليه وسلم يقول ( كل امتي معافى الا المجاهرون ) لاتجاهر بالكبائر والمحرمات وتب الى الله ورحمة اله واسع هاما المجاهره شي غريب .
14. بالنسبة للانتر نت متواجد مقاهي للنت في كل مكان وليست كثيره واغلب لوحة المفاتيح ( الكيبورد ) انجليزي ويتعبك لا ومن زينها اماكن حروفها متغيره عن اماكن الحروف الي عندنا فتجد m a @ كلها في امكان مختلفه فحاول تدور على جهاز اولوحة مفاتيح عربي ممكن تجد وحده في المقهى اما البث الواي فاي فقليل ومايكون الا في بعض الفنادق وسعر الساعه للعمل عليه من 8 الى 10 درهم للساعه أي من 5 الى 6 ريال في الساعه ، اما الجوال نت فلا يوجد عندهم شي عندهم تخلف في هذا المجال
15. الاتصالات عندهم غااااليه جدا سعر الدقيقة او جزء منها للسعودية مايقرب ب 12 ريال سعودي احسن شي دق على اللي تبيه واقطع وخله يتصل عليك .او خذ معك شريحتك وجوالك وعممها افضل من سعرهم الخيالي .
16. سعر صرف الريال عندهم ب 1ريال سعودي = 1.91 درهم مغربي .
17. رخصة القيادة السعودية للي بيستاجر سياره تمشي بس عندهم امور تختلف عنا الافضلية لمن بخارج الدوار وليس لمن داخله ، ممنوع تلف يمين والاشاره حمراء ، اذا فيه لوحة قف في الشارع وبعدها مركز تفتيش وقف عندها لين يأذن لك الشرطي تجيه والا غرامه 100 درهم وغرامة قطع الاشرة الحمراء 400 درهم ، وتقيد بالسرعه .
18. التوقيت الزمني يختلف عنا بساعتين أي اذا عندنا في السعودية الساعة 12 ظهرا عندهم الساعة 10 صباحا ، وعصرهم طويل .
19. حافظوا على الصلاة والله يا اخوان اهم شي انك تقوم بأركان الاسلام حتى لوسويت الكبائر والمحرمات احرص على امور دينك وعدم الجهر بذلك .
20. بالنسبة لنظام الجي بي اس للجوالات المدعومه بهذه الخدمة ممتاز جدا حيث تبرمج السكن والمحلات الحلوة ولاتظيع وارسل الاحداثية برسالة من جوالك لخويك اللي معك يجيك في نفس المكان بدون وصف او كثرة كلام .
21. ما احس أن لجهاز الاب توب فايده خاصة في المغرب الا اذا تبي تسكن في فنادق غالية ومدعومه بالدي سي ال .
22 . جميع الفنادق ما يعطيك وصل على المبلغ المسدد لليوم وعندهم ثقه زايده فأفضل شي انك تسدد الاجار بعد مايعجبك الفندق للايام اللي بتسكنها من اول شي او في اخر شي بعد ماتنتهي حتى مايكون فيها خربطه .
23 . افضل شي تكون الشنط مزوده بالكفرات حتى يسهل التنقل بها وكذلك عزبة الطبخ شنطة كبيره حقت الملابس مزوده بالكفرات اسحبها وانت ماشي .
24. اخيرا المغرب مافيها طبيعه اطلاقا مثلها مثل مدن السعودية الا ان مدن السعوديه افضل بكثير بس هناك حركه في السواحل حريه مفتوحه جو براد في المناطق الساحلية وحار ظهرا في غير الساحلية كمراكش وغيرها والشعب طيب وخلوق
ولكم تحياتي