أهلا وسهلا بك إلى المسافر السياحة و السفر.
أهلا وسهلا بك زائرنا الكريم، يسرنا ان تسجل معنا في اكبر مواقع السفر للتسجيل اضغط هنا

حمودي و اسبرانزا في رحلة لاستكشاف ربوع السعودية

2006-08-27
الصورة الشخصية
عدد المشاركات: 87
السلام عليكم ورحمة الله

حمودي و اسبرانزا في رحلة لاستكشاف ربوع السعودية

الجزء الأول

قبل ما يقارب شهر من اليوم قررت وبعد تفكير مطول إني ألبي طلب خالي حمودي لزيارته في مدينة الرس ، طبعاً قرار تلبية الدعوة كان غصب على لان حمودي و من كثر ما طنشت دعواته لي هدد انه يجيني في الرياض مع عيال عمة و يخطفني و يوديني للرس غصب.

لذلك و خوف من تهور حمودي المعتاد قررت إني أروح للرس طواعية وبغير أكراه ، لذلك انطلقت على الهوندا صباح يوم خميس بعد ما بلغت حمودي في اليوم السابق و أخذت منه وصف مكان مزرعته في الرس.

المشوار كله ما اخذ الا حدود ساعتين ونصف كان خلالها حمدوي يدق على كل كم 5 دقائق على الجوال و يسألني انا وين فيه (يخاف على أنخطف):) وصلت لمدخل المزرعة و توكلت على الله ودخلتها بعد ما قريت ما يلزم من المعوذات.

ما أمداني امشي بسيارتي كم متر داخل المزرعة إلا وطلع لي ذاك الرجال البترة الضخم اللي من طوله كان رأسه يضرب في عسبان النخل و الأرض تهتز من تحته إذا مشي ، ولونه كان اسمر مائل إلي السواد وكأنه من حقين الشاطئ الشرقي لإفريقيا ، وكان معه حدود 30 رجال كلهم على نفس الشكل و الكبر إلا إن الشخص هذا كان أكبرهم و كان هو اللي يقودهم ، إنا ما أخفيكم قلبي طاح في بطني و تهضم يوم شفتهم و بالذات القائد حقهم البترة ، بس الغريب إني ما شفت حمدوي ، صحيح إني ما عمري شفت حمودي شخصياً لكني اعرف شكله لأنه أرسل لي صورته عن طريق المسنجر قبل مده ، إنا استغربت أكثر وشلون حمودي ذاك الشاب الوسيم الحليوه صاحب العيون الزرقاء الفاتحة و الشعر الناعم الطويل المائل للبنى الخفيف ، صاحب البنية الرياضية الممتازة يكون عندها في مزرعته هالاشكال.

تفكيري فيما حولي ما طال لأني تفاجئت بالبترة يفتح باب الهوندا ويجرني من كتفي الأيسر بقوه و يرميني على الأرض ، إنا من هول اللي صار معي ما قدرت أتحرك و من الخوف غمضت عيوني و بديت أتشهد ، فجاءه سمعت صوت حمدي وهو يقول “وأخيران تنزلت يا اسبرانزا و تكرمت تسير علينا في الرس ” صحيح إن الكلام اللي قاله حمودي تقل فيه نبرت تهديد ، بس ما تصدقون كثرت فرحتي يوم سمعت صوته لأنه على الأقل بينقذني من البترة اللي طارحنى على الأرض و حاط رجلة في بطني ،،، فتحت عيوني وانأ مطروح على الأرض و بديت اللفلف عيوني يمين و يسار وانأ أدور حمودي ، بس ما شفت حمودي ، فقلت لنفسي أكيد انه وري جدار هالبتر اللي أمتجمعين حولي ،،، و فجاه و للمرة الثانية سمعت صوت حمودي و بدا يطق قلبي بسرعة من الفرح ،،، بس أيضا للمرة الثانية ما شفت حمودي ،،، ركزت نظري على البترة اللي واقف فوقي ورجلة في وسط بطني و بدت براطمه اللي تقل براطم بعير من كبرها تحرك و فجاءه طلع صوت حمودي من تحت براطمه ،،، انا تهولت من اللبراطم و تهولت أكثر من صوت حمودي اللي يطلع إذا تحركت براطم البترة.

