New Year In The Gold Coast

السلام عليكم
تحياتي لكم يا شباب طبعا زي ما وعدتكم قبل بتقرير صغير
عن أجازة رأس السنة أو احتفالات رأس السنة
هنا في استراليا
في البداية الإجازة كانت لمدة عشرة أيام لكن إنا فضلت
إني اجلس في البيت واستغلها بالمذاكره ولا اطلع ألا يوم
الأحد, قررت مع زميلي و رفيق دربي في رحلة جاكرتا أننا
نروح لمنطقة القولد كوست على المحيط الهادي وبالتحديد
service paradise
المنطقة جميله جدا و هي مقصد للسياح من كل بلاد العالم
ويتواجد فيها الخليجين بكثره في فتره الصيف
بصراحة ما خططنا للرحلة بالشكل المطلوب لأنه لازم ترتب
حجز الفندق من بدري يعني قبل شهر إلى شهرين لكن هذا
اللي صار , وصلنا بحدود الساعة 3 عصرا أخذنا لفه على كم
فندق لكن من دون نتيجة , عشان كذا قررنا أننا ما نضيع وقت
أكثر وقلنا نحضر الاحتفال وإذا قدرنا نرجع لمدينتا ولا نمنا على
الشاطئ والديره أمان ولله الحمد

نزلنا لشاطئ وكان مره مزدحم طبعا السباحة ممنوعة بسبب
الأمواج العالية وكل الموجودين يسوون رياضة ركوب الأمواج وحنا
الله يخلف علينا سباحه مانعرف حدنا نتخبص في المويه لا وخايفين
نغرق في المويه

انا موجود في الصوره هذي لكن الامواج مغطيتني

فيه علامات تحدد قوة الموج وفرق أنفاذ متواجده 24 ساعة
وأيضا منقذ على دباب بحري يوجه الأشخاص ويرجعهم أذا
دخلوا البحر بزيادة , جانا أكثر من مره يقول “ياورعان ارجعوا
وراء شويه وحنا ولا معطينه وجه “
وهذي صوره لفرق الأنقاذ الله يكفينا الشر

وألين غابت الشمس وحنا نتخبص في المويه, الأمواج
مره جميله وبصراحة التخبص قصدي السباحة ممتعه فيها

رجعنا السيارة وغيرنا ملابسنا عشان الاحتفالات, ما قلت لكم أن
المنطقة هذي المواقف فيها بفلوس عشان كذا وقفت الفانتوم
حقي في مواقف احد المجمعات التجارية و كان السعر حوالي
ال 20 دولار من الساعة 3 العصر إلى الساعة 4 الفجر
فعاليات الحفل كانت عباره عن
مرقص مفتوح على المحيط مع DJ وشاشه كبيره فيها العد التنازلي
العاب ناريه من الساعة 9 إلى 12 منتصف الليل , في رأس كل ساعة
عرض لمدة 15 دقيقه

الشرطة كانت منتشرة في كل مكان الوضع أكثر من رائع , الشئ
الوحيد اللي استغربت منه هو انه الشراب كان مسموح فيه على
الشاطئ وبشكل علني لأنه في زيارتي السابقة كان ممنوع يعني
لازم تروح محل ما أحد يشوفك لكن في هاليوم كان مسموح على
الشاطئ بس بشرط انك ما تطلع من منطقه الشاطئ ولا تروح
للسوق أو المطاعم المحيطة وإذا سويت الشئ هذا الشرطة
يمسكونك ويخلونك تحطها في ألزباله قدامهم

أبي اذكر لكم موقف طريف صار لنا مع طفله صغيره بسم الله على قلبها,
كنا جالسين وبعد ما بدت الموسيقى قمنا نرقص سامبا والناس تتجمع
علينا اللي يصور واللي يرقص معنا بعدين رقصنا رقصه شوي غريبه
اسمها الضفدع ونفس الطريقه تجمعوا اللي يصور واللي يرقص المهم
الاموره هذي جت ورقصت معنا وعلمناها كيف ترقص , قالت أنا أبي
أعلمكم رقصه المهم علمتنا رقصتها و رقصنا معها و الناس تناظر وتصور
المهابيل اللي يرقصون مع هالطفله جتنا الأم والأب و راحت هي وجابت
خواتها ” صغار يا جماعة الخير لا احد يفهم غلط ” قبل حنا عطيناها قلايد
على شكل أنوار يمكن عطيناها خمس راحت و وزعتها على خواتها
وجابتهم معها الأم قالت لازم نمشي ولا راح ترقص البنية كل الليل
“شف الاهتمام لو أنها سعوديه كانت قالت خلها ترقص وافتك من إزعاجها”
راحت البنية وأخذت قلبي معها ” حبيتها يا شباب”:36_2_18:
هذا أنا مع حبيبة قلبي:smile11:

وعلى الساعة 12 بداء العد التنازلي ثم الألعاب النارية , وبوسات
تجيك من كل جهه وآنت بعد لاتصير بخيل وزع دام الشغله ببلاش
حاولت اني انزل لكم مقطع فيديو على نهاية العد التنازلي لكن ما قدرت
بعدين طلعنا إلى ملهى ليلي و كملنا السهره هناك إلى الساعة 3
وبعدين مشينا إلى مدينتنا وشلون وصلنا ما ادري لكن الله الساتر

أتمنى التقرير أعجبكم مع أن الرحلة كانت قصير
وما رتبنا لها بالشكل المطلوب