مقارنة بين تايلند واندونيسيا (تقرير ومقارنة عن تجربة)

بسم الله الرحمن الرحيم ..

طبعا اول شي احب اتقدم بجزيل الشكر لاخواني اللي ساعدوني

بموضوعي اللي طرحته قبل 9 ايام تقريبا ..كل الشكر

https://www.otlaat.com/almosafr/forum/showthread.php?t=35529

واليوم حبيت انزل موضوع لكن مميز شووي لان القسم ماشاءالله كله تقارير

وانا مدة اقامتي باندونيسيا كانت قصيره فلذلك تقريري لن يكون شي جديد

عشان جذي حبيت يكون مقارنه وليس تقرير مصور :

1-اندونيسيا ( جاكرتا)
2-تايلند ( بتايا)

حتى تعم الفائدة و اوضح لكم الفرق :

*طبعاً نبدأ بالاسعار التذاكر ومدة الرحلة في الطياره:
نفس الشي سعر التذكرة ومدة الرحلة اندونيسيا اطول بساعه تقريبا

*الاجواء :

متقاربة ولكن اجد جاكرتا افضل لقلة الرطوبة فيها في هذا الوقت

-ملاحظه : تايلند جوها معتدل طوال العام = لا صيف ولا شتاء عندهم ولكن رطوبه جوهم وامطار

*الطبيعه :

جميعهم طبيتعهم جميله ولكن اجد في اندونيسيا طبيعه اقوى واجمل وتلاحظها من اول وصلك للمطار ماشاءالله

*الاسعار :

تايلند ارخص ولو نقارن مثلا فندق فيسي (بتايا-تايلند) بفندق اوسس امير(جاكرتا -اندونيسيا)

نجد اليوم في فيسي بـ 7.500 دينار كويتي تقريبا وانما اوسس امير 15 دينار تقريبا<< من كاها -ملاحظه : سعر الفندق دبل معه العلم كلهم في نفس المستوي *التسوق :

الصراحه بتايا قليله مجمعاتها ولكن تحسها شغل مرتب وحلو عكس جاكرتا مجمعاتهم تضيق الخلق وغاليه

*الفنادق :

-تايلند (بتايا) كثيره ومحد يكلمك وامان وماتدفع الا اذا تبي تسافر
-اندونيسيا (جاكرتا) امان والنظافه جيده جداً بس ازعاج كل يوم لازم تدفع لهم\
وان مادفعت قفل البطاقه حتى الغرفه ماتقدر تفتحها <<بالنسبه لاوسس امير بس الامان 100% *ابزر العيوب :

1-تايلند ( بتايا):
-الروائح الكريهه تجدها في الشوارع وانت تمشي
-لا تصلح للعوائل وشهر العسل
-قليله المجمعات فيها
-ماتسمع فيها اذان وكلها بوذا
-يمرك العربات المتنقله (ابو صراصير وحشرات )

2-اندونيسيا ( جاكرتا):

1-الصراحه ما تحس بالامان وكثر النصب فيها وامثله على ذلك:
-ماتمشي الا جوازك او نسخه منه وياك وان صادوك سالفه كبيره
-لا ضاعت الورقه حقت الفيزه تدفع غرامه غير وانت داخل -تايلند الفيزا مجانيه
-النصب بتحويل الدولار لروبية كل محل يعطيك سعر ويفرق عن الثاني واذا الفلوس فيها كسر خفيف خصم منها << ودي افهم ليش ؟؟؟؟
2-تحتاج التاكسي بكل مكان تبي تروحه وهذا طبعا يخليه يلعب عليك صح
3-عدم قرب الاماكن من بعض ماتقدر تروح مشي من مكان لمكان
4-اللغه الانجليزيه تعبانه عندهم يمكن يعرفون عربي اكثر من الانجليزي
5-تحس الشعب مو مررررح حيل نفس تايلند

* ابرز المميزات :

تايلند ( بتايا)
1-تصلح للشباب من الدرجة الاولى وفيها اماكن ترفيهه واجد ورحلات كثيره
2-رخص الاسعار فيها
3-تقدر تمشى وتروح وتجي بدون حاجة لتاكسي كل شي قريب عندك
4-احسها امان اكثر من جاكرتا (راي شخصي)
5-محد له شغل فيك تسويي اللي تبي وتلبس اللي تبي ماحد يخزك
6-تحس بالفرحه والوناسة والدليل مايضيق خلقك الا لمن تركب الطياره بترجع
7-انصح فيها الشباب والعكس للعوائل

اندونيسيا ( جاكرتا)
1-تصلح للعوائل حيييل وهم تصلح للشباب بس للعوائل من الدرجة الاولى
2-مافيها مناظر مخله بالاداب بالشوارع
3-واجد من الشعب محجبات فلذلك اذا كانت عائلة والحرمه متغطيه مايقعدون يطالعونها يستغربون عادي
4-وجود الاماكن الترفيهيه ورحلات السفاري الى الغابات
5-تسمع الاذان وهذا الصراحه شي يوسع الصدر ..حتى لو كنت عزوبي :9303f68a42:
6-قلة الديسكوات والنوادي الليله :55215075d4: وهذا يصب في صالح العوائل
7- بلاد جميل وتستحق الزيارة حقاً
8-انصح فيها العوائل والشباب ايضاً فهي متعه للجميع
9-الشعب طيب مافي شغل عصابات بس ابعد عن ستوديم
طبعا اتقبل النقد بكل صدر رحب

بأنتظر ارائكم