إنا هنا ايقنت بأن المحضور قد وقع ، و ايقنت بأنه ما فيه احد بينقذني من اللي إنا فيه إلا ربي ، ،، لذلك جمعت كل ماعندي من قوه و قدرت ارفع رجل البتره من على بطني و نقزت ذيك النقزه و تعنقطت في رقبت البتره و بديت اصارخ عليه و اقول ” طلع حمودي من كرشتك يا المجرم ، خاف ربك وشلون تبلعه قطعه وحده وهو رجال أبو عيال“.

إنا كررت الجملة السابقة حدود 3 مرات و كل مره أقولها اسمع صوت حمودي وهو يضحك ،،، إنا انبسطت يوم سمعت صوت حمودي وهو يضحك و عرفت انه لين الحين بخير ولو انه في كرشت البترة ،،، فبديت أصارخ و أقول “تصبر يا حمودي أبطلعك من كرشة البترة ، أبشق بطنه و أطلعك” ،،، إنا ومع قولتي للجملة الأخيرة تفاجئت بالبترة يطيح من بين يديني و يتمدد على ظهره و يمسك بطنه و يضحك ذاك الضحك الغريب و بصوت حمودي.

إنا ما عرفت وش السالفة وتسمرت في مكاني الين وقف البترة ضحك و بعدين وقف على رجلينة قرب مني و قال لي “انا حمودي يا اسبرانزا ، إنا هو وتراني ما بلعت احد ولا شي“.

ياللهول ، ياللمفاجئة ،،، حمودي ذاك الشاب الوسيم الحليوه طلع هالبتره اللي ما ينوصف ،،، وش الحل وش المخرج من هالورطه ،،، حمودي ما خلاني اكمل تفكيري و قطع حبل افكاري وجرني من يدي و دخلني بيت شعر مركوز في وسط المزرعة ، بيت شعر من كبره تقل ملعب كوره ، وعلى كبر بيت الشعر الواحد ما يلقى فيه مغز ابره من كثر العالم اللي جالسين فيه.

اخذني حمودي وجلسني في صدر المجلس و بعدين اخذ مكرفون و قال للجالسين “ابشروا ياالربع ابشروا الله جاب لنا اسبرانزا حق فانكوفر

انا استغربت من اللي قاله حمودي للحاضرين بس ما علقت ولا قلت شي ،،، المهم اخذنا لنا حدود ساعة و مغير قهوه رايحة و قهوه جائية و صحون القدوع (التمر) تروح و تجى بعد.

بعدها وقف حمودي وماشاءالله من طوله اضطر يدنق لا يضرب رأسه في سقف بيت الشعر ، و اخذ المكرفون و قال ” تفضلوا يالربع تفضلوا حياكم الله الغداء والم“.

بعدها سحبني حمودي من يدي و طلع بي لم بيت شعر ثاني كان كبر الاول او اكبر ،، و في داخل بيت الشعر كان فيه 10 تباسي (صحون) من كبرها لو طب في الواحد منها 20 رجال كان أخذهم كلهم ، و في داخل كل تبسي كان فيه قعود كامل (بعير).

قعدنا و تغدينا وعينا من الله خير ، و عقبها رجعنا لم بيت الشعر الأول و بدوا القهوجية يدورون بصحون مليانة بيالات شاهي و نعناع.

بعدين نادي حمودي على واحد من الصبيان حقينه و قال له يجيب الربابه.

جاب الصبي الربابة و قرب المكرفون لحمودي و بعدين بدا حمودي يعزف عليها قصيده (البارحه يوم الخلايق نيام) ، و كان طريقة أداه الحقيقة جميله و بالذات مع نضام السماعت الموجودة في بيت الشعر (سراون ساوند) فسجلتها عنطريق جوالي ، و إذا تحبون تسمعون حمودي يعزف على الربابة فهذي هو ألوصله:

http://www.50005000.com/KSA/Magdor/Magdor.rm

استمر حمودي في العزف على الربابة شوي و سولف معي و مع الرجال الموجودين في بيت الشعر شوي الين إذن العصر و بدو الناس يتفرقون الين معاد بقى في بيت الشعر إلا إنا و حمودي و عيال عمانه و عيال اخواله و عياله الاربعطعش و بعض الصبيان حقينة و بعض القهوجية.

