تقريري البسيط لمدة 4 ايام بدبي مع الاسعار !!

السلام عليكم ورحمة الله

حبيت اشارككم تقريري المتواضع عن زيارتي لدبي

طبعا هذي اول زياره لي لدبي وكانت لشخصين حبينا نستكشف دبي

قلنا وقت اختبارات يمكن نحصل الاسعار رخيصه نوعا ما

وللاسف وجدنا العكس تماما طلعت الاسعار اعلى من المتوقع !

في البدايه حجزنا على طيران ناس ب1300 رايح جاي

مدري احس انها كثيره لان قبل فتره كنت ناوي اطلع دبي

وبحثت وحصلت الرحله ب700 ريال رايح جاي

المهم كانت المده 4 ايام من الاربعاء ليوم السبت من تاريخ 20-5 الى 23-5

والفندق تم الحجز عن طريق بوكينج في سيتي بريميير للشقق الفندقيه

بسعر 1800 لمدة 3 ليالي شامل الضرايب وكل شي

شقه عباره عن غرفة نوم وصاله كبيره ومطبخ وحمامين اعزكم الله

بالاضافه الى البلكونه المطله على برج خليفه

الفندق على طريق الشيخ زايد جانب محطة الخليج التجاري

فندق ممتاز صراحه وفخم نوعا ما

لكن يعيبه مافيه مكان سهر ولا حتى خدمة مساج

هذي النقطه راحت علينا بس تعرفون اول مره وكذا بس زبطنا امورنا ههههههههه

المهم باليوم الاول كانت رحلتنا الساعه 7 ونص ص من مطار جده

وصلنا دبي وبعد المراثون الطويل حتى وصلنا الجمارك

انهينا اجراءاتنا وخرجنا بعد ماحولنا الفلوس وشرينا شريحه اتصالات

بس للاسف اغلى من الي اعرفه اخذناها ب 155 فيها 1 جيجا ومدري كم رصيد

يوم خرجنا طبعا فيه سواقين خصوصي هنود راح يقولون خل نوصلكم

مافي انصب منهم واحد يقول ب160 اوصلكم والثاني 150

لا وواحد يقول نصيحه لا تروح تكسي ياخذ عليك اغلى

طبعا عندي خبر انهم نصابين لذلك طنشناهم وركبنا تكسي ب58 درهم (=

وصلنا الفندق وسوينا تشيك ان وطلعنا الغرف ريحنا شوي

وهذي بعض الصور للشقه

وهذا الفيو من البلكونه

طبعا الفندق فيه خدمة توصيل لدبي مول وبعض الاماكن السياحيه مجاني وله اوقات معينه

ركبنا الباص ورحنا دبي مول تمشينا وتغدينا في شيك شاك

ورحنا لرسبشن برج خليفه عشان نحجز بعد يوم ولا يومين

وتفاجأت ان الاسعار تغيرت

تقول الموظفه ب300 سواء بحجز النت او الدخول الفوري او الحجز المباشر

الي اعرفه ان الحجز المباشر ب100 درهم زي النت والدخول الفوري ب400

المهم كنسلنا برج خليفه نهائيا دامه كذا

وبعدها رحنا لمحطة الميترو

وهنا احس دفعنا فلوس بزياده لاننا اخذنا بطاقة نول مفتوح لمدة يوم ب22 درهم

لاني مادري بكم اشحن لو اخذت بطاقه عاديه وهل تكفي ولا لا

قلنا 22 ومفتوح واضمن وكمان فيه سيكيورتي اماراتي يقول المفتوحه افضل

وركبنا الميترو وانطلقنا الى محطة جبل علي

قلنا خل نروح البعيد ونرتاح من بدري وركبنا كان مليان وزحمه الميترو

وصلنا جبل علي الميترو كله مافيه الا انا وخويي هههههههه

خرجنا وجلسنا نص ساعه ماحصلنا تاكسي حتى ناس مافي

ودقيت على التاكسي الي بالاتصال وجا بعد 10 دقايق يمكن

وودانا نادي الرمايه ب30 درهم

وهنا برضو احس السعر ارتفع ودفعنا 250 للشخص للبندقيه الشوزن

اما المسدس ال9 ملي يقولون موقف حاليا ويفتح بعد 3 اشهر

هذا المدرب الي معنا مع البنادق

وهذا خويي وهو يقنص الاطباق

يوم خلصنا دقينا على التاكسي وجا وودانا محطة ابن بطوطه ب40

لان يقول مافي طريق الا لها من جبل علي

وركبنا الميترو ورجعنا الفندق بعد ماشرينا اغراض من البقاله

وهذي صور مغربيه من البلكونه

