مغامرات المهابيل في بلاد الارخبيل

في يوما من الايام وفي مدينة الرياض بالتحديد المعروفه بجوها الغائم
والممطر والمائل بل والمنسدح الى البروده في بعض الاحيان وبالذت في فصل الصيف
خرجت من مقر عملي بعد ان سلمت نوبتي حيث اعمل سوكرتي (حارس)
في احدى الشركات وامتطيت صهوة سيارتي الوانيت ددسن غماره ابو مشعاب
بدون مكيف والتي قمت بشراءها قبل شهرين من جارنا ابو مناحي :1103:
بالتقسيط المريح ولا عندي نيه اسدده :9303f68a42:
وكما جرت العاده قبل وصولي الي البيت امر على البقاله
القابعه في احد زوايا الشوارع القريبه من منزلنا لاشتري علبة لبن المراعي
ابو ريالين سابقا واربعه ريال حاليا:6b5bf50998: لاطفىء بها عطشى وللمعلوميه
فهي تعمل كبديل لمكيف الساره وتغنيك عنه. وجرت العاده ايضا ان اشتري جريده
لزوم التميلح والكشخه قدام عيال الحاره:6b08cdd459: او بالاصح استعيرها
من العامل في البقاله باتفاق مسبق واعيدها اليه في المساء بعد الاطلاع على
الصور الموجوده فيها فقط لان ماعندي وقت للقراءه . مقابل فتح حساب عنده والتسديد اخر الشهربعد المماطله والتملص . واثنا توقفي امام البقاله انفة الذكر واذا بصديق
الطفوله دحيم متكي بجانب البقاله في عز القايله الله لايبلانا ومستمتع بمنظر خلاب
يمر من امامه وهو جدول ضرب قصدي جدول مياه صرف صحي جدا يزين هذا الشارع
ويكاد لاينقطع طوال ايام السنه فسلمت على صديقي دحيم ولاكنه لم يعرني اية اهتمام
ولم يرد علي كالعاده فلم استغرب منه هذا التصرف فتركته ودخلت البقاله
واشتريب اللبن والجريده + مالبورو احمر قلاب واثناء خروجي اذا بالاخ دحيم ينهض من مكانه ويقابلني مبتسم شدوقه واصله اذانه على غير عادته:11:
فاراد مني ان اوصله الى بيتهم وما صدقت خبر وقلت له اركب وبعد توقفي امام بيتهم
مد يده الى مسجل الساره وقصر على صوت الفنان بشير محمد شنان
ياليت سوق الذهب يفرش حرير :9303f68a42: . ثم قال لي وهو يلتفت يمين ويسار
وبصوت منخفض : ياصديقي العزيز دغيمان ودي تخاويني في سفريه برا انا وانت وبس
فقاطعته بوضع يدي على جبهته رغم كثرة العرق المتساقط منها من شدة الحر:1125:
وذا بحرارته طبيعيه قلت له سلامات انا وانت فهمناها لاكن البس( القطو)
وشهوله يسافر معنى مسوي فيها فاهم فلم يكد كلامي ينتهى
الا وخشتي ملزقه في القزاز من اثر كف تلقيته على العلباه :14: …..
اقول لك يادلخ انا وانت فقط فهمت ولا افهمك . قلت لالالا فهمت الله يرحم والديك
لاكن وين تبينا نسافر برا يعني برا الرياض جده ؟ خلاص قدام . قال يافغره ياافتش
اقول نسافر برا تقول جده والله لو مانت صديقى وابتليت فيك لافتح في وجهك
ذا الى تقول براد عزوبيه محروق لافتح فيه شوراع افهم ياثور تسافر معي اندونيسيا
ولا مانت مسافر معي ؟ عاد هو صاحب سفريات لاندونيسيا ومعروف بالحاره
وسمعته زي الطين لان الي يسافر في مجتمعنا الله يعينه على كلام الناس
يصير شغلهم الشاغل وقضية العصر وقضية بعد المغرب والعشاء ….
