تقرير عن رحلتي لـ الكويت / السالمية " صور "

سلام عليكم و رحمة الله و بركاته

اسعد الله مسآكم / صباحكم بكل خير جميعاً …

اقدم لكم تقريري المفصل عن رحلتي للكويت

في تاريخ 1437/01/30 / محرم / يوم الخميس

رحلة الدمام

مسكنا خط من الأحساء الى الدمام بدايةً على الساعه 10 بالليل

وصلنا الدمام الساعه 12 بالليل لتناول وجبة العشاء في مطعم البحار

و من ثم توجهنا الى كورنيش الدمام و كان مزدحم وقتها و الأجواء بارده

و ضلينا في الكورنيش من الساعه 1.30 الى الساعه 3.00 الفجر

و طفينا السيارة و فتحنا النوافذ و خذينا غفوة على هذه الأجواء الباردة

ماجات الساعه 4.30 الفجر الا ماسكين الخط متوجهين للخفجي

وصلنا الخفجي على الساعه 9,00 الصباح

عدينا الجمارك السعودية و الكويتيه

و طبعاً التأمين إجباري و اقل مدة اسبوع كامل بـ 90 ريال سعودي

وصلنا لسالمية على الساعه 10,00 الصباح تقريباً كان بتاريخ 1437/02/01 / صفر / يوم الجمعة

فندق بودل

كنا قاصدين التوجهه لفندق بودل و كان السكن فل و قالو لنا تعالو على الساعه 3 العصر و راح تلقاها جاهزه

حجزنا غرفة صغيرة فيها سريرين + دورة مياه

لمدة يومين كان السعر مع الخصم 54 دينار كويتي = 660 ريال سعودي

الفندق اقدر اعطيه 3 نجوم و انصح اي سعودي يسكن فيه

مطعم فريج صويلح

رحنا تغدينا في هذا المطعم الي سبب ضجة اعلامية كبيرة

كان المطعم مزدحم من السعوديين و الأمراتيين و المقاعد بالحجز

المطعم متواضع جداً على هذه الزحمه

طلبنا :

– صحن مجبوس دياي

– صحن اموش ربيان

– صحن مشويات

– حلا

– شوربة عدس

– شوربة فطر

الحساب كان 17 دينار كويتي = 210 ريال سعودي

لا انصح بطلب مشويات من هذا المطعم لأنه طعمها سيء

هذا المطعم متخصص في ضرب المجابيس و دق بالخمس

سوق المباركية

جات الساعه 9.00 بالليل متوجهين لسوق المباركية

سوق شعبي متواضع و كانت فيه الأجواء جميله و مزدحم و مزدهر

و انصح اي شخص ناوي يروح الكويت يتردد لسوق المباركية

فيه من محلات الأقشمة و الخياطة.. و صرافات التحويل العملات… و محلات الخضار … و الأجار ” المخلل “… و المطاعم البحرية

اخذنا من سوق المباركية اقمشة شتوية لأن الشتاء دخل علينا فجئاه

قماش شتوي 3 امتار = 6 دنانير الى 8 دنانير كويتي = من 70 ريال سعودي الى 100 ريال سعودي هذه اسعار الأقمشة الشتوية

مطعم الشمم / سوق المباركية

بعدها رحنا تعشينا في مطعم الشمم مطعم بحري مشهور بالكويت

و كان عشا موفق و لذيذ و يوم الأحد تغدينا منه قبل لا نمشي السعودية

طلبات العشاء :

– صحنين عيش مشخول

– ماعون ميد ( 10 حبات )

– زبيدية مشويه

– صحن ربيان مشوي

– قوري جاي

طلع علينا الحساب 18 دينار كويتي = 220 ريال سعودي تقريباً

طلبات الغداء :

– صحن مطبق هامور مع مرق

– صحن مطبق زبيدي مع مرق

– هامور مشوي

طلع علينا الحساب 21 دينار كويتي = 260 ريال سعودي تقريباً

شارع الخليج / الواجهة البحرية

شارع الخليج شارع مزدهر

كانت زياراتي له خلال هاليومين في منتصف آلليل و آخر آلليل تقريباً

من مطاعم… شرنمبي … مطعم عبدالوهاب اللبناني .. مطعم ميس الغانم… ابراج الكويت … مقاهي و قهاوي… مجمع المارينا

و هذه هي اغلب الأماكن الي رحتها في شارع الخليج

ابراج الكويت

قهوة لابيلا بشارع الخليج

هي قهوة و مطعم بالنفس الوقت

انصح اي واحد راعي مزاج و معسل يروح لها

الأكل رخيص و لذيذ عندهم

طلبنا :

– صحن مشويات

– 2 همبرجر لحم بالجبن

– مهلبية

– 2 عصير افوكادو

– 1 معسل تفاحتين

الحساب طلع علينا بـــ 11 دينار كويتي = 135 سعودي

مطعم عبدالوهاب اللبناني / ميس الغانم

في اليوم الثاني يصادف تاريخ 1437/02/02 / شهر صفر / يوم السبت

توجهنا قاصدين لتناول وجبة الغداء مطعم ميس الغانم و لقيناه مزدحم و الحجز بالمقاعد

و قال لنا الكاشير انتظر ربع ساعه

شفنا الوضع مكركب و مزدحم طلعنا من المطعم متجهين لمطعم آخر

و حنا نتمشى في شارع الخليج … شفنا مطعم عبدالوهاب اللبناني

دخلناه و طلبنا :

– شوربة خضار ( صالونه )
– شوربة فطر

– مشويات عبدالوهاب
– عيش مشخول
– ربيان مقلي ( صالونة ربيان )
– سمك مشوي

– محلبية ( مهلبية )
– كوبين جاي ورق

المطعم اكله متواضع جداً جداً و مافيه ولا اي نكهة لبنانية و الأسعار غالية

ولا انصح فيه ابداً

طلعنا من المطعم و الحساب كان 27 دينار كويتي = 330 ريال سعودي

مجمعات الكويت :

رحنا مجمع الأفنيوز + مجمع المارينا

الأجواء جميلة في المجمعات

لكن ماطولنا كل مجمع ضلينا فيه ساعه وحده بس

ملاحظات آخرى :

الحقيقة كانت رحلة موفقة و جميلة لكن الأيام ماكفت نلف الكويت كلها

كان ودي اظل فيها على الأقل 3 ايام

و بحثنا عن مطعم اسمه ربيانة الكويت ولا لقيناه

قوقل يقول انه في حولي و رحنا حولي ولا لقيناه للأسف

و سألنا الكويتيين و قالو لنا حنا اول مره نسمع بهذا المطعم !!

و كنا نتمنى نروح مجمعات اكثر لكن الوقت ماكان يكفي

رجعنا السعودية على يوم الأحد بتاريخ 1437/02/02 صفر

ضلينا ساعه كاملة ندور على شارع الملك فهد علشان نرجع السعودية

و مسكنا الخط على طريق اظلم تدرون بعد مافيه عصر

خسارتنا كانت خلال هاليومين

97 دينار كويتي للأكل و الشرب + 54 دينار كويتي لسكن

تقريبا 1800 ريال سعودي

عَ العموم انصح اي سعودي عزوبي يروح للكويت

ملاحظة :

الصور اغلبها حجمها كبير مادري ليه

اتمنى من الإدارة تشوف حل لتصغير الصور

تحياتي و تقديري لكم …