اماكن الشيشة في البحرين ( تجربتي )

أهلا بمحبي الشيشة في مقاهي الشيشة في البحرين، مقاهي على البحر لأروع منظر وأطيب شيشة في مقهى لاميزون دو كافيه، وللبحث معنا عن محلات المعسل في البحرين في كافيه روج، اليوم جايب لكم تجربتي مع اشهر الأماكن اللي تقدم الشيشة( المعسل في البحرين ).

المقاهي الموجودة في جزيرة أمواج

كافيه فينيس
بالنسبة لي افضل شيشة موجودة في مقاهي لاقون، اللي هو مجمع المقاهي اللي بأموالج المكان، يتميز بالاضاءة الحمراء الهادية.

حزاوي الأول
ثاني افضل شيشة بالنسبة لي في امواج.

كافيه صدف
في الأصل كان هذا الكافيه قهوة شعبية في المحرق، مقابل المطار ويتميز المكان بأسعار المقاهي الشعبية، سواء بالنسبة للشيشة أو المأكولات.

كافيه جيز
فرع أمواج هو واحد من 3 فروع لهذا الكافيه المشهور في البحرين، يبقى فرع في سترة( شخصيا ما احبه )، والفرع الثاني في العدلية( الفرع المفضل بالنسبة لي.

كافيه بريمافيرا
هذا الكافيه المتخصص في الأكل الهندي تتوافر فيه الشيشة، بس للأسف مو بنفس جودة الكافيهات السابقة، بس يتميز هذا الكافيه أن الاغاني اللي فيه صاخبة وجديدة ومتعوب عليها، وبعض الليالي يكون فيه مغني سابقا، وفي ليالي الويكند عادة الواحد يحتاج يحجز طاولة.

كافيه أنغام بيروت
جنب كافيه بريمافيرا، يتميز بالأكل اللبناني والاجواء الهادية ويقدم شيشة عادية.

كافيه حدوتة مصرية
الشيشة في هذا الكافيه جيدة الى حد ما، والاجواء هادية جدا.

كافيه على بابا
هذا الكافيه جديد، وعلى حسب كلام الاصدقاء الشيشة عادية والأسعار مبالغ فيها.

كافيه ام كلثوم
الشيشة عادية والاجواء جدا هادية.

هذي اشهر الكافيهات في جزيرة أمواج، بالنسبة الى جزيرة الريف، جربت الكافيه اللي فيها مرة وحدة بس ومستحيل اكررها، الشيشة سيئة والاسعار مبالغ فيها، بس للأمانة منظر الكافيه المطل على البحر كان حلو.

كافيهآت منطقة العدلية

كافيه البنديرة
طبعا هذا يمكن من اشهر الكافيهات اللي في البحرين، وله 3 فروع فرع العدلية( وهو الفرع المفضل بالنسبة لي ) وفرع سند، وفرع مجمع العالي بجوار مجمع السيف، الشيشة جيدة في كافيه البنديرة، والاجواء لطيفة واحب في المكان دزاينه الشعبي.

كافيه لاميزون
وهو من أحد افضل الكافيهات اللي فيها شيشة، وهذا واحد فرع واحد من أصل 3 فروع، واحد في العدلية وهذا الفرع المفضل بالنسبة لي، والثاني في الزنج( ما يعجبني )، والثالث في منطقة السيف، وفرع السيف تكون فيه حفلات و بوفيه ب 20 دينار في الليل مع وجود مغنيين. كافيه جميل دزاينه مصري فرعوني، بس أسعاره اعلى من الباقي شوي.

كافيه روج
هذا الكافيه من اجدد الكافيهات في منطقة العدلية، شيشته حلوة، الاجواء فيه حيوية خصوصا في ليالي الويكند، الاغاني عندهم بعد حلوة. من الأماكن المفضلة بالنسبة لي.

كافيه دون فيتو
الشيشة في هذا الكافيه عادية، والاضاءة خفيفة، ما اعرف شنو السر أن هذا المكان يجذب الأجانب.

كافيه أريزونا
الشيشة في هذا الكافيه على المزاج، مرة حلوة و مرة لا، بس الناس تروح له عشان الكباين والخصوصية عادة.

طبعا في كافيهات كثيرة في العدلية بس انا شخصيا افضل اللي ذكرتهم، وما راح اذكر الباقي عشان لا يكون الموضوع مجرد ذكر اسماء الأماكن. لو كان في احد يحب المقاهي الشعبية، ف انا ارجح له قهوة حزاوي الأول في المنامة، وهي تفتح 24 ساعة، طبعا المكان شعبي ما يناسب لو حد صاحب برستيج وكذا، ولو في حد يحب جو الروقان على البحر ارجح له: بوشيدو في منطقة السيف، الشيشة عندهم جيدة، بس طبعا المكان سعره اعلى من الأماكن الباقية عشان وجود العصاير وهالامور. وثاني مكان على البحر بس هذا بعيد شوي عن باقي الأماكن اسمه تاباس في سوفتيل الزلاق، وطبعا هذا بعد أسعاره اغلى من الباقي وكل ليلة فيه حفلة لاتينية من بعد الساعة 10.

لو احد يحب يشيش في الجفير طبعا قريب من أماكن السهر وكذا، في قهوة فوق باسكن روبنز في شارع المطاعم، الشيشة فيها جيدة بس ناسي اسمها، وفي كافيه جديد جنب برادات الجزيرة اسمه سكون الشيشة فيه ممتازه واجواءه كلاسيكية.