تقرير رحلتي للمغرب شهر 9/2011

عدد اعضاء الرحله 3 اشخاص قررنا ان تحط رحالنا في مراكش مدة 8 ايام واغادير مده 6 ايام

اخترنا نسكن في مراكش في فلل القاردن سيتي بعد المشاورات والبحث في المنتديات وسؤال اكثر من عضو ويقول المثل من سئل ماضاع

وتم حجز الفيلا قبل الرحله باسبوع واخذنا الاوكي ان الفيلا راح تكون جاهزه في التاريخ المحدد للوصول

وقمنا بالحجز في اغادير 4 ايام في فندق اماديل ويومين في شقق المارينا عن طريق المؤيد وسمعنا قبل رحلتنا باسبوعين ان صحارى

جاهز للسكن وقمنا بتغير حجز المارينا لصحارى بعد ماسمعنا ان في المارينا مشاكل ولخبطه.

نبدا الاكشن مع الاسف الرحله غير مصوره

تم ختم الجوازات واستلام الشنط واخذ 3 شرايح من شركة انوي >> للاسف ارسالها زفت المهم الحين نبي سياره بالسواق لفينا على كم مكتب قال ب 750 درهم والله ونلقى لنا واحد اجودي وش بحليله قال تبون

سياره قلنا اي بالله نبي

قال عندي سوناتا 2010 قلنا كم قال 700 قلنا غير هالكلام قال 550 وترا السياره ديزل ماراح تصرف وتتعبكم قلنا عليها تامين قال ايه قلنا اجل تم قال وين بتروحون قلنا لمراكش قال السواق اكله وشربه عليكم قلنا

مهوب مشكله الخير واجد قال وسكنه عليكم

والله ونرد عليه كلنا الثلاثه بصوت واحد عسى ماشر ماتبي بعد نصيد له قال خلاص خلاص ينام في السياره قلنا له اهم شي يدل ويعرف يسوق قال مايحتاج الرجال حافظ مراكش شارع شارع زنقه زنقه قلنا بس بس

دامها زنقه زنقه

توكلنا على الله قال يالله مشينا لمكتبنا في كازا نسجل العقد قال كم تبون السياره قلنا 8 ايام والله ونطلع من المطار رايحين لكازا وحنا بالطريق الرجال يطلع لنا بطاقه مكتوب عليها الحرس الملكي السعودي ومكتوب

اسمه فيها وصورته

قال انا كنت اشتغل في قصر الملك فهد في جنيف وعندي قصر في سويسرا وعندي شركه سيارات في المغرب فيها اكثر من 50 سياره قلنا ماشاء الله تبارك الله قلنا طيب ليه جاي في تالي هالليل في المطار ماعندك موظفين قال احب

اشرف على شغلي بنفسي واتفاهم مع السواقين حتى مايتلاعبون بالاسعار ومنها ازور صديقي مدير المطار قلنا والله انك منتب سهل اجل اذا احتجنا شي من المطار بنكلمك قال الي تبونه كلموني ومايكون الا خاطركم طيب

والله ووصلنا لمكتبهم في كازا ووقعنا العقد ودفعنا حق 4 ايام قلنا الباقي بعد 4 ايام قال مافيه ثقه قلنا افا عليك لا بس مابعد صرفنا دراهم >> الا مافي ثقه

وركبنا الشنط وسئل السواق قال تعرف تسوق السوناتا قال افا عليك لي 7 سنوات اسوق عيب عليك تسئلني هالسؤال والله ونركب ونجي عند الاشاره وتطفى السياره قلنا افا يابو سبع سنوات قلنا يمكن متغيره عليه السياره:7191:

والله وطلع الرجال غشيم طول الطريق كلنا الثلاثه انتبه فيه لفه قدامك فيه دوار هدي اوجعتنا روسنا من سواقته لو حنا دارين انه بتجي كذا كان استاجرنا سياره بدون سواق والله ويضيع فينا الطريق والاخت

مريم الي استاجرنا الفيلا عن طريقها

في فلل القاردن سيتي كل شوي تتصل علينا تاخرتو عسى ماشر ووينكم قلنا باقي نصف ساعه قالت اذا ماتبون الفيلا ترا عادي لاتحرجون انفسكم قلنا لاوالله حنا بالطريق بس خوينا غشيم ومايدل المهم ماوصلنا

