عـــدنــا والحمدلله على السلامة

أخواني مشرفين وأعضاء منتدى المسافر

السلام عليكم ورحمة الله وبركاته

ابشركم وبحمد الله وصلنا بالسلامة لأرض الوطن فجر يوم الأحد بعد تأخير الرحلة
التي مقررة ان تصل يوم السبت الساعه 11 مساء بس مثلكم عارفين خرابيط
جميع الخطوط وأولها السعوديه اللي انا عليها

طبعا بعطيكم ملخص الرحلة والصور ماقدر انزلها لاني ادخل النت من مقهى انترنت
لان اتصالي في البيت عادي والى اللحين ماسك سرا بالدي اس ال
وانشالله بحاول بقدر المستطاع اني انزلها هالايام

ملخص الرحلة

الانطلاق من الرياض الساعة 10 مساء يوم الثلاثاء والوصول الى مطار سوكارنو في
جاكرتا العزيزه نزلت من الطياره وحطيت رجلي للفيزه وانا اعطيها 100 دولار لفيزتين
ورجعت لي الباقي روبيات ومن اللخمه اخذت الفلوس ولا عديتها ودزيت للجوزات علشان
اخلص بسرعه ويوم عديت الجوزات واثر الحرمه حقت الفيزا زرفتني بـ 40000 الف روبيه
قلت يارجال بكل طقه تعليمه وعدينا الجوزات وصرفت من الصرافين الـ 100 دولار
بــ 880000 الف روبيه واخذت شناطي ورحت لمكتب كاها وحجزت غرفتين بفندق
استون اتريوم اللي صاير نار على رداه سعر الغرفه بـ 465000 الف روبيه
ورحت لمكتب تأجير السيارات واخذت سياره بـ 170000 الف روبيه بعد ملعنه بالمكاسر
انا وحقت المكتب طلعت من المطار مامعي ولا روبيه
ودزينا للفندق واول مادخلته قالو اصبر شوي اللحين ينظفون الغرف قلت الله يستر بس
قلت لخويي يمدحون لو نروح لسوق الاتريوم مير على الاقل نصرف ونشرب لنا كابتشينو
واروح واصرف الـ 100 دولار بــ 905000 الف روبيه ونروح وناخذ الغرف من الفندق اللي
لكم عليها شوي مستهلكه قلت الدعوه يوم واحد وبعدها شقق الالسون والله واخذ
دش واغير الملابس قلت لخويي اللحين كفي العشاق ينتظرني من زمان ماجلست فيه
والله واروح له واجلس فيه واتقهوى بس على فكره ترى سمحو بالتدخين فيه شكلهم
يوم منعوه دجو ماحد جاهم

انتظرونا بالحلقه القادمه الصراحه تعبت وانا اعصر مخي اتذكر وتعبت بعد من الكتابه

وانا اسف على الاطالة

تحياتي لكم