## طيران الاتحاد وموقفهم السيئ معي ##

السلام عليكم ورحمة الله وبركاته

ومساكم الله بالخير يالاخوان وكل عام وانتم بخير ، وينعاد عليكم باليمن والبركات .

طبعا نحن كمسافرين عرب عندما تحصل لنا مواقف سيئة او نتعرض للظلم والاهمال لا نجد من نشتكي له ونفضفض له وبكل اسف الا عالم الانترنت والمنتديات كالمنتدى الرائع هذا لأننا عارفين محد حولك ومحد بيجيب لك حق ، فأحببت ذكر الموقف الحاصل بيني وبين خطوط طيران الاتحاد ( أبو ظبي ) .

ذهبت إلى بانكوك قبل تقريبا أسبوعين إلى ثلاثة ع طيران الأتحاد مع أحد الزملاء ، ومن طبعي وبخبرتي المتواضعة في السفريات ، احب ارتب كل اموري اونلاين ، يعني المقاعد والوجبات وكل شي ارتبه واختاره مسبقا ، فأخترت المقاعد والوجبات ، سلمت لهم الشنط ( 3 شنط ) أحد هذه الشنط فيها الأموال واللابتوب وكاميرا تصوير غالية وهي الأهم من بين كل هالثلاث شنط ، وكنت أحمل في شنطة الظهر الجوازات ومبلغ 10000 بات ( عشرة الالاف ) ، توقعت انه راح يكون كافي جدا جدا لايصالي للفندق ولقضاء يوم كامل بعد لمعرفتي بالاسعار لانها مو اول سفرية فسعر التاكسي للفندق كان ( 400 بات ) ، ومن طبعي احب اصرف الدولار في بانكوك لان سعر الصرف هناك اوفر وافضل ، ركبت الطيارة وللاسف ماعطوني الوجبات اللي اخترتها ، وماعطوني المقاعد اللي اخترتها قلت مشي ياولد ( مع العلم ان نفس الحركة صارت في العودة ، ماعطوني المقاعد اللي اخترتها ) .

المهم وصلنا مطار بانكوك وتفاجأت بان اللي وصل شنطتين فقط ، والشنطه الاهم واللي فيها كل الاغراض والعدة والفلوس ماحصلناها ، أنصدمت ورحت للكونتر حق الشنط التابع للطيران الاتحاد وقلت لهم السالفة ، وأستقبلوني بكل برود وكانهم متعودين ع هالشي ، طالبوني اكتب لون الشنطة ووصفها واحدد عنواني في بانكوك ، وأول ماتوصل الشنطة راح يرسلونها لي ، وقالولي ان لهم باليوم 4 رحلات من أبوظبي لبانكوك ( على كلامهم ) واذا ماحصلناها الان راح تجيك بكرا الصباح ان شاء الله ، قلت حصل خير .

رحت الفندق وبصراحة كان فندق رائع وأول مره اسكن فيه ، لكن تفاجأت انه طلب المبلغ مقدما وكان المبلغ تقريبا ( 6300 بات ) حاولت اتفاهم معاها واعطيها المبلغ عند التشيك اوت ، لكن الموظفة كانت جديدة وماتعرف انجليزي ، فتهاونت بالموضوع وقلت المبلغ المتبقي معي بيكفينا لليوم الثاني صباحا لحد ماتوصل الشنطة المهمة ، فقلت خل أنام شوي والعصر اروح مكتب الاتحاد في بانكوك واشتكي عشان يهتمون بالموضوع ، رحت وقابلتني الموظفة التايلندية وأتصلت على مكتب المطار الخاص بالاتحاد وقالولها الشنطة نسوها ببلد المغادرة وماحصلوها بمطار بانكوك والصباح بتجي ، وقالت لي سياستنا نعوضك عن كل يوم 40$ لحد ثلاث ايام ، وتستلم المبلغ في المطار عند مغادرتك ، والله يالاعصاب ولعت معي ، تخيلو فقط لو ماكان معي مبلغ السكن ، لو ماكان معي الصرف التايلندي ، لو ماكان معي زميلي اللي استفدت من ملابسه ، قلت لها انتي مهبولة او شنو ؟ الاربعين دولار هذي تساوي تقريبا 1400 بات وشلون اسكن فيها واكل فيها واشتري ملابس فيها ؟ قالت هذي سياستنا ، قلت لها عطيني رقم الادارة العامة حقت الشكاوي ، قالت مافيه رقم ، فيه ايميل فقط ارسل لهم شكوتك وراح يردون عليك بأسرع وقت .

