أمطــار الرس وفنجال الشاهي ..

يالله نكشت !!!

وش السالفه ….. شف السمـــــاء خيال وجو أوربي …. كذا يبدا تخطيطنا دائما علشان نطلع للبر ههههه وكل الحكايه فنجال شاهي ولكل امرء مايهوا ….

لاكن اليوم من غير أي تخطيط تم خطفي من قبل عمي العزيز …. وعلى وين للبر هههه الساعه 4 العصر وين يمدينا نروح وش نبي نسوي نشوف المطر طيب وبعدين !!!! عطان ذيك العين قال لا يكثر فنجال شاهي ونرجع !!! قلت طيب يالله نكشت هههه كني مقتنع ومبسوط وانا :waheg8: ……. لاكن بيني وبينكم الجو كان اليوم على الرس والقصيم بشكل عام يذكرني ببونجاك والفله اللي هناك الفرق بس انك هنا تحس انك مكتف من البرد ويالله يالله تمد يدينك وأذانك انسى انك تحس انها موجودات ولا لا !!! ههههه .

المهم وأنا أسوي اني طير بر وأقول لعمي طيب مر المحطه خل نكمل أغراضنا وأشوف ذيك الابتسامه من الاذن للإذن ….. ولسان حاله يقول بدا يتعلم الولد بس سألني سؤال يملأه رغبه ولهفه من التأكد من الشعور السابق المتولد لديه وقالي وش ناقص ؟ … طبعا من طيب نيه قلت بسرعه وبدون تفكير بنياته بعلمه ممكن الرجال له طلبات خاصه ولا ممكن يحب شي معين وبالفم المليان قلت له بجيب إندومي !!!!!!!! وماكملت كلامي عن نكهه الكادي حقت الدجاج وكيف لو حطيت معها شويه شطه سومطره إلى خشتي بالقزازة اللي قدام من قوة الفرام …..

نزل أبوعلي على الشارع وفتح صدره وهو يتمنى أقرب وانيت …لا … جمس …. انت لو تدقق بعيونه ممكن تقول كان يتمنى تريله أو قطار وينهي معاناته معي …… بس وحركه غير متوقعه منه وهو ياخذ نفس عميق …… رجع للسياره بسرعه خاطفه وأثاري إبريق الشاهي بجبهتي وهو يعشق ولا يوقف الى عند المحطه ….. ويرفسن وأنا بوسط الحطب ويقول النفس طيبه عليك بس لا تكثر من السوالف هذي حطب ولا يكثر وتعال ……. :sunglasses2: طبعا تنفضت شوي وأصوت للهندي ..ياماس ياماس ويجي الهندي لمي يقلب شكلي من أعلى رأسي لأسفل قدمي يقول هنا مافيه نفر ياماس … ثم قال : هذا أنا اسم شهاب إيس إبقى ؟ أها نسيت نفسي أنا وين فيه ….. وأقول وش ابي وانا أقلب الحطب كني فاهم وهذا زين وهذا مو زين وعلى الفلسفه هذي ولا دريت الى انا بالصندوق مع ربطه حطب فوقي ومن الزعل عمي دعس ذيك الدعسه اللي لزقت كشرتي بأخر الصندوق ( الصندوق للي يحب يثقف نفسه هو حوض الوانيت ) ….. حتى العصافير اللي يطيرون فوق راسي دائما إذا استلمت ضربه قاضيه من عمي اللطيف تركتهم عند الهندي المرة هذي ماأمداهم يلحقون من الحركه الخطافيه هذي …..

