رحله دراسيه الى جـ Sfu ـامعة سايمون فربزر في فانكوفر

بسم الله الرحمن الرحيم

جامعة سايمون فريزر

ملخص الرحله

السلام عليكم

تحياتي لكم جميعا

من كثر ما قريت عن فانكوفر قلت الا اروح واشوف بنفسي وش القصه
بصراحه لحسة مخ يعني اللي مارح لفانكوفر راح عليه نص عمره

في ها الموضوع مار اح اتكلم عن جمال فانكوفر ولا جوها ولا ناسها
اظن اسبرنزا ما خلا لنا شي
لذااااا
راح اتكلم عن برنامج الدراسه حقي والجامعه كاضافه لسلسلة المعلومات عن فانكوفر
وهذا افضل من تكرار المعلومات

ليش فانكوفر؟

كنت ابحث عن مكان ادرس فيه لغه وكان فيه خيارات كثيره لكن كل دوله لها مميزات وعيوب
بس كندا تعتبر حاليا افضل مكان للدراسه من وجهة نظري ما عدا بعد المسافه
ومن ابرز الايجابيات في فاكوفر
الامان ( الكنديين عباره عن خليط من اعراق مختلفه عشان كذا هم مايستغربون الاجانب لان كل واحد يعتقد ان الثاني كندي زيه “سيم سيم”)
الطبيعة والجو: فوق الوصف
الرخص :تعتبر معقوله بالمقارنة بالمدن السياحيه الاخرى
طيبة اهلها: بصراحه شي ملحوظ ، بالعربي اجاويد
اللغه (الاكسنت): كلهجه فكما هو معروف انهم يتكلمون بلهجهة امريكا الشماليه يعني زي الامريكان

الطيران

حجزت على خطوط الكاثي باسيفك www.cathaypacific.com
وكانت الخطه اني اطلع لهونج كونج (طيران 11 ساعه) واقعد يوم في هونج كونج واطلع بعدها لفانكوفر(طيران 13 ساعه)
وهذا اللي حصل في العوده، بس الروحه تبهذلنا لانه صارت ظرووف واضطرينا نواصل طيران يعني بالضبط من البحرين لفانكوفر 30 ساعه طيران يعني رحنا فيه ، لدرجة انا لما وصلنا ماقدرنا نلبس الجزم حقتنا اكرمكم الله من كثر ماهي متنفخه ارجولنا

لذااااا
ما انصح احد يطلع عن طريق هونج كونج الا اذا كان ناوي يقعد فيها يوم اوكثر في هونج كونج
بالنسبه لخطوط الكاثي باسفك اعتبرها جيده ما فيه ملاحظات او مميزات ممكن سعر التذكره 5480 ريال واعتقد انه سعر جيد

ليش سايمون فريزر؟

بصراحه دخت السبع دوخات علشان احصل هالجامعه
طبعا المعاهد التجاريه على قفا من يشيل بس تلقى الدراسه فيها لك عليها
ولكن الجامعه لها منهج خاص، لان اللغه تعتبر مرحله من مراحل الجامعه:

المنهج: انا كنت ابحث عن برنامج يركز على المحادثه والاستماع وهذا ما وجدته
العرب: كنت ابحث عن مكان ما فيه عرب وفعلا ما كان في الجامعه في عز الصيف الا ثلاثه انا وخويي و واحد سعودي من جده كان في البدايه في معهد خاص وتوه محول للجامعه
الانضباط: الحضور شي اساسي في هالجامعه يعني الدعوه مو مفلوته زي بعض المعاهد على حد علمي حضرت والا ما حضرت ماحد دارى فيك

موقع الجامعه
موقع الجامعه الرئيسي في بارنابي Burnabe وهي تعتبر مدينه جامعيه لكن اللي يهمنا هو مركز اللغه الخاص بالجامعه في الداون تاون في فانكوفر

يقع مركز اللغه الخاص بجامعة سايمون فريزر في الداون تاون على شارع هاستنج زي منو شايفين على الخريطه

موقعهم مميز جدا لانه يقع في الداون تاون وفي برج كبير يطل على البحر الدور الاول كله مطاعم يعني ما تبلش في الاكل وفيه مطعم لبناني اسمه كازبلانكا تشتغل فيه عائله لبنانيه مسلمه وعندهم شاورما وفلافل ودجاج ورز وكفته وكله حلال .
الدور الثاني والثالث والرابع خاص بالجامعه
هذه صورة البرج

هذا المنظر تم تصويره من داخل الجامعه

تقع الجامعه امام محطة “ووتر فرنت” Waterfront يعني من القطار على الجامعه بدون باصات

انا كنت ساكن في منطقة بارنابي Burnabyوكنت اطلع في القطار من محطة “مترو تاون” Metrotown الى “ووتر فرونت” في عشرين دقيقه

وللمعلوميه في فاكوفر احلى شي المواصلات تاخذ بطاقه شهريه بقيمة 95$ مايعدل 350 ريال( خاص بمنطقتين واظن ماراح تحتاج اكثر من مطقتين Two Zones ) وتركب الباصات والقطار طول الشهر بها البطاقه وين ما تبي
وهذي صورت المترو او القطار او سمه زي ماتبي وهو عند الساينس وورلد

