أهلا وسهلا بك إلى المسافر السياحة و السفر.
أهلا وسهلا بك زائرنا الكريم، يسرنا ان تسجل معنا في اكبر مواقع السفر للتسجيل اضغط هنا

بعض البرامج او المواقع المفيده في السفر عن تجربه خاصه

2017-12-16
عدد المشاركات: 1

بسم الله الرحمن الرحيم،

اخواني واخواتي منتدى المسافر،

اخواني الزوار،

بالنسبه لي هذي اوّل مشاركه وباذن الله ماراح تكون الاولى،

موضوع كتبته في منتدى اخر وحاب اني اضيفه لمنتداكم،

لانه متخصص بهالمواضيع، الله يعطيكم العافيه جميعا،

عموماً اما بعد :

عن تجربه شخصيه ممكن فيه ناس تعرف هالبرامج وممكن البعض يجهل، لدرجة انه مايسافر الى بعض الدول لعدم معرفته شنو فيها هالدوله، ناحية مواصلاتها واسعارها واماكن السياحه والى اخره، على العموم هناك برنامج اسمه ( TripAdvisor ) هالبرنامج معروف جداً لدرجه ان بعض المحلّات او اغلبها، تستخدم هالبرنامج لاخذ اراء وتقييم الناس عليها+موقع المكان ورقم التلفون والعنوان بالضبط، وايضا هالبرنامج الحلو فيه، اي دوله تسافرلها، وتفتح هالبرنامج، دايركت ياخذ موقعك ويعلمك شنو الاماكن القريبه منك بهالمنطقه وشنو فيها من نشاطات ومطاعم ومقاهي والعاب وملاهي وكل شيء، ويعلمك اذا هالمكان يحتاج تذكره دخول او لا ويعلمك اسعار التذاكر وانواعها وتقدر تحجزها من البرنامج عن طريق رابط تشعيبي لموقع الحجر، برنامج جدا جميل ويمكن ايضا غفلت عن مميزاته لانه جدا ممتاز، . . البرنامج الاخر وهو معروف عند الجميع وغني عن التعريف اللي هو google map الصراحه هالبرنامج عندي من اهم البرامج في السفر وافضلها من ناحية المواصلات، الحلو فيه عندما كنت في كوريا الجنوبيه و سنغافوره وغيره من الدول تعرفون ان المواصلات ( التكاسي ) لو تبي تقيسها على المشوار الواحد ممكن ياخذ لا يقل عن 7 دنانير لو بتحسبها على سفرتك الروحه والرده للفندق يكلفك مبلغ انت اوْلى فيه، فا قوقل ماب يعطيك خيارات على حسب الديره المتوفره فيها سبل المواصلات مثل الأندر قراوند ( المتروّات ) والباصات، من ناحية المتروات، يعلمك شنو اقرب نفق تروحله على حسب موقعك+ يعلمك شنو الخط اللي لازم تركب فيه المترو واي لون وشنو اتجاهه من ناحية اسم اول محطه تمر عليها متوجها لمحطتك لان كل لاين فيه رايح وفيه جاي، ويعلمك ايضا اذا احتجت تبدّل اللاينات بالانتباه الى اسم اخر محطه تنزلها بهاللاين للتوجه الى اللاين الاخر وهكذا والاسعار جدا رخيصه وليست مكلفه يعني تقدر من ربع دينار الى دينار على حسب الدوله، ومن ناحية الباصات طبعا يعلمك شنو محطة انتظار الباصات اللي توقف عندها واقرب نقطه لك وشنو رقم الباص وشنو اسم المحطات اللي تمر عليها بهالباص ومن ناحية التبديل من باص الى اخر نفس نظام تقريبا المتروات وباسعار رخيصه جداً، وايضا هناك الكثير من مميزات هالبرنامج الاكثر من رائعه، . . نروح حق برنامج اخر وهو برنامج طيران اسمه kayak، هالبرنامج يعلمك على حسب اختيارك لأي ديره بتروح، من ارخص تذكره الى اغلى تذكره، وعلى حسب طبعا، اذا كان طيران مشترك او ترانزيت طويل وهكذا، وايضا تقدر عن طريقه تزيد حمولتك بالطياره لان طبعا بالاونلاين ارخص بكثير من انك اتّوهق بالوزن وتدفع زود عند البوردنغ، عن نفسي استخدمته كثير واستفدت منه بشكل كبير مو بس بحجوزاتي بالديره، استفدت منه ايضا باوروبا واسيا بالسفر للمناطق الداخليه باسعار جدا رخيصه تترواح مابين ال 20 الى 60 دينار خل نفترض من اسبانيا الى باريس ذهاب وعوده، استخدمته للامانه يوم انّي ملّيت من الديره هههه وحبّيت اغيّر اشوف شنو الدول القريبه عندي واطلعلها عن طريق حجوزاتي بهالبرنامج وهو مضمون من تجربه شخصيه، . . وايضا الغني عن التعريف هو موقع البوكنغ حجزي كله عليه وهناك مواقع كثيره،ومن رأيي الشخصي البوكنغ افضلها، يعلمك اذا فيه خصومات بالفنادق وتقدر تشوف وين موقع الفندق بهالمنطقه وشنو اقرب محطة قطار او اندر قراوند او شارع حيوي قريب من فندقك او سكنك بشكل عام والى اخره، وفيه شغله يغفل منها الكثير حاب انبهكم عليها، قبل لا تحجز الفندق ادخل على تفاصيل الغرفه او الشقه لمعرفة مساحتها عشان ماتنصدم بصغرها هههه، . . واخراً فيه برنامج الى الان ما استخدمته علّمني عليه صديق جزائري عايش في فرنسا، لان البوكنغ مو كل الشقق يطلعلك اياها، فا هالبرنامج فيه مميزات للامانه نسيتها لكن يعلمك شنو الشقق المتوفره بهالمنطقه او بيوت ارضيه للاجار والى اخره ، بعطيكم اسم البرنامج واللي يجربه يفيدنا بالمعلومات هذا اسمه ” Airbnb ” كان هذا اللي عندي للأمانه وسامحونا على القصور واذا كان هناك شي يمكن غفلت عنّه او جديد راح اعلمكم عليه وافيدكم فيه باذن الله تعالى واللي حاب يستفسر عن بعض الامور لبعض الدول اللي زرتها مثل ( كوريا الجنوبيه – وسنغافوره – لندن – جزيرة ايبيزا ( اسبانيا ) – فرنسا – تايلند) حنا متواجدين وحاضرين، وسامحونا عالقصور واتمنّى انّي فدتكم بشي ولو بالقليل

انشر هذا الموضوع

اكتب رد

شاركنا برد على الموضوع

avatar
  اشترك  
بلغني اذا
aboras
مشارك
aboras

يعطيك العافية 


ZETZO
مشارك
ZETZO

اشكرك

بحر الهوى
مشارك
بحر الهوى

الله يعافيك

amer511
عضو
amer511

يعطيك العافية ماقصرت
فعلا هذة البرامج في غاية الأهمية
والمسافر لا يستغني عنهااا . وهي توفر الكثر من الجهد والمال
اشكرك علي الموضوع المفيد .
وننتظر منك المزيد …