نصايح للي يحب بنقلور

السلام عليكم ورحمة الله وبركاتة

بحكم ماشفته بعد زيارتي لبنقلور احب اقولكم نصايح لوجة الله

بلد من ناحية الامان من بعد الله نعم هي امنة بوجهة نظري

السكن متوفر حسب الرغبة سواء شقق او فنادق على المستوى اللي تحب وكل شي بحسابه طبعا

المواصلات الافضل تاخذ لك سايق من الصبح الى المساء

وسعره من 100 لغاية 200 ريال باليوم على حسب نوع السيارة وحجمها ونت وشطارتك

الاكل متوفر عدة مطاعم سواء عربية او ايرانية وغيرة الكثير

النصايح

حاول في البداية قبل ان تسافر يكون لك اتصال بأي طريقة مع الدكتور اللي حاب تعالج عنده

عشان تستفسر عن عن حالتك هل لها علاج او شكثر الفترة اللي تحتاجها

في حالة ماقدرت توصل للدكتور هذي بعض النصايح

1_اذا حجزت الفندق او الشقة حاول في البداية لاتزيد المدة اكثر من3 ايام حتى تتأكد من مستوى السكن

وتعرف العيادات اللي راح تعالج فيها والمدة اللي يحتاجها فترة علاجك

وعلشان تكون قريب منها او انك تتوسط بينها عشان تختصر وقتك من زحمة الطريق

وبخصوص اللي فترة علاجه طويلة الافضل ياخذ له شقة مع طباخ او طباخه

2_حاول تسوى فحوصاتك قبل كل شي وبعدها اطلب مقابلة الطبيب اللي اعتمد الفحص وخله يشرح لك

ويحدد لك حالتك وشنو تحتاج بالضبط ومن بعدها تكون عندك فكرة بخصوص حالتك

تبداء بعدها مراجعة العيادات اللي تحتاجها

3_ السايق حاول كثر ماتقدر تتفق معاه بعد ماتخلص من وتعتمد مع الدكاترة اللي راح يباشرون علاجك

لكي توفر على نفسك عمولة السايق اللي توصل تقريبا 10% من تكلفة علاجك في العيادة الواحده

4_ الاسعار يا أخواني في البداية لاتتصورون انها رخيصة جداً وحطوا في بالكم المفاصل شي أساسي جداً

في كل عيادة مثلاً بعض العيادات عادي يطلب منك في البداية 100 الف روبية انزل معاه الى غاية 50 الف روبية

عادي وخلك صامل على سعرك وعطه كم عذر وانه ظروفي ماتسمح والى اخرة من الاعذار اللي خابرينها

وطبعاً انت وازن الوضع واذا بغيت تصعد بسعرك خلك تصعد بالكثير خمسة الاف روبية عن سعرك طقة طقة

الى ان يتم الاتفاق وبعدها اعرف الاوقات اللي راح تعالج فيها عشان تقسم وقتك اذا عندك كذا مرجعه لاسمح الله

5_بخصوص الاكل حاول تاخذ معاك من ديرتك اللي تحب مثل التمر والقهوة او بعض الاجبان لانه توفرها يكون صعب شوية

اما بخصوص الباقي متوفر بكثرة من خضرة وفاكهة ولحوم بانواعها من فضل الله

و أي استفسار انا حاضر وبالخدمة لكم يأخوان في اللي اقدر علية

واعتذر عن اي شي غاب غني ماذكرته

مابي الا دعواتكم وعسى الله يشفي مرضاكم

واللي حاب ينقل الموضوع محلل الى يوم الدين