مسلسل رمضان المسافر- اسبيرانزا وابو سلطان في رحلة للمغرب

كل عام وانتم بخير والشهر عليكم مبارك

حبينا في منتدى المسافر نقدم لكم شي جديد ، شي يليق بمنتدى السياحة والرحلات ويليق باعضاءه وزواره.

لذلك تكاتفت الجهود وقررنا نقدم لكم مسلسل رمضاني عن رحلة لدولة المغرب.

طوال رمضان وكل يوم بنقدم لكم حلقة جديدة من مسلسلنا الرمضاني.

وقبل ما نبدى في مسلسلنا الرمضاني لهذه السنة احب اشكر كل من ساهم في تقديم واخراج هذا الموضوع:

الكاتب الكبير : ابو سلطان
الرسام المعروف: عبدالمحسن الطواله
اشهر من يلقى القصايد الصوتية: خاز باز
وعبد الله : اسبيرانزا

اترككم الان مع اول حلقات مسلسل رمضان المسافر:

___________________
___________________

اسبيرانزا وابو سلطان في رحلة للمغرب

الحلقة الاولي

ابو سلطان الصديق الصدوق والعزيز على قلب اسبيرانزا وزميلة في العمل ، سافر للمغرب مع بعض ربعة ولا كان يدري اسبيرانزا عن السفرة.
وبعد عودة ابو سلطان من السفرة بعدة ايام تقابل اسبيرانزا مع ابو سلطان.

اسبيرانزا: يا هلا والله ومرحبا ببو سلطان ، وينك يا عم و وين ايامك ، لي مدة ما شفتك ، هو انت كنت في اجازة وانا مدري.
ابو سلطان: هلا والله باسبيرانزا ، هو انا ما قلت لك اني مسافر للمغرب.
اسبيرانزا: المغرب!! ، انت مسافر للمغرب يا ابو سلطان وانا اخر من يعلم ،، ما هقيتها منك والله يا ابو سلطان ، هذي والله بحق.
ابوسلطان: ابشر بالحق والله يا اسبيرانزا ، لو تبي اذبح لك مديري واحطة لك على تبسي ما يغلي عليك.
اسبيرانزا: تذبح لي مديرك يا ابو سلطان ، ليه هذا الحق اللي يليق في صديقك وزميلك العزيز ،، بعدين مديرك اكيد طعم لحمة مر.
ابو سلطان: اجل أمر وتدلل واطلب الحق اللي تبية.
اسبيرانزا: الحق لاحقين علية ، بس اللي ابي اعرفة يا ابوسلطان انت وش موديك للمغرب انا ما خبرتك راعي علوم المغرب.
ابو سلطان: لية يا اسبيرانزا تضن فيني ضن مهوب زين ، انا رحت للمغرب وتمشيت فيها واستكشفتها ولا كان لي في العلوم النصف كم اللي فيها.
اسبيرانزا: ايه طيب يا ابو سلطان ، هالكلام قلة لم سلطان مو لي انا ، انا عطني العلم الحقيقي.

وبدى ابو سلطان يسولف على اسبيرانزا عن الاماكن اللي راح لها في المغرب و عن الاشيا اللي شافها.
سواليف ابو سلطان مع اسبيرانزا استمرت ساعات طويلة و اسبيرانزا مغير مطير عيونة و سعابيلة تقاطر من التفاصيل اللي كان يقولها له ابو سلطان.
اخيرا وبعد ما يقارب 4 ساعات من السواليف.

اسبيرانزا: ابو سلطان ، انا عرفت الحق اللي انا ابية منك.
ابو سلطان: امر وتدلل يا اسبيرانزا ، الي تامر فيه انا حاظر.
اسبيرانزا: تسلم لي يا ابو سلطان ، انا حقي انك تسفرني للمغرب.
ابو سلطان: بس يا اسبيرانزا ، ما طلبت غالي والله ان شاءالله السنة الجائية اسافر انا وياك للمغرب.
اسبيرانزا: وش السنة الجاية الله يهداك ، انا ابي اسافر للمغرب الحين.
ابو سلطان: تسافر للمغرب الحين!! ليه عسى ما شر شايفني فاضي ولا عندي شي اسوية غير اني اسفرك و اترك عيالي و عملي.
اسبيرانزا: ليه يا ابو سلطان كذا ، ليه تجرح مشاعري
ابو سلطان: بس بس يا اسبيرانزا لا تصيح ونت رجال هذا كبره
اسبيرانزا: :
ابو سلطان: اقول خلاص يكفي صياح ، ترى الناس اللي حولنا في المكتب بدو يطيرون عيونهم فينا.
اسبيرانزا:
ابو سلطان: خلاص يا اسبيرانزا تراك فضحتنا ، خلاص اسافر انا وياك للمغرب متى ما انت بغيت.

مسح اسبيرانزا دموعه وخم ابو سلطان ذيك الخمة اللي بغى يكسر بها ضلوعه.

اتفق ابو سلطان مع اسبيرانزا انه يتم التجهيز للسفر للمغرب على اول طيارة ، وبدا ابو سلطان في التجهيز والتحضير للسفرة.

وفي اليوم التالي (يوم الاحد) تقابل اسبيرانزا مع ابو سلطان في العمل.