وقال خويي يبي مساج وسالنا قالو فيه قريب ورحنا بلموزين اللكزس ب10 درهم

بعدها رجعنا الفندق مشي اخذنا ربع ساعه يمكن

ونوووووم

اليوم الثاني

صحينا من النوم وفطرنا وتوجهنا للمحطه وشرينا برضو تذاكر مفتوحه لمدة يوم

واتجهنا الى الامارات مول ورحنا سكي دبي وبررررضو الاسعار اعلى من المتوقع

اخذنا تذكرتين الشخص ب300 يعني 600 للشخصين

بعض الصور من سكي دبي

بعد ماخرجنا رحنا شرينا تذاكر السينما ب35 التذكره

وشرينا فشار وعصاير صراحه الذ بوب كورن اكلته بحياتي خاصه الي بالكراميل

خلص الفيلم وفرينا شوي بالمول ورجعنا الفندق ريحنا لين الساعه 8

ورحنا دبي مول تفرجنا على النافوره الراقصه وبعدها على سوق البحار

رحنا مطعم مغربي اسمه المالوف وتعشينا فيه ب160

ورجعنا الميترو وعلى الديره واخذنا تاكسي لين حياه ريجنسي ب30

طبعا الدخول كان ب200 للشخص برضو اعلى من السعر المتوقع

مدري يمكن عشان يوم خميس او تغيرت الاسعار بكامل الاسبوع

يوم دخلنا الا انا رجعت السعوديه هههههههههه

زحمه بشكل مو طبيعي الناس واقفه ماتقدر تمشي وكلهم سعوديين

مدري هو نظامه كذا ولا عشان يوم خميس

المهم انبسطنا واستانسنا ورجعنا الفندق على الساعه 4 الفجر ب30

ونوم اقوى شي

اليوم الثالث

بعد ماصحينا من النوم وفطرنا

رحنا المحطه وبررررضو تذاكر مفتوحه ههههههههه

وتوجهنا لمحطة مول الامارات وخرجنا واخذنا تاكسي للوايلد وادي ب16

وصلنا واخذنا التذكره الوحده ب250 بالاضافه ل35 للصندوق

بعض الصور من الوايلد وادي

طبعا اول شي فلينا ولعبنا وانبسطنا وبعدين اخذت الكاميرا اصور

ماقدرت اصور كل شي عشان المناظر الخلابه

وثاني شي خايف على الكاميرا من المويه

خرجنا من الوايلد وادي على الساعه 6 وجدا هلكانين وتعبانين

ماتوقعتها تهلك بالدرجه هذي المهم

اخذنا تاكسي وودانا على الجي بي ار ب21

صراحه جونا كان مو ذاك الزود من التعب ومانقدر نمشي

كل ماشفنا كراسي جلسنا فيها نريح شوي ههههههه

تعشينا في مطعم اسمه سمسم وتمشينا شوي بالشاطئ

كان ودنا نروح للمارينا لكن ماقدرنا من التعب

جلسنا في كوفي وعسلنا الراس ب38 واخذنا تاكسي للميترو ب12

رجعنا الفندق ونوم بعد يوم مرهق من الوايلد وادي والمشي

اليوم الرابع والاخير

صحينا الساعه 1 ونص وبسرعه جهزنا اغراضنا

وسوينا تشيك اوت وخلينا الشنط عندهم بالمخزن

ورحنا على دبي مول ورحنا اكواريوم والتذكره ب100

بعد ماخرجنا منه اتجهنا الى تشيليز

وتغدينا فيه ب150 كان لذيذ اكلهم جدا

ومشينا شوي بالسوق وشرينا بعض الاغراض والهدايا البسيطه

عن نفسي لازم اشتري على الاقل مجسم او مجسمين لمعالم دبي

لان عندي رف خاص بمجسمات وتحف الدول الي زرتها

اخذنا تاكسي من دبي مول الى الفندق اخذنا شنطنا ووصلنا المطار ب44

وانتهى تقريري الي مدري وش يبي من طوله ههههههه

مجموع ماتم دفعه في هذه السفره شامل التذاكر وكل شي

حدود 13 الف ريال خلال هالاربع ايام لشخصين *_* طبعا مع الي ماذكرتها بالتقرير (=

واحس اني متحسف على تذاكر الميترو لاني دفعت اكثر من الي احتاجه

وباذن الله لي زياره ثانيه لدبي لزيارة باقي الاماكن الي مازرتها

وبتكون اكيد اقل اغلاط من الرحله الاولى

والف شكر للناس الي ساعدتني قبل اسافر بالمنتدى يعطيهم العافيه

هذا وصلى الله وسلم على محمد