استمريت في السواليف مع حمودي لمدة طويلة و الحقيقة لقيت إن خلف الشخص الضخم البنية ، كبير الكرشة ، اسمر ألبشره هذا شخص خفيف الدم مزوح يحب الضحك و يحب نكت الحواطى.

مع صلاة العشاء طلب حمودي من الصبيان يشبون الضو في قلب المزرعة و يجهزونها لأني إنا وياه بنروح و نكمل ألسهره حولها.

و بالفعل توجهت إنا وحمودي لم النار ، اللي ماشاءالله من كبرها يشوفونها اللي على القمر ، وكانوا الصبيان مادين شويات على النار فوقها 6 تيوس صغيرات قاعدين يجهزونهن للعشاء.

المهم و إثناء ما إنا و حمودي قاعدين حوا النار ولا حولنا احد يسمعنى التفت على حمودي بنظرة غريبة و قال لي “اسبرانزا أنت خائن لبلدك و أهلها” ، انا الحقيقة استغربت من كلامه و دار بيني و بينه الحوار التالي:

اسبرانزا: افااا يا حودي ،،،، وش هالكلام “خائن و ما خائن”.
حمودي: ايه يا اسبرانزا انت خائن ونصف لهلك و بلدك ، انت شخص قاعد تشجع الناس على السفر و السياحة الخارجية ولا عمرك جبت طاري لديرتك ولهلها.
اسبرانزا: الله يهداك يا حمودي ، وش سياحة داخلية وخرابيطه ، هو في السعودية سياحة داخلية ، ،، لياك تحسب أبهاء وجبالها و أجاراتها اللي اغلي من سويسرا سياحة داخلية ،،، لياك تضن مهرجان جده و الباحة سياحة،،، ترى السعودية ما فيها إلا بران وحر.
حمودي: لا يا اسبرانزا ،،، السعودية فيها أماكن سياحية من الدرجة الأولي ،،، السعودية فيها أماكن اغلب أهلها ما يعرفونها ولا يدرون عنها.
اسبرانزا: طيب هذا أنت تقول فيه أماكن محد يدري عنها ،،، إذا الكلام هذا صحيح وشلون توقع إني إنا اعرفها وانا قليل ما اطلع من الرياض و البر هذا ما اعرفه.
حمودي: ايه هنا يجي دوري ،،، إنا ونت نبي نروح للاماكن هذي و أبيك أنت تكتب عنها ،،، أبي الكل يعرف الأماكن هذي و يروح لها و يتمتع بجمالها.
اسبرانزا: بس يا حمودي اللي أنت تكلم عنه يبي له مشورة و دوران ،،، يبي له تقطيع بران و نوم في البراري وانا الحقيقة منيب راعي الأمور هذي.
حمودي: لا تشيل هم هالموضوع ،،، انا حاط الشي هذا في بالي ،،، و عندي بدال الجيب عشرة و عندي وايت البنزين بناخذه معنا عشان كل ما احتجنا بنزين نعبي منه ،،، و عندي بيت الشعر بناخذه وين ما نروح ،،، وبأخذ الصبيان حقيني كلهم عشان يخدمونا.
اسبرانزا: والله يا حمودي مدري ،،، أخاف ما تجوز لي المشورة هذي ،،، أخاف تتعبنا على غير سنع لاني ما هقيت إن في السعودية شي يسوأ من يروح له و يزوره.
حمودي: انت بس قل تم يا اسبرانزا و انشاءالله بتروح مغامرة و تستكشف أشياء ما عمرك شفتها من قبل.
اسبرانزا: شورك و هداية الله يا حمودي ،،، تم
حمودي: زين اجل اليوم خل ننام بدري عشان من بكره نحرك لأول مكان نبي نزوره.
اسبرانزا: “أول مكان نزوره؟؟ ،،، أشوفك جاهز يا حمودي للرحلة قبل حتى ما إنا أوافق ،،، بعدين تعال وين أول مكان هذا اللي نبي نروح له.
حمودي: إنا مجهز الأمور و مخطط للرحلة وحتى مختار الأماكن اللي نبي نروح لها ،،، إنا بكل بساطة كنت واثق انك تبي توافق لأنك راعى مغامرة ،،، ورحلتنا هذا بتكون احد أهم مغامراتك ،،، إما المكان اللي نبي نروح له فنشاءالله بكره أول ما نحرك أقول لك وين نبي نروح.