مراكش

الا الساعه 2 ونص

ودخلنا للفيلا واعطينا مريم الجوازات قالت ياهلا بيكم ارتاحو وبكره تمرون علي في مكتب الشركه في شارع قيلز عشان نسجل العقد قلنا خير ان شاء الله ويطمر واحد من العيال قال ياعيال انا مافيني نوم بروح اسهر

من بيروح معي

قلت : انا بنام

قال لخوينا الثالث هاه تخاويني قال ابدن مالك لواا انا بنام مامني وحده طافي قال والله ياعيال انا مانيب رايح مع هالسواق لحالي غشيم ومايدل برسله يجيب لي تاكسي ويناديه يامحمد رح جيب لي تاكسي انا بروح

اسهر قال انا اوديك قال لا

ارتاح انت

العيال يبون يروحون مشوار بكرةالصباح بدري قال اوكي بروح اجيب لك طاكسي ودخلت غرفتي وحطيت راسي وصحيت من بكره الساعه 10 الصبح على صياح خوينا يتهاوش مع السواق:2: قمت وغسلت ونزلت قلت شفيك

قال ابن …….

امس ارسلته يجيب تاكسي وسحب علي انتظرته ساعه وساعتين وماجاني اتصل عليه مايرد علي

شوي الاالجرس يرن ونفتح الباب والى هو (خليل) الي استاجرنا منه السياره قلنا جابك الله ترا سواقكم غشيم ومايدل بهذلنا امس مايعربف يسوق ومايدل وش هالكلام وامس

ارسلناه يجيب طاكسي

وسحب علينا قال انا دريت منه وجاي من كازا بعد ماكلمني وقالي وجاي عشانكم بنغيره لكم و سيارتكم في المغسله والشوفير الجديد بيجيكم بعد نص ساعه بس ترا امس يوم سجلنا العقد مااخذنا فوتو كوبي للجواز >> صوره للجواز قال عطوني

الجواز اصوره قلنا مع مريم قال

اتصلو عليها والله ونتصل عليها يامريم نبي جواز واحد بس عشان نصوره لصاحب السياره قالت تعالو لشارع قيلز والله ونركب معه على سيارته اوووون لشارع قيلز وناخذ الجواز قال بنزل اصوره واجيكم انتظرو في

السياره والله ونشوف الرجال واقف ماراح يصور وقاعد يكلم بالجوال

قلنا خلصنا من اليوم ننتظرك

قفلت معنا قلنا خلص علينا ترا لنا ساعتين واحنا ترامااكلنا شي من امس ولا نمنا زين قال شوي ويجي قلنا طيب صور الجواز انت قال لحظه المهم ويتهاوش معه

خوينا قلت لخويي وش رايك ناخذ جوازنا ونخليه يقلب وجهه ماعاد نبي السياره

قلت له ماعاد نبي السياره هات الجواز وضف وجهك

قال لحظه بس

قلت لخوي انت رح للحلاق تضبط نستفيد من الوقت شوي ونشوف وش تاليتها معه

قالي انت شكلك طيب ومحترم وتتفهم اركب نروح نجيب السياره وندور لكم شوفير لان هذاك بيتاخر وانتم

مستعجلين قلت يالله واركب معه ونروح

لمنطقه اسمها ولاية سيدي علي وندخل في هالحواري ونجي عند سيارات خربانه ومصدمه قال سيارتكم امس طلع الشوفير وصدم فيها والعقد باسمكم وهذي السياره قدامك مصدومه والله واشوفها والا هي والله

رايحه فيها

قلت المطلوب قال كم تدفع قلت اهااا طيب شرايك نروح للشباب في شارع قيلز ونجلس في كفي ونتفاهم قال اوكي ونروح للعيال والا هم مخلصين من الحلاق نعيما ياعيال السالفه كذا كذا كذا الرجال يقول كم

تدفعون

وقالو وش رايك قلت نروح للشرطه ماعندنا غير هالكلام اذا له شي بياخذه والله ونروح لقسم المرور قال الفجر فيه واحد صدم واوراقه عندكم قالو راعي السوناتا قال ايه قالو وش فيه قلنا هذا ابلشنا ماخذ الجواز مننا يقول ادفعو قيمه اصلاح السياره

