الأمل بكم كبير

بسم الله الرحمن الرحيم .. السلام عليكم ورحمة الله

في البدايه يشرفني ويسعدني أن يتم قبولي في هذا المنتدى الرائع واللي بصراحه أعتبره المرشد السياحي الأول لهواة السفر .. وأحب أشكر جميع اللإخوة والأخوات المشاركين على المعلومات القيمه والاسلوب الأكثر من رائع في طرح المواضيع …

وأنا ياإخوان محتاج مساعدتكم في مسألة السفر الى فرنسا .. لأن هذي تعتبر أول سفرة لي بعد الزواج ان شاءالله .. وهي راح تكون مع المدام .. يمكن شفت أكثر من مشاركة عن نفس الموضوع بس حبيت أسأل مرة ثانيه لأني بصراحه شوي دقيق وحرص وبنفس الوقت عشان أتجنب ترك بعض المعلومات اللي يحتاجونها الأخوة اللي بيعرضون مساعدتهم لي .

1- السفرة ان شاءالله راح تكون في الفترة مابين 15/5/2008 الى 30/5/2008 طبعا” أنا وزوجتي فقط .
2-الفترة اللي راح نقضيها هناك اسبوعين بالضبط ان شاءالله تعالى . والفترة كلها في باريس فقط .

والأسئله اللي أتمنى من أهل الخبرة أن يساعدوني في الاجابه عنها :
1- أفضل الفنادق ( من فئة 4 نجوم ) والقريبه من الشانزليزيه ومتوسط السعر بشهر 5 ومستوى الأمان فيها.
2- متوسط صرف الوجبات ( فطور . غدا . عشا ) اذا كانت في مطعم . ( حتى لو بشكل تقريبي )
3- أفضل طريقة مواصلات ( من حيث السعر ومن حيث الخصوصيه والأمان ) وكم متوسط السعر .
4- كم الميزانية المتوقعة لزيارة الأماكن الترفيهيه والسياحيه .( مثلا” رسوم الدخول وغيرها حتى لو بشكل تقريبي )
5- كيف الجو في شهر 5 في فرنسا ؟
6-هل يفضل التعامل مع أحد من الأخوة العرب هناك ( كمرشد سياحي ) ؟ وكم في الغالب تكون يومية المرشد .
7- اذا فيه أحد من الشباب اللي سافرو هناك شهر العسل يتكرم بإقتراح برنامج معين أو حتى البرنامج اللي كانوا ماشين عليه في سفرتهم للإستفادة . مع وضع الأسعار حتى أسوي مقارنة مع
الميزانيه . ( أنا أعرف ان الصرف يختلف من شخص لآخر بس أتمنى تلبية طلبي )
8- هل ميزانية ( من 2500 الى 3000 ) دينار كويتي ( 28000 ريال تقريبا” ) كافيه للسفرة .. طبعا” من غير التذاكر وميزانية التسوق هناك .

( يمكن بعض الأخوة يستغرب من دقتي شوي بس تعرفون الواحد يحب يسافر وهو مرتاح البال خاصة في ظل وجود الأهل معه )

في الختام أرجو العذر منكم على الإطاله وخالص الشكر للجميع .