كانت الساعة حدود 9 بالليل يوم تمددت جنب النار المشبوبة لأنه و الغريب في الأمر كان الجو شوي برد مع إن النهار حر يصلخ ، بس هذا دائم حال المناطق المفتوحة و المزارع.

و من الصبح و عند حدود الساعة 6 ، حزمت عفشي و انطلقت مع حمودي لأول موقع في رحلتنا لاستكشاف ربوع السعودية ، لقيت الموكب حقنا يضم 5 جيوب في اكس ار و تريله محمل عليها بيت الشعر و بعض الإغراض الاخرا و وايت ماء كبير و وايت بنزين صغير ، يعني باختصار حمودي ما ترك شي الا و جابه معنا.

ركبت إنا و حمودي في أول الجيوب و انطلقنا ، الجيب كان فيه إنا و حمودي و واحد من صبيانة اللي كان يطبخ القهوة و ألشاهي و الفطور في منطقة المراتب الخلفية ، يعني الواحد ما يمديه يقول أبي بيالة شاهي بالنعناع الا و يمدها له الصبي علطول وهي طازجة من البريق اللي فوق القز الكهرب.

أول ما طلعنا من مدينة الرياض ، وكنا ماشين على طريق جده قام حمودي و شغل جهاز الماجلان حقه و دخل الإحداثيات التالية:

22 درجة و 54 دقائق شمال
41 درجة و 08 دقائق شرق

انا عن نفسي ما ادري وشو جهاز ماجلان ولا وشلون تشتغل الإحداثيات هذي ، فسالت حمودي عن المكان اللي بنروح له بالضبط فقال:

إحنا ألان متوجهين إلي جبل بركاني اسمه (حفر كشب) أو زى ما يسميه البعض (حفر وهبا) .

(اضغطوا على الخريطة لمشاهدتها بحجم اكبر)

لو تركز معي يا اسبرانزا في الخريطة هذي بتحصل مدينة الطائف هي اللي تحت على اليسار و الخط الأحمر اللي واصل لها هو خط الرياض ، قبل ما نؤصل للطائف بحدود 150 كم بيجينا مفرق قرية (ام الدوم) على اليمين ، بنطلع مع المفرق هذا و نمشي مع خط معبد حدود 100 كم الين الين يجينا الجبل (الدائرة الحمراء)

إنا بعد ما كمل حمودي كلامه مديت يدي و حطيتها على جبهته قلت يمكن الرجال مصخن ولا شي ، يوم لقيت حرارته عاديه دار بيني و بينه الكلام التالي:

اسبرانزا: جبال و براكين !!! والله يا مقدور شكل لحم التيس اللي كلناه امس مآثر على عقلك.
حمودي: لا اثر فيني لحم التيس ولاش ،،، وكلامي صحيح مئه بالمئه و أنت بتشوف بعينك أول ما نأصل الجبل ،،، لا و أزيدك فيه حدود 50 جبل بركاني صغير حول الجبل اللي إحنا رايحين له لأكن الأهم هو اللي اسمه حفر كشب ،،، و للمعلومة هو ما أطلق عليه اسم حفر كشب إلا لأنه حفره كبيره في وسط الأرض يبلغ عمقها حدود 300 متر و عرضها أكثر من 3 كم ،،، و كانوا الناس في السابق يعتقدون أنها ناتجة عن نيزك طاح في المكان هذا ، لكن البحوث الجيلوجية اثبتت انه بركان فعلي و اثبت انه ثار قبل ميات السنين و هذا هو سبب وجود حمم و أغبره بركانية بكثرة في المنطقة.