برنامج الدراسه

الجامعه لاتعتمد على الكتب ولا يوجد هناك اي كتاب راح تشوفه
المنهج يعتمد على المواضيع اليوميه (الحياة اليوميه)
مثل نشرة الاخبار او الجرايد او الاحداث اليوميه او الافلام او الاغاني ………………….
تعتمد الجامعه على اسلوب المحادثة والعمل بطريقة الورش يعني كل المناهج تعتمد ورش عمل
بالعربي هم يحاولوا انك تفكر بالانجليزي مش تتكلم كمترجم
ببساطه لازم تتعرف على العادات والتقاليد والثقافه الغربيه بشكل عام ليسهل عليك تعلم اللغه
يوجد في الجامعة ثلاث برامج صباحيه تكون تفرغ كامل
وهناك برامج مسائية اللي تستمر لمدة 10 اسابيع وتكون تفرغ جزئ يعني للموظفين

البرامج الثلاث هي:

4 اسابيع وبتكلفة 1300$
ولا يوجد فيه اختبار تحديد مستوى يعني بيكون معاك في الفصل ناس ماتعرف شي وناس افضل منك بس مافيه اختبار في اخر الشهر

8 اسابيع وبتكلفة 2600$
ويوجد فيه اختبار تحديد مستوى وعلى اساسه يتم وضعك في المستوى المناسب وفي نهاية المده فيه اختبار

12اسبوع وبتكلفة 3900$
ويوجد فيه اختبار تحديد مستوى وعلى اساسه يتم وضعك في المستوى المناسب وفي نهاية المده فيه اختبار

شروط الدراسه في الجامعه
– ان يكون الطالب ملم باساسيات اللغه يعني يعرف يقرأ ويكتب( بالعربي يفك الخط)
– ان يكون عمر الطالب اكثر من 18 سنه

مستويات الدراسه في الجامعة

يوجد في الجامعه اربع مستويات راح يتم تحديد مستواك عن طريق اختبار في اول يوم
مستوى مبتدئBasic (Low Intermediate):
مستوى متوسطLevel I (Intermediate):
مستوى فوق المتوسطLevel II (High Intermediate):
مستوى متقدمLevel III (Advanced):

الجدول الدراسي
يبدا الدوام يوميا من الساعه 9:30 صباحا وحتى 4:30 عصرا وفيه ساعه غداء من 12:30 حتى 1:30 وبين كل محاضره ومحاضره 10 دقايق (راعين الزقاير تهمهم هالعشر)
يوجد معمل حاسب الي (انترنت) مفتوح لجميع الطلاب طوال اليوم ، يعني مع الاقلاع اون لاين

وهذا هو مثال للجدول اليومي في الجامعه

هذا شرح موجز جدا لبعض المواد علما بان طابع الترفيه هو السائد في جميع المحاضرات واقصد انه مع ان المواضيع فيها نوع من الجديه والاهميه الا انه لا يمكن ان تصل الى مرحلة الملل لان الدراسه هناك بشكل عام تعتمد على النقاش المفتوح بين الاستاذ والطلاب وبين الطلاب انفسهم وهذا من خلال تجربه شخصيه. مستحيل تجد محاضره واحده يكون فيها المدرس يتكلم والفصل ساكت. المدرس يعطيك فكره او موضوع ويبدا يدير الحوار مع الطلاب
Canadian Studies
في هذه الماده راح تتعرف على المجتمع الكندي بشكل عام من حيث التاريخ والموقع الجغرافي والاقتصاد ….. وذلك لمساعدتك على فهم عادات وحياة الكنديين.
Composition, Grammar and Written Structure

وهذي الماده تساعد الطالب على تحسين مستوى الكتابه ، بحيث يستطيع الطالب التعبير عن افكاره بطريقه تتوافق مع نمط الكتابه المتبع امريكا الشمالية.

Literature

هذه الماده راح تساعدك في القراءه بشكل عام وقراءة مقالات الكتاب الكنديين بشكل خاص. كذلك تحسين مستوى الفهم اثناء القراءه وذلك بفهم القيم والقضايا المؤثره في الادب الكندي

Listening Practice

هذه الماده تساعدك على فهم كلام الشارع اليومي، من خلال فهم الكلمات والعبارات اليوميه الدارجه في الشارع. وهذه الماده تكون من خلال مشاهدة افلام او اغاني او دعايات ………….

News Media and Social Issues

هذه الماده تجمع بين الاستماع والقراءه من خلال فهم قضايا واخبار الحياه في الغرب. كذلك تحسن القدره على مناقشة قضايا المجتمع الكندي.