بصراحه لم استوعب الامر انا اسافر خارج وطني الحبيب لا احب سواه
وش يقولون عني الناس .. فطلبت من صديقي دحيم مهله حتى افكر في الموضوع
فوافق على ان اوافيه بالرد سريعا . ثم ودعنى صديقي بكلمة اقلب وجهك يافغره
ثم ذهبت الى البيت وبعد ان ضربت في الكبسه حتى طقطقة اضلعي << مرادف وحنيني لك يكوي اضلعي .فكرت في كلام دحيم قلت ياولد خلاص انا بسافر بس كيف اقنع الوالد
رحت يم الوالد في الصاله ولقيته متكي ومروق بعد الكبسه وجالس قدام مكيف
المويه وبراد الشاهي قدامه :dracula: . طبعا في بيتنا مبداء الديمقراطيه وحرية
الراى والاقناع هو السائد ومن هذا المنطلق درعمت ادربي راسي يم الوالد
الله يحفضه وجلست بجانبه وما ان لامست الارض حتى نهرني باعلى صوته قم قم
وريحة رجولك ذا الخياس جعلك البلا رح غسل( كراعينك) يامروح فابتعدت عنه قليلا
واستجمعت قواي العقليه والبدنيه لتلقي الضربات والللكمات في حالة الطوارى
ففاتحته في الموضوع . بابا انا سوف اذهب مع دحيم لاندونيسيا فرفع نظره لي
وامسك ببراد الشاي فتوقعت حينها انه سوف يسكب لي بيالة شاي علماشي
وفي لمح البصر الا وبراد الشاي المنعنش حلا برا ماشي خمسة الاف متر في الثانيه
متجها الى خشتي وبفضل الله تمكنت من (الروغان) وقفزت كلغزال
متجها الى الحوش ولم اخطو خطوتين الا وبيالة الشاي تدغدغ علباي
وانواع السب والشتم يدغدغ مسامعي :36_2_18: طبعا مشهد الحوار الديمقارطي
الي صار بيني وبين الوالد الله يحفظه لم يثنيني عن ما عزمت عليه
قلت مالك الا هيفا قصدي مالك الا رقيه الي هي الوالده الله يحفظها
وبعد استرداد النفس بسبب هذا الحوار الهادي والمقنع بيني وبين الوالد
تسللت على المطبخ وامسط الوالده بذيك البوسه على الهامه..
قالت هاه ياوليدي وش عندك قلت لها ودي اسافر لم اندونيسيا تكفين يمه
اقنعي الوالد يسمحلي اسافر تكفين تري تكفين تهز الحريم وبجيبلك مروخ للركب
من هناك وبجيب للوالد دهن عود قالت خلاص ياوليدي دام فيها دوا الركب رح وابوك
ماهوبقايلنلك شي ان شاالله ربي يهديه بس هاه ياوليدي ابيك تجيب لي
موية زمزم مقري فيها.. تتوقع الوالده اندونيسيا قريبه من مكه.. قلت ابشري لو تبين اجيبلك (سعوط زميع) <<< ماده مركبه ماتعرفونها .!
وبعدها صعدت الى غرفتي في الطابق الثاني بجنب عشه الحمام
كي احضى بقيلوله عقب نهار شاق . وبعد ساعه اذا بالوالده حفظها الله
ورعاها وسدد الى طريق الخير خطاها لما فيه صالح الامه العربيه
والاجنبيه والاندونوسيه اذا بها تزف خبر موافقة الوالد . وقالت ابوك يدعيلك
بالتوفيق ويقول خليه يطس في الي مايحفظه..
والله وانا اقمز من الفرحه واصك براسي في سقف الصندقه قصدي
الغرفه وخمس دقايق وانا مسنتر عند صديقي دحومي وازف له خبر موافقتي
على مرافقته وبداء صديقي دحيم في عمل الترتيبات مثل الحجز وشراء بعض
الاغراض المهمه وانا وراه اسحب رجولي مادري وش السالفه وقبل السفر بيومين
سالني دحيم . هاه عسا امورك جاهزه وجواز سفرك جاهز
قلت ايه كلش تمام بس وشو له جواز السفر ماهو بلازم لاني اذكر مره رحت الخرج
ومرتين للمزاحميه بدون جواز سفر :colere_rouge: فاقترب منى دحيم
ورفسني بركبته رفسه على تسبدي كادت ان تاتي باجلي لولا لطف الله
قال يافاغر في احد يسافر بدون جواز سفر انت ماتفهم قم مشينا للجوازات
نطلع لك جواز . وبعد معاناه تم استخراج الجواز قبل ساعات من الرحله
وكان اقلاعنا الساعه العاشرا مساء ومن الساعه 2 الضهر وحنا مسنترين
في المطار ومحاسيكم مشخص بنطلون اخضر ثلاثه خطوط ابيض داكن
من الجوانب من مخلفات الحرب العالميه الاولي وفنيله علاقي بس
الحق يقال الفنيله كانت جديده توي فاكها بقراطيسها شد بلد ,,

انتهت الحلقه الاولي وانتظرونا في الحلقه الثانيه ومافيها من
مواقف الله لايكتبها على صديق
عموما اذا عجبكم الموضوع وحبيتو اني اكمل علموني ولا اضف
عفشي واغير معرفي وابلع العافيه احسن