تقرير رحلة عبوووودي

بسم الله الرحمن الرحيم
 طبعا في البداية كنت جالس مع واحد من الشباب نفكر وين نروح في الأجازة لأن الفصل الأول ينتهي في 20/10/2006 يوافق 26/9/1427 الأجازة مدتها 3 أسابيع ,بصراحة ما ودنا نرجع السعودية لأن ما صار لنا هنا 8 شهور يعني بدري والشوق ما فيه شوق بصراحه وأيضا الشباب اللي قبل نصحونا إن الرجعة مكلفه ماديا وتأثر عليك نفسيا ” حنا كلنا صرنا مرضى نفسيين في هالبلد ” ..
 فكرنا نسوي جوله داخل استراليا لكن راح تكون مكلفه بشكل كبير والمدة راح تكون أقل يعني حدها 10 عشرة أيام ,طبعا فيه شباب راحوا اندونيسيا وقالوا إن البلد مرره حلوه ورخيصه ونقدر نجلس فيها الأجازه كاملة ,توكلنا على الله وقلنا خلاص الأجازة في جاكرتا ..
 رحنا مكتب حجوزات حنا ما نقدر نروح قبل يخلص رمضان فحجزنا على يوم 25/10 /2006 والرجعة يوم 10/11/2006 على الخطوط السنغافورية ب1150 دولار استرالي وبنفس الوقت حجزنا فندق كروان بلازا ليله عشان يوم الوصول ب 115 دولار ,اخترنا الخطوط السنغافورية لان بصراحه أنا مجربها قبل وخدمتهم حلوه والفرق بينها والخطوط الثانيه بسيط يعني 100 دولار مشكلتهم بس انه لو بغيت تلغي التذكرة تدفع 600 دولار رسوم والخطوط الثانيه 300 دولار قلنا أن شاء الله ما راح نلغيها ..
 مشينا من برسبن يوم العيد هنا في استراليا سوينا حفله بسيطه مع الشباب السعوديين للأسف بدون صلاة عيد ومشينا إلى المطار الساعه 4 العصر والرحله كانت الساعه 8 مساء .كان مسار الرحله برسبن _سنغافورة _جاكرتا من برسبن مدة الرحله 7:30 ساعه كنت نايم طول الرحله “المقاعد مرره مريحه” ,الانتظار في سنغافورة كان لمدة ساعه ونص المطار” ياشباب روعه روعه بصراحه تحفه معماريه” جلسنا أخذنا أغراض من السوق الحره ومشينا إلى جاكرتا وطبعا نايم طول الرحله وكانت لمدة ساعه ونص ..
 وصلنا جاكرتا بالسلامة الساعه 9:30 صباحا يوم 26/10/2006 قصينا الفيزا ,المطار بصراحه مرتب وما كان فيه زحمه أخذنا سيارة إلى الفندق ب 250, طول الطريق بصراحه كنا نطالع يمين يسار مستغربين من المدينة ناطحات سحاب على صنادق والدبابات مرره مستغربين ..

 ريحنا في الفندق وطلعنا للسوق اللي جنب الفندق وتمشينا شوي بعدين رجعنا الفندق ,في الليل بدأت المشاكل لأن المراقص كلها مسكره عشان العيد مو دارين أن السعوديين جايين يقضون العيد فيها زي ما قلت لكم في اليوميات, خويي ضاق صدره قلت له خلنا نريح يومين و الشباب ما قصروا عطونا رقم جون ,جاء عندنا في الفندق وعطانا معلومات وأماكن نزورها في اندونيسيا عموما وجاكرتا خصوصا ماكانت جديدة لأنكم ما قصرتوا ,قضينا السهرة على التلفزيون والنت والشباب اللي نلقاهم في النت يقولون انتم طالعين جاكرتا وجالسين على النت قلنا الشكوى لله ..
 في اليوم الثاني طلعنا من الفندق ورحنا للأتريوم الحجز كان عن طريق مكتب كاها لمدة ثلاث ليالي ب 150 دولار أميركي ,الفندق بصراحه غير سيء لكن حنا مشكلتنا نقارنه مع كروان بلازا اللي ما عجبنا فيه الخدمة ليست بالمستوى المطلوب بالأضافه إلى الإزعاج في أخر الليل ..
 اليوم الثالث ما كان فيه أي شي مميز قضيناه بين الأسواق والمطاعم والمراقص طبعا ما قلت لكم وش كثر أنبسط خويي بعد ما فتحوا “وأنا بعد بس مستحي أقول” ,رحنا مطعم الجزيزه صحيح الأسعار نوعا ما غاليه لكن للشباب جايين من استراليا كنا مره مشتاقين للمندي والأكل السعودي طلبنا كل شي عندهم “يعني السعر مايهم” ..
 اليوم الرابع كان المفروض أننا نطلع من الفندق بس صحينا متأخرين قلنا خلينا نجدد من عندهم ليله زياده وكان السعر 70 دولار غالي بصراحه بس ما فينا حيل نروح للمكتب, بعد ما تغدينا بالفندق رحنا لمدينة الألعاب “دنيا فانتازي” بصرحه المدينه حلوه ومتعوب عليها وأنا ما توقعتها كذا,

قبل ما نروح مدينة الألعاب رحنا مكتب كاها وحجزنا في كروان بلازا لمدة ثلاث ليالي ب 210 دولار وفي الليل البرنامج ثابت ما تغير ..
 مرت الأيام الثلاث هذي والوضع نفسه ما تغير البرنامج ثابت ما يتغير بس رحنا السينما مره وحده ولعبنا بلياردو في “السارينا” ..
 تعرفنا على شاب سعودي وقال لنا عن فندق اسمه”لي جلا ندر” سعره 50 دولار وقال انه ممتاز توكلنا على الله وحجزنا أربع ليالي ب 200 دولار وبصراحه الفندق حلو والخدمه جيده على الأقل ما فيه أزعاج أخر الليل والسر “أن ما فيه سعوديين” ..
 رحنا للمنطقة اللي وراء مدينه الألعاب على الشاطئ سألنا عن الدبابات البحريه قال لو لنا أنها خاصه وليست للإيجار كنا متحمسين طاحت وجيهنا ورحنا للمطعم اسمه “بندر جاكرتا” طبعا خويي من أهل الشرقية وخبير أسماك هو اللي أختار السمك وتغدينا عندهم أسعارهم جدا جدا معقولة والخدمة حلوه ..
 في اليوم العاشر خويي قال أنا طفشت خلنا نرجع استراليا قلت على راحتك أنا مبسوط هنا أو في استراليا يعني مو فارقه معي ,الكلام هذا يوم الجمعه باقي على حجز الفندق يومين والخطة أول كانت أننا يوم الاثنين نروح الجبل والخميس نرجع عشان الرجعة يوم الجمعه ,طلبنا من الفندق يكلمون الخطوط السنغافورية قالوا لنا أذا ودنا نقدم موعد الرحله لازم ندفع رسوم ,قلت له حرام ندفع فلوس عشان نرجع بدري توكلنا على الله قلت خلاص نجلس الى الأثنين ونروح الجبل ,كلمنا سواق حضرمي عن طريق خوينا السعودي و اتفقنا على كل شي والسعر كان 300 ألف يوميا ..
 طبعا وصلنا الجبل متأخرين تقريبا الساعة 6 المغرب لان الطريق كان زحمه ,وحجزنا فيلا أربع غرف ب 400 المجمع اسمه “فلل بوري عصري” لان الفلل بغرفتين كلها محجوزة وفي الجبل بدأت المتعة ..

 زي ما قلت لكم وصلنا بالليل ما شفنا شئ على الطريق لكن الجو كان مره حلو وكان فيه شوي مطر ,كنا تعبانين من الطريق فاتعشينا في مطعم رند عدن “حنين عدن” أسعارهم جدا رخيصة والأكل مره ممتاز وأخذنا من عندهم نعناع بعد العشاء مرينا على مقهى اسمه little Arab شيشنا هناك ثم نزلنا تحت فيه بلياردو لعبنا شوي بعدين على الفيلا وأحلى نومه إلى الساعة 9 الصباح ..
 على الساعة 11 رحنا للحديقة الحيوانات “السفاري” الحديقة جدا حلوه وفكرتها رائعة ,أكيد حضرنا عرض الفيله والكاوبوي على فكره عرض الكاوبوي موجود عندنا في استراليا تكلمنا مع الشايب الاسترالي اللي يقولون انه هو المسئول عنهم اسمه “روجر” كان عايش في مدينتنا وبعض الممثلين كان تدريبهم عندنا في الجولد كوست العرض كان مرره ممتع ,الساعة 4 رجعنا الفيلا وقبل مرينا مزرعة وأخذنا من عندهم ذبيحة على كيفك وأحلى شوي كان بالليل .النوم كان بدري تقريبا الساعة 10 ..

 في اليوم الثاني لنا في الجبل رحنا لحديقة الأشجار وحديقة الزهور أكيد مرينا على الشلالات

وكانت جدا ممتعه سبحنا هناك “هالحين أنا في زكام منها”
 كلمنا مدرب يعرفه السواق عشان البراشوت وقال لنا أن ما فيه أمكانيه اليوم عشان اتجاه الرياح وفي الليل طبعا سوينا حفله صغيره بالفيلا شوي وحركات مبطين عنها ومشتاقين لها ..
 صحينا صباح الخميس وجمعنا أغراضنا في السيارة وسلمنا الفيلا وطلعنا للبراشوت ونفس المشكلة اتجاه الرياح انتظرنا تقريبا ساعة والحمد الله تحسن الوضع وطار خويي وبعد ما شفته طار قلت والله ما أطلع لو أيش ..

 رجعنا جاكرتا الساعة 5 العصر ومرينا على مطعم أبو نواس وتغدينا عندهم “بصراحة ماهو بالمستوى المطلوب ولا يقارن مع الجزيرة” وعن طريق كاها حجزنا ليله في كراون بلازا ..
 ماطولنا في السهره مع أنها الاخيره لان المرقص كان مليان من كبار السن يحسن خاتمتهم ,بالنسبة لي أنا تضايقت مرره وجلست شوي ومشينا بدري للفندق ..
 يوم الجمعه رحنا المطار وتأخرت الطياره تقريبا ساعة وصلنا سنغافورة متأخرين زين أننا قدرنا نلحق على الطياره الثانية وفي يوم السبت الساعة 9 الصباح وصلنا أرض الوطن أستراليا بصراحة ياشباب أنا استمتعت بالرحلة جدا لكن مره مره كنت مشتاق لأستراليا ..

انطباعات عن الزيارة الأولى لجاكرتا
 البلد حلوه مره لكن محتاجه أنهم يهتمون بالسياحة والسياح .
 من الزيارة الأولى تتعرف على البلد, يعني لو تزروها مره ثانيه تكون خبير فيها.
 الشعب طيب جدا جدا ومسالمين, وأعتقد غير خطره حسب ما الناس يقولون لكن “حرص ولا تخون”.
 تحتاج انك تسوي لك برنامج للزيارة جميع المناطق السياحية,مشكلتنا أننا ضيعنا وقت كثير في جاكرتا .
 تشرفت بصراحة بلقاء ” عاشق الثري ” في الثري هورس وأيضا تغدينا مع بعض كنت أتمنى أننا طلعنا مع بعض للجبل لكن هو يحب يروح بالي ,كنت أتمنى أني أرجع السعودية في أجازة رأس السنة لكن للأسف الشديد ما لقيت حجوزات لكن أنتظر وعدك لي بزيارة استراليا.

بعض النصائح من أخوكم عبوووودي

 أعتقد انه ما يحتاج تأخذ معك دولارات والسبب أنها نفس السعر لو سحبت عن عن طريق الصراف وفي نفس الوقت البطاقة لو ضاعت أو سرقت لا سمح الله يمكن تعوض لكن الفلوس صعبه.
 الفنادق أنصح ب كراون بلازا أو فنادق الخمس نجوم بلا أتريوم بلا لي جلاندر مع الاحترام للشباب اللي يحبوها.
 البلد ليست رخيصه,الأسعار فيها معقولة ” كراون بلازا في دبي ب 500 دولار في الليلة ” بالنسبة للميزانية اللي قلت لكم بصراحة ما كفت ,الرحلة كلفت مع التذاكر مبلغ 20 ألف ريال علينا الاثنين.
 المشاكل مع البوليس بصراحة مالها الأ حلين الأول استئجار سيارة خاصة في جاكرتا وهي غير ضرورية والثاني المرافقين يكونون في تاكسي وأنت في تاكسي وتبعد عن المشاكل.
 أنا عندي سؤال لكم ياشباب انتم جايين من السعودية يعني عندكم أحسن مطاعم المندي والأكل السعودي ومقاهي الشيشة اللي أنا مستغرب منه ليش تجون المطاعم العربية في جاكرتا بالعكس المفروض انك تجربون الأكل الأسيوي لكن حنا اللي جايين ومشتاقين للأكل السعودي.

في نهاية التقرير أتمنى أنه يكون أعجبكم وأعتذر عن التأخير والسبب الدراسة, وأتمنى أن شاء الله أكتب لكم تقرير عن أجازة رأس السنة هنا في استراليا لكن ما أقدر أوعدكم لكن أقول أن شاء الله.