الحقيقة كلام حمودي كان منطقي و معقول ، لذلك سكت ولا عاد علقت على الموضوع.

و بالفعل و بعد ما قطعنا حدود 500 كم من الرياض جانا مفرق على اليمين عنده لوحة تقول (ام الدوم) ، لفينا يمين من عند اللوحة و تعدين كم قرية على الطريق و بعدين بدت تظهر لنا جبال صغيره و الأرض صارت تقل صبخة ولكنها في الحقيقة بقايا حمم بركانية و كانت المنطقة مليانة شجر و زرع بشكل ملحوظ.

هذي صوره لحد الجبال الصغيرة ، ولاحظوا الأرض و الشجر.

كملنا مشينا على الخط الزفلت الين وصانا عند منطقة زي الهوية و كان فيه مواصير محطوطة عندها عشان ما تطب السيارات معها.

نزلنا من الجيب ، و مشينا إلي طرف الهوية ، وهالني المنظر ، الحقيقة منظر ولا في الخيال منظر لازم الواحد يشوفه عشان يصدقه.
كنا واقفين عند طرف حفره كبيره ياله الواحد يشوف طرفها الثاني و في قاع الحفرة كانت الأرض بيضا من الملح وعلى بعض إطرافها كان فيه نخل نابت بكثافة و كان الواحد يشوف مزرعة كلها نخل.

هذي صور من طرف الحفرة.

قررنا ننزل و نلف بسياراتنا حوا الحفرة و ندور أحسن مكان نطق فيه بيت شعرنا بحيث يكون حول الحفرة و يكون عند احد إطرافها الصغيرة لأننا نوينا نطب في وسط الحفرة و نستكشفها.

نزلنا عفشنا من عند الطرف الشمالي للحفرة و طقينا بيت الشعر و بعدين انطلقت إنا و حمودي و بدينا نتسلق طرف الحفرة.

هذي صوره لبعض النخل و احني نتسلق طرف الحفرة.

صعود طرف الحفرة ما كان بالشي الصعب لأنه ما كان رفيع بشكل كبير ، و يوم وصلنا للقمة و طلينا في وسط الحفرة من الطرف اللي تسلقناه اكتشفنا انه مو احني بس اللي في المنطقة ، لقينا إعداد كبيرة من الأجانب قاعدين ينزلون لوسط الحفرة من عدة اتجاهات.

هذي صور لوسط الحفرة من الجهة اللي تسلقناها.

و هذي صور للأجانب اللي شفناهم في المنطقة ، ولو تشوفون حجم الواحد منهم قدرتو تقدرون حجم الحفرة.

بعد كذا بديت إنا و مقدور في طريق النزول لأرض الحفرة ، وصدقوني إن النزول مهوب دائم سهل ، والله من مره مسطت إنا و حمودي على وجيهنا ، النزول بالحالة اخذ مننا ما يقارب ساعتين من ضمنها فترات استراحة.

هذول زود أجانب ما شفناهم الا يوم قربنا من قاع الحفرة.

و هذي صور من قاع الحفرة.

أول ما وصلنا لم قاع الحفرة انطلقت انا و حمودي لم وسطها و لم الملح و الموية الموجود في وسطها

هذي صوره للملح و واحد خواجة قاعد يتمشي.

وهذا الملح.

الغريب ان الملح و مع مشينا عليه كان تقل ثلج و تسمع صوته يتكسر تحت رجليك ، و الأغرب هو نبع الموية اللي قاعد يفيض في وسط الحفرة بشكل مستمر ولكن كميات قليلة.

المكان و بصفة عامه إنا ما عمري توقعت انه موجود في السعودية ، وللأسف إني إنا و مقدور كنا السعوديين الوحيدين بين جموع كبيرة من الأجانب ، يعني طلعو الأجانب يعرفون ديرتنا أحسن مننا.

لا يفوتكم تروحون للحفرة لأنها من جد مغامرة رهيبة.

انشاءالله التقيكم في الجزء القادم مع مغامرة جديدة لي إنا و حمودي في منطقة أخرا من ربوع السعودية

(يتبع)

انشر هذا الموضوع