اسبيرانزا: بشر يا ابو سلطان وش صار على التجهيز للسفر.
ابو سلطان: ابشرك حجزت لنا كرسيين على رحلة يوم الاثنين القادم.
اسبيرانزا: الله يبشرك بالجنة يا ابو سلطان ،، ايه كذا استانست.
ابو سلطان: رحلتنى بتكون من الرياض لجدة على الخطوط السعودية ، وبعدها من جدة على الدار البيضاء ومن الدار البيضاء على مراكش.
اسبيرانزا: انا فهمت الرياض و جدة و مراكش ، بس وش دخل الدار البيضاء في الموضوع.
ابو سلطان: الدار البيضاء يا اسبيرانزا ،، الدار البيضاء عاصمة المغرب.
اسبيرانزا: ايه انا فهمت الحين ، انت تقصد كازا ، انا راح بالي على دار بيضاء ثانية.
ابو سلطان: طيب دامك فهمت الحين خط الرحلة ، انت عندك ملابس مناسبة للسفر
اسبيرانزا: افا يا ابو سلطان ، انا راعي السفر واللي مقطع العالم تقطيع ما تكون عندي ملابس ،، لا اكيد عندي ملابس ، بس ما ينقصني الا قطعة ملابس وحده ابشتريها اليوم او بكرة.

مع نهاية دوام يوم الاحد توجه اسبيرانزا عايد لبيته وهو كله فرحة بسفترته المقبلة للمغرب ، صحيح ان اسبيرانزا سافر للكثير من دول العالم سوا في غربها او شرقها ، لكن المغرب كانت وجهه جديده بالنسبة له وكان متحمس لها وللمغامرة اللي بيخوضها في ربوع المغرب ، لكن وقبل وصول اسبيرانزا لبيته تذكر امر مهم ، تذكر ان زوجته سوف يكون من الصعب علية اقناعها بسفرته بدونها فكيف اذا قال لها انه مسافر بدونها وللمغرب.

بدت الفرحة والانبساط اللي كان عايش فيها اسبيرانزا تتلاشى وبدى يهوجس.

ونترككم الان مع هواجيس اسبيرانزا:

والله فاتت على السالفة ذي ، تحمست للسفرة ونسيت المعزبة ، الحين وش ابقول لها ، وشلون ابقنعها بسفرى للمغرب لا ومع ابو سلطان.
يا ربي وش الحل ، اقول لها اني طالع للبر ، لا ما هقيت ينفع بتكفشني على طول لانها عارفة اني ماني راعي بران ، طيب اقول لها اني طالع انتداب للعمل؟؟ ، ايضاً ما ينفع لانها بتتصل على كل شوي وتشيك على واذا اتصلت على جوالي وطلعت رنة دولية عرفت اني مسافر برى السعودية ، طيب ممكن اقول لها اني طالع انتداب برى السعودية؟؟ لا ايضاً ما ينفع لانها اكيد تبي تقول انها بتروح معي.

طيب وش الحل يا ربي؟؟؟ ، وش الحل ، وش الحل.

طيب ليه ما ادخل البيت وازعق عليها واقول لها “قومي يا مره جهزي شناطي لاني مسافر مع ابو سلطان للمغرب” ولا يحتاج اعطيها أي عذر ، انا رجل البيت ويحق لي اسوي اللي انا ابية!!!

لا لا لا ما ينفع والله ان ما اشم الهواء ثاني يوم ولا عاد يلقوني اهلى الا مقطع في اكياس.

ما فيه الا اني اقول لها الحقيقة واشوف وش يصير.

و وصل اسبيرانزا للبيت وبعد تناوله للغداء جلس مع زوجته في المجلس يتفرجون على التلفزيون.

اسبيرانزا: حبيبتي وبعد قلبي ام ياسر تعالي اجلسي جنبي خليني اكحل عيوني زين باجمل زوجة في العالم.
المعزبة: هاه!!! ، وش السالفة يا اسبيرانزا ، وش الكلام الحلو هذا ، بعدين وش سالفة تعالي اجلسي جنبي ، مهوب انت اللي تقول لي دايم خليكي جالسة على الكنب الثاني عشان تتربع وتاخذ راحتك على الكنب.
اسبيرانزا: لا يا ام ياسر شكلك ما بعد عرفتيني زين ، انا تراني ما استغني عنك ، واحب ما لقلبي هو انك تجلسين دايم جنبي.
المعزبة: طيب هذا انا جاية اجلس جنبك.
اسبيرانزا: يا هلا والله ويا مرحبا بحبيبتي وبروحي وبحياتي كلها ، تو ما طلع القمر في عز الظهر.

وجلس اسبيرانزا مع زوجته على كنب واحد لاول مره من سنين واخذ اسبيرانزا يتغزل في زوجته بكل ما يعرف وما لا يعرفة من كلام الغزل.
وحتى واصل اسبيرانزا تغزلة بزوجته ببعض قصايد الغزل اللتي يعرفها:

حبيبتي بعينها قلابة تجر قلبي جرة الربابـة
تميس رقـة بكل صحـــف قمراء تملي رغبة الغلابة

لقد ملأ الهوى قلبي هواء ونسم خاطري مسمار طرفك
تدوربي الهواجس دون جنط على عجل أفتش حول حزمـك
تحيرني عفاريت الليالي وألقى الحل في تبديل بلفك

خراشة أنت يا حلم السويعات دقيقة اللفظ تشفين الجراحات
إن كنت في السيريا عمري وصنقله فلتضبطي الوقت كم يغدو وكم يــات
تأملي الدرب إما عدت ثانية فللعقارب صولات وجولات

حمضت صورتك التي أحببتها ورأيت وجهك مشرقا بفلاش
لما رأيت رؤوسها محروقة فورا نقلت لغرفة الإنعاش

وبعد ان انتهاء اسبيرانزا من التغزل بزوجته و بعد ان ادخلها في جو شاعري خاثر ، بدى في تجميع شجاعته لكي يفاتحها بموضوع سفرته للمغرب مع ابو سلطان.

الي اللقاء في الحلقة القادمة