فالمهم في المطار أعطوني ورقة ايصال فيها رقم الشكوى حقتي ورقمهم لاتصل عليهم مساء ع كلامهم ، فاتصلت عليهم بالمساء وقالولي الشنطة بالصباح وهي عندك ان شاء الله ، قمت الصباح ووصلنا للعصر ومحد حولك ، اتصلت على مكتبهم في المطار قالولي اتصل بالليل ، أتصلت على مكتبهم في بانكوك كلمني موظف عربي قلت له السالفة وقالي للاسف ماعرف ادخل الكمبيوتر واشيك وين الشنطة حقتك ومالك الا تنتظر الليل او بكرا لان عندنا 4 رحلات من ابو ظبي لبانكوك يوميا ( ع كلامه ) ، فأنتهي اليوم الاول وماجا شي ، وانتهى اليوم الثاني وماجا شي ، وانتهي اليوم الثالث ماجا شي ، رابع يوم العصر وصل سواق شركة توصيل ومعاه الشنطة ، ويبيني اوقع ع استلامها بسررعه ومستعجل قلت له والله ماوقع لحد ماتفحصها فانيلة فانيلة ، سروال سروال ، دولار دولار ، وقعدت اتفحصها اتفحصها ولله الحمد مافيه شي ناقص ، لكن الوضع في الشنطة محيوس فوق تحت والملابس ريحتها خيست ، والكاميرا حصلتها مفتوحة .

ولولا الله ثم بطاقة الصراف والا كان رحت في خبر كان .

فالمهم تخيلو ثلاث ايام من جدول سفريتك المحدودة ، تعكر جوك ومزاجك ، والغلط والخطأ مو منك ، وتعويضهم مثل وجيههم وتستلمه عند المغادرة ، وأنت في غربة وبلد غير عربي ولا اسلامي ، وترفع شكوى منذ ذاك الوقت عبر الايميل اللي اعطتني اياه الموظفة ، تطالب بحقك وبانصافك ( ولو برسالة اعتذار فقط ) ، ولكن للاسف والله منذ رفعت شكوى ليومك هذا تقريبا حول 15 يوم ، حتى رسالة واحدة ماردو علي ، اعتذار واحد ماشفته منهم وهذا اللي ضايقني وخلاني اكتب الموضوع ، يعني فوق انهم مضيعين شنطتي ثلاث ايام ومخربين نفسيتي وجدولي المعدود ، وفوق ان المقاعد اللي اخترتها ماعطوني اياها ، وخربو علي المقاعد اللي ماخترتها ايضا وذلك بسبب ان فيه رجال ومرته يبون يكونون جنب بعض ، طيب انا شكو اللي مضبط اموري اونلاين ؟؟ وفوق التأخير اللي حصل عند المغادرة ، وفوق اني قابلت ناس في مطار ابو ظبي جايين من جاكرتا يقولون عطلوهم وأجلو رحلتهم يوم كامل ، ومع ذلك رسالة اعتذار واحدة او تقدير او احترام مافيه ؟

ماقول غير الله يعز الطيران القطري ، فرق السماء والارض

وهذي صورة لأيصال الشكوى للتاكيد .
http://store2.up-00.com/2015-09/1443006733291.jpg

اعتذر عن الاطالة وبالتوفيق