وصلنا شعيبنا المصون ومايسمى بالجسر الثاني …. والامطار ماشاء الله تمام والخير الله أكبر … وأكيد انا برقع سوالف المحطه مع عمي وأنا أنط اول ماوقف والاغراض وراي بالهوا على بالي شقردي…… وأوقف على الاطلال والمراد هنا جال الشعيب هههه كني عندي سنع والحس اصبعي بشوف من وين الهواء على شان النار واستقرت جميع تصويتات خلايا مخي على المكان هذا

:28_3_6v:

وإخترت المكان وأحفر للنار وأزبط المكان والعم مابعد نزل يكلم بالجوال وبراي الذمه ولا أحط بذمتي شي يكلم خويه اللي يبي يجينا بعد شوي يوصف له مكاني الخطير اللي يبيلهم سنين خبره من البراري على شان يدلونه ههههههه

أخترت مكان يكون له إطلاله ساحره حيث تجمع منظر الشعيب ودفاء النار

قلت من هنا تناظر كذا

وأنا بلتفت وأثاري الفرشه بخشتي وهو يقول يرحم والديك مجلسنا بنص الشعيب يالدب واذا امطرت بعد شوي وجانا سيل ؟؟؟؟ وش تبي تسوي والله ان تجمع عزبتنا من أخر الشعيب >>> أعلمك يالعزبه ….وكمل كلامه رح إفرشه جنب السياره هناك !!!!

:waheg66:

أكيد قلت طيب !!!! هذا عمي ولا مايهمن أحد أنا هههههههه >>> واضح

وصل خوينا الثالث

وزبطنا الفرشه

والحركه الالتوائيه المشهورة ايام البرد ههههه الكل زابن جنب النار >> ترا الحركه هذي مسجله بإسمي بمركز الاختراعات وراح أطالب فيها دولياً هههههه

وهذي النار حقتنا بس بالنكهه الاندونيسيه ههههههه

وحطينا الشاهي …… على النار

وبديت أختخت من هنا وهناك ومن ورا السياره استكشف المكان

وانا راجع وأثاري خوينا الثالث متدخل بطبخه الشاهي بدون سابق إنذار >>>ههه طبخه تضحكون هاه ….أجل ولو تجربون يوم أسويه للشباب بالكاتم وحنا بفندق ميركوري وش تقولون ههههه

المهم نرجع حق محور حديثنا

طبعــاً يده كبيره خوينا شوي لأن فيه داء الفيل هههههه

وبعد كذا ويوم شفت الموضوع كذا قلت أجي جنب الابريق والزق جنبه …. لا بعد يخبصون وزنيه الملح ويروح تعبنا على الفاضي !!!!!!!

جلسنا نتمتع بالهواء العليل ….

وماشاء الله ….. زبط الشاهي ياولد كل واحد يمد فنجاله

وهذي الجلسه اللي يتمناها كل شاب سعودي>> على الارجح والاحصائيات تقول كذا ههههههه

ومع أول رشفه فنجال أخذني الغرور شوي … وعلى بالي أسولف عليهم وأنا أنادي عمي وأقول :
ماشاء الله عليك يابو علي نارك جزله !!!! >>> متأثر بشاعر المليون

مايحتاج أكمل والحمد لله فيه واحد يفكنى ههههه

وحنا متوغلين بكاس الشاهي ….. أمطرت علينا ولا شربنا فناجيلنا ههههه وهذي حكايه كل يوم بالشتاء هههههه ونرجع من بكرا نسويه مره ثانيه ….

جـــــدا عادي شعب مكافح وعندنا جلد والدليل ننتظر المؤشر يرجع للعشرين الف !!!!

الجميل مع سواليف النار والنقاشات العميقه والوديه بمثل هذه الاجواء …. إلى مايكون فيه ترطيب للجو من أحد ضيوف الشرف وهم أصحاب الجيوب ولا البانشيات بوسط الشعيب … لاكن المره هذي بطلنا راعي ددسن الضعيف ومحمل لأذانه حطب ….

نهايته يتمنى أحد يدف معه هههههه

نهايه الحكايه لليوم الجمعه … اتمنى انكم تشربون الشاهي وانتم بأحلى جو ….

تحياتي لكم …. وإعذروني على الاطاله

الكــابتن خالد