الشاليه والعيد مع جوري عيدين

كل عام وأنت بخير وينعاد عليكم بصحه وسلامه يارب

طبعآ الكل يعرف أن حلاوة العيد بالطلعات المميزه والحلوه واللي تخلي العيد له طعم

وعيدنا هالسنه كان مره حلو >>> أبي احلل أجازتي اللي أخذتها :9303f68a42:

طبعآ كنا مسوين برنامج من قبل العيد للأماكن اللي بنروحها مثل الشاليه والملاهي

وأستراحة الاهل يعني قضينا وقت ممتع بصراحه وحبيت أني اصور لكم يومنا في الشاليه

لإنه كان بالنسبه لي يوووووم خطير مابين وناسة بنات وسباحه ولعب كوره

ولكم التفاصيل بالصور ,,, ان شاء الله أنه يعجبكم

ثاني أيام العيد الفطر المبارك اخترنا انه نطلع للشاليه تغير جو بما ان الجو معتدل

حجزنا في شاليهات نجد بصراحه مره حلوه أخذنا الشاليه الكبير لإن الشله كثيرين ماشاء الله أخذناه بـ 900 ريال لليوم

طلعنا من الساعه عشره الصباح وتغدينا فيه وتعشينا وسهرنا لوقت متأخر

راح أعرض لكم الصور مع التعليق أتمنى ماتزعجكم كثرة الصور بس لإني احب اكون دقيقه في التفاصيل خخخخ :61acbf8b15:

وهنا مدخل الصاله الداخليه للشاليه

بصراحه راااايقه

وهذا حمام الصاله والمغسله جنبها على طول

هذي غرفة الطعام >>> وهـ عليهم وش حلاته صغنطوطه :2fe0a1b787:

طبعآ غرف النوم فيه غرفتين نوم كبيره مع الحمامات تبعها بس ماصورت الا وحده وحمامها

وهذا مجلس صغير برا الشاليه مع حمامه مخلينه للإولاد >>> ضلم احتلينا الشاليه كلها يالنسوان:2fe0a1b787:
عاد المجلس ماله داعي صغير وحمامه صغير بس يكفيهم وش يبون بعد :9303f68a42:

https://www.otlaat.com/almosafr/forum/uploaded/4478_11223057887.jpg

وهذا المطبخ ماعليكم تراه محيوس شوي بس تعرفون نزلنا الاغراض فيه وكل الخرابيط

يوم جت الساعه وحده الضهر بدينا نطبخ ذبيحتنا وبدينا نحوس في المطبخ واللي يعيب الشاليه
ان مطبخه صغير ,,,, وهذا قدرنا

وهذا جزء من اللحم الباقي ماصورته لإنه كان باقي ماأنغسل صورت لكم الجزء اللي غسلته خخخخخ وحده نضيفه ماتبي تصور اللحم وفيه دم >>> تتقرف :9303f68a42:

المهم حطيت اللحم على النار وغطيت عليه وطلعت برا لقيت المسبح وش كثر مغري قلت اصوره

لكم وهذي صور للمسبح طبعآ مسبح للإطفال ومسبح لنا يالكبار :6bc61aca8f:

طبعآ بما أن اللحم يطول في الطبيخ قلت مابدهاش لازم اتقهوى وقلت للشغاله روحي جيبي لنا
قهوه وجابت لنا القهوه وتقهوينا

المهم خلص غدانا على حوالي الساعه 3 وشوي وهذي صورته

وهنا يوم حضرته في الصحووووون

تغدينا وريحنا شوي وطلعت برا اتمشى شوي ومعي كاس شاهي واخترت مكان رهيب
وجلست فيه

وانا أتمشى مريت على هذا الشي >>> حيل يغريني

شوفو وش حلاة المويه ولونها يجننننننننننن

هنا عاد ماقدرت أقاومه >>> حسيته يناديني ورحت على طوووووول وجهزت أغراضي تبع المسبح

استمتعت بشكل رهييييييب للغايه >>> كأني ماقد شفت مسبح ومويه :2fe0a1b787:
طلعت من المسبح وناديت (( نينا )) شغالتنا وقلت لها افرشي لنا فرشه برا
لإن الجو من جد خطير

وجبنا قهوه وشاهي وقعدنا الى قرب العشاء سواليف ومناقشات وونااااسه

قمت صورت لكم المسبح في الليل >>> عاد يقولي أبوي ماخلصتي تصوير من الصبح وأنتي تصورين >>> الله يصلحك بس وانا أبوك >>> قلت امين يبه :2fe0a1b787:

على الساعه 11 تقريبآ بدينا نولع الفحم عشان نشوي

وأنا قاعده أشوي حصل موقف بصراحه موتني ضحك طبعآ الشاليه مليان اطفال يوم قربت اشوي
قلت لهم كلكم أطلعوا برى الشاليه العبوا في الملاهي الخارجيه عشان الازعاج طلعوا كلهم
الا واحد فيهم اللي هو ولد أخوي قال لا ابقعد أشوفك وأنتي تشوين الدجاج
شكله جوعان :2fe0a1b787:

المهم قعدت اراقبه وهو يطالعني ويتذمر لإني تأخرت عليه في الشوي أنا قلت شكله جوعان
صورت له ثلاث اوضاع خخخخخخ

هنا في البدايه وهو باقي

وهنا خلاص متملل مسكين خخخخخخ وهـ بس فديته عيون عمته

خلص المشوي على خير بعد ماتعبت هالمسكين وهو يناضر فيني كأنه يقول مابغيتي ياعمه تخلصين

طبعآ بحط لكم صور المشوي صحيح اني حرقته شوي بس ماعليكم من الشكل عليكم من الطعم خخخخخخخخخخخخخخخخخخخخخخ

هنا غطيته بخبز عشان مايبرد لإن الباذنجان والبطاطس والرز باقي ماخلصت

وهنا بعد ماحضرنا العشاء وبصراحه كانت عشوه لذيذه >>> يعني عشاء لذيذ

خلصنا العشاء وسوينا شاهي على الفحم وتقهوينا ومن بعدها بدينا نلعب كوره وصورت لكم الالعاب الناريه

وفي نهاية اليوم حبيت أقولكم أنه كان يوم جدآ رائع وحبيت أنكم تشاركوني فيه بحلاوته
واتمنى انه عجبكم يومي بكل مافيه بكل صوره وبكل تعليقاته

وهذي صوره نهائيه للشاليه وانا طالعه

ورجعت وأنا أجهش من البكاء لا أريد العوده الى البيت :329b2f6765:

0
0
0
0

تقبلوا تحياتي وتقديري ويومي الجميل بكل ماحصل به من أحداث ذكرتها ولم أذكرها :9303f68a42:

جــوري