تجربتي في ثلاث معاهد لغة في الفلبين وبتحديد في مكاتي

السلام عليكم ورحمه الله وبركاته

تجربتي في ثلاث معاهد في مانيلا وبتحديد في مكاتي ومابي ادخل في تفاصيل ثانيه غير المعاهد ابي بس تقيمي لهم للفائده للجميع وبسم الله نبدا : –

اول معهد درست فيه : American Institute

وهذا موقعهم : American Institute for English Proficiency: Makati & Quezon City – If you value quality education, it’s time to enroll at The American Institute

المعهد للاسف لو توصفه باسوى المعاهد قليله عليه هالوصف 🙂

اولا : نتكلم في السعر لمده 40 ساعه مع مدرس لحالكم ب650 دولار
ثانيا : المكان التدريس يعني الفصول بدون مبالغه متر ونص في متر ونص والاضاءه والمكيفات 2/10 يعني طبيعي تصبصب عرق ومرات يحط لك مروحة الي لها عامود وتروح يمين ويسار .
ثالثا : المدرسين درسني فلبينيين الشرح في وادي وهم في وادي تسال اي شي يبلم ثم يقول افتح جوالك وترجمها في قوقل !!
وغير كذا تحس يبي يضيع الوقت باي شي تافهه بس كانه يقول مايهمني انك تفهم اهم شي اخلص الوقت وبس غير يتاخر في الحضور احيانا عشر دقايق او غيرها من تضيع الوقت ، ويوم واحد درسني امريكي في المعهد بصراحه ممتاز في الشرح وكل شي وكان اخر يوم لي .
هذا كله انا والمدرس لحالنا .
ودخلت كذا حصه مع مجموعه والله مافي اي فايده مثال توضيحي : تخيل من بعض الحصص يلعب مع الطلاب وشي العبه اوراق يكتب فيها حرف ثم كل واحد يسحب ورقة ، ثم يقول نزلو روسكم والي اقول الحرف يرفع راسه ثم يختار يطرد واحد وبس ثم يسال الطالب الثاني تتوقع من الي طرده يقول هذا ثم يكتب اسم الطالب في الصبورة احتمال في الصبوره ثم الثاني يساله نفس الشي من تتوقع ثم بعدها يعيد توزيع الورق ونفس الشي يعني الطالب يقول في الحصه هذا فقط << يعني وش استفدت من تعليم او مهاره او معلومات جديده لا شي !! مثال ثاني ومابي اطول اكثر احد الحصص وزع اوراق وقال كل واحد يكتب مواصفات الجوال الي يبيها وليش يبي بهذي الموصفات ويخليهم يكتبون ساعه عشان يبقى ساعه الي يقرا فيها وش كتبو الطلاب بدون مايناقش جماعي او نفهم وش السالفه !! اكتفي بهذا القدر من الامثله .
وللاسف العرب واجد فيه خصوصا السعودييين .
تقيمي للمعهد 1/10

———–

المعهد الثاني : Languages Internationale

وهذا موقعهم : Welcome to Languages Internationale! | Languages Internationale

المعهد درست في مدة بسيطه جداا اربع ايام فقط بعد مانكويت في الاول قلت جرب لمده قصيره واذا اعجبك كمل

الاول السعر المعهد : 760 دولار لمده 40 ساعه مع مدرس لحالكم
المبنى والاضاءه والمساحات كبيره والمكيف يعني الجو العام ممتاز جدا
التدرس ليس سئ حلو لانه الغرفه كبيره وفاتح الجهاز كبير ويشرح لك مثل يطلع صور وتتعلم معه
العيبوب : يستخدم كثير ترجمه قوقل بحكم الاب توب مفتوح واغلب الشروح عليه
تقيمي له 7/10 لو مالقيت المعهد الثالث كان استمريت فيه . طبعا المدرس فلبيني .

موقعه حلوو قريب مره مره من قرين بيل مول بينهم شارع تقريبا .

———-

المعهد الثالث : American English Skills

موقعهم : American English – The Best English School in the Philippines

اولا السعر المعهد : 800 دولار لمده 30 ساعه يعني اقل بعشر ساعات واغلى في السعر لكن عندهم قروب صغير ثلاث اشخاص فقط ب640 دولار في 36 ساعه
طبعا نظام القروبات في كل المعاهد ثلاث ايام في الاسبوع انا خذت القروب بس 30 ساعه و12 ساعه مع مدرس لحالنا ومن حظي القروب ماكتمل ماصار الا وحده معي صينيه درست بس يوم ثم سافرت وقالو خلاص بتصير لحالك يعني سعر المجموعه مثل سعر انا ومدرس لحالنا 🙂
السلبيات والايجابيات :
اولا : السعر مرتفع عن الغير لكن المدرسين 2 امريكان وواحد بريطاني ماعندهم مدرس فلبيني .
ثانيا : عندهم اربع غرف تدريس ثنين صغيره مترين في متر وشوي وثنيتن كبيره تاخذ اكثر من عشر طلاب براحه مخصصه للقروبات والله اعلم بس درست فيها اكثر من مره .
ميزه المعهد هذا المدرسين كان يوم يدرسني بريطاني ويوم امريكي طبعا الامريكي اقرب لك في الغه بحكم الافلام والاعلام الامريكي بس البريطاني افضل في الشرح بنسبة لي بس اللكنه “الهجة” حقتهم تختلف البريطانييين ماينطقون حرف r مثل الامريكان مرره خفيفه .
بس اشوف الفايده لمده هذي افضل بكثير من المعهد الاول ، الثاني ماكملت فيه يمكن يكون افضل والله اعلم .

تقيمي للمعهد 9/10

هذا ملخص سريع لتجربتي وحبيت اركز على التجربه فقط وعدم التطرق للمدن الاخرى والمعاهد الاخرى .

اتمنى يفيد الاشخاص الي ناوين مكاتي تحديدا .

من ناحيه التعلم استفدت طبعا بس مو مثل الي كنت ابي 🙂 بس شهرين وشوي المده فقط قليلة .
والغه يبي لها 70٪ على الطالب في تطوير نفسه في المحادثه وكل شي وللامانه الفلبيين الاغلب الشعب يتكلم انجليزي .

هذا والله اعلم وصل الله على نبينا محمد وعلى اله وصحبه اجمعين .