Oral Skills

هذه الماده تساعدك على تعلم النطق الصحيح للحروف الانجليزيه من خلال معرفة مخارج الحروف الصحيحه وكذلك بالنسبة للكلمات والجمل وهذا ما يسهل عليك التحدث بطريقه مفهومه ومشابهه للاكسنت الكندي. كذلك ستتعرف على العديد من مهارات الاتصال في هذه الماده

مواد التخصص

يحق لكل طالب في برنامج ال 8 اسابيع وال 12 اسبوع اختيار ماده يرغب في التركيز عليها ( مثلا انت عندك مشاكل في المحادثه وتبغى تركز عليها، يكون هناك 3 ساعات اسبوعيا تقريبا لهذه الماده بناء على رغبتك)

الرحلات
غالبا مايكون يوم الجمعه وهو اخر يوم دوام في الاسبوع يكون رحله من الساعه 9:30 وحتى 12:30 . الرحلات كانت اسبوعيه في البرنامج اللي انا حضرته وكانت ممتعه مره رحنا الى جامعة UBC وهي تعتبر من اقوى الجامعات هناك ومره طلعنا لمتحف ويوم للجسر المعلق . وتكون هذي الرحلات جزء من الدراسه.

الرحلات الاسبوعيه
تنظم الجامعه رحلات يوم السبت رحلات باسعار رمزيه وهذه الرحلات لاتعتبر جزء من الدراسه ولكن تقدر تقول نشاط لامنهجي كل واحد بكيفه ( وهذي مناسبه للي اول مره يسافر مالك ومال الشقا خل الجامعه تمشيك مع شله ومع كندي عارف الدروب وتمتع بالرحله وخل الباقي عليهم)

هذي صورة لاحدى رحلات الطلاب

هذي صوره لرحلة سياكل في ستانلي بارك

السكن
لايوجد في الجامعه سكن ولكنهم وعن طريق موقعهم يوصون بالسكن عن طريق شركه First Choice International Placement
وهذا موقعهم للي يبغى معلومات اكثر http://www.fciplacement.com/
واللي يبغي يحجز او يبغى معلومات اكثر يراسلني وانا في الخدمه

المدرسين
95% من المدرسين عندهم من الجنس اللطيف جميع اللي درسوني انا مدرسات وعلى مستوى عالي من اللباقه والخلق والتعاون

الطلبه

غالبية الطلبه من شرق اسيآ (كوريا-اليابان – الصين – تايوان)
الفصل اللي كنت فيه
10 من تايوان
1من اليابان
1 من كوريا
2 شنب من السعوديه

طريقة التسجيل في الجامعه

للمعلوميه لايوجد مكتب او وكيل للجامعه في المملكه وهذا نوعا ما ميزه مو عيب ، بحيث يكون الطلبه العرب هناك قليل ، وهذا اللي لاحظته اكثر الطلبه يقول مابغي يكون هناك عربي وانا اولهم
على العموم انا من كثر ما حنيت عليهم بانه ليش مالكم مكتب في السعوديه؟
قالوا تبغى تصير وكيل لنا خذ الوكاله ولاتزعجنا !! وبصراحه مره حسيت اني توهقت ومره احس انه مكسب لي اني اكون وكيل لمثل هالجامعه.
بعدها طلبت منهم يشرحون المطلوب مني كوكيل لاني مالي في الشغله هذي . انا ماعندي مكتب ولا لي في البزنس ولذاااا
فانا شغلتي كمرشد طلابي فقط (مالي علاقه بالامور المالية) يعني اساعدكم في الاجرءات والتسجيل في الجامعه والاجابه على الاستفسارت وكذلك حلقة وصل بينكم وبين الجامعه مجانا بدون ما تدفعون اي شي (حقي يوصلني من الجامعه )

طريقة الدفع

احفظ قروشك ولا تعطي احد قرش ما يستحقه
بالنسبه للفيزا روح لDHL وعب النموذج من عندهم وتجيك الفيز خلال 3 اسابيع
بالنسبة للجامعه عب النموذج من الموقع وادفع بالفيزا او الماستر كارد او حواله عن طريق البنك لرقم حساب الجامعه

https://***form.sfu.ca/cgi-bin/***Ob…lc.application

بالنسبة لشركة السكن برضو نفس الكلام من خلال الموقع التالي
http://www.fciplacement.com/app_homestay.html

وللمتابعه فقط تقدر تراسلني وانا اساعدك باللي اقدر عليه انشاء الله
ملاحظه اخيره توجد خانة اسمها Agent في موقع الجامعه والسكن اذا ودك تحط اسمي (Khaled) اكون لك شاكر، واذا ما ودك طنش ولا تشيل هم

نصيحه هامه وعامه
ياجماعه حنا في عصر الانترنت شغلة الوكيل انتهت من زمان اي مكان في العالم واي جامعه (جامعه او شركه او مكتب او اي شي) في العالم ادخل على الموقع حقهم واطلب الخدمه منهم ولا تنتظر وكيل او غيره بالعربي انت منت في حاجتي ولا حاجة المكاتب خل اتصالك مباشر في الجامعات وريح مخك
انا حجزت في الجامعه والسكن وفندق في هونج كونج بالانترنت مضمونه ويجيك التاكيد بالايميل ولم اواجه اي مشكله

وانكانك تبغى مساعده انا برضه حاضر .

اتمنى اني اكون افدتكم بها التجربه الشخصيه واذا احد عنده استفسار او ملاحظه لا يرده الا الكيبورد

ودمتوا سالمين،،،،