العقد باسمكم ومدري ايش قال القانون مايطالبهم بشي هم استاجرو السياره بالشوفير الي يتحملها الشوفير وعطهم جوازهم قال لي تعال بالله عطني اي شي مساعده قلت خذ الف درهم ويعطيني الجواز ونطلع من القسم قال بالله

صورو الجواز لي

انا مااخذت صوره قال خويي لا منيب معطيك قلت بالله عطه صوره قال والله مايشدها اوريك فيه من اليوم يمرمطنا ويسحبنا وراه تقول غنم قلت عطه خله يبلها ويشرب مويتها انت سمعت حق المرور يقول ماعليهم شي ونروح لمحل تصوير والله ويجي يسحب الجواز من يدخويي ونفتن عليها ثلاثتنا

ويفرقونا المغاربه :67a2654d42:قلنا جب الجواز قال تجيبون السفير القنصل الجواز والله ماتاخذونه قلنا لاحول ولاقوه الا بالله وش يبي هذا وكنت مشغل البلاك بيري ويسولف معي واحد من الشباب قلت بالله عطني رقم السفاره

ويرسل الرقم واتصلت عليهم السلام عليكم قلت ياطويل العمر احنا في مراكش وسالفتنا كذا كذا كذا قال اخذ الجواز منكم عنوه قلت اي بالله قال دقايق واتصل عليك خلكم عند قسم الشرطه ولاتتكلمون معه شوي ويتصل

علي قال خذ هالرقم دق عليه اسمه سعد القحطاني ابوعبدالله مسؤل شؤن الرعاياواخذت الرقم واتصل عليه قال هلا ومرحبا وجيت بقوله السالفه قال عندي خبر ابيك تدخل لقسم الشرطه تسوي عليه شكايه وتكلمني وتقولي وش

صار معك

ودخلنا قسم الشرطه قلنا فيه واحد ماخذ مننا الجواز بالقوه قال تعرفونه قلنا ايه هذا رقمه كلمه قال تعال الحين قبل نجيك نسحبك على وجهك يا …… قال انا جاي ومعاي محامي الشركه وشوي يدخلنا علينا قال

عطهم جوازهم

وناخذ الجواز ويكتبون انه مايطالبنا بشي وانه اخذنا الجواز منه بعد ماخذه مننا بالقوه شوي ويدق جوالي الا هو سعد القحطاني مسؤل شؤن الرعايا في السفاره قال وش صار قلت الحين احنا نسوي شكايه واخذنا الجواز قال

عطني العسكري وكلمه

قال العسكري تقدرون تروحون وطلعنا من قسم الشرطه بعد صلاه العشاء ويدق جوالي السفاره قال وش صار معكم قلنا خلصنا قال حلو انبسطو ولا عليكم من احد تبون منه فلوس قلنا مااااانبي شي نبي نروح ناكل

لنا يومين مااكلنا شي والله دخيلك جتى المويه ماشربناها كائننا صايمين

وكلمة حق كان تعامل السفاره معنا واتصالتهم مشكورين عليها والاخ سعد القحطاني ابو عبدالله بيض الله وجهه يتصل فينا كل يوم يتطمن علينا وياخذ علومنا طلع صديقنا مع العلم ماورانا لاواسطه ولاشي ولا حنا

عيال تجار على قد حالنا

يعني الرجال قال عيال ديرتي بتطمن عليهم لاااقل ولا اكثر المهم رحنا لمرجان نشتري اغراضنا :110103_supa_market_والعلوم الزينه ونتعشى في ماك داخل مرجان كل واحد ياخذ له 3 همبرغر هههههههه من الجوع :1128:عسى الله مايغيرها من

نعمه

وجينا نطلع من مرجان ونلقى هذاك الطير :12:الي فاجانا بكلمه تصلخت وجيهنا تقول احد صافقنا كف

نكمل بعدين وش قال الطير لنا وايش صار لنا في الياسمين وليش انطردنا من الياسمين واكلنا علقه من البودي قاردات:boxe: