تقرير رحلتي للعمه (الحلقه الرابعه والاخيره) + الرد عن جميع الاستفسارات

السلام عليكم ورحمة الله وبركاته…

نواصل معكم تقرير رحلتي للعمه

رابط الحلقه الاولى

رابط الحلقه الثانيه

رابط الحلقه الثالثه

الحلقه الرابعه والاخيره…

وصلنا في حلقتنا الثالثه الي محاولتنا للوصول لحل لمشكله الديجي بالثري هورس

طبعنا حنا لما رجعنا للشقه انا وخويي ورفيقنا الثالث.. جلسنا نتناقش كيف ان حنا

نقدر نخلي الديجي يرجع لوضعه الطبيعي ولا يزعجنا بالاغاني العراقيه المكرره…

وللمعلوميه انا مو كره بالاغاني العراقيه فكرنا كذا بس علشان الاغناي هن ماغير

3 او 4 اغاني وتتكرر… عشان كذا النفسيات تعبت..

المهم قال خوينا الثالث ياشباب مالكم هم .. الديجي خويي وانا بتكلم معه واضبط الامور,,

قلنا اوكي..

تجهزنا للسهره ومن بعده طلعنا كالمعتاد نلعب بيلاردو بالتشيليز سرينا ..

والساعه 2 وحنا بالثري هورس ومتحمسين لتعديل الديجي …

دخلنا واذا بالاغاني العراقيه تردح …

راح خويي للديجي وجلس عنده وقعد تقريبا حوالي ربع ساعه…

المهم خلصت الاغنيه العراقيه والا هذا راشد الماجد يصدح بأغنية هلي لا تحرموني منه ..

انبسطنا وقلنا ياسلاااااااااااااااااام هذا هو الديجي المضبوط..

خلصت الاغنيه ورجعت الاغاني العراقيه من جديد ……

سألت خويي وقلت له وش السالفه ..

قال ياشباب الموضوع فيه دراهم … بكم شده بس..

قلت له فسر وش قصدك ..

قال .. القروب العراقي كل يوم يدف الديجي بمليون عشان يشغل الاغاني الي يبونها..

قلنا خير انشالله …!!!!

مليووووون .. وين عايشين ياخوي

قال هذا الي قاعد يصير … الموضوع موضوع دراهم والديجي وده يكسب..

قلنا خلاص يصير خير ..

كملنا السهره والصراحه ذيك السهره قضيناها بالاستهبال على التشيوي وعلى السكيورتيه

ومطنشييين الديجي..

وبعد رجوعنا للشقه نمنا,,

وفي اليوم التالي صحينا الساعه 3 العصر..

رحنا تغدينا بالاتريوم..

وبعدها رحنا للسوق الصيني الشعبي بمنقادوا..

والصراحه السوق زين وفيه البضائع المقلده والي تقليدها كويس..

ورخيص للي يبي يشتري هدايا وغيرها..

المهم بعد ماخلصنا رجعنا للشقه وجلست جلسه حلوه مع اخوي الطنايا والي بأمانه

اقولها ,, انه رجال جلسته ماتنمل ابد .. رجل محترم جدا وبشوش جدا..

المهم بعدها اخذنا لنا تريحه ابو ساعتين..

والساعه 10 ونص طلعنا لبلانيت هوليود …

وللمعلوميه كان هذا اليوم يوافق الجمعه..

وبلانيت هوليود يوم الجمعه غييييييييييير..

وانصح اي واحد يروح لجاكرتا انه يروح للبلانيت هوليود يوم الجمعه وراح يشوف بنفسه انه غيير.

حتى اسألوا اخونا سنديري ههههههههه

المهم بعد السهره رحنا للثري …

وكان الديجي على حاله… وان كان يتخلل الاغاني العراقيه بعض الاغاني الاجنبيه والعربيه ..

والظاهر ان الديجي حس ان الناس ملوا من الاغاني العراقيه وصار يطعم بالاغاني الثانيه..

وزي سهرتنا يوم الخميس قضيناها يوم الجمعه … استهبال وضحك وتطنيش للديجي ..

وبنهايه السهره رجعنا للشقه ونوووووووووووووم..

وفي يوم السبت وكان هذا يومنا الاخير بالاندو لاننا بكرا راجعين للسعوديه صحينا على الساعه 6

المغرب لأننا كنا ناوين نواصل من السهره للمطار..

طلعنا اكلنا بأبو نواس لتوديعه..

ورجعنا للشقه واخذنا لنا مساج لتوديعه ايضا هههههههههه

وجلسنا نضف العفش وطلعنا بس ملابس السهره وملابس المطار..

واتفقنا انا وخويي على ان نجعل اخر سهره لنا حلوه ونضبط الامور بالثري هورس..

اخذنا معنا مليونين عشان شغل الدف والدفيف للديجي..

طلعنا للبيلاردو ولعبنا هناك للساعه 1 ونص وبعد للثري

اول مادخلنا والاغاني العراقيه تدهر وتردح..

اول ما اتجهت رحت انا وخوينا الثالث للديجي ..

قلت له كم تبي ولا تشغل اي اغنيه عراقيه اليوم..

قال ما اقدر .. العراقيه معطيني مليون روبيه عشان اشغل اغانيهم ..

قلت له بعطيك المليون حقت العراقيه ولا تشغل اي اغنيه عراقيه اليوم..

جلست يحاول يرفع السعر ويتكلم .. بس خوي اقنعه بحكم صداقته له..

شغل الاغاني المنوعه مابين العربي والغربي ..

جاه واحد من العراقيه وقاله ,, فين الاغاني العراقيه ..

صرفه الديجي ورجع له مليونه وقاله بكرا انشالله..

المهم سهرنا ذيك الليله بدون الاغاني العراقيه وكانت سهره من العمر..

والله ماكان ودي اعطي هالديجي شي بس حبيت اقهر هالقروب من جهه.. ومن جهه اخرى

حبيت ان تكون اخر سهره لي ممتعه..

المهم نهاية السهره طلعنا ورحنا للشقه

وجلسنا نسوي الاستعدادت الاخيره للعوده للسعوديه ..

وكان يسود الشقه جو من الصمت الرهيييييييييييييييب

وكانت النفسيات تعبانه شوي..

وطبعا خويينا الثالث كان جالس بجاكرتا لانه لسى مطول عن الرجعه..

المهم على الساعه تسع ونص سوينا تشيك اوت وطلعنا للمطار لأن الرحله كانت الساعه 12

ونص..

وبعد ماوصلنا قالوا ان الرحله تأخرت للساعه 6 المغرب … طبعا الخطوط السعوديه لاوم تتأخر.

جلسنا نفكر وش بنسوي ..

قلنا مالنا الى نرجع لجاكرتا ونجلس عن خويينا الثالث,,

رجعنا لجاكرتا ورحنا لخوينا الي كان مستغرق بالنوم ..

فتحت الشغاله لنا وعلى طول اتجهت انا لأقرب كنبه ونمت على طول ,,,

والساعه 3 صحا خوينا وشافنا وانهبل وتوقع ان الرحله فاتتنا ,,,

شرحنا له الوضع .. اكلنا لنا لقمه خفيفه والساعه 4 وربع رجعنا للمطار مره اخرى..

ووصلنا للمطار الساعه 5 تقريبا ومابين التختيم و الجوازات للساعه 5 ونص تقريبا ..

والساعه 6 ركبنا الطياره..

ومن حسن الحظ كان مقعدي مقعد طوارئ .. وعلى طول نمت ,,

ولا صحيت الى لما صرنا فوق الخرج…

ولما نزلت من الطياره كان في استقبالي اخوي عاشق الثري وكان معه المبدع جدا نجم الليل..

………………….

انتهت الرحله والحمد لله كانت ممتعه جدا بكل تفاصيلها

وشكرا لكل المتابعين مع املي الكبير ان يكون التقرير اعجبكم …

واسف جدا لعدم وضع صور مع التقرير لآنه بصراحه لاتوجد صور متوفره عندي ولم

ارغب ان اضع صور قديمه وذلك لرغبتي بالمصداقيه بالتقرير..

واسف جدا لعدم ردي على الاستفسارات وذلك لرغبتي بأن اجعل الردود بنهايه التقرير ..

وانا مستعد الان للرد عن اي استفسار..

